1 तीमुथियुस 2
2
अराधना करँइ के बारे माहीं निरदेस
1अब हम सबसे पहिले तोंहईं इआ निरदेस देइत हएन, कि सगले मनइन के खातिर परमातिमा से धन्यबाद के साथ बिनती, प्राथना, अउर निबेदन किहा करा। 2अउर प्रसासन चलामँइ बालेन, अउर ऊँच पद बाले अधिकारिन के खातिर घलाय प्राथना किहा, एसे कि जउने हम पंचे सान्ति के साथ निडर होइके, परमातिमा के भक्ती करत गम्भीरता से जीबन बिताय सकी। 3अउर हमहीं पंचन काहीं मुक्ती देंइ बाले परमातिमा काहीं, इआ निकहा लागत हय, अउर ऊँ एसे प्रसन्नव होत हें। 4अउर परमातिमा इआ चाहत हें, कि सगले मनई मुक्ती पामँय; अउर ऊँ सत्य काहीं निकहा से जान लेंय 5काहेकि सगले संसार के एकयठे परमातिमा हें; अउर परमातिमा के अउर मनइन के मेल-मिलाप करामँइ बाले एकयठे बिचबई हें, मसीह यीसु, जउन मनई के देंह लइके इआ संसार माहीं आए हँय। 6जउन खुद काहीं सगले मनइन काहीं मुक्ती देंइ के खातिर, क्रूस माहीं बलिदान कइके कीमत चुकाइन हीं; इआ काम परमातिमा के ठहराए सही समय माहीं प्रभू यीसु मसीह पूर कइके गबाही दिहिन हीं। 7हम बेलकुल सही कहित हएन, लबरी नहीं बोली, हम इहय खुसी के खबर सुनामँइ के खातिर, यीसु मसीह के पठए खास चेला आहेन, अउर गैरयहूदी लोगन काहीं, परमातिमा के ऊपर बिसुआस करँइ के सत्य बचन के उपदेस सुनामँइ के खातिर, हम चुने गएन हँय।
8एसे हम चाहित हएन, कि हरेक मसीही मन्डलिन माहीं मंसेरुआ बिना गुस्सा, अउर झगड़ा किहे, खुद काहीं पबित्र रखिके अपने हाँथन काहीं ऊपर उठाइके परमातिमा से प्राथना करँय। 9इहइमेर सगली मेहेरिआ घलाय, सकुच के साथ खुद पर नियन्त्रन रखिके, उचित ओन्हन से खुद काहीं सजामँय, इआ नहीं कि बार गुहँय, अउर सोन-चाँदी, अउर मोतिन, अउर महग ओन्हन से, बलकिन निकहे-निकहे कामन से सजामँय, 10काहेकि जउन मेहेरिआ खुद काहीं परमातिमा के भक्ती करँइ बाली मनती हईं, उनखे खातिर इआ उचितव हय। 11अउर मेहेरिअन काहीं मसीही मन्डली माहीं सान्त बइठिके, बिना कुछू बोले-चाले बचन सुनामँइ बालेन के सिच्छा काहीं सिखँय चाही। 12अउर हम इहव कहित हएन, कि मसीही मन्डली माहीं मेहेरिआ उपदेस न देंय, अउर न मंसेरुअन के ऊपर हुकुमय चलामँय, बलकिन सान्त बइठँय। 13काहेकि परमातिमा पहिले मंसेरुआ काहीं बनाइन, जिनखर नाम आदम परा, अउर ओखे बाद मेहेरिआ काहीं बनाइन, जिनखर नाम हब्बा परा। 14अउर आदम काहीं सइतान नहीं बहकाए पाइस, पय मेहेरिआ सइतान के बहकाए माहीं परिके, परमातिमा के हुकुम के उलंघन कइके अपराधिन बनिगे। 15एखे बादव मेहेरिआ बच्चा पइदा किहे के कारन मुक्ती पइहँय, अगर खुद पर काबू रखिके, परमातिमा के ऊपर बिसुआस, प्रेम, अउर पबित्रता माहीं अटल रहँय।
اکنون انتخاب شده:
1 तीमुथियुस 2: bag
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.