MAAKU 9

1Akũ à pìńnɛ: Yãpuran matɛn oárɛ, gbɛ̃kenɔ kú la kũ oni garo ari ò kína kũ Luda kà e, àtɛn su kũ gbãnao.

Yesu linaa

(Mat 16:24-17:13; Luk 9:23-36)

2Gɔrɔ suddo gbɛra Yesu Pita kũ Yamisio kũ Yuhanao sɛ̀ à dìdi kũńwo kpi leia ńtɛ̃nɛ. Akũ à lì ń wára, 3a pɔ́kasanɔ tɛn tɛ́ kɛ púu táitai. Gbɛ̃ke kú andunia gũn kũ ani fɔ̃ à a pura kũ lɛro. 4Akũ Iliasu kũ Musao bò ò sùḿma, òtɛn yã o kũ Yesuo. 5Akũ Pita pì Yesunɛ: Dannɛri, à mana kũ ó kú la. Ò kuta dɔ mɛ̀n aakɔ̃, n pɔ́ mɛ̀n do, Musa pɔ́ mɛ̀n do, Iliasu pɔ́ mɛ̀n do. 6À dɔ̃ yã kũ átɛn oro, zaakũ vĩna ń kũ manamana. 7Ludambɛ luku kìpa à dàńla, akũ ò kòtoo mà a gũn à pì: Àkũmɛ ma Nɛ́ mɛ̀n do légelege yenyĩde ũ. À a yã ma. 8Kãnto kũ ò gu gwàgwa, odi gbɛ̃ke e doro, sé Yesu ado.

9Kũ òtɛn kipa kpi pìia, akũ Yesu pìńnɛ òsun yã kũ ò èe pì o gbɛ̃ke maro ari Bisãsiri Nɛ́ vuna gan. 10Ò yã pì kũna, ama òtɛn kɔ̃ lala òtɛn pi: Vuna gan yã bire de deramɛɛ? 11Akũ ò a là ò pì: Bɔ́ yã mɛ́ à tò ludayãdannɛrinɔ dì pi Iliasu mɛ́ ani su káakuu? 12À wèḿma à pì: Iliasu ni su káaku yãpuramɛ, ani yã sĩnda pínki kɛkɛ a gbɛ̀n, ama à kɛ̀ dera ò kɛ̃̀ Luda yãn ò pì, Bisãsiri Nɛ́ ni wɛ́tãmma le manamana ari ò gíii? 13Ama matɛn oárɛ Iliasu sù kɔ̀, akũ ò kɛ̀nɛ ń pɔyeinaaamɛ, lákũ ò a yã ò Luda yãn nà.

Yesu nɛ́gɔ̃gbɛ̃ tãnade werekɔ̃anaa

(Mat 17:14-21; Luk 9:37-42)

14Kũ ò sù ń gbɛ̃ kparanɔ kĩnaa, ò è pari likańyĩ, ludayãdannɛrinɔ tɛn lɛ́kpakɔ̃a kɛ kũńwo. 15Kũ pari Yesu è, a yã bò ń sarɛ, akũ ò bàa lɛ̀ ò gɛ̀ɛ ò fɔ kpàa gɔ̃̀nɔ ń pínki. 16Akũ à a ìbanɔ là à pì: Bɔ́ lɛ́kpakɔ̃an átɛn kɛ kũńwo lɛɛ? 17Akũ gɔ̃gbɛ̃ ke wèa zàa gũn à pì: Dannɛri, ma sunnɛ kũ ma nɛ́omɛ, tãna mɛ́ à a nɛ́nɛ nàtɛ. 18Tó à dìdia, àdi a pãtɛ zĩtɛ, àdigɔ̃ lɛ́'ifuta bɔtɛ, àdigɔ̃ saka só, àdi gbãgbã sɔ̀rɔrɔ. Ma pì n ìbanɔnɛ ò pɛ́ tãna pìia à bo, akũ ò fùa. 19Akũ Yesu pìńnɛ: Gbãragbɛ̃ ludanaanikɛrisarinɔ! Manigɔ̃ kú kãáo ari bɔrɛmɛɛ? Manigɔ̃ mɛna kãáo ari bɔrɛmɛɛ? À mɔ́mɛnɛ kũ nɛ́ pìio la.

20Kũ ò sùnɛ kãao, kũ tãna pì Yesu è gɔ̃̀nɔ, akũ à nɛ́ pìi yĩ̀gãyĩgã à a pã̀tɛ zĩtɛ bèn. Akũ àtɛn gbigiri kɛ àtɛn lɛ́'ifuta bɔtɛ. 21Yesu nɛ́ pì de là à pì: Zaa bɔrɛmɛ à kúo lɛɛ? À wèa à pì: Zaa a nɛ́ fíti zĩmɛ. 22Àdigɔ̃ a zu tɛ́ kũ ío gũn baala'i, àdigɔ̃ ye à a dɛ. Tó ĩni fɔ̃ ǹ pɔ́ke kɛ ǹ ó wɛ̃nda gwa, ǹ kpáwái. 23Yesu pìnɛ: N pì, tó mani fɔ̃ yá? Bee pɔ́ sĩnda pínki dì sí kɛ gbɛ̃ kũ à ma náani vĩnɛ. 24Akũ nɛ́ pì de wiki lɛ̀ gɔ̃̀nɔ à pì: Má n náani vĩ. Ǹ n náani kũ àtɛn kĩama karamɛnɛ. 25Kũ Yesu è zà tɛn nakaraḿma, à gì tãna pìinɛ à pì: Tãna sãto kpáturuku, ma ònnɛ ǹ go nɛ́ pìia. Ǹsun gɛ̃ a gũn doro. 26Akũ tãna pì wiki lɛ̀ à a yĩ̀gã pãsĩpãsĩ, akũ à gòa. Nɛ́ pìi gɔ̃̀ wútɛna lán gɛ̀ɛ bà ari gbɛ̃ daside pì à gàmɛ. 27Akũ Yesu a kũ̀ a ɔa à a fùtɛ à zɛ̀.

28Kũ Yesu gɛ̃̀ ɔnn, akũ a ìbanɔ a gbɛ̀ka gusarɛ ò pì: À kɛ̀ dera ódi fɔ̃ ò pɛ́ tãna pìia à boroo? 29Akũ à wèḿma à pì: Adi taka dì sí boro, sé kũ aduakɛnaao.

Yesu ɛra à a ga kũ a vunaao yã'onaa

(Mat 17:22-23; Luk 9:43-45)

30Kũ ò bò gwe, akũ ò pã̀ Galilinɛ. Yesu ye ògɔ̃ a kúki dɔ̃ro, 31zaakũ àtɛn yã da a ìbanɔnɛmɛ. À pìńnɛ: Oni Bisãsiri Nɛ́ na gbɛ̃nɔnɛ ń ɔĩ ò a dɛ, a gɔrɔ aakɔ̃de zĩ ani futɛ. 32Odi a yã pìi dɔ̀rɔ dɔ̃ro, akũ vĩna ń kũ ò yã pì gbɛkaa.

Tɛna Yesui lán nɛ́ fíti bà

(Mat 18:1-9; Luk 9:46-50)

33Akũ ò kà Kapɛnamu. Gɔrɔ kũ à kú bɛ, à a ìbanɔ là à pì: Bɔ́ lɛ́kpakɔ̃an átɛn kɛ zɛ́ gũnn? 34Akũ ò yĩtɛna, zaakũ òtɛn lɛ́kpakɔ̃a kɛ zɛ́ gũn deńla yã musumɛ. 35Akũ à vùtɛ à gbɛ̃nɔn kuri awɛɛpla pìnɔ sìsiai à pì: Tó gbɛ̃ ye à kɛ gbɛ̃ káaku ũ, ade gɔ̃ gbɛ̃ kpɛde ũ, àgɔ̃ gbɛ̃ sĩnda pínkinɛ zĩ̀ri ũ. 36À nɛ́ fíti sɛ̀ à a zɛ̀ ń arɛ, akũ à a sɛ̀ à a kpà a kùla à pìńnɛ: 37Gbɛ̃ kũ à nɛ́ dínɔ do sì ma ìbakɛ yãi, makũmɛ à sì. Gbɛ̃ kũ à ma si sɔ̃, makũmɛ à sì madoro, gbɛ̃ kũ à ma zĩn à sì.

Gbɛ̃ kũ adi ibɛrɛ kpá kũooro bi ó gbɛ̃mɛ

(Luk 9:49-50)

38Akũ Yuhana pìnɛ: Dannɛri, o gbɛ̃ke è, àtɛn tãnanɔ goḿma kũ n tɔ́o, akũ o ginɛ, zaakũ ó gbɛ̃nlo. 39Akũ Yesu pì: Àsun gínɛro, zaakũ gbɛ̃ke ni fɔ̃ à daboyã kɛ kũ ma tɔ́o à ɛra à ma tɔ́ vãni sí doro. 40Gbɛ̃ kũ adi ibɛrɛ kpá kũooro bi ó baakpɛmɛ. 41Yãpuran matɛn oárɛ, gbɛ̃ kũ à á gba ímina kũ á kun Kirisi pɔ́ ũ yãi, ade ni kura a láadairo.

42Tó gbɛ̃ tò nɛ́ kũ ò ma náani vĩ dínɔ doke sã̀tɛ, anigɔ̃ sã̀na adenɛ ò wísilɔgbɛ zɔ̃kɔ̃ dɔ a wakalɛ ò a zu sɛ̀bɛɛ gũn. 43-44Tó n ɔ mɛ́ àdi tó ǹ fu, ǹ zɔ̃ ǹ zukũna. À sã̀nannɛ ǹ gɛ̃ wɛ̃̀ndii gũn kũ ɔ kusuo de n gɔ̃ kũ ɔ mɛ̀n plaola ǹ gɛ̃ tɛ́ kũ àdi garo gũn gyãwãn. 45-46Tó n gbá mɛ́ àdi tó ǹ sãtɛ, ǹ zɔ̃ ǹ zukũna. À sã̀nannɛ ǹ gɛ̃ wɛ̃̀ndii gũn ɛrɛ ũ de n gɔ̃ kũ gbá mɛ̀n plaola ò n zu tɛ́n. 47Tó n wɛ́ mɛ́ àdi tó ǹ fu, ǹ bo. À sã̀nannɛ ǹ gɛ̃ kpata kũ à bò Luda kĩnaa gũn kũ wɛ́ doo de n gɔ̃ kũ wɛ́ mɛ̀n plaola ò n zu tɛ́n, 48gu kũ ń kɔ̀kɔbirii dì lákaro, tɛ́ pìi dì garo.

49Tɛ́ ni mɛ̀ ũ gbɛ̃ sĩnda pínkia lákũ òdi pɔ́ kɛkɛ kũ wisio nà. 50Wisi bi pɔ́ manamɛ, ama tó a nna tà, deran oni kɛ nà à gɔ̃ wisi ũ dɔɔ? À tó wisi gɔ̃ kú á gũn, ánigɔ̃ nna kũ kɔ̃o.

اکنون انتخاب شده:

MAAKU 9: BB2005

های‌لایت

کپی

مقایسه

به اشتراک گذاشتن