Matiyu 10
10
Ɛnza ŋé a yɛ kaamɔɔndhye ndá ni fyáa ó bhyáashaala
Maki 3.13-19; Luka 6.12-16
1Ɛnza ŋé a yɛ kaamɔɔndhye ndá ni fyáa ólu kíi tó kɛ lámansa yóo ŋólu gbɛ́ ŋó sébhaaya o dí i man, kɛ yangalo óni shaaya bɛ́suu lákɛɛnya sé dí i man. 2Aa céladhye ndá ni fyáa mín myáashaa, olu tɔ́ɔ ó lée lúu nín: Jónan ó tɔ́ɔ tɛɛ kó Simɔn, o mín ŋe kíila kó Piyɛli, o lɔ́ɔcɛ Andele; Zebede dhyénjɛ fyáa ólu: Zaki ní Yaya; 3Filipu ní Batelemi, Tomasi ní Matiyu, nísɔɔnmyaanbhaacɛ o; Alife dhyénjɛ Zaki, óni Tade; 4Simɔn Zelɔti#10.4 Zelɔti tɔ́ɔ o kɔ́ɔ yáa nan kɛ́ lé kó a wɛɛ í wíi Lomɛn olu kanman. ní Zudasi Sikaliyɔti mín ngáa Ɛnza ɲanva.
Ɛnza ŋé a yɛ kaamɔɔndhye ŋolu bhyáashaa cé mínnan
Maki 6.7-13; Luka 9.1-6
5 Ɛnza ŋé a yɛ kaamɔɔndhye ndá ni fyáa ólu bhyáashaa cé mínnan o lée nín: A kɛ́nan sé káafii olu yɛ só ólu la, a kɛ́nan sé Samali só ó sí la. 6Áa táa Izalayɛlika o léelu fɛ́ yé, o mínnu e óo saa túunnin nú lé. 7A kɛ́ kɛ́ táala, áa táa lakawanin kɛ́ le kó: «Ala yɛ́ Mansaya ó lágɛɛnman wáati o wɛ́ɛ bhyáa sé le! 8Áa yaangalotɔ ólu lákɛɛnya, áa su ólu lákuun, áa kwáantɔ ólu lákɛɛnya, áa lámansa yóo ŋólu gbɛ́. Ŋwɛ́ɛn o kó ólu kɛ́ ó sé dí a man gbɛ́ɛgbɛɛ, oo lɔ mínngɛ, áa o kó ólu kɛ́ gbɛ́ɛgbɛɛ. 9Á kɛ́nan sɛ́ɛn, wáman wɛ́ɛ, wáman shaanɛɛn wɛ́ɛ bhyáa a jífa lɔ. 10Á kɛ́nan bhɔɔ, wáman deeke fyáa, wáman sawaa lú, wáman gbéle ta. Kɛ mansɔɔ bháalakɛdhye ó kákan kɛ a yɛ́ sunman ŋo sɔɔ.
11A kɛ́ lo só óo só la, áa ɲaanli kɛ kó yɛ́nee e sé kɛ́la a yɛ́tii lé yénɔn. Áa tó o yɛ́tiiya ó la fɔ kɛ táa sé a táasan o mán. 12A kɛ́ fáa lo bhó nɔ́ la, áa fóli kɛ. 13Ni o bhónanbhaa olu kɛ́ í bhóo síi a kɔ́ɔ, i yáa o hɛ́lɛ o sɔ́ɔ, wáa ni i man í bhóo síi a kɔ́ɔ, i táa a yɛ́ fóli o hɛ́lɛ o sɔ́ɔ. 14Ni i man í ɲán sii a kɔ́ɔ, wáman kɛ í tóo sii a kómankan kɔ́ɔ bhó mín ní só súusuu la, áa táa kɛ bhɔ́ o ywáa ó lɔ. A táatɔ ó, áa sé mangbasi kɛ a sénan gbánbga ŋo tó yé.#10.14 A sénan gbánbga ŋo tó yénɔn: Oo Yawudhyaa olu yɛ́ kókɛse né le; o kɔɔ o tɔ́ɔ lé kó kaamɔɔndhye ŋolu ni o sómɔɔn ólu mán bhyɛ né wé. Ko mín ngɛ́ táa i sɔɔ i gbu lu bhyaa fɔ née wé. 15Tó ní fɔ a yɛ́ tínɲan in ne ngó, kítitɛɛ ló ŋo la, bhóo yáa gban o sómɔɔn olu lá kɛ tínmin Sodɔmu yamaan ólu ní Gomɔɔ yamaan ó ka.»
Lɔbhawili mínnu káa kɛ́ kwɔ́la
Maki 13.9-13; Luka 21.12-17
16«Áa í tóomanlɔ! Ní a bhyáashaala óyoo saa lú kɛ táa kóngowuu olu cɛ́man. Oo lɔ mínngɛ, áa i yáakii tó a yɛ́ɛ lɔ óyoo san olu, a yɛ́ kó ó ló mbɛ́ a gbɛ́ óyoo biininngbɛ o. 17Áa í yáakii tó a yɛ́ɛ lɔ, kɛ mansɔɔ mɔɔn ólu yáa á ló kítitɛɛbhaa ólu bhóo, óni kɛ a gbási gbɛ́nɲɛn lá i yɛ sɛ́ɛbho ŋolu la. 18I yáa táa ni ále yámaantii ólu ní mansa ólu kɛ́ɛnnan né kósɔn. O kó ó yáa kɛ́ sɛ́ɛyaman lé ilee ní káafii olu yɛ́. 19Wáa í kɛ a ló mɔɔn ólu bhóo, a kɛ́nan hánmin a fɔ́dhyaa ŋólu ní a kómanseɲan o tá fa nvɛ́. A káa dhyaa mínnu fɔ, olu yáa yíi a mán o wáati o lɔ, 20kɛ mansɔɔ a káa dhyaa mínnu fɔ, olu táa kɛ́ ále gbúlu fɔ́dhyaa ne. A Fá Ní Sɛnnɛnyanin ŋo lé káa o kóman ólu ló a lálɔ.
21Bhádhyeman ŋólu yáa kɛ́ ɲɔ́ɔn yɛ saya ó sɔ́ɔbu le. Fa ólu yáa o sí kɛ́ i dhyé ŋólu la. Dhyé ŋólu yáa í ɲányɛɛman í fa ólu mán kɛ i fáa. 22Bɛ́ yáa a mánbhɔ né tɔ́ɔ ó kósɔn. Wáa mɔɔn mín ngɛ í lɔ́ja kɛ táa sé a la ŋó mán, o yáa kísi. 23I kɛ a tɔ́lɔ só lɔ́la, áa bwée kɛ táa a lɔ gbɛ́ɛ la. Tó ní fɔ a yɛ́ tínɲan in ne ngó, a táa wɛɛ Izalayɛli só ó bɛ́ lɔyaalala sánnin mɔɔn Dhyénjɛ ó nán ó cɛ.
24 Kaamɔɔndhye ŋo sí mán nvísaa a kaamɔɔn o le, bháalakɛdhye nzí mán nvísaa a kunndii o le. 25Kaamɔɔndhye mín ndá tɔ́lɔya mán tínmin a kaamɔɔn o tá o ka, o kaamɔɔndhye ŋo kákan né kɛ í ɲáanli, tó bháalakɛdhye mín ndá tɔ́lɔya mán tínmin a kunndii o tá o ka, o kákan né kɛ í ɲáanli. Fɔ́ kɛ́ kɛ́ lútii gbú o mán kó Bɛlizebuli, lúmanbhaa olu tá o mánfaa yóoɲan kɛ tínmin o ka ŋan!
Luka 12.2-7
26A kɛ́nan sháan mɔɔn sí ɲɛn. Kɛ mansɔɔ fénoonaankɛnin nzí tɛ́ yé mín ndáa yé. Gbondo sí tɛ́ yé mín ndáa bhɔ́ kɛ́ɛnman. 27Ngɛ́ fé ŋóo fé nvɔ a yɛ́ diwi o lɔ, áa o lábhɔ tée lɔ. Kóman mín ngɛ fɔ́ a tóo lɔ, o kóman ó yáa lá bhó ŋó kúnnɔn. 28Mɔɔn mín núu mɔɔn fáala tó í tɛ́ sé kɛ a ni o fáa! A kɛ́nan sháan ólu ɲɛ́n. Áa sháan Ala le ɲɛn, Ala lée sé kɛ mɔɔn fásisoo óni í ní o fyáa bɛ́ láfii yaananman o lɔ kɛ i lahalaki yé. 29Mɔɔn tɛ́ kɔ́ɔn dhyénin nvyáa felela dáasi kéembe la a? O ló mbɛ́ kwɔ, kɔɔnnin ŋo sí tɛ́ í bénan lúuman ni á Fá Ala mán dyɛn o man. 30Sáanko ále a! Háanin a kúnzhe ó yɛ́ɛ, Ala á ó bɛ́ lá nɔ. 31Oo lɔ mínngɛ, a kɛ́nan sháan. Álee a físaa kɔ́ɔn dhyénin ŋólu lé.»
Ɛnza ngó kɛ í lɔ́la bɛ́ ɲánla kó íi a yɛ kaamɔɔndhye ne
Luka 12.8-9
32«Mɔɔn mín ngɛ í lɔ́ a lá bɛ́ ɲánla kó álee né yɛ́ kaamɔɔndhye ne, né yáa nɔ́ la Nvá ɲánla o míin sá ŋó lɔ ngó o tíi óo ndá le. 33Wáa ni mɔɔn mínngɛ í bá né lɔ mɔɔn ólu ɲánla, né yáa bá o tíi ó lɔ Nvá míin sá ŋó lɔ o ɲánla.»
Ɛnza mán nan láha lálo ndɔ́ɔ lɔ, a nánnin ŋé kɛɛ lé lálo ndɔ́ɔ lɔ
Luka 12.51-53; 14.26-27
34«A kɛ́nan kɛ́ a kɔ́ɔnnɔn kó nánnin ɲé hɛ́lɛ o lé lálo ndɔ́ɔ lɔ́ lúukolo ó ka, nánnin ndɛ́ hɛ́lɛ lalo ndɔ́ɔ lɔ. Nánnin ŋé kɛɛ lé lálo ndɔ́ɔ lɔ. 35Kɛ mansɔɔ nánnin ɲe lé kɛ cɛ lo dhyénjɛ óni a fa cɛ, dhyémuso óni a man cɛ, muso óni a manmuso cɛ. 36Mɔɔn yɛ́ɛla bhónanbhaa o léelu káa kɛ́ í yúu le. 37Mɔɔn mín nva wáman a man kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne, mɔɔn mín dhyénjɛ wáman a dhyémuso kɛ́ dhyáa a yɛ kɛ tínmin né ka, o tíi ó mánngan kɛ kɛ́ né yɛ́ kaamɔɔndhye ne. 38Mɔɔn mín man a gbáanɲii o tá kɛ bhyáa né kwɔ́ kɛ mansɔɔ a tɛ fɛ́ ké ii ale fáa né kósɔn, o tíi ó mánngan kɛ kɛ́ né yɛ́ kaamɔɔndhye ne. 39Mɔɔn mín ŋé fɛ́ kɛ a ni o lámala, o tíi ó yáa bɔɔn a ní o lɔ, waa mɔɔn mín ngɛ bɔɔn a ni o lɔ́ né kósɔn, o tíi ó yáa ɛliyanan o sɔ́ɔ.»
Bhaaye é kóbhɛɛkɛ ó la
Maki 9.41
40«Mɔɔn mín ngɛ í ɲán sii a kɔ́ɔ, oo í ɲán siila né lé kɔ́ɔ wé. Mɔɔn mín ngɛ í ɲán sii né kɔɔ, oo í ɲán siila né bhyáashaabhaa o lé kɔ́ɔ wé. 41Mɔɔn mín ngɛ í ɲán sii Ala yɛ céla ó kɔ́ɔ o yɛ́ célaya ó kósɔn, o tíi o yáa o céla o yɛ́ bhaaye o ɲɔ́ɔn nzɔ́ɔ, mɔɔn mín no ngɛ́ í ɲán sii Alamɔɔn o kɔ́ɔ o yɛ́ Alamɔɔnya ó kósɔn, o tíi ó yáa bhaaye sɔɔ Alamɔɔn o la. 42Tó ní fɔ a yɛ́ tínɲan in né ngó, mɔɔn óo mɔɔn kɛ́ jíswaan ó jífyɛ ɲan kée dí ɲɛ́n kaamɔɔndhye ŋo bɛ́ lɔ fítiinin ŋo mán kó kɛ mansɔɔ aa né yɛ́ kaamɔɔndhye ne, o tíi o táa bɔɔn a saa o lɔ.»
اکنون انتخاب شده:
Matiyu 10: MXX
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© (Active), Wycliffe Bible Translators, Inc. All rights reserved.
