S. Juan 11
11
Kaj kimi a Lázaro
1Tiʌ junturi' xi'ra ne mo' uts u k'aba' Lázaro lʌji' u winki Betania a lʌiti' u kʌjta a María y Marta a lʌji' ch'upra u bojo'. 2A je' a María a lʌji' u xi'ra u bojo' u k'aba' Lázaro ne mo' uts, a bexi' lʌji' a tu cho'a perfume tu yok a Jesús y yete u tso'tse o jo' tu tisa u yok a Jesús. 3Marta y María a u ch'upra u bojo' a Lázaro tu tuchi'to' u yao' ti Jesús:
—Ts'uri, a mok a wet mʌn a ne otsi a wirik, ne mo' uts.
4Ka tu yua Jesús, tu ya'a:
—A je' a ya'ji mo' ti' u kimi, a je' a ya'ji lʌji' ti' u ye'sik u muk' K'uj y bexi' ti' u yira' u muk' u Ti'a K'uj.
5Tak a Jesús ne otsi u yirik a marta, u ch'upra bojo' y yete a Lázaro. 6Kaj a'bti' a Jesús ne mo' uts a Lázaro, Jesús p'ati u jer ka'p'e k'in tu tiʌ. 7Pachi tu ya'ti' u kʌ'sa winiko':
—Ka' kox ix Judea.
8U kʌ'sa winiko' tu yao' ti' a Jesús:
—Rabí, mo' ne uchak tu tunto' u kinsikech a kʌjʌ' tita a judíos yete tunich, ¿y poch ka' bin tita?
9Jesús tu nuka:
—¿Jump'e k'in mʌnʌ' ti' doce horas? A mok ku mʌn chuk'in mʌnʌ' u t'ichmʌn, tu' sasi u k'ak' a k'in a yʌn yok'o a je' a lu'm, 10chen a mok ku mʌn ix ak'bi, a lay ku t'ichmʌn, tu mʌnʌ' kip' ti'.
11Pachi tu ka' a'a u jer:
—Ak bojo' a Lázaro wenuka', chen binika' in wʌse.
12U kʌ'sa winiko' tu nuko' ti':
—Ts'uri, wa wenuka', jeu ch'ene.
13Chen Jesús tu ya'a bex tu jach kimen a Lázaro, chen u kʌ'sa winiko' u tukriko' tu ya'a bex a Jesús tu jay jach wenuka' a Lázaro. 14Bein Jesús tu ki a'a tio' u kʌ'sa winiko':
—A Lázaro jach kimi, 15y tsoy in wor tu mo' tie'x tita kaj kimi, ti' bex jea' ki' ch'eike'x in t'ʌn. Chen ko'xe'x ire tu tiʌ.
16A Tomás, a lʌiti' ku ya'bati' Dídimo, tu u ya'tio' u jer kʌ'sa winiko' a Jesús:
—Bexi' ko'xe'x to', ti' aj kimi ket yete Jesús.
Jesús lʌji' ku ka' ts'ek u kuxta a winik y lʌji' kuxta
17Kaj k'uchi Jesús tu tiʌ Lázaro ya yʌn cuatro k'in tuj muka'. 18Betania tiʌ xok'o Jerusalén, oxp'e kilómetros u nʌchi, 19y ne pim judíos tari u nʌse u yor a Marta yete a María tuj kimi u xi'ra u bojo'. 20Ka tu yua a marta tʌn u tar xok'o Jesús, jok'i u yire, chen a María p'ati ix u yatoch. 21Marta tu ya'ti' a Jesús:
—Ts'uri, wa way ti' yʌnech ka'chik, in suku' moj kimi ka'chik. 22Chen beje' in we, tu woro a ba' wa ka k'atik ti' K'uj jeu laj ts'ektech.
23Tu nuka Jesús:
—A suku' jeu ka' kuxta.
24Marta tu ya'ti':
—In we' je'e, in we jeu ka' lik'i tu ka' kuxta ka' lik'ik tu woro' tu ka' kuxto' ka' xu'ruk t'ʌn.
25Jesús tu ya'ti':
—A Ten Lʌjien a ku li'sik tu ka' kuxta a ba' y bexi' tenen a mok ts'ek kuxta, a mok ku yaksik tu yor ti' ten, tak kimen jeu ka' kuxta. 26Tu woro a mok ku yaksik tu yor ten, mʌnʌ' u kimi. ¿Ka ch'eik a je' a t'ʌn?
27Marta tu nuka ti':
—Ki ch'eik Ts'uri, a ten tin cha' a t'ʌn a tech jach lʌjiech a Cristo a u Ti'a a K'uj, a lʌji' tarech yok'o a je' a lu'm.
A Jesús ku yak'tik u bʌj ix u mukra a Lázaro
28Chen ts'oki u t'ʌn a marta, bini u t'ʌne a María a lʌji' u kik, y tu ya'ti' tu juni':
—Ak Wʌjkʌ'si tiʌ way y tʌn u t'ʌnikech.
29Y ka tu yua, se'p' lik'i ij bini u yire a Jesús. 30Jesús mo' tey okok yok'o u kʌjtai, tiʌ tuba tu yiro' u bʌjo' yete a Marta. 31A judíos a tio' ix u nʌji tu tiʌ a María, ka tu yiro' u lik'i y u jok'o se'p' a María ij bini, bexi' tio' tu t'u'ro' tuj bini, u tukriko' ti ku bin tu yok'o, yok'o u mukra u bojo'.
32Kaj k'uchi María tu tiʌ a Jesús, tu xonkitubʌj ti Jesús y tu ya'ti':
—Ts'uri, way ti' yʌnech ka'chik, in suku' moj kimi ka'chik.
33Ka tu yira Jesús u yok'o a María y bexi' yete a judíos a u yet tar, tu yua u bʌj ne mo' tsoy u yor y tu ch'a otsi tio', 34y tu k'ata tio':
—¿Tuba ta muke'x?
Tio' tu nuko':
—Ts'uri, ko'ten ch'e'te, way tiʌ. 35Y Jesús chu'mpʌ u yak'tikubʌj. 36Y a judíos tu yao':
—¡Ire'x boj jach otsi tu yira!
37Chen tax jujuntu tʌn u yei'ko':
—A je' a tu jea' u wich a muj yirik u ber ¿Mo' bik u metik ba' ka'chik ti' mu' kimi a Lázaro?
Lázaro ku ka' lik'i tu ka' kuxta
38Jesús xuy ne mo' jach tsoy u yor, xok'i ix mukra winik. Jabʌn aktʌn u mukra y yok'o u jor mʌkʌ' yete tunich. 39A Jesús tu ya'a:
—K'uye'x a tunich
Marta u ch'upra u bojo' a kimen a winik, tu ya'a:
—Ts'uri, ya ne yʌn u bok tu yʌn cuatro k'in tuj kimi.
40Jesús tu nuka ti':
—¿Mij wa'tech wa ka ki aksik ta wor ti ten ja' jach irik u muk' K'uj?
41Tu k'uyo' a tunich tu' but'a u bʌk'e a Lázaro, pachi Jesús tu nʌ'sa u wich ix kʌ' y tu ya'a:
—Tet, bay tech jach tsoy in wor tu ta wu'a in t'ʌn. 42Ten toj in we tu woro k'in ka wui'k in t'ʌn, chen tʌn in wei'k bex ti u ch'eik in t'ʌn a winik jach tech ta tuchi'ten. 43Pachi chen ts'oki u t'ʌn Jesús, ne k'ʌ'm abotnʌj y bex tu ya'a:
—¡Lázaro, ko'ten jaknʌki!
44A to kimen, jok'i, laj sut taptʌ' u k'ʌ' yete u yok y tu woro u wich yete nok'. Jesús tu ya'a:
—Pite'x y cha'e u bin.
Tʌn u katik u yoro' bik u kinsa' a Jesús
(Mt. 26.1-5; Mr. 14.1-2; Lc. 22.1-2)
45Ne pim judíos tu yakso' tu yoro' ti Jesús aj taro' u wak'onte a María y tu yiro' baij tu meta a Jesús. 46Chen tax jujunto' bino' tu tio' u winiko' a judíos a ku ya'batio' fariseos ti' u tsikbʌtiko' tio' baij tu meta Jesús. 47Lʌji' kaj u much'o' u bʌjo' u t'ojio' a moko' ku meajo' yok'o u yatoch K'uj yete u winiko' a judíos a ku ya'batio' fariseos yok'o tuku nʌj much'ik u bʌjo' tu woro a yʌn u kuch y tu yao':
—¿Baij kʌk bij mete? Ka wirke'x a je' a xi'ra ne ya'p ba' ku ye'sik u metik. 48Wa kak cheiti' xuri' u metik bex, tu woro a winik biu ch'ae u t'ʌn y binukaj taro' a romanos y biu laj jupse u yatoch K'uj tu tio' y bexi' tu woro ak kʌjta biu ts'ose.
49Kaj u nuka a Caifás a lʌji' u jach t'oji a mok ku meaj yok'o u yatoch K'uj a lay yaxk'in y kaj ya'a:
—A teche'x toj mix ba' a we'ex, 50yʌn maj wike'x más tsoy ti' to' wa jay junturi' xi'ra ku kimi ti' tu woro a winik y más ne mo' tsoy wa tu woro ak kʌjta ku ts'osa' to'.
51A je' a ba' tu ya'a mo' ti jay ti', a ti' lʌji' a mok u jach t'oji a mok ku meaj yok'o u yatoch K'uj a lay yaxk'in, bein toj a'bti' ten K'uj yʌnti' u kimi Jesús ti' tu woro u kʌjto' a Judíos, 52y mo jari ku bij kimi ti' u kʌjta a judíos, ku bij kimi ti' u laj much'ik tu woro u ti'a a K'uj a to'o laj ch'ikibino' taro'. 53Lʌji' u k'ini kaj chu'mpʌjo' u kʌxtik bik u kinsiko' a Jesús. 54Bein a Jesús ya muj ne e'sik u bʌj ti' a judíos, lʌji' kaj jok'i ix u kʌjto' a judíos ij bini yok'o jump'eri' u kʌjta u k'aba' Efraín a xok'o tiʌ yok'o u lu'mi tu mʌnʌ' nukuch che' woro tikin lu'm yʌn woro tikin lu'm, tita p'ati yete u kʌ'sa winiko'.
55Y xok'o u k'uchu u k'ini a Pascua u metko' u yo'cho' a judíos, y ne pim winik toj nʌ'ko' ix Jerusalén ti' u toj p'o'ik u bʌjo' y ti' uts'kintik u pixʌno' ti' K'uj. 56Y tʌn u kʌxtiko' a Jesús wa tiʌ tita y jujunto' tʌn u k'atko' tiu bojo' yok'o u yatoch K'uj:
—¿Bik a tukrike'x teche'x? ¿Yʌn wa je'e u tar a Jesús yok'o a jea' o'chi ku meta'?
57U t'ojio' a moko' ku meajo' yok'o u yatoch K'uj yete u winiko' a judíos a ku ya'batio' fariseos tu li'so' t'ʌn, wa yʌn mok u yue tu tiʌ Jesús, ka u ya'e, ti' u chuka'.
اکنون انتخاب شده:
S. Juan 11: PLacNaha
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Sociedad Biblica de México AC
