Kari Rdrudan 4
4
Gnrihan Knkela
1Laqi mu, bhangi ka pnseeru tama,
bleyaq mkela ka kari niqan elu.
2Ado malu tnugsaan ka bnege mu yamu,
iya ba laxi ka tnugesa mu.
3Meniq ku berah tama mu ciida we laqi ku nana,
wano taxa bale kuxul bubu mu.
4Tmgesa kenan ka heya: “Pniqi ba lhebun su ka kari mu,
pyugi ka kari pnosa mu, kiya de mpkuudus su.
5Ngngali ka knkela ma, ngngali ka malu tunux,
iya chungi, iya qduriq kari peeyah quwaq mu.
6Iya qdaani ka knkela, knkela ka mpqlahang isu,
skxeli ka heya, kiya de qlhangun su na ka heya.
7Psai tgberah ba ka knkela, kiya de ngngalun su knkela,
pryuxi kana knkela dnoi su ka malu tunux.
8Pstutuy baro ka knkela, kiya de pstoyun su na baro,
thmkemux ka knkela, kiya de pspruun su na knledax paru.
9Psaun na tunux su ka bunuh huwe,
bege na isu ka knledax kbnuhun.”
10Laqi mu, qbahang, ngali ka kari mu,
kiya de maha bsiyaq ka kndesan su ma, maha su msdrudan.
11Wada ku tena tmgesa isu ka kksaun su elu knkela,
mdudul isu mkkesa elu msderux.
12Mkmkesa su, uka ka mpsqeya papak su.
Tmalang su, uxe su mpskripuc uri.
13Angal bale ka pnseeru, iya plaxi,
qlhangi bale, ado kiya ka knuudus su.
14Iya qleqah elu seediq naqah,
iya kkesa ddaun seediq naqah.
15Qdriqi, iya oda hiya,
qdriqi oda nanak elu su.
16Nasi ini oda naqah ka dheya, maha naqah tnqiyan daha,
ini pskripuc seediq de, naqah tnqiyan daha.
17Ado mekan pang qnnaqah ka dheya,
ngalan na sino mimah ka mmhemuc beebu seediq.
18Kiya de, elu seediq msderux noda we mntena ledax mgrebu,
mrana lmedax, betaq ceka naali.
19Mnkuung ka elu seediq naqah,
snkripuc maanu we ini daha klai.
20Laqi mu, qlhangi mbahang ka kari mu,
psquri birac su mbahang kari mu.
21Iya psthyai peeyah doriq su ka dheya,
seku lhebun peeniq lhebun su.
22Ado slayan daha ka dheya, kiya de slayun daha ka knuudus,
maangal mpkmalu kana heyi.
23Qlhangi ka lhebun su, hmrinas qmlahang ani maanu,
ado pusu hrean qsiya pneeyah lhebun.
24Sthyai ka pridil quwaq,
qdriqi ka quwaq naqah.
25Psquri berah mita ka daha doriq su,
sdrexi mita berah ka daha doriq su.
26Sbrnexi ka elu toma papak su,
kiya de mgdehu ka kana elu su.
27Iya psquri iril, iya psquri narac,
Qdriqi peeyah qnnaqah ka papak su.
The Bible Society in Taiwan, 2020
© 台灣聖經公會版權所有，2020