NAANA 29
29
Yakubu kana Labã bɛ
1Yakubu ɛ̀ara à dà zɛ́n à gàa ↄfãntɛ̃bↄɛkpadeenↄ bùsun. 2Kɛ̀ à kà gwe, à lↄ̀gↄ è sɛ̃̀n sã kpàsa lɛo aagↄ̃ kaɛna à saɛ, zaakɛ lↄ̀gↄ pì ín wè kpáḿma. Gbɛ̀ bíta tatana lↄ̀gↄ pìlɛ. 3Tó kpàsa pìnↄ kàkↄ̃a gwe píngi, ben wè gbɛ̀ pì go lↄ̀gↄ pìlɛ wà í kpáḿma, ben wè ɛara wà gbɛ̀ pì tataàlɛ a gbɛ̀n. 4Ben Yakubu sãdãrinↄ là à bè: Gbɛ̃nↄ, a bↄ mámɛ? Aↄ̃ wèàla wà bè: Wa bↄ Aranamɛ. 5Ben à ń lá à bè: Á Nao dio Labã dↄ̃ↄ́? Aↄ̃ wèàla wà bè: Wá à dↄ̃. 6Ben à ń lá à bè: À aafiaↄ́? Aↄ̃ bè: À aafia. Ǹ à nɛ́ Rasɛli gwa, èe mↄↄ kↄ̃n sãanↄ kãaa. 7Ben Yakubu bè: Ɔfãntɛ̃ kpɛ́ gbãa, sãanↄ tágurↄↄ e ká kↄ̀ro. À í kpáḿma à gá ń dã. 8Ben aↄ̃ bè: Wé fↄ̃ro. Tó èe kɛ sã kpàsanↄ kàkↄ̃a píngi baasiro, wè gbɛ̀ go lↄ̀gↄ pìlɛ wà í kpáḿmaro.
9Kɛ̀ èe yã oońnɛ lɛ, Rasɛli mↄ̀ kↄ̃n a de sãanↄ, zaakɛ sãdãrin à ũ. 10Kɛ̀ Yakubu a desɛ̃ Labã nɛ́nↄgbɛ̃ Rasɛli è kↄ̃n à de sãanↄ, à sↄ̃̀ lↄ̀gↄzi à gbɛ̀ gò lↄ̀gↄ pìlɛ, ben à í kpà a desɛ̃ sãanↄa. 11Ben à lɛ́ pɛ̀ Rasɛlia à pↄnna ↄ́ↄ dↄ̀. 12Ben à ònɛ kɛ̀ à de danɛ Rɛbɛka nɛ́n a ũ. Ben Rasɛli bàalɛ à gàa à ò a denɛ. 13Kɛ̀ Labã a dãre nɛ́ Yakubu baaru mà, à bàalɛ à gàa daàlɛ. Kɛ̀ à kà, ben à kùsia à lɛ́ pɛ̀a à tào a bɛ. Ben Yakubu yã kɛ̀ kɛ̀nↄ ònɛ píngi. 14Ben Labã bènɛ: Ma arumɛ n ũ yãpura.
Yakubu Lea kↄ̃n Rasɛlio sɛna
Yakubu kɛ̀ Labã bɛ mↄ do, 15ben Labã bènɛ: Kɛ̀ ń dɛ ma danɛ ũ yãnzin nɛ́ zĩi kɛmɛ pãↄ́? Dia mɛ́ fĩa bonnɛ nà ǹ omɛ. 16Labã sↄ̃ nɛ́nↄgbɛ̃nↄ vĩ gↄ̃ↄn plaa. Yↄ̃ↄ tↄ́n Lea, Bãa sↄ̃ Rasɛli. 17Lea wɛ́ɛ busana, Rasɛli sↄ̃ↄ nↄkparɛ maaamɛ, ben à kakana maa. 18Yakubu ye Rasɛlizi, ben à bè Labãnɛ: Mɛ́ zĩi kɛnnɛ wɛ̃̀ swɛɛplaa n nɛ́ bãade Rasɛli yãnzi. 19Labã bè: À sã̀ↄ mà à kpámma dɛ mà à kpá gbɛ̃ pãndeala. Ǹgↄ̃ kú ma bɛ kɛ̀.
20Ben Yakubu zĩi kɛ̀nɛ wɛ̃̀ swɛɛplaa Rasɛli yãnzi, ase à kɛ̀nɛ lán gurↄ plaaa bàmɛ kɛ̀ à yezi yãnzi. 21Ben à bè Labãnɛ: Kɛ̀ ma zĩ gurↄↄ pàpa, ǹ ma nↄↄ kpáma mà sɛ́. 22Ben Labã gwedeenↄ kàkↄ̃a ń píngi à nↄsɛpↄblee kɛ̀ńnɛ. 23Kɛ̀ uusiɛ kɛ̀, ben à a nɛ́ Lea sɛ̀ à kpàa, ben Yakubu dàɛo. 24Labã a nↄgbɛ̃ zĩkɛri Zilipa kpà Leaa zĩkɛri ũ. 25Kɛ̀ guu dↄ̀ Yakubu è Leamɛ, ben à bè Labãnɛ: Bↄ́yãnzi ń kɛ̀mɛ lɛɛ? Rasɛli yãnzin ma zĩi kɛ̀nnɛziroo? Bↄ́ bé à tò n ma kɛkɛ? 26Labã bè: Wa kiia wè Bãa kpá gↄ̃ↄa Yↄ̃ↄ ãro. 27Ǹ azuma doo kɛ kↄ̃n gbɛ̃ beeeo gĩa, mɛ́ à gbɛ̃ndoo kpámma zĩi kɛ̀ nɛ́ ɛara ǹ kɛmɛ wɛ̃̀ swɛɛplaa pãnde pↄ́ ũ. 28Yakubu wèzi à azuma doo pì kɛ̀ kↄ̃n Leao, ben Labã a nɛ́ Rasɛli kpàa nↄↄ ũ. 29Labã a nↄgbɛ̃ zĩkɛri Bila kpà Rasɛlia zĩkɛri ũ. 30Yakubu dàɛ kↄ̃n Rasɛlio sↄ̃, ben à yezi dɛ Leala. Ben à ɛ̀ara à zĩi kɛ̀ Labãnɛ ai wɛ̃̀ swɛɛplaa dↄ.
Yakubu nɛ́nↄ
31Dii è Yakubu ye Leaziro, ben à à kɛ̀ nɛ́dandee ũ, Rasɛli sↄ̃ pãaamɛ. 32Lea nↄ̀ sì à nɛ́ ì gↄ̃gbɛ̃ ũ, ben à tↄ́ kpànɛ Rubɛni, zaakɛ à bè: Dii ma nawɛ̃akɛna gwà. Ma zã égↄ̃ yemazi sa. 33Kɛ̀ à nↄ̀ sì dↄ, à nɛ́ ì gↄ̃gbɛ̃ ũ, ben à bè: Dii mà ma zã yemaziro, ben à ɛ̀ara à nɛ́ kɛ̀kii kpàma dↄ. Ben à tↄ́ kpànɛ Simɛↄ. 34Kɛ̀ à ɛ̀ara à nↄ̀ sì dↄ, à nɛ́ ì gↄ̃gbɛ̃ ũ à bè: Kɛ̀kii sa ma zã é ma diɛkii ero, zaakɛ ma nɛ́gↄ̃gbɛ̃ ìo mɛ̀n aagↄ̃. Ben à tↄ́ kpànɛ Levi. 35À ɛ̀ara à nↄ̀ sì dↄ à nɛ́ ì gↄ̃gbɛ̃ ũ à bè: Kɛ̀kii sa ma Dii sáabu kpà, ben à tↄ́ kpànɛ Yuda. Ben à nɛ́'ii zɛ̀.
اکنون انتخاب شده:
NAANA 29: BBB
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bokobaru Bible with New Testament and OT Portions © Sim International, 2005.