MAAKU 7

Futɛokarayã

(Mat 15:1-9)

1Farisinɔ kũ ludayãdannɛri kũ ò bò Yurusalɛmu kenɔ sù Yesu kĩnaa, 2akũ ò è a ìba kenɔ tɛn pɔ́ ble ɔpipinaa sari. 3Zaakũ Farisinɔ kũ Yudanɔ ń pínki ń dizinɔ futɛokarayã kũnamɛ, òdi pɔ́ ble ɔpipina a zɛ́a sariro. 4Tó ò bò ɛtɛn ò sù, òdi pɔ́ ble zú'onaa sariro. Ò futɛokarayã pãndenɔ kũna dasi. Lɛmɛ òdi tokonɔ kũ lonɔ kũ butanɔ pípi lɛ. 5Akũ Farisinɔ kũ ludayãdannɛrii pìnɔ Yesu là ò pì: Bɔ́yãi n ìbanɔ dìgɔ̃ ó dizinɔ futɛokarayã kũnaroo? Òdi pɔ́ ble ɔpipinaa sari. 6Yesu wèḿma à pì: Isaya annabikɛyã ò á manafikidenɔ yã musu swáswa lákũ à kɛ̃̀ Luda yãn nà à pì:

Buri bire dì bɛ̀ɛrɛ limɛnɛ kũ lɛ́omɛ,

ń swɛ̃̀ kúmaro.

7Òdigɔ̃ donyĩ kɛmɛnɛ pãmɛ,

bisãsiri yãzɛkpatɛn òdi dańnɛ.

8A pã kpà Luda yãdannɛnaai, akũ á bisãsiri futɛokarayã kũna. 9Akũ à pìńnɛ dɔ: A pã Luda yãnɛ de à le àgɔ̃ á futɛokarayã kũna manan yá? 10Musa pì, àgɔ̃ á de kũ á dao bɛ̀ɛrɛ dɔ̃. À pì dɔ, gbɛ̃ kũ à a de ke a da kpe bò, ò ade dɛ. 11Ákɔ̃nɔ sɔ̃, adì pi tó gbɛ̃ pì a de ke a danɛ, pɔ́ kũ á vĩ à ń kpe tao bi Kɔɔbãmɛ, 12à zɛ́ vĩ à a de kũ a dao kpe tao doro. Kɔɔbãmɛ pɔ́ kũ òdi kpá Ludaa ũ. 13Lɛmɛ adì Luda yã kɛ pã lɛ á futɛokarayã kũ adì dańnɛ yãi. Yã bire takanɔn adì kɛ dasi.

Yã kũ àdi tó ògɔ̃ gbãsĩ

(Mat 15:10-20)

14Akũ Yesu ɛ̀ra à pari sìsiai à pì: À sã kpá à ma yã ma á pínki. 15Pɔ́ke kun kũ àdi gɛ̃ gbɛ̃ gũn kũ àdi a gbã̀ lɛ́ro. Pɔ́ kũ àdi bo gbɛ̃ gũn mɛ́ àdi tó àgɔ̃ gbãsĩ. 16Gbɛ̃ kũ à sã vĩ, à yã pì ma. 17Kũ à pari tò gwe à tà bɛ, akũ a ìbanɔ a là yã pìi mìii. 18À pìńnɛ: Á laasun kpɛ́ yĩda se yá? Kũ pɔ́ke kun kũ àdi gɛ̃ gbɛ̃ gũn à tó àgɔ̃ gbãsĩro, á dɔ̃roo? 19Pɔ́ pìi dì gɛ̃ a swɛ̃̀ɛ gũnlo, sé a gbɛrɛn, gbasa à bo mɛ̀n. Lɛn Yesu pɔ́ble sĩnda pínki kɛ̀ blena pɔ́ ũ lɛ tɛ̃̀ɛ sari. 20Akũ à pì: Yã kũ àdi bo gbɛ̃ gũn mɛ́ àdi tó àgɔ̃ gbãsĩ. 21Zaakũ zaa bisãsiri swɛ̃̀ɛ gũn laasun vãni dì bon: Pãpãkɛnaa, kpãni'onaa, gbɛ̃dɛnaa, zinakɛnaa, 22wãkũu, nɛ̀sɛvãni, manafiki, wé'isariyã, sãnkara, gbɛ̃sɔ̃sɔ̃naa, karambaani kũ mìsariyão. 23Yã vãni pìnɔ dì bo swɛ̃̀ɛ gũn pínki, àkũ mɛ́ àdi tó gbɛ̃ gɔ̃ gbãsĩ.

Nɔgbɛ̃ zĩ̀tɔ Yesu náanikɛnaa

(Mat 15:21-28)

24Yesu bò gwe à gɛ̀ɛ Taya bùsun, akũ à kìpa bɛ kea. À ye ò a dɔ̃ro, ama adi le à a zĩda ùtɛro. 25Nɔgbɛ̃ kũ a nɛ́nɔkpare tãna vĩ Yesu baaruu mà, akũ à sù à wùtɛ a arɛ gɔ̃̀nɔ. 26Nɔgbɛ̃ pì sɔ̃ Giriki gbɛ̃mɛ ò a ì Siria Fenisia bùsun. À wɛ́ kɛ̀ Yesua de à tãna goarɛ a nɛ́a. 27Akũ Yesu pìnɛ: Ǹ tó ò pɔ́ble kpá nɛ́nɔa gĩa, zaakũ à mana ò nɛ́nɔ pɔ́ble sɛ́ ò zu gbɛ̃danɔnɛro. 28Akũ nɔgbɛ̃ pìi wèa à pì: Dikiri, bee gbɛ̃da kũ òdi wútɛńyĩnɔ dì nɛ́nɔ pɔ́ble bùru sɛ́sɛ. 29Yesu pìnɛ: Kũ n yãwenama mana yãi, ǹ tá, n nɛ́ tãna gòa. 30Kũ à kà bɛ, à a nɛ́ lè wútɛna pɛ̀ɛa, tãna pìi gòa.

Sãto werekɔ̃anaa

31Akũ Yesu fùtɛ Taya bùsun à gɛ̀ɛ Sidɔ̃, akũ à bɔ̀tɛ kũ Wɛ̃tɛmɛnkuri bùsuuo ari à gɛ̀ɛ à kà Galili sɛ̀bɛɛi. 32Akũ ò sùnɛ kũ sãto bebekariio, ò wɛ́ kɛ̀a de à ɔ naa. 33Yesu bò pari gũn kũ sãto pìio à a ɔnɛterere pɛ̀pɛ a sãn. Kũ à lɛ́'i sù, akũ à ɔ nà sãto pì nɛ́nɛa. 34À wɛ́ sɛ̀ musu à wesa kàkara à bò, akũ à pìnɛ: Ɛfata. Yã pìi pì ǹ wɛ̃. 35Zaa gwe gɔ̃̀nɔ gɔ̃gbɛ̃ pì sã wɛ̃̀ a nɛ́nɛ fùtɛ, akũ à yã ò swáswa. 36Yesu pìńnɛ òsun o gbɛ̃ke maro, ama lákũ àtɛn gíńnɛ nà, lɛmɛ òtɛni a kpàkpa kɛńnɛ lɛ. 37Yã pìi bò ń sarɛ manamana à gɛ̃̀ onala, akũ ò pì: A yã sĩnda pínki kɛnaa dìgɔ̃ manamɛ. Àdi tó bee sãtonɔ yã ma, akũ àdi tó bebekarinɔ yã o.

اکنون انتخاب شده:

MAAKU 7: BB2005

های‌لایت

کپی

مقایسه

به اشتراک گذاشتن