1 थिस्सलुनीकियन 5
5
प्रभू दुसराय आमँइ बाले हें तूँ पंचे तइआर रह्या
1हे भाई-बहिनिव, समय अउर दिन तारीख के बारे माहीं तोंहईं पंचन काहीं लिखँइ के कउनव जरूरत नहिं आय। 2काहेकि तूँ पंचे त खुदय निकहा से जनते हया, कि जइसन रात माहीं चोर अचानक आबत हय, उहयमेर प्रभू के आमँइ के दिन आमँइ बाला हय। 3जब लोग-बाग इआ कहत होइहँय, कि सब कुसल-मंगल हय, अउर कुछू डेर नहिं आय, तबहिनय उनखे ऊपर एकय एक घोर संकट आय परी, जइसन लड़कहाई मेहेरिआ के पीरा; अउर ऊँ कउनव मेर से न बचि हँय। 4पय हे भाई-बहिनिव, तूँ पंचे त पाप रूपी अँधिआर माहीं नहिं आह्या, कि उआ दिन तोंहरे ऊपर चोर कि नाईं अचानक आय परय। 5काहेकि तूँ पंचे सगले जने त जोति अउर दिन के सन्तान आह्या, हम पंचे न रातय के आहेन, न अँधिआरय के। 6एसे हम पंचे अबिसुआसी लोगन कि नाईं सोबत न रही, बलकिन सचेत अउर अपने ऊपर काबू रखँइ चाही। 7काहेकि जउन सोबत हें, त ऊँ रातयके सोबत हें, अउर जउन मतबार होत हें, ऊँ रातयके मतबार होत हें। 8पय हम पंचे त दिन के आहेन, बिसुआस अउर प्रेम के झिलम #5:8 झिलम- पुराने जमाने माहीं जब राजा लड़ाई माहीं जात रहे हँय त सुरच्छा के खातिर छाती माहीं पहिरत रहे हँय।पहिरिके अउर मुक्ती के आसा के टोप पहिरिके सचेत रही। 9काहेकि परमातिमा हमहीं पंचन काहीं क्रोध के खातिर नहीं, बलकिन एसे ठहराइन हीं, कि हम पंचे अपने प्रभू यीसु मसीह के व्दारा मुक्ती पाई। 10प्रभू यीसु मसीह हमरे पंचन के खातिर एसे मरे, कि हम पंचे चाह जिअत रही, चाह मर जई, जब ऊँ दुसराय अइहँय, सब जन मिलिके उनहिन के साथ जिअत रहब। 11इआ कारन एक दुसरे काहीं सान्ति द्या, अउर एक दुसरे काहीं आत्मिक रूप से बढ़ामँय के खातिर मदत करा, जइसन तूँ पंचे करतेव हया।
मसीही मन्डली के खातिर उपदेस
12हे भाई-बहिनिव, हम पंचे तोंहसे बिनती करित हएन, कि जउन तोंहरे बीच माहीं मेहनत करत हें, अउर प्रभू माहीं तोंहार अँगुआई करत हें, अउर तोंहईं सिच्छा देत हें, उनखर सम्मान करा। 13अउर उनखे इआ काम के कारन, उनहीं बड़े प्रेम से आदर के काबिल समझा, अउर आपस माहीं मिल-जुलिके रहा। 14अउर हे भाई-बहिनिव, हम पंचे तोंहईं समझाइत हएन, जिनखर चाल-चलन निकहा नहिं आय, उनहीं समझाबा, डरपोकन काहीं ढाढ़स द्या, कमजोरन काहीं सम्हारा, अउर सगलेन के साथ सहनसीलता देखाबा। 15अउर सचेत रहा कोऊ, कोहू के साथ बुराई के बदले बुराई न करा, बलकिन हमेसा भलाई करँइ के खातिर तइआर रहा, अपसय माहीं भर नहीं, बलकिन सगले मनइन के साथ भलाई करँइ के कोसिस करा। 16हमेसा आनन्दित रहा। 17हमेसा प्राथना करँइ माहीं लगे रहा। 18हरेक बात माहीं धन्यबाद करा; काहेकि जेतने जने मसीह यीसु माहीं हया, तोंहरे खातिर परमातिमा के इहय इच्छा ही। 19पबित्र आत्मा के काम काहीं न दबाबा। 20परमातिमा के सँदेस बतामँइ बालेन के बातन काहीं तुच्छ न जाना। 21सगली बातन काहीं पहिले जाँचा-परखा जउन निकही होंय, उनहीं अपनाबा। 22अउर हरेकमेर के बुराइन से बचे रहा।
आसिरबाद
23सान्ति देंइ बाले परमातिमा खुदय तोंहईं पूरी तरह से पबित्र करँय; अउर तोंहार आत्मा, प्रान अउर देंह हमरे पंचन के प्रभू यीसु मसीह के आमँइ तक, पूर-पूर निरदोस अउर सुरच्छित रहय। 24काहेकि परमातिमा जउन तोंहईं बोलाइन हीं, सच्चे हँय, अउर ऊँ अइसनय करिहँय। 25हे भाई-बहिनिव हमरे पंचन के खातिर प्राथना करत रहा। 26सगले बिसुआसी भाई-बहिनिव, आपस माहीं मसीही प्रेम के साथ नबस्कार करा। 27हम तोंहईं प्रभू के किरिआ धराइके कहित हएन, कि इआ चिट्ठी सगले भाई-बहिनिन काहीं पढ़िके सुनाई जाय। 28प्रभू यीसु मसीह के किरपा तोंहरे ऊपर होत रहय। आमीन!
اکنون انتخاب شده:
1 थिस्सलुनीकियन 5: bag
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. All rights reserved.