MAAKU 9

1Ben à bèńnɛ: Yãpuraan mɛ́ɛ ooare, gbɛ̃kenↄ kú gura kɛ̀ aↄ̃é garo ai aↄ̃ kí kɛ̀ Ludaa kà e, èe suu kↄ̃n gbãaao.

Yesu lina

(Mat 17:1-13, Luk 9:28-36)

2Gurↄ swɛɛdoo gbɛra Yesu Pita kↄ̃n Yemisio kↄ̃n Yohanao sɛ̀ à dìńyo kpii lezĩa ńtɛ̃ɛ. Ben à lì ń wáa, 3à pↄ́kãsãanↄↄ e tɛ́ kɛɛ pú fénfen. Gbɛ̃kee kú anduna guu kɛ̀ eé fↄ̃ à à pura kũ lɛro. 4Ben Ilia kↄ̃n Musao bↄ̀ wà mↄ̀ńzi, aↄ̃ↄe yã oo kↄ̃n Yesuo. 5Ben Pita bè Yesunɛ: Dannɛri, à maa kɛ̀ wá kú kɛ̀. Wà kutaa dↄ mɛ̀n aagↄ̃, n pↄ́ mɛ̀n do, Musa pↄ́ mɛ̀n do, Ilia pↄ́ mɛ̀n do. 6À dↄ̃ yã kɛ̀ ée ooro, zaakɛ vĩa ń kũ maamaa. 7Ludambɛ luguu pìta à dàńla, ben aↄ̃ kòto mà à guu à bè: Àmbe ma Nɛ́ mɛ̀n do léle yenzidee ũ. À à yã ma. 8Kãndo kɛ̀ aↄ̃ guu gwàgwa, aↄ̃ↄe gbɛ̃ke e dↄro, sé Yesu ado.

9Kɛ̀ aↄ̃ↄe pitaa kpiii pìa, ben Yesu bèńnɛ aↄ̃ton yã kɛ̀ aↄ̃ↄ è pì o gbɛ̃ke maro ai Gbɛ̃ntee Nɛ́ fɛɛ bↄna gaan. 10Aↄ̃ yã pì kũna, mↄde aↄ̃ↄe kↄ̃ lalaa wèe bee: Fɛɛ bↄna gaan yã beee dɛ diamɛ? 11Ben aↄ̃ à là wà bè: Bↄ́yãnzin ludayãdannɛrinↄ è be Ilia bé eé mↄ́ káakuzi? 12À wèńla à bè: Ilia é mↄ́ káaku yãpuramɛ, eé yã píngi kɛkɛ à gbɛ̀n, mↄde à kɛ̀ dia wà kɛ̃̀ Luda yãn wà bè, Gbɛ̃ntee Nɛ́ é wɛ́ɛtãmma e maamaa ai wà gízi? 13Mↄde mɛ́ɛ ooare Ilia mↄ̀ kↄ̀, ben aↄ̃ ń pↄyezi kɛ̀nɛ, lán wà à yã ò Luda yãn nà.

Nɛ́gↄ̃gbɛ̃ zĩnde kɛ̃kↄ̃ana

(Mat 17:14-21, Luk 9:37-42)

14Kɛ̀ aↄ̃ sù ń gbɛ̃ kpaaanↄ kiia, aↄ̃ↄ è parii ligańzi, ben ludayãdannɛrinↄↄ e lɛokpakↄ̃a kɛɛńyo. 15Kɛ̀ parii Yesu è, à yã bↄ̀ ń saɛ, ben aↄ̃ bàa lɛ̀ wà gàa wà ì kpàa gↄ̃ↄ ń píngi. 16Ben à a ìbanↄ là à bè: Bↄ́ lɛokpakↄ̃an ée kɛɛńyo lɛee? 17Ben gↄ̃gbɛ̃ ke wèàla zà guu à bè: Dannɛri, ma mↄnnɛ ma nɛ́omɛ, zĩn bé à à nɛ́nɛ nàɛ. 18Tó à dìdia, è à pãɛ tↄↄtɛ, ègↄ̃ lóufuta bↄɛɛ, ègↄ̃ swaa soo, è gbãgbã sↄ̀rↄrↄ. Ma bè n ìbanↄnɛ aↄ̃ pɛ́ zĩn pìa à bↄ, ben aↄ̃ fùa. 19Ben Yesu bèńnɛ: Tↄ̃ↄrigbɛ̃ ludanaanɛkɛrisaideenↄ! Mɛ́gↄ̃ kúao ai bↄrɛmɛ? Mɛ́gↄ̃ mɛnaaao ai bↄrɛmɛ? À mↄ́mɛ nɛ́ pìo kɛ̀.

20Kɛ̀ wà mↄ̀onɛ, kɛ̀ zĩn pì Yesu è gↄ̃ↄ, ben à nɛ́ pì nìgãnigã à à pã̀ɛ tↄↄtɛ. Ben èe gbegere paa èe lóufuta bↄɛɛ. 21Yesu nɛ́ pì de là à bè: Zaa bↄrɛmɛ à kúo lɛɛ? À wèàla à bè: Zaa à nɛ́ féte zĩmɛ. 22Ègↄ̃ à zuu tɛ́ kↄ̃n ío guu baabↄrɛ, ègↄ̃ yezi à à dɛ. Tó nɛ́ fↄ̃ ǹ pↄ́ke kɛ, ǹ wa wɛ̃nda gwa ǹ wa faaba kɛ. 23Yesu bènɛ: N bè, tó mɛ́ fↄ̃ↄ́? Baabↄ píngi è sí kɛ gbɛ̃ kɛ̀ ma náanɛ vĩinɛ. 24Ben nɛ́ pì de wii lɛ̀ gↄ̃ↄ à bè: Má n náanɛ vĩ. Ǹ n náanɛ kɛ̀ èe kɛ̃sãama kaaramɛ. 25Kɛ̀ Yesu è zà e nakↄ̃rɛɛḿma, à gì zĩn pìnɛ à bè: Zĩn swãdo kpadugu, má ònnɛ ǹ go nɛ́ pìa. Ǹton gɛ̃ à guu dↄro. 26Ben zĩn pì wii lɛ̀ à à nìgã pãsĩpãsĩ, ben à gòa. Nɛ́ pì gↄ̃̀ daɛna lán gɛ̀ bà ai paridee bè à gàmɛ. 27Ben Yesu à kũ̀ a ↄↄa, à à fɛ̀ɛ à zɛ̀.

28Kɛ̀ Yesu gɛ̃̀ ua guu, ben à ìbanↄ à gbèka gusaɛ wà bè: À kɛ̀ dia wée fↄ̃ wà pɛ́ zĩn pìa à bↄroo? 29Ben à wèńla à bè: Kɛ̀ taka è sí bↄro, sé kↄ̃n aduakɛnao.

Yesu ɛara à a ga kↄ̃n a fɛɛnao yã'ona

(Mat 17:22-23, Luk 9:43-45)

30Kɛ̀ aↄ̃ bↄ̀ gwe, ben aↄ̃ pã̀ Galilinɛ. Yesu yezi wàgↄ̃ a kúkii dↄ̃ro, 31zaakɛ èe yã daa a ìbanↄnɛmɛ. À bèńnɛ: Weé Gbɛ̃ntee Nɛ́ na gbɛ̃nↄnɛ ń ↄzĩ wà à dɛ, à gurↄ aagↄ̃dee zĩ eé fɛɛ. 32Aↄ̃ↄe à yã pì dↄ̀rↄ dↄ̃ro, ben vĩa ń kũ aↄ̃ yã pì gbekaa.

Tɛna Yesuzi lán nɛ́ féte bà

(Mat 18:1-5, Luk 9:46-48)

33Ben aↄ̃ kà Kapɛnamu. Gurↄↄ kɛ̀ à kú bɛ, à a ìbanↄ là à bè: Bↄ́ lɛokpakↄ̃an ée kɛɛ zɛ́ guuu? 34Ben aↄ̃ yĩtɛna, zaakɛ aↄ̃ↄe lɛokpakↄ̃a kɛɛ zɛ́ guu dɛnlaa yã musumɛ. 35Ben à vɛ̃̀ɛ à gↄ̃ↄn kuri awɛɛplaaa pìnↄ sìsiazi à bè: Tó gbɛ̃ yezi à kɛ gbɛ̃ káaku ũ, adee gↄ̃ kpɛɛdee ũ, à gↄ̃ baade pínginɛ zĩ̀ri ũ. 36À nɛ́ féte sɛ̀ à à zɛ̀ ń aɛzĩ, ben à à sɛ̀ à à kpà a kùla à bèńnɛ: 37Gbɛ̃ kɛ̀ nɛ́ kɛ̀nↄ doke sì ma ìbakɛɛ yãnzi, mámbe à ma si. Gbɛ̃ kɛ̀ ma si sↄ̃, mámbe à ma si madoro, gbɛ̃ kɛ̀ ma zĩin á sì.

Gbɛ̃ kɛ̀ èe íbɛtɛ kpáwaoroo nɛ́ wa baakpɛɛmɛ

(Luk 9:49-50)

38Ben Yohana bènɛ: Dannɛri, wa gbɛ̃ke è, èe zĩnnↄ gooḿma kↄ̃n n tↄ́o, ben wa ginɛ, zaakɛ wa gbɛ̃nlo. 39Ben Yesu bè: Àton gínɛro, zaakɛ gbɛ̃ke é fↄ̃ à dabuyã kɛ kↄ̃n ma tↄ́o à ɛara à ma tↄ́ zaaa sí dↄro. 40Gbɛ̃ kɛ̀ èe íbɛtɛ kpáwaoroo nɛ́ wa gbɛ̃mɛ. 41Yãpuraan mɛ́ɛ ooare, gbɛ̃ kɛ̀ à a gba ímina kɛ̀ á kuu Kirisi pↄ́ ũ yãnzi, adee é kora a láadaziro.

42Tó gbɛ̃ tò nɛ́ kɛ̀ ma náanɛ vĩi kɛ̀kiinↄ doke sã̀sã, eégↄ̃ sã̀ↄ adeenɛ wà wísilↄgbɛ gbɛ̃̀ntɛ̃ dↄ à waalɛ wà à zu sɛ̀bɛ guu. 43-44Tó n ↄↄ bé è tó ǹ fu, ǹ zↄ̃ ǹ zĩnna. À sã̀ↄnnɛ ǹ gɛ̃ wɛ̃̀ndi kɛ̀ è yãaroo guu kↄ̃n ↄ kusuo dɛ n gↄ̃ kↄ̃n ↄ mɛ̀n plaaaola ǹ gɛ̃ tɛ́ kɛ̀ è garoo guu gɛ̀wãan. 45-46Tó n gbá bé è tó ǹ fu, ǹ zↄ̃ ǹ zĩnna. À sã̀ↄnnɛ ǹ gɛ̃ wɛ̃̀ndi kɛ̀ è yãaroo guu ɛrɛ ũ dɛ n gↄ̃ kↄ̃n gbá mɛ̀n plaaaola wà n zu tɛ́n. 47Tó n wɛ́ɛ bé è tó ǹ fu, ǹ bↄ. À sã̀ↄnnɛ ǹ gɛ̃ kpata kɛ̀ bↄ̀ Luda kiia guu kↄ̃n wɛ́ɛ dooo dɛ n gↄ̃ kↄ̃n wɛ́ɛ mɛ̀n plaaaola wà n zu tɛ́n, 48gura kɛ̀ aↄ̃ kↄ̀kↄbii è yãaro, tɛ́ pì è garo.

49Tɛ́ é mɛ̀ ↄ̃ baade píngia lán wè pↄ́ kɛkɛ kↄ̃n wisio nà. 50Wisi nɛ́ pↄ́ maaamɛ, mↄde tó à nnaa tà, dian weé kɛ nà à gↄ̃ wisi ũ dↄↄ? À tó wisi gↄ̃ kú a guu, égↄ̃ nna kↄ̃o.

اکنون انتخاب شده:

MAAKU 9: BBB

های‌لایت

کپی

مقایسه

به اشتراک گذاشتن