MAAKU 12

Geepi líkpɛ arukɛrinɔ

(Mat 21:33-46; Luk 20:9-18)

1Akũ Yesu fùtɛ àtɛn yãlɛkɔ̃ańnɛ à pì: Gbɛ̃ke mɛ́ à geepi líkpɛ bà à karaa lìkai, à wɛ̀ɛɛ yɔ̃̀ geepi'ifɛ̃ki ũ à búdãkpãgbaa kɛ̀, akũ à bú pìi nà arukɛrinɔnɛ ń ɔĩ, akũ à fùtɛ kũ táo. 2Kũ geepizɔ̃gɔrɔ kà, akũ à a zĩ̀rii zĩ̀ arukɛrii pìnɔa de à a geepi nɛ́ sí. 3Akũ arukɛrii pìnɔ a kũ̀ ò a gbɛ̃̀, ò a gbàrɛ ɔkori. 4Akũ à ɛ̀ra à zĩ̀ri pãnde zĩ̀ dɔ. Akũ ò gbɛ̃ bire lɛ̀ a mìia ò wé'i dàa. 5A ɛ̀ra à gbɛ̃ pãnde zĩ̀ dɔ, akũ ò gbɛ̃ bire dɛ̀. Lɛn à gbɛ̃ pãndenɔ zĩ̀ lɛ dasi, ò ń gbɛ̃kenɔ gbɛ̃̀ ò ń gbɛ̃kenɔ dɛ̀. 6À nɛ́gɔ̃gbɛ̃ mɛ̀n do yenyĩde mɛ́ à gɔ̃̀nɛ sà, akũ à a zĩ̀ zã à pì: Oni ma nɛ́ yã da. 7Akũ arukɛrii pìnɔ pìkɔ̃nɛ: Túbibleriimɛ dí. À tó ò a dɛ, a túbi ni gɔ̃ ó pɔ́ ũ. 8Akũ ò a kũ̀ ò a dɛ̀, akũ ò a gɛ̀ɛ sɛ̀ ò bòo bura gũn. 9Tɔ̀! Bɔ́n burade pì ni kɛɛ? Ani su à arukɛrii pìnɔ dɛdɛ à bura pì na gbɛ̃ pãndenɔnɛ ń ɔĩ. 10Ádi Luda yã dí kyó kɛroo?

Gbɛ̀ kũ kpɛ́borinɔ pã kpài

mɛ́ à gɔ̃̀ kpɛ́ kusuru gbɛ̀ mìde ũ.

11Dikiri mɛ́ à abirekũ kɛ̀,

akũ à kɛ̀wɛrɛ yãbonsarɛ ũ.

12Akũ ò zɛ́ wɛ̀tɛ ò a kũ, zaakũ ò dɔ̃̀ kũ ń yãin à yãlɛkɔ̃anaa pìi ò, ama ò vĩna kɛ̀ parinɛ, akũ ò a tò gwe ò tà.

Bɛ'ɔgɔkpana Sizaa yã

(Mat 22:15-22; Luk 20:20-26)

13Akũ ò Farisi kenɔ kũ Hɛrɔdu gbɛ̃nɔ zĩ̀ Yesu kĩnaa kũ ɔ̃ndɔ̃o, de ò a kũ a yã'onaa gũn. 14Kũ ò kà, akũ ò pìnɛ: Dannɛri, ó dɔ̃ kũ gbɛ̃ yãpurademɛ n ũ. Ndì gbɛ̃ wɛ́ gwaro, ndì gbɛ̃ gwena gwaro, ndì Luda zɛ́ dańnɛ súsu. À zɛ́ vĩ ò bùsu'ɔgɔ kpá Sizaa yá, ke à zɛ́ vĩro? Ò kpáan yá, ke òsun kpáaro? 15Yesu ń manafikikɛ dɔ̃̀ḿma, akũ à pìńnɛ: Bɔ́yãin átɛni ń lɛ́ átɛn gwaa? À mɔ́ kɔ̃n ɔgɔ pì doo mà gwa. 16Kũ ò kpàa, akũ à pìńnɛ: Dí mì wãnzãn dí kũ a tɔ́oo? Ò wèa ò pì: Siza pɔ́mɛ. 17Akũ Yesu pìńnɛ: À pɔ́ kũ à de Siza pɔ́ ũ kpá Sizaa, à pɔ́ kũ à de Luda pɔ́ ũ kpá Ludaa. A yã bò ń sarɛ.

Gɛ̀nɔ vuna yã

(Mat 22:23-33; Luk 20:27-40)

18Akũ Sadusi kũ òdi pi gɛ̀nɔ dì vuronɔ sù Yesu kĩnaa, ò a gbɛ̀ka ò pì: 19Dannɛri, Musa òwɛrɛ a takada gũn à pì, tó gbɛ̃ gà à a nanɔ tòn nɛ́'isari, a dakũna gyaanɔ pì sɛ́, de à nɛ́ buri dato a vĩ̀ninɛ. 20Tɔ̀! Dedokɔ̃nɔnɔn kun gbɛ̃nɔn suppla. Woru nɔ sɛ̀, akũ à gà nɛ́'isari. 21Akũ Sabi nɔ pìi sɛ̀ dɔ, akũ à gà à nɔ pìi tò nɛ́'isari. Akũ Biɔ kɛ̀ lɛ dɔ 22ari à gɛ̀ɛ à pɛ̀ ń suppladea. Ń pínki ò gà nɛ́'isari. Ń pínki gbɛran nɔ pìi gà se. 23Gɛ̀nɔ vuna gɔrɔ zĩ ń dí mɛ́ anigɔ̃ nɔ pì vĩi? Zaakũ ń gbɛ̃nɔn suppla ń pínki ò a dɔ̃̀ nɔ ũmɛ. 24Akũ Yesu wèḿma à pì: Á Luda yã kũ a gbãnao dɔ̃nasari yãin a sãtɛroo? 25Tó gɛ̀nɔ fùtɛ, oni nɔ sɛ́ro, oni zã kɛro, onigɔ̃ kun lán malaikanɔn kun nà ludambɛmɛ. 26Gɛ̀vuna yã musu, ádi Musa takada kyó kɛroo? Gu kũ à lɛ̀kara yã òn Luda pìnɛ akãamɛ Ibrahĩ kũ Isaakuo kũ Yakubuo Luda ũ. 27Luda dì kɛ gɛ̀nɔ Luda ũro, gbɛ̃ bɛ̃nɛnɔ Ludamɛ a ũ. A sãtɛ à kɛ̀ zɔ̃kɔ̃.

Dokayã kũ à deńla

(Mat 22:34-40; Luk 10:25-28)

28Ludayãdannɛri ke kú gwe, à lɛ́kpakɔ̃a kũ òtɛn kɛ mà. Kũ à è Yesu yã wèḿma manamana, akũ à nài à a là à pì: Dokayã kpate mɛ́ à de a kparanɔla pínkii? 29Yesu wèa à pì: Yã kũ à deńlan dí: Isarailanɔ à sã kpá. Dikiri ó Ludamɛ Dikiri ũ ado. 30Ǹgɔ̃ ye Dikiri n Ludai kũ nɛ̀sɛ mɛ̀n doo kũ n ninio pínki kũ n laasunnwo pínki n gbãna lɛ́n. 31A pladen dí: Ǹgɔ̃ ye n gbɛ̃dakei lán n zĩda wɛ̃̀ndii bà. Dokayã ke de abirenɔlaro. 32Akũ ludayãdannɛrii pìi pìnɛ: Yã manamɛ, dannɛri. N yãpura ò, n pì Luda mɛ̀n domɛ, a pãnde kunlo, sé àpii. 33Yena Ludai kũ nɛ̀sɛ mɛ̀n doo kũ n laasunnwo pínki n gbãna lɛ́n kũ yena n gbɛ̃dakei lán n zĩda wɛ̃̀ndi bàao de sa'opɔ kũ òdi ká tɛ́n à tɛ́ kũla kũ sa'ona buri sĩnda pínkio. 34Kũ Yesu è à yã wèawa kũ laakariio, à pìnɛ: Gɛ̃na kpata kũ bò Luda kĩnaa gũn zã̀ kũnworo. Zaa gɔrɔ birea gbɛ̃ke dí sù a yãke laa doro.

Arumasihu buri yã

(Mat 22:41-46; Luk 20:41-44)

35Yesu ɛ̀ra àtɛn yã dańnɛ Luda ɔnn, akũ à gbɛ̃nɔ là à pì: À kɛ̀ dera ludayãdannɛrinɔ dì pi Dauda burin Arumasihu ũu? 36Kũ Luda Nini dìdi Daudaa, à pì:

Dikiri pì ma dikirinɛ à vutɛ a ɔplai

ari àgɔ̃ a ibɛrɛnɔ kátɛnɛ a gbá gbáru.

37Lákũ Dauda pìnɛ Dikiri ũ, à kɛ̀ dera anigɔ̃ de a buri ũ dɔɔ?

Ludayãdannɛrinɔ kũ Farisinɔ manafiki

(Mat 23:1-36; Luk 20:45-47)

Akũ pari tɛni a yã ma kũ pɔnnao. 38A yãdannɛnaa gũn à pì: À laakari kɛ ludayãdannɛrinɔi. Òdigɔ̃ ye kurenaai kũ uta zɔ̃kɔ̃nɔ dana, de ògɔ̃ fɔ kpákpaḿma ɛtɛnɔa. 39Òdigɔ̃ wɛtɛ ò vutɛ aduakɛkpɛ vutɛki mananɔ gũn kũ dikpɛ vutɛki mananɔ. 40Òdi adua gbã̀na kɛ de gbɛ̃nɔ ń e yãi, akũ òdi gyaanɔnɔ kpɛ́ síḿma. Ń wɛ́tãmma nigɔ̃ pãsĩpãsĩ de gbɛ̃ sĩnda pínki pɔ́la.

Gyaanɔ takaside gba

(Luk 21:1-4)

41Akũ Yesu vùtɛ Luda ɔnn ɔgɔdakia arɛ, àtɛn gbɛ̃nɔ gwa lákũ òtɛn ɔgɔ dan nà. Ɔgɔdasidenɔ tɛn ɔgɔ zɔ̃kɔ̃ dan. 42Akũ gyaanɔ takaside sù à kɔbɔ pla dàn, adi ká sisiro. 43Akũ Yesu a ìbanɔ kàkara à pìńnɛ: Yãpuran matɛn oárɛ, gyaanɔ takaside dí ɔgɔ dà ɔgɔdaki gũn de gbɛ̃ sĩnda pínkila. 44Zaakũ ń ɔgɔ dasi gũnn ò bòn ò kàn ń pínki. Nɔgbɛ̃ dí sɔ̃, a takasikɛ gũnn pɔ́ kũ à vĩ à pɔ́ bleon à dàn pínki.

اکنون انتخاب شده:

MAAKU 12: BB2005

های‌لایت

کپی

مقایسه

به اشتراک گذاشتن