Kari Rdrudan 9
9
Knkela ma Mngataq
1Smalu sapah ka niqan knkela,
pteetu 7 pusu eruc.
2Smeeliq ku tnbugan, psmalu ku malu ba sino,
psramal ku ttluungan uuqun.
3Smkagul dtnqliyan mqedil,
mosa taalu baro mlawa ckceka alang hiya,
4“Ima ka seediq uka tunux, pqrii hini ka heya!”
Rmengo dseediq uka tunux,
5“Eyah ka yamu, uqi ka pang mu,
mahi sino pnsino mu.
6Lixi ka uka tunux namu, kiya de mpkuudus,
kkesa elu mkela lmngelung.”
7Mkpkmalu seediq psparu, maha mangal pqsiqa,
mseru su seediq naqah, tsyaxun su daha.
8Iya kseengi ka seediq psparu, so maha qmriqu isu.
Kseengi ka seediq niqan knkela, kiya de mpgaalu sunan.
9Tgsai ka seediq niqan knkela, maha krinah niqan knkela,
tyui ka seediq msderux noda, maha mrana ka knkela na.
10Miicu Utux Tmninun we kiya ka prdingan knkela,
mkela Pusu Mrtaso we kiya ka niqan tunux.
11Spooda yaku, knkawas su we maha mrana,
maha mrana spegan ka knkawas knuudus su uri.
12Netun su niqan knkela, isu nanak ka niqan knkela,
nasi su psparu bale, isu nanak ka maha mangal.
13Mlawa ka mqedil mngataq,
uka tunux ka heya, uka bale gnkela.
14Tleung rhengun sapah na ka heya,
tleung tgbaro tluungan ckceka alang.
15Mlawa seediq moda hiya:
Rmengo dseediq msderux kkesa na,
16“Ima ka seediq mngataq, pqrii hini ka heya!”
Rmengo dseediq mngataq:
17“Cheya ka qsiya gneeguy,
malu bale ka pang lneing.”
18Ini kela niqan utux mnhuqil ka seediq,
pnlawa daha we gaga meniq truma ba nniqan mnhuqil.
The Bible Society in Taiwan, 2020
© 台灣聖經公會版權所有，2020