Sɑkɑri 2
2
1Sɑkɑri u nɔni seeyɑ mɑ u mɑɑ kɔbi nnɛ wɑ. 2Mɑ u gɔrɑdo wi u kɑ nùn gɑri mɔ̀ bikiɑ u nɛɛ, kɔbi yirɑ̀ mini.
Mɑ u nùn wisɑ u nɛɛ, kɔbi yi yi Yudɑbɑ kɑ Isirelibɑ kɑ Yerusɑlɛmugibu yɑrinɑsiɑwɑ mi.
3Yen biru, Yinni Gusunɔ u mɑɑ nùn sekobu nnɛ sɔ̃ɔsi. 4Mɑ u nùn bikiɑ u nɛɛ, mbɑ seko be, bɑ kobu nɑ.
Mɑ u nùn wisɑ u nɛɛ, bɑ nɑwɑ bu kɑ kɔbi yi tɔ̃yɑ ko, kpɑ bu yi bɔɔku yi, yi yi Yudɑn tem wɔri yi mɛn tɔmbu yɑrinɑsiɑ sere ben goo kun kpĩɑ u kɑ tii yinɑ.
Sɑkɑri u wɛ̃ɛ wɑ kɑ̃siru sɔɔ
5Ye Sɑkɑri u mɑɑ mɛɛrɑ, yerɑ u durɔ goo wɑ u wɛ̃ɛ yĩirutii nɛni. 6Mɑ u nùn bikiɑ u nɛɛ, mɑnɑ ɑ dɔɔ.
Mɑ u wisɑ u nɛɛ, nɑ dɔɔwɑ n Yerusɑlɛmu yĩire n kɑ yen dɛ̃ɛbu kɑ yen yɑsum wɑ.
7Sɑnɑm mɛ Gusunɔn gɔrɑdo wi u kɑ nùn gɑri mɔ̀, u susim wee, yerɑ gɔrɑdo goo u mɑɑ nɑ u kɑ wiɔnɔ yinnɑ. 8Mɑ u nùn sɔ̃ɔwɑ u nɛɛ, ɑ dukɑ doo ɑ ɑluwɑɑsi wi sɔ̃ ɑ nɛɛ, Yerusɑlɛmu yɑ koo ko wuu gè bɑ ǹ mɑɑ gbɑ̃rɑru toosimɔ. Domi gen tɔmbu kɑ gen yɑɑ sɑbenu koo dɑbiɑ. 9Yinni Gusunɔ u mɑɑ nɛɛ, u ko n sɑ̃ɑ nge gbɑ̃rɑ dɔ̃ɔgiru Yerusɑlɛmu yen sɔ̃. Mɛyɑ u ko n mɑɑ sɑ̃ɑ yen bɛɛrɛ.
Yinni Gusunɔ u be bɑ rɑɑ
kpikiru dɑ soku
10Sɑkɑri u nɛɛ,
Yinni Gusunɔ u geruɑ u nɛɛ,
bɛɛ be u rɑɑ yɑrinɑsiɑ hɑnduniɑn goonu nnɛ ye sɔɔ,
i wurɑmɑ.
I seemɑ i wurɑmɑ sɑɑ sɔ̃ɔ yɛ̃sɑn nɔm geu giɑn di.
11Bɛɛ Yerusɑlɛmugibu, bɛɛ be i yoru dimɔ Bɑbiloniɔ,
i kisirɑmɑ.
12Domi wi, Gusunɔ wɔllu kɑ tem Yinni u nɛɛ,
yenibɑn biru,
Yerusɑlɛmun bɛɛrɛ yɑ koo wurɑmɑ.
Wee u mɑn gɔriɔ bwese ni nu bɛɛn yɑ̃nu gurɑn mi.
U nɛɛ, nù n mɑɑ bɛɛ bɑbɑ,
yɑ sɑ̃ɑwɑ nge win tiin nɔniyɑ nu bɑbɑ.
13Wee u koo nu nɔmɑ doke
kpɑ nu gɔsiɑ bɛɛn yobu.
Sɑɑ ye sɔɔrɑ nu koo giɑ mɑ Gusunɔ, wɔllu kɑ tem Yinniwɑ u mɑn gɔrimɑ.
14Wiyɑ u nɛɛ, bɛɛ Yerusɑlɛmugibu, i nuku dobun kuuki koowo.
Domi u koo nɑ u n kɑ bɛɛ wɑ̃ɑ.
15Bwese dɑbinɑ nu koo wurɑ wi, Yinni Gusunɔn mi giɑ yen tɔ̃ɔ te,
kpɑ nu ko win tɔmbu,
kpɑ u n wɑ̃ɑ kɑ be.
Sɑɑ ye sɔɔrɑ i ko i giɑ mɑ wi, Gusunɔ wɔllu kɑ tem Yinniwɑ u mɑn gɔrimɑ.
16U ko n mɑɑ Yudɑ mɔ tem dɛɛrɑm mɛ sɔɔ.
U koo mɑɑ Yerusɑlɛmu gɔsi.
17Bɑɑwure u koo nɔɔ mɑri Yinni Gusunɔn wuswɑɑɔ.
Domi u koo seemɑ win wɑ̃ɑ yee dɛɛrɑrun di.
Sɑkɑri u yɑ̃ku kowo wɑ
kɑ̃siru sɔɔ
اکنون انتخاب شده:
Sɑkɑri 2: BB2005
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.