Kari Rdrudan 3
3
Dmurun Bnege na Mbbeyax
1Laqi mu, iya chngii ka tnugesa mu,
lhebun su we qlhangi bale ka pnosa mu kari.
2Ado mbege ali qnedis isu ka heya,
knkawas knuudus su ma ptbale lhebun su.
3Iya pqdriqi isu ka gnaalu ma knbale,
bkei nduyung su, pskari bobo lhebun su.
4So kiya de, meeniq su berah Utux Baro ma seediq bobo dxeral,
maangal su huwe, mpniqan malu qntaan.
5Pskingal lhebun su smtama Utux Tmninun,
iya stama gnkela su tunux nanak.
6Meniq su kana elu ddaun su we heya ka ngali pusu,
mpsderux elu su ka heya.
7Iya so smmkela bale,
kcugi ka Utux Tmninun, qdriqi ka naqah oda.
8Kiya de mpkmalu heyi su ka nii,
mpsdheriq kana buuc su ka nii.
9Ngali ka dnoi su,
kana hani mhei peeyah dxeral su we, sprui ka Utux Tmninun.
10So kiya de, mpsngari sntngayan ka repun su,
mpcuwaq knstenge na ka sino bgurah meniq rcilung sino su.
11Laqi mu, iya tsyaxi qmita ka pnseeru Utux Tmninun,
iya qdaani ka knseang na tmgesa.
12Ado gnaalu na Utux Tmninun we, ksengun na tmgesa,
mntena so mseang tmgesa laqi kuxul na tama.
13Maangal knkela, maangal malu tunux,
seediq nii we mbbleyaq da.
14Ado mgkala ging niqan rrihan ka knkela,
nangal na gnrihan we mgkala king.
15Mgkala btunux qrari ka knmalu na,
kana kuxul su we, uka ka mptena heya.
16Narac baga na we niqan knbrawan kndesan,
iril baga na we niqan qnbleqan.
17Elu na we sqrasun,
elu na we stngayan mtbale.
18Ssmalu na qhuni knuudus ka seediq smtama heya,
qmlahang heya we maangal mbleyaq.
19Dmoi knkela pheyu pusu dxeral ka Utux Tmninun,
dmoi malu tunux na smapo krkarac.
20Dmoi gnkela na rmaguh ebun truma,
pttingun na quyux knmalu peeyah krkarac baro.
21Laqi mu, qlhangi ka mttuku gnkela ma knkela oda,
iya pqdriqi peeyah doriq su ka dheya.
22Kiya de, pniqun na beyax tppelaq ka knuudus su,
mpsalu pnlpilan nduyung su.
23Ciida, mpsbale su mkkesa elu,
uxe su mptakur.
24Mtaqi su tikuh, uxe su mpkiicu,
mtaqi su, mpkchungi ba ka tnqiyan su.
25Asi eyah ka so kcugun we, uxe su mpkiicu,
ga phqilun ka seediq naqah we, uxe su mpkiicu uri.
26Ado stmaan su ka Utux Tmninun,
heya we mpqlahang papak su uxe premux tlenga.
27Nasi niqan beyax su meepah malu ka baga su,
iya laxi, dyagi ka seediq maangal na.
28Nasi niqan ka dnoi su,
iya rngagi so nii ka ssiyo su:
“Osa han, eyah kusun di, biqun misu.”
29Ga meniq ssiyo su ka siyo su ge,
iya lngelung smalu pqnaqah heya.
30Nasi ini ba seeliq sunan ka seediq we,
iya nseung mkseang heya.
31Iya soora seediq kmmhemuc qmeepah naqah,
iya geegi ani kingal ka elu na.
32Ado trqilun Utux Tmninun ka seediq mquri icil nii,
kuxul na theyaq ka seediq msderux.
33Pkdira sapah seediq naqah ka Utux Tmninun,
smbleyaq sapah seediq msderux noda ka heya.
34Mhulis seediq smkuxul mhulis seediq ka heya,
kiya we mege huwe seediq ptlebu lhebun ka heya.
35Mplutuc mangal paru knledax ka seediq niqan knkela.
Ani phyegun baro ka mngataq seediq we kiya ka psqaun.
The Bible Society in Taiwan, 2020
© 台灣聖經公會版權所有，2020