Kari Rdrudan 6
6
Egu Ba Pndakar
1Laqi mu, isu we nasi su rmirih dmayo dangi,
rmirih su seediq uxe su gnklaan.
2Kiya de ptgdiyal su kari quwaq su,
qrapun su na kari quwaq su.
3Laqi mu, ga su mtuting ckceka baga dangi su, meepah su so nii de maha malu dmoi baga sunan,
pslebu lnglungan su nanak, osa migin dnayo dangi su.
4Iya ptqii ka klabi doriq su,
iya psleung ka doriq su.
5Keso mdayo isu nanak, mntena rqenux rabang qduriq peeyah baga seediq mosa mptcamac,
mntena su qbheni qduriq peeyah baga maangal qbheni.
6Seediq mbserux,
sai qmita ka noda qtahi, kiya de maangal su knkela.
7Uka mpgeela ka qtahi,
uka mdudul supi, uka qbsuran paru ka dheya.
8Kiya de psramal uqun ani rbagan,
smeli uuqun qmburung ciida.
9Seediq mbserux, mpbetaq su knuwan mtaqi?
Mpbetaq su knuwan ka mptkela su?
10Taqi ta tikuh, slleung ta tikuh,
tgkemu baga ta msange tikuh.
11Mntena seediq mpgeeguy asi eyah isu ka qnqrinuc su,
qnqrinuc su we maha mptena seediq madis qqeerung meyah.
12Seediq naqah mkciicil,
wano smtama quwaq mridil ka noda na.
13Ptkumax doriq pgkela,
phrenang papak pgkela, pgkela tluding baga.
14Smeku naqah lhebun,
posa naqah oda, ptgdiyal kari seediq klaali.
15So kiya de asi eyah heya ka mqraqil,
asi phqili saya, uka sspuhan.
16Niqan 6 ka qnrquun Utux Tmninun,
niqan 7 ka trqilun lhebun na,
17kiya ka doriq psparu, hema mpqberiq,
baga mmhemuc pphuqil,
18lhebun smmalu naqah oda,
papak tmalang mqeepah qnnaqah,
19quwaq mege mberiq prana smnetur seediq,
kiya uri we tggarang ptgdiyal seediq ckceka mtswai.
Mdakar Iya Mkmhemuc Msuupu
20Laqi mu, pyugi ka kari pnosa tama su,
iya laxi ka tnugsaan bubu.
21Pniqi ckceka lhebun su klaali,
qrii nduyung namu.
22Mkkesa namu, mpdudul isu ka heya,
sbaang su mtaqi, mpqlahang isu ka heya,
mtkela su mtutuy, mprengo isu ka heya.
23Ado knledax ka gaya pndakar, ledax ka tnugesa,
elu knuudus ka pnseeru tmgesa.
24Mpqlahang isu pqduriq peeyah mqedil naqah,
pqduriq isu peeyah hema psridil mqedil icil qnlhangan.
25So uxe mpklgelu lhebun su ka knbtunux na,
so uxe mpblebil isu ka doriq na.
26Ado qnhdean ba 1 pang su we maha desun mqedil kkbrexan.
Mqedil niqan rseno we meyah maduk knuudus knmalu su.
27Memux puniq berah ka seediq,
Inu uxe mpculing ka papak na peni?
28Nasi mkkesa bobo tahuc ka seediq,
uxe mpsqama ka papak na peni?
29Msuupu mtaqi mqedil ssiyo, so kiya uri,
kana theyaq heya we, maha niqan pnkdira.
30Ado knuure mekan uqun gneeguy na ka seediq gmeeguy,
ini sbiciq mita heya ka seediq.
31Ani so kiya, nasi wada qrapun, maha mpririh msn7 pnrana,
kana dnoi su sapah we spririh su.
32Mmhemuc msuupu mqedil, kiya ka uka knkela,
meepah so nii we, mpseelaq heya nanak.
33Mpqnaqah heya ma mpqsiqa heya,
uxe mpkuuka ka qnsiqa na.
34Ado snhuur sqama seang ka rseno,
cmiyuk ciida we uxe ba mpksngari.
35Ini angal ani maanu pnririh,
mege su egu bnege, uxe mpsruwa mpsbale.
The Bible Society in Taiwan, 2020
© 台灣聖經公會版權所有，2020