Kari Rdrudan 1
1
Rrihan Kari Rudan
1Laqi Dawid, Kari rudan Selomoh qbsuran paru Israel:
2Pgklaun na knkela ma pnseru ka seediq,
pgkela kari niqan elu.
3Maangal malu ba pnseru,
kiya ka msderux noda, ini psaanak ma pstena moda.
4Mpkela lmngelung ka seediq uka tuunux,
mpniqan gnkela ka mbbeyax, niqan ba gnkela daha.
5Mbahang ka seediq niqan knkela, prana gnklaan,
seediq mkela tunux we maangal niqan ba oda.
6Mkela ba kari rudan ma kari hnedil,
mkela kari ma kari lneing seediq niqan knkela.
7Miicu Utux Tmninun we kiya ka pnrdingan knkela,
ini psparu mita knkela ma pnseru ka seediq mngataq.
Mege Dnudul Kari Mbbeyax
8Laqi mu, bhangi ka pnseeru tama su,
iya lixi ka tnugesa bubu su.
9Ado mpkbunuh su bunuh knledax huwe tunux su ka nii,
mptena so qniri nduyung.
10Laqi mu, netun mpsridil isu ka seediq niqan qnquwan noda,
iya osa smnegul ka isu.
11Nasi rmengo ka dheya: “Suupu mosa yami ka isu,
mpqburang ta psdara phuqil seediq ka ita,
mnseung ta mgleing, smipaq ta seediq uka qnaqah.
12Pntena ta so tuxan mnkuung, rmequn ani muudus ka dheya,
asi ta rqeni, mntena ta rmequn seediq mpremux hnqilan dxeral.
13Maangal ta lmlamu malu qyqeya,
pstngayun ta tmquri sapah ka gnlekan ta.
14Eyah suupu yami ka isu,
pspuwe ta 1 lubuy psaan pila.”
15Laqi mu, iya psuupu mkkesa mntena elu daha,
hteri ka papak su kmkkesa elu daha.
16Ado ini beyo tmalang meepah naqah ka papak daha,
ini beyo psdara smipaq seediq ka dheya.
17Posa kadi berah qbheni ka dheya,
maha uka ngngalun daha.
18Mntena bale, pqburang ka dheya we, kiya ka psdara dara daha nanak,
mgleing ka dheya we, kiya ka phuqil knuudus daha.
19Kana mbeyax gmeeluk dnoi we, maha so nii ka elu ddaun daha,
maangal knuudus daha nanak ka niqan lnglungan so nii.
Mlawa Seediq ka Knkela
20Gisu mlawa ckceka elu alang ka knkela,
paru hrenang na mlawa meniq ngerac pssliyan.
21Gisu mlawa elu mgrahul seediq,
meniq rhengun alang, ckceka alang, posa kari, rmengo:
22“Smkuxul uka tunux ka seediq uka tunux,
smkuxul psparu ka seediq psparu,
tmraqil gnkela ka seediq mngataq,
mpbetaq knuwan so nii ho?
23Ado pnseru mu kmpriyux ka yamu,
reesun mu bgihur mu ka yamu,
tgsaun maku ka kari mu.
24Ado mnlawa ku, ini namu qbahang,
tmaus ku baga, ini namu qtqita.
25Ini namu qita kana pndakar mu,
hmetur namu mbahang pnseeru mu.
26-27Smterung namu mqraqil, mphulis ku ka yaku.
Meyah betaq yamu ka so smiicu,
mntena so bgihur paru meyah ka so smiicu,
meyah betaq heyi namu ka pnrqilan de,
mphulis ku.
28Ciida meyah dmurun kenan ka dheya, kiya de uxe ku mciyuk,
migin namu bale we, uxe ku namu slayun.
29Ado tmraqil gnkela ka dheya,
gmao ini kiicu Utux Tmninun.
30Ini qbahang pndakar mu,
ini psparu kana knseengan mu.
31Kiya de maangal nanak pnhei daha,
mttengi ckceka knddaan daha nanak.
32Smeeliq elu ka seediq mngataq, phuqil heya nanak,
mtbleyaq ka seediq mngataq, migin pkuuka dheya nanak.
33Wano mbahang yaku we, mpbleyaq meniq,
maangal mtbale, ini kiicu mqraqil.”
The Bible Society in Taiwan, 2020
© 台灣聖經公會版權所有，2020