MATIU 9

Kɔ̃̀nɔde werekɔ̃anaa

(Maa 2:1-12; Luk 5:17-26)

1Yesu gɛ̃̀ gó gũn, à ɛ̀ra à sɛ̀bɛ bikũ̀ à kà a bɛ wɛ̃tɛa. 2Akũ gbɛ̃kenɔ mɔ̀nɛ kũ kɔ̃̀nɔdeo wútɛna gyãresɛbɔn. Kũ Yesu è ò a náani vĩ, akũ à pì kɔ̃̀nɔde pìinɛ: Ma gbɛ̃, ǹ laakari kpátɛ! N durunnanɔ kɛ̃̀mma. 3Ludayãdannɛri kenɔ kú gwe, akũ ò ò ń nɛ̀sɛɛ gũn ò pì: Gbɛ̃ bire tɛn dɔkɛ kũ Ludaoomɛ. 4Yesu ń laasun dɔ̃, akũ à ń lá à pì: Bɔ́yãi átɛn laasun vãni lɛ́ á nɛ̀sɛɛ gũnn? 5Tó ma pì, a durunnanɔ kɛ̃̀a, ke tó ma pì à futɛ à táa o, a kpate mɛ́ à aragaa? 6Ma ò lɛ de àgɔ̃ dɔ̃ kũ Bisãsiri Nɛ́ durunnanɔ kɛ̃mmana iko vĩ zĩtɛ lamɛ. Akũ à pì kɔ̃̀nɔde pìinɛ: Ǹ futɛ ǹ n wútɛbɔ sɛ́ ǹ tá bɛ. 7Akũ à fùtɛ à tà bɛ. 8Kũ pari è lɛ, vĩna ń kũ, ò Luda kũ à iko bire taka kpà bisãsirinɔa tɔ́ bò.

Matiu sisinaa

(Maa 2:13-17; Luk 5:27-32)

9Yesu bò gwe, àtɛn gɛ̃tɛ, akũ à gbɛ̃ kũ òdi pi Matiu è vutɛna a bɛ'ɔgɔsikpɛn. À pìnɛ: Ǹ mɔ́ ǹ tɛ́mai. Akũ à fùtɛ à tɛ̀i. 10Kũ Yesu tɛn pɔ́ ble a bɛa, bɛ'ɔgɔsirinɔ kũ kifirinɔn kú gwe dasi, òtɛn pɔ́ ble kãao kũ a ìbanɔ lɛɛlɛ. 11Kũ Farisinɔ è lɛ, akũ ò a ìbanɔ là ò pì: Bɔ́yãi á dikiri tɛn pɔ́ ble kũ bɛ'ɔgɔsirinɔ kũ kifirinɔoo? 12Kũ Yesu yã pìi mà à pì: Gbɛ̃ kũ à aafia vĩ bàka kú kũ likita yãoro, sé gyãre. 13À gɛ́ à laasun lɛ́ yã kũ à kɛ̃na Luda yãn bire mìia ò pì: Kɔ̃ wɛ̃ndagwanaan má yei, adi kɛ sa'onaanlo. Mádi su gbɛ̃ mananɔ sísiro, sé kifirinɔ.

Lɛ́yĩnaa

(Maa 2:18-22; Luk 5:33-39)

14Akũ Yahaya Da'itɛkɛri ìbanɔ sù ò Yesu là ò pì: À kɛ̀ dera ókɔ̃nɔ kũ Farisinɔ odì lɛ́ yĩ, akũ n ìbanɔ dì yĩ sɔ̃roo? 15Akũ Yesu yã lɛ̀kɔ̃ańnɛ à pì: Nɔsɛri gbɛ̃nɔ ni pɔsira kɛ gɔrɔ kũ à kú kũńwo nɔsɛ gũn yá? Oi, ama a gɔrɔ ni su kũ oni nɔsɛrii pì bo ń tɛ́, gbasa ò lɛ́ yĩ sà. 16Gbɛ̃ke dì uta zĩ nambata na kũ pɔ́lɛ dufuoro, zaakũ a dufu ni sɔ̃kũn à kɛ̃kɔ̃rɛ, uta zĩ fɔ̃na ni kara. 17Òdi sèwɛ̃ dufu ká tùru zĩ gũnlo. Tó ò kɛ̀ lɛ, tùru ni pũtãmɛ, wɛ̃ pì ni kɔ́tɛ, tùru ni wíwi. Oi, òdi sèwɛ̃ dufu ká tùru dufu gũmmɛ, onigɔ̃ mana ń pínki.

Nɛ́nɔkpare vuna kũ nɔgbɛ̃ kũ à ɔ nà Yesu utaaao

(Maa 5:21-43; Luk 8:40-56)

18Gɔrɔ kũ Yesu tɛn yã birenɔ ońnɛ, gbãnade ke sù à kùtɛ a arɛ à pì: Ma nɛ́nɔgbɛ̃ gà tera dí. Ǹ mɔ́ ǹ ɔ naa, anigɔ̃ kú wɛ̃̀ndiio. 19Akũ Yesu fùtɛ à tɛ̀i kũ a ìbanɔ.

20Nɔgbɛ̃ ke kú gwe, aru dì bɔtɛa à kà wɛ̃̀ kuri awɛɛpla. À sù à ɔ nà Yesu uta lɛ́a a kpɛ kpa. 21Zaakũ à pì: Bee tó ma ɔ nà a utaa dé, mani werekɔ̃a. 22Yesu lìtɛ à a è, akũ à pì: Ǹ n laakari kpátɛ, nɔgbɛ̃! Ma náani kũ n kɛ̀ mɛ́ à n werekɔ̃a. Gwe gɔ̃̀nɔ nɔgbɛ̃ pì wèrekɔ̃a.

23Kũ Yesu kà gbãnade pì bɛa, à è òtɛn kutɛ pɛ́, pari kĩni dɔ. 24Akũ Yesu pì: À á zĩda gá. Nɛ́ pì dí garo, àtɛn i omɛ. Akũ òtɛn a lalandi kɛ. 25Kũ ò pɛ̀ gbɛ̃nɔa ò bɔ̀tɛ bàai, akũ Yesu gɛ̃̀ kpɛ́n, à nɛ́ pìi kũ̀ a ɔa, akũ à fùtɛ. 26Akũ yã pì baaruu dà bùsuu pìla pínki.

Vĩ̀nanɔ werekɔ̃anaa

27Kũ Yesu bò gwe, vĩ̀na gbɛ̃nɔn planɔn tɛ́i kũ wikio òtɛn pi: Ǹ ó wɛ̃nda gwa, Dauda buri! 28Kũ Yesu kà bɛ, vĩna pìnɔ nài, akũ à ń lá à pì: Á ma náani vĩ kũ mani fɔ̃ mà yã pì kɛárɛ yá? Ò wèa ò pì: Lɛmɛ, Dikiri. 29Akũ à ɔ nà ń wɛ́a à pì: Àgɔ̃ deárɛ lákũ a ma náani kɛ̀ nà. 30Akũ ń wɛ́ gu è. Yesu kpã̀kɛ̃ńyĩ à pì: Àsun o gbɛ̃ke maro. 31Bee kũ abireo ò gɛ̀ɛ ò a baaruu dàgula bùsuu pìn pínki.

Nɛ́nɛnatɛnade werekɔ̃anaa

32Gɔrɔ kũ vĩ̀nanɔ tɛn bɔtɛ, ò sù Yesunɛ kũ tãnade kũ a nɛ́nɛ natɛnaao. 33Kũ Yesu tãna pìi gòa, akũ à yã ò. Yã pìi bò pari sarɛ ò pì: Ódi yã bire taka e Isarailanɔ bùsun yãro. 34Akũ Farisinɔ pì: Àdi tãna goḿma kũ tãnanɔ kína gbãnaomɛ.

Yesu wɛ̃ndadɔ̃na gbɛ̃nɔnɛ

35Yesu gɛ̀ɛ wɛ̃tɛnɔa kũ lakutunɔ pínki, à yã dàńnɛ ń aduakɛkpɛnɔ gũn, à kpata kũ à bò Luda kĩnaa baaru nna kpàńnɛ, à gyãrenɔ wèrekɔ̃a ń pínki kũ gbãnasaridenɔ ń pínki. 36Kũ à pari è, akũ ò kɛ̀nɛ wɛ̃nda, zaakũ ò kú bídin, ò lìkara lán sã kũ ò dã̀ri vĩronɔ bà. 37Akũ Yesu pì a ìbanɔnɛ: Pɔ́kɛ̃na zɔ̃kɔ̃, ama zĩkɛrinɔn dasiro. 38À wɛ́ kɛ Buradea de à zĩkɛrinɔ gbarɛ ò a pɔ́nɔ kɛ̃.

اکنون انتخاب شده:

MATIU 9: BB2005

های‌لایت

کپی

مقایسه

به اشتراک گذاشتن