Kari Rdrudan 7
7
1Laqi mu, pyugi ka kari mu,
pniqi lhebun su ka kari pnosa mu.
2Muyu kari pnosa mu de mpkuudus su dhenu,
muyu tnugesa mu, mntena so qmlahang seediq ga ckceka doriq.
3Pcequr tluling baga su,
gqraani lhebun su.
4Rmengo knkela: “Mtswai mu mqedil ka isu.”
Ngalun na tndadal na ka niqan luqi tunux.
5Kiya de qmlahang isu smtheya mqedil uxe su gnklaan,
smtheya isu peeyah hema msdheriq mqedil icil qnlhangan.
Mqedil Mkmhemuc Msuupu
6Mneniq ku bais sapah,
spooda mu bais mita ku nganguc.
7Qtaan mu ckceka seediq naqah tunux,
taan mu ba ka 1 riso uka luqi ga ckceka lqlaqi.
8Mkleelu ku moda elu alang, msdaling ku elu mquri heya,
mquri ku elu maha sapah na.
9Meniq keeman, meniq sreesa,
meniq ceka rabi, ckceka mnkuung.
10Tai, meyah smterung heya ka 1 weewa,
ppdeping mqedil kbrexun ka heya, niqan mberiq ka lhebun na.
11Mdiras mlawa ka heya, uka hteran,
papak na we ini gseesu meeniq sapah.
12Duma nak we meniq ckceka elu alang, duma nak we mosa meniq pssliyan,
uxe uri we mtara rhengun elu.
13Tmunguh ma mbeyax blebil riso kiya ka heya,
ini qsiqa dqeras na rmengo heya:
14“Wada mu sbege ka snapuh ptbale,
wada mu daun ka sndhegan mu saya.
15Kiya de, meyah ku smterung isu,
mqmita ku dqeras su, kiya de betaq ku smdiyal isu da!
16Mhedu ku smapo pala qlapo,
spagan mu capang niqan ratu Micrayim.
17Dmoi ku iyu skenux, malu sknexan, rehaq nike,
pskenux tqiyan mu.
18Aguh han! Tgtengi ta pnugluwan, betaq mgrebu,
ppsqaras ta msuupu ka ita.
19Ado ini eniq sapah ka rseno mu,
wada theya daun na.
20Wada madis psaun pila,
asi ka betaq mtumun ka idas de kiya ka meeyah sapah.”
21Mqedil nii ge, egu ba cheya kari psridil heya,
mssibus bale ka quwaq na mmuxi heya.
22Asi snegul heya ka riso, mntena so dapa desun smeeliq,
mntena seediq mngataq madis xiluy bbekuy papak mosa ppseru.
23Betaq wada pklihu lhebun na ka budi, mntena qbheni mtbeyax mremux kadi,
ini na klai wada na sbege kana ka knuudus na.
24Lqlaqi nii, qbahang kari mu saya,
bhangi bale ka kari ckceka quwaq mu.
25Iya pqrii elu na ka lhebun su,
iya qqnuuqu mremux elu nugedang na.
26Ado wada ptakur hbaro seediq ka heya,
wada phqilun heya ka hbaro seediq.
27Sapah na we kiya ka elu hhqilan,
maha su betaq nniqan mnhuqil.
The Bible Society in Taiwan, 2020
© 台灣聖經公會版權所有，2020