Kari Rdrudan 2
2
Snadu Knkela
1Laqi mu, isu we nasi su ngalun ka kari mu,
blequn su smeku ka pnosa mu kari.
2Qmlahang su mbahang knkela,
pskingal lhebun migin mpkela tunux.
3Isu we nasi su mlawa dmurun gnkela lmngelung,
psbaro hrenang su dmurun malu tunux.
4Migin su heya, mntena su migin ging,
snleus su migin heya, mntena su migin malu ba dnoi.
5Kiya de mpkela su miicu Utux Tmninun,
mpkela su Utux Baro.
6Ado mege knkela ka Utux Tmninun,
gnkela ma malu tunux we pneeyah heya kana.
7Psliun na mttuku bale gnkela ka seediq msderux,
slmeun na qqeerung ka seediq ini kbiki noda.
8Ado qlhangun na ka elu pstena,
qlhangun na ka elu seediq kmstuutux.
9Ciida, mpkela su msderux oda, pstena,
ini kbiki, elu malu daun.
10Ado mpremux lhebun su ka knkela,
mpqaras lhebun su ka gnkela.
11Mpqlahang isu ka mkmkela oda,
mpqlahang isu ka malu tunux.
12Mdoi baga su pqduriq peeyah elu seediq naqah,
psthyani ka seediq smnetur uka elu.
13Lixun daha ka elu msderux,
pkkesa elu mnkuung.
14Smkuxul naqah oda,
smkuxul qnquwan seediq naqah.
15Mbiki ka elu daha,
wada tsridil peeyah ckceka elu ka dheya.
16Mdoi su pqduriq mqedil uxe su gnklaan ka knkela,
pqduriq su na peeyah msdheriq quwaq mqedil icil qnlhangan.
17Lixun na ka mqedil pnstrengan na mbbeyax,
chngiun na nanak ka pnsdhegan mrtaso.
18Mpsquri hnqilan ka sapah na,
mpsquri utux hnqilan ka elu na.
19Mnosa heya ka ani ima we, uxe pnberih,
uxe maangal elu knuudus uri.
20Pkkesa elu seediq malu ka knkela,
mpqlahang elu seediq msderux noda.
21Meeniq dxeral ka seediq msderux,
mpsngari hiya ka seediq mttuku.
22Wano seediq naqah ka sqitun peeyah dxeral,
gbilun daha ka seediq mpkraki ba.
The Bible Society in Taiwan, 2020
© 台灣聖經公會版權所有，2020