MATIU 15

Fɛɛakaarayã

(Maa 7:1-13)

1Farisi kenↄ kↄ̃n ludayãdannɛri kenↄ bↄ̀ Yerusalɛmu aↄ̃ mↄ̀ Yesu kiia, ben aↄ̃ à là wà bè: 2Bↄ́yãnzi n ìbanↄ ègↄ̃ wa dezinↄ fɛɛakaarayã kũnarozi? Aↄ̃è ↄ pípi gbasa wà pↄ́ blero. 3Ben Yesu wèńla à bè: Bↄ́yãnzin eè gí Luda yãdiɛnanↄzi àgↄ̃ a fɛɛakaarayã kũna? 4Zaakɛ Luda bè, à bɛ̀ɛ lí a de kↄ̃n a daonɛ. À bè dↄ, gbɛ̃ kɛ̀ à a de ke a da kpɛ bↄ̀, wà adee dɛ. 5Apinↄ sↄ̃ eè be, tó gbɛ̃ bè a de ke a danɛ, pↄ́ kɛ̀ á vĩ à ń kpe dao gↄ̃̀ Luda pↄ́ ũ, 6àsun a de kpe daoro. Lɛmɛ eè Luda yã kɛ famma lɛ, lɛ àgↄ̃ a fɛɛakaarayã kũna yãnzi. 7A mↄnafikideenↄ! Isaya annabikɛyã ò a yã musu wásawasa à bè:

8Bori beee è bɛ̀ɛ limɛɛ kↄ̃n lɛ́omɛ,

aↄ̃ swɛ̃̀ kúmaro.

9Aↄ̃ègↄ̃ dↄnzi kɛɛnɛ pãmɛ,

gbɛ̃ntee yãzɛkparɛn aↄ̃è dańnɛ.

Yã kɛ̀ è tó wàgↄ̃ gbãsĩ

(Maa 7:14-23)

10Ben Yesu parii sìsiazi à bè: À swã kpá à yã ma. 11Èe kɛ pↄ́ kɛ̀ è gɛ̃ lɛ́n bé è tó gbɛ̃ gↄ̃ gbãsĩro. Yã kɛ̀ è bↄ lɛ́n bé è tó gbɛ̃ gↄ̃ gbãsĩ. 12Ben a ìbanↄ sↄ̃̀zi aↄ̃ bè: Ń dↄ̃ kɛ̀ Farisinↄ yã pì mà à ń zↄ̃ ń swɛ̃̀nloo? 13Yesu wèńla à bè: Pↄ́ kɛ̀ ma De kɛ̀ kú musu e tↄ̃ro weé wurɛmɛ. 14À ń tó gwe. Vĩ̀a dↄn'aɛdeenↄmɛ! Tó vĩ̀a gò kũna vĩ̀anɛ, aↄ̃ plaa ń píngi é si wɛ̀ɛmmɛ. 15Pita bènɛ: Ǹ yã pì bↄkↄ̃tɛwe. 16Ben Yesu bè: A laasuu kpɛ́ yĩi seↄ́? 17Á dↄ̃ kɛ̀ pↄ́ kɛ̀ gɛ̃̀ lɛ́n è tá gbɛɛɛn gbasa à bↄ mɛ̀nloo? 18Yã kɛ̀ è bↄ lɛ́n sↄ̃ è bↄ swɛ̃̀ guumɛ. Àmbe è tó gbɛ̃ gↄ̃ gbãsĩ. 19Zaakɛ zaa swɛ̃̀ guun laasuu zaaa è bↄn: Gbɛ̃dɛna, zinakɛna, pãpãkɛna, kpãi'ona, ɛgɛtona kↄ̃n gbɛ̃sↄ̃sↄ̃nao. 20Yã beeenↄ bé è tó gbɛ̃ gↄ̃ gbãsĩ, pↄ́blena ↄpipisai è tó gbɛ̃ gↄ̃ gbãsĩro.

Nↄgbɛ̃ zĩ̀tↄ wɛ́ɛkɛna

(Maa 7:24-30)

21Ben Yesu bↄ̀ gwe, à gàa Taya kↄ̃n Sidↄ̃o bùsun. 22Kanaa nↄgbɛ̃ kee kú bùsu pìn, à mↄ̀ à wii pɛ̀zi à bè: Dii, Dauda Bori, ǹ ma wɛ̃nda gwa. Zĩn e wɛ́ɛ tãa ma nɛ́nↄkparɛa maamaa. 23Ben Yesu e weàlaro. À ìbanↄ sↄ̃̀zi, aↄ̃ wɛ́ɛ kɛ̀a wà bè: Ǹ pɛ́ nↄgbɛ̃ pìa, zaakɛ ègↄ̃ tɛ́wazi kↄ̃n wiiiomɛ. 24Yesu wèńla à bè: Isarailinↄ sãsãna lán sãanↄ bàmɛ. Aↄ̃ kiian Luda ma zĩn ado. 25Ben nↄgbɛ̃ pì mↄ̀ à kùɛnɛ à bè: Dii, ǹ ma ĩanka. 26Yesu bènɛ: À maa wà nɛ́nↄ pↄ́blee sɛ́ wà zu gbɛ̃ɛnↄnɛro. 27Ben nↄgbɛ̃ pì bè: Yãpuramɛ Dii! Mↄde baa gbɛ̃ɛnↄ è pↄ́ble buru kɛ̀ lɛ̀ɛ ń dii teebu gĩzĩnↄ sɛ́sɛ. 28Ben Yesu wèàla à bè: Nↄgbɛ̃, ń ma náanɛ vĩ bíta. À kɛnnɛ lán ń yezi nà. Ben à nɛ́nↄkparɛ pì aafia è zĩ pìa gↄ̃ↄ.

Yesu gyãreenↄ kɛ̃kↄ̃ana pari

29Yesu bↄ̀ gwe à gàa èe dↄↄ Galili sɛ̀bɛzi, ben à bikũ̀ à vɛ̃̀ɛ sĩ̀sĩa. 30Wà mↄ̀nɛ kↄ̃n ɛrɛnↄ kↄ̃n vĩ̀anↄ kↄ̃n gbɛ̃ kↄ̃̀ↄkũnanↄ kↄ̃n swãdoonↄ kↄ̃n gyãre pãndenↄ paripari. Wà ń káɛ à aɛ, ben à ń kɛ̃kↄ̃a. 31Kɛ̀ gbɛ̃nↄↄ è swãdoonↄↄ e yã oo, gbɛ̃ kↄ̃̀ↄkũnanↄↄ e gↄ̃ↄ wásawasa, ɛrɛnↄↄ e táa oo, vĩ̀anↄↄ e guu ee, yã pì bↄ̀ ń saɛ, ben aↄ̃ Isarailinↄ Luda sáabu kpà.

Yesu pↄ́blekpana gↄ̃ↄn bↄrↄ siigↄ̃ↄnↄa

(Maa 8:1-10)

32Yesu a ìbanↄ sìsiazi à bèńnɛ: Gbɛ̃ kɛ̀nↄ kɛ̀mɛ wɛ̃nda, zaakɛ aↄ̃ gĩakɛ wà kúmao gurↄ aagↄ̃, ben aↄ̃ↄ pↄ́ke vĩ wà blero. Má yezi mà ń gbarɛ kↄ̃n nↄaaoro, lɛ guu tón liḿma zɛ́nlo yãnzi. 33Ben a ìbanↄ à là wà bè: Mákpan wé pↄ́blee en sɛ̃̀tɛ pↄ̀rↄtu kɛ̀, à parii kɛ̀ taka kãa? 34Ben Yesu ń lá à bè: Burɛdi mɛ̀n ũgban á vĩi? Aↄ̃ bè: Mɛ̀n swɛɛplaamɛ kↄ̃n kpↄ̀ kete kenↄ. 35Ben à bè parii vɛ̃ɛ tↄↄtɛ. 36Ben à burɛdi mɛ̀n swɛɛplaaa pìnↄ sɛ̀ kↄ̃n kpↄ̀nↄ, à sáabu kɛ̀, ben à lìlikↄ̃rɛ à kpà a ìbanↄa, aↄ̃ↄ kpà gbɛ̃nↄa. 37Baade píngi pↄ́ blè wà kã̀. Wà à kpaaa kɛ̀ gↄ̃̀nↄ sɛ̀ɛ ai gbíi swɛɛplaaa pà. 38Gↄ̃gbɛ̃ kɛ̀ aↄ̃ pↄ́ blènↄ kà gↄ̃ↄn bↄrↄ siigↄ̃, nↄgbɛ̃nↄ kↄ̃n nɛ́nↄ baasi. 39Kɛ̀ Yesu gbɛ̃nↄ gbàrɛ, ben à gɛ̃̀ góro'itɛ guu, à gàa Magadã bùsun.

اکنون انتخاب شده:

MATIU 15: BBB

های‌لایت

کپی

مقایسه

به اشتراک گذاشتن