1 तीमुथियुस 1
1
पवलुस के अभिबादन
1हम पवलुस आहेन, हे तीमुथियुस इआ चिट्ठी हम तोंहईं लिख रहेन हँय, जउन हमहीं मुक्ती देंइ बाले परमातिमा अउर हमरे आसा के अधार मसीह यीसु के हुकुम से मसीह यीसु के खास चेला आहेन, 2काहेकि तूँ हमरे व्दारा बचन सुनाए से यीसु मसीह के ऊपर बिसुआस किहे हया, इआ बिचार से हे तीमुथियुस, तूँ हमरे सग लड़िका कि नाईं हया।
हम प्राथना करित हएन, कि पिता परमातिमा अउर हमरे पंचन के प्रभू यीसु मसीह के तरफ से तोहईं किरपा, दया, अउर सान्ति मिलत रहय।
गलत सिच्छा देंइ बालेन के बिरोध माहीं चेतउनी
3हे तीमुथियुस, जइसन हम तोहईं मकिदुनिया प्रदेस काहीं जाँइ के समय समझायन रहा हय, कि तूँ इफिसुस सहर माहीं रहिके, उन लोगन काहीं जउन गलत सिच्छा देत हें, हुकुम द्या, कि ऊँ दुसरे बिसुआसिअन काहीं गलत सिच्छा न देंय। 4अउर तूँ उहाँ के बिसुआसिअन काहीं समझाबा, कि ऊँ अइसन किस्सा-कहानिन से अउर अनन्त बंसाबलियन से दूरी रहँय, जउने से लड़ाई-झगड़ा होत हें, काहेकि जउन मुक्ती पामँइ के प्रबन्ध परमातिमा किहिन हीं, उआ केबल प्रभू यीसु मसीह के ऊपर बिसुआस करे से मिलत ही, उनसे इनखर कउनव लेन-देन नहिं आय। उहय बात काहीं पुनि कहित हएन। 5हमरे समझामँइ के मतलब इआ आय, कि सुद्ध मन से अउर अच्छे सोच-बिचार से, अउर निस्कपट बिसुआस से प्रेम उत्पन्न होत हय। 6कुछ जने इन बातन काहीं छोंड़िके फालतू के बातन माहीं फँसिगें हँय। 7अउर ऊँ यहूदी नेमन काहीं सिखामँइ बाले बनँइ त चाहत हें, पय जउने बातन काहीं खुब जोर दइके बोलत हें, उनहीं खुदय नहीं समझँय। 8पय हम पंचे जानित हएन, कि अगर कोऊ मूसा के बिधान के नेमन काहीं, सही रीति से काम माहीं उपयोग करत हय, त उआ निकहा हय। 9इआ जानिके कि परमातिमा के दीन मूसा के बिधान के नेम सही काम करँइ बालेन काहीं सुधारँय के खातिर नहीं, बलकिन अधरमिन, बिद्रोहिन, अउर जउन परमातिमा के अराधना नहीं करँय, पापिन, अउर जउन पबित्र जीबन नहीं जिअँइ, असुद्ध मनइन, अउर महतारी-बाप के कतल करँइ बाले, कतलिन, 10अउर ब्यभिचारिन, जउन मंसेरुअय, मंसेरुअय एक दुसरे के साथ गलत सम्बन्ध बनाबत हें, अउर मनइन काहीं बेचँय बालेन, अउर झूँठ बोलँइ बालेन, अउर झूँठ किरिआ करँइ बालेन, अउर इनखे अलाबव सत्य उपदेस के सगले बिरोधिन के खातिर ठहराए गे हँय। 11इआ सिच्छा परम धन्य परमातिमा के महिमा के उआ खुसी के खबर के मुताबिक ही, जउने के प्रचार करँइ के जिम्मेबारी हमहीं सँउपी गे ही।
किरपा के खातिर धन्यबाद
12अउर हम अपने प्रभू मसीह यीसु काहीं, जउन हमहीं सामर्थ दिहिन हीं, धन्यबाद देइत हएन, ऊँ हमहीं बिसुआस के काबिल समझिके, अपने सेबा के खातिर ठहराइन हीं। 13हम त पहिले यीसु मसीह के अपमान करँइ बाले रहेन हय, अउर बिसुआसी लोगन काहीं सतामँइ बाले, अउर उनखे ऊपर अत्याचार करँइ बाले रहेन हय; तऊ प्रभू हमरे ऊपर दया किहिन, काहेकि जब हम प्रभू के ऊपर बिसुआस नहीं करत रहेन, उआ दसा माहीं बिना समझे बूझे ईं काम किहेन रहा हय। 14अउर प्रभू के किरपा हमहीं बहुतायत से मिली, अउर साथय-साथ उआ बिसुआस अउर प्रेम जउन मसीह यीसु के ऊपर बिसुआस किहे से मिलत हय, उहव हमहीं मिला। 15इआ बात बेलकुल सही हय, अउर हरेकमेर से मानँइ के काबिल ही, कि मसीह यीसु पापिन काहीं मुक्ती देंइ के खातिर, इआ संसार माहीं आए हँय, जउनेन म से सगलेन से बड़े पापी हम आहेन। 16पय हमरे ऊपर एसे दया भे, कि हम सगलेन से बड़े पापी के ऊपर, यीसु मसीह आपन पूरी सहनसीलता देखामँइ, कि जउन मनई अनन्त जीबन पामँइ के खातिर, उनखे ऊपर बिसुआस करिहँय, उनखे खातिर हम आदर्स बनी। 17अब हमेसा राज करँइ बाले राजा, अरथात अबिनासी, जिनहीं कोऊ कबहूँ नहीं देखिस, एकलउते परमातिमा के आदर अउर बड़ाई जुग-जुग होत रहय। आमीन।
18हे बेटा तीमुथियुस, उन परमातिमा के सँदेस बतामँइ बालेन के बातन के मुताबिक, जउन बात पहिलेन तोंहरे बारे माहीं बताई गई रही हँय, हम इआ हुकुम देइत हएन, कि तूँ उनहिन कि नाईं उनखर बिरोध करा, जउन अनुचित सिच्छा सिखाबत हें, अउर सत्य बचन के सिच्छा देत रहा। जइसन सिपाही युद्ध माहीं जीतँय के खातिर निकही लड़ाई लड़त हय। 19अउर हमेसा यीसु मसीह के ऊपर बिसुआस रक्खा, अउर आपन सोच-बिचार निकहा रक्खा, काहेकि इनहीं छोंड़े के कारन केतनेव के परमातिमा के ऊपर कीन बिसुआस नास होइगा हय, जइसन पानी माहीं बूड़िके जिहाज नास होइ जात हय। 20उनहिन म से हुमिनयुस अउर सिकन्दर आहीं, जउनेन काहीं हम बिसुआसिअन से अलग कइ दिहेन हँय, कि ऊँ बुराई करब न सिखँय।
اکنون انتخاب شده:
1 तीमुथियुस 1: bag
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.