Kari Rdrudan 5
5
Mdakar Iya Mkmhemuc Msuupu
1Laqi mu, tlleus lhebun mbahang knkela mu,
peeyah birac su mbahang gnkela mu.
2Mpaangal su qlhangun mkela oda,
quwaq su we mpqlahang gnkela.
3Ado quwaq mqedil uxe gnklaan we so beyuq walu,
mnkala abura qnsdhereq ka quwaq na.
4Bobo na de maadis mngihur mntena hnqilan,
mntena hlmadac mhungul bale.
5Mptuting hnqilan ka papak na,
maha mremux tuxan mnkuung ka papak na.
6Heya we uxe na slayun ka elu knuudus,
kmpriyux ka elu na, ini kela ka heya nanak.
7Lqlaqi mu, qbahang yaku saya,
iya lixi ka kari pneyah quwaq mu.
8Elu knksaan su we sthyai ka heya,
iya smdaling rhengun sapah na.
9So uxe su bege seediq icil ka paru knledax su,
sbege su seediq naqah bale ka kndesan su.
10So uxe mpstenge qyqeya su ka seediq uxe gnklaan,
maha sapah seediq icil ka nangal su pneyah bnqresan.
11Mhuqil su ciida, mnaqah ka qraqil heyi su ciida,
mpsdaring su pshengak.
12Mprengo su: “Hmuwa, ma ku tmraqil ba tnugesa?
Ma ku ini psparu pnseeru?
13Ini ku qbahang kari mptgesa,
ini ku posa birac mbahang tmnugesa yaku.
14Psseli nami pssliyan seediq,
so ku hari nii mtuting ebun truma.”
15Mahi qsiya pneyah rcilung su,
mahi qsiya muudus pneyah ckceka beling knriyan pusu qsiya su.
16Ma su spqluli nganguc ka pusu qsiya su?
Ma su spqluli elu alang ka qsiya su?
17So maha nnisu nanak,
iya biqi seediq uxe su gnklaan.
18So maangal msbleyaq ka pusu qsiya su,
skxeli ka mqedil nangal su mbbeyax ciida.
19Mntena draqul rqenux malu qtaan, mntena bubu miric knmalu,
tai so mttuku bale isu ka berah na,
tai so sgcuqi lmngelung su bale pnugluwan na.
20Laqi mu, ma su sgcuqi lmngelung mqedil uxe su gnklaan?
Ma su tmmaku berah mqedil icil qnlhangan?
21Ado ga meniq berah Utux Tmninun kana ka noda seediq.
Pseung kana elu seediq ka heya.
22Ga qrapun qnquwan noda na nanak ka seediq naqah,
gisu qriyan snuyuk qnquwan noda na nanak.
23Mphuqil ini angal pnseeru ka heya,
mpkgedang knngataq na ka heya.
The Bible Society in Taiwan, 2020
© 台灣聖經公會版權所有，2020