Kari Rdrudan 8
8
Tmdahu Knkela
1Ini plawa ka knkela peni?
Ini pkparu hrenang na ka niqan luqi peni?
2Mheyu meniq rhengun elu pstreengan ka heya,
meniq bungu ssiyo elu.
3Meniq ssiyo rhengun paru qnlhangan, rhengun ba paru qnlhangan,
meniq ddaun mremux hiya, mlawa ka heya,
4“Kana seediq rngage maku,
mprengo ku txtaxa namu ga bobo dxeral.
5Seediq uka ba tunux! Sluhe mnugkela,
Seediq mngataq ba! Gimi mnugkela ka lhebun namu.
6Qbahang ka yamu, ado mprengo ku malu ba oda,
mpraguh ka quwaq mu mprengo oda msderux.
7Mpeeyah bale ba ka quwaq mu,
quwaq mu we maha tmraqil oda naqah.
8Kana kari pneyah quwaq mu we to msderux,
uka mberiq ma uka mridil.
9Malu pkesa ka seediq niqan luqi,
niqan gnkela we, ngalan na msderux.
10Yamu we ngali ka pnseeru mu, nii we mgkala mangal ging,
ani su wano mangal gnkela, mgkala malu ba king.”
11“Ado mgkala malu mkere btunux qrari ka knkela,
ani maanu kuxul su we uka mgkala pnseengan heya.
12Yaku, mkela bale ka sapah knkela,
maha migin mangal gnkela ma mkela ba oda.
13Miicu Utux Tmninun we kika tmraqil qnnaqah,
trqilun mu ka psparu, tmdahu, naqah oda ma, quwaq mberiq.
14Niqan ka smeung oda mu, mttuku gnkela,
malu tunux mu, niqan ba gnkela.
15Smtama yaku qmlahang qnlhangan ka qbsuran paru,
smtama yaku smalu pntena ka laqi qbsuran.
16Seediq mdayo qbsuran paru, kana mpsgao msderux noda,
maha smtama yaku mangal beyax.
17Gmaalu kenan we, sgaalu mu uri,
migin ba kenan we, slayun na.
18Egu dnoi ma paru knledax we pneeyah yaku,
bsiyaq ba dooyun dnoi ma msderux ooda we pneeyah yaku uri.
19Mgkala king ka gnhei mu, mgkala king bale,
gnhiyan mu we hmrinas ging gneegan mu.
20Mkkesa ku elu msderux oda ka yaku,
mkkesa ku ckceka elu pnstena.
21Maangal egu ba malu qyqeya ka gmaalu kenan,
pstngayun mu ka repun na.”
22“Meniq berah mpsmalu ciida ka Utux Tmninun,
mpsmalu kana ani maanu meniq bobo dxeral ciida, meniq ku hiya ka yaku di.
23Peeyah cbeyo bale, peeyah pnrdingan bale,
berah uka ka bobo dxeral, wada ku phyegun di.
24Uka ka ebun truma,
uka pusu qsiya paru ciida,
tena ku mtuting ka yaku.
25Ini phyegi ka dgiyaq,
uka ciida ka llebu dgiyaq,
tena ku mntuting ka yaku.
26Ciida, ini salu bobo dxeral ma qnpahan breenux,
ani biciq ba bengux dxeral.
27Pheyu dgiyaq paru ciida ka heya, meniq ku hiya,
ptaayus matis rcilung ka heya.
28Pskere su rangah karac baro,
Pskere su pusu rcilung.
29Gyusan su ayus ka rcilung, so ini hrinas ayus ka qsiya,
pgdehu su pusu bobo dxeral.
30Ciida, meniq ku ssiyo na mseediq ku msalu,
stenge qrasan klaali, mqaras ku bale klaali.
31Mqaras ku bobo dxeral na,
smkuxul ku meniq seediq bobo dxeral.”
32“Lqlaqi, qbahang kenan saya,
muyu elu kari mu we maangal mbleyaq da.
33Qbhangi ka pnseeru, ngali ka knkela,
iya ba laxi.
34Qbahang yaku, tara rhengun mu klaali,
tmara ssiyo rhengun mu we, maangal mbleyaq ka seediq kiya.
35Ado migin kenan we, kiya ka maangal knuudus,
mpaangal huwe Utux Tmninun ka heya.
36Pqnaqah yaku na we, gisu smeeliq knuudus na nanak,
qmriqu kenan na we, gisu smkuxul mhuqil.”
The Bible Society in Taiwan, 2020
© 台灣聖經公會版權所有，2020