MATIU 25
25
Nɔkpare gbɛ̃nɔn kurinɔ
1Gɔrɔ birea kpata kũ à bò Luda kĩnaa nigɔ̃ de lán nɔkpare gbɛ̃nɔn kuri kũ ò ń fitilanɔ sɛ̀ ò bòo, òtɛn gɛ́ da nɔsɛrilɛ bàmɛ. 2Ń gbɛ̃nɔn sɔɔronɔ bi yɔ̃nkɔnɔmɛ. Ń gbɛ̃nɔn sɔɔronɔ sɔ̃ laakaridenɔmɛ. 3A yɔ̃nkɔnɔ ń fitilanɔ sɛ̀ nísi zànaa sari, 4a laakaridenɔ sɔ̃ ò ń fitilanɔ sɛ̀ kũ nísi zànaao. 5Nɔsɛri dí su likalikaro, akũ i ń sɛ́ ń pínki, òtɛn i o. 6Lizãndo ò wiki lɛ̀: Nɔsɛri tɛn su! À futɛ à gɛ́ daalɛ. 7Akũ nɔkpare pìnɔ vù ń pínki, ò ń fitilanɔ kɛ̀kɛ. 8Akũ yɔ̃nkɔnɔ pì laakaridenɔnɛ: À ó gba nísi fíti sàee! Ó fitila tɛn ga bi! 9Akũ laakaride pìnɔ wèḿma ò pì: Ani mɔ́wá kãáo pínkiro. À gɛ́ à á pɔ́ lú a yìarinɔ kĩnaa. 10Kũ ò gɛ̀ɛ lú, akũ nɔsɛrii kà. Gbɛ̃ kũ ń soru kɛ̀nɔ gɛ̃̀ kãao nɔsɛ gũn, akũ ò gbàa tàta. 11Kũ à kɛ̀ saa nɔkpare kpara pìnɔ sù, òtɛn lɛ́ zu: Dikiri, Dikiri! Ǹ zɛ wɛ̃wɛrɛ! 12Akũ à wèḿma à pì: Yãpuran matɛn oárɛ, má á dɔ̃ro. 13Abire yãi á wɛ́ gɔ̃ dɔ, zaakũ á a gɔrɔ ke a gɔrɔ zaka dɔ̃ro.
Ɔgɔdakɛna zĩkɛrinɔnɛ
(Luk 19:11-27)
14Kpata kũ à bò Luda kĩnaa de lán gbɛ̃ kũ àtɛn gɛ́ wɛ̃tɛaa bà, akũ à a zĩkɛrinɔ sìsi, à a aruzɛkɛ nàńnɛ ń ɔĩ. 15À ɔgɔda kɛ̀ ń gbɛ̃ donɛ sɔ̃̀nɔ sɔɔro, gbɛ̃ plade sɔ̃̀nɔ pla, gbɛ̃ aakɔ̃de sɔ̃̀nɔ do, ń baadi gbãna lɛ́n, akũ à gɛ̀ɛ wɛ̃tɛa. 16Sɔ̃̀nɔsɔɔrode gɛ̀ɛ à laga tà kũ ɔgɔ pìio gɔ̃̀nɔ, akũ à àree lè sɔ̃̀nɔ sɔɔro. 17Sɔ̃̀nɔplade kɛ̀ lɛ dɔ, akũ à àree lè sɔ̃̀nɔ pla. 18Sɔ̃̀nɔdode sɔ̃ à gɛ̀ɛ à wɛ̀ɛ yɔ̃̀, akũ à a dikiri ɔgɔ pìi ùtɛn. 19Gɔrɔ pla gbɛra zĩkɛrii pìnɔ dikirii sù, akũ àtɛni a ɔgɔ yã gɔ̃gɔ̃ kũńwo. 20Sɔ̃̀nɔsɔɔrode sù kũ sɔ̃̀nɔ sɔɔro pãnde kũ à lèeo à pì: Dikiri, ǹ sɔ̃̀nɔ sɔɔro kũ n kpàma gwa, à àree kàramɛnɛ sɔ̃̀nɔ sɔɔro dɔ. 21Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zɔ̃kɔ̃ nannɛ n ɔĩ sà. Ǹ gɛ̃ ma pɔnnakɛnaa gũn. 22Sɔ̃̀nɔplade sù dɔ à pì: Dikiri, ǹ sɔ̃̀nɔ pla kũ n kpàma gwa, à àree kàramɛnɛ sɔ̃̀nɔ pla dɔ. 23Akũ a dikirii pìnɛ: N kɛ̀ zĩkɛri mana náanide! Lákũ ń náani vĩ kũ a fítio nà, mani a zɔ̃kɔ̃ nannɛ n ɔĩ sà. Ǹ gɛ̃ ma pɔnnakɛnaa gũn. 24Akũ sɔ̃̀nɔdode sù sà à pì: Dikiri, má dɔ̃ kũ n yãnɔn zĩ'ũ. Ndì pɔ́ kɛ̃ gu kũ ńdi tɔ̃nlo. Ndì pɔ́ kakara gu kũ ńdi gbɛ̃nlo. 25Akũ vĩna ma kũ, ma gɛ ma n ɔgɔ ùtɛ wɛ̀ɛn. N pɔ́n dí. 26Akũ a dikirii pìnɛ: Zĩkɛri vãni ma'ãde! Ń dɔ̃ kũ madì pɔ́ kɛ̃ gu kũ mádi tɔ̃nlo, madì pɔ́ kakara gu kũ mádi gbɛ̃nloo? 27À mana yã n ɔgɔda kɛ̀o gbɛ̃kenɛ, de tó ma su, mà a pɔ́ sí kũ a ío. 28À sɔ̃̀nɔ do pì sía à kpá sɔ̃̀nɔsɔɔrodea. 29Zaakũ gbɛ̃ kũ à pɔ́ vĩn Luda ni karanɛ ari àgɔ̃ din. Gbɛ̃ kũ à vĩro sɔ̃, bee pɔ́ kũ à vĩ Luda ni síamɛ. 30Zĩkɛri pã dí sɔ̃, à a zu bàai gusiran. Gwen oni ɔ́ɔ dɔn ò ɔ di ń mìia.
Ziakpɛ zĩ yãkpatɛkɛnaa
31Tó Bisãsiri Nɛ́ sù a gakuri gũn kũ a malaikanɔ ń pínki, ani vutɛ a kíblegba gakuridea. 32Andunia burinɔ ni kakara a arɛ ń pínki, ani ń kɛ̃kɔ̃a, lákũ pɔ́dãrii dì sãnɔ kɛ̃kɔ̃a kũ blènɔ nà. 33Ani sãnɔ kpá a ɔplai, blènɔ sɔ̃ ɔzɛi. 34Abire gbɛra Kína pì ni pi gbɛ̃ kũ ò kú a ɔplainɔnɛ: Ákɔ̃nɔ kũ ma De arubarikaa dàágunɔ, à mɔ́ à kpata kũ à a soru kɛ̀árɛ zaa anduniakatɛna gɔrɔ ble. 35Zaakũ kũ nà tɛni ma dɛ, a pɔ́ble kpàma. Kũ ími tɛni ma dɛ, a í kpàma. Kũ má kun nibɔ ũ, a ma si. 36Kũ má kun punsi, a asiri tàmɛnɛ. Kũ matɛn gyã kɛ, a ma gwa. Kũ ò ma da kpɛ́siran, a su wɛ́ kpàtɛmai.
37Gbɛ̃ mananɔ ni pinɛ: Dikiri, bɔrɛn o è nà tɛni n dɛ o pɔ́ble kpàmma ke ími tɛni n dɛ, o í kpàmmaa? 38Bɔrɛn o n e nibɔ ũ o n si, ke ń kun punsi o asiri tànnɛɛ? 39Bɔrɛn o n e ntɛn gyã kɛ, ke ò n da kpɛ́siran o gɛ wɛ́ kpàtɛnyĩi? 40Kína pì ni weḿma à pi: Yãpuran matɛn oárɛ, yã kũ a kɛ̀ gbɛ̃ kĩanaanɛ ma gbɛ̃ dínɔ tɛ́, makũmɛ a kɛ̀mɛnɛ.
41Abire gbɛra ani pi gbɛ̃ kũ ò kú a ɔzɛinɔnɛ: À gomɛnɛ gwe ákɔ̃nɔ kũ Luda lɛ́ kɛ̀árɛnɔ! À tá tɛ́ kũ àdi garo kũ Luda kɛ̀kɛ Ibilisinɛ kũ a ìbanɔ gũn. 42Zaakũ nà tɛni ma dɛ, ádi pɔ́ble kpámaro. Ími tɛni ma dɛ, ádi í kpámaro. 43Má de nibɔɔ ũ, ádi ma síro. Má kun punsi, ádi asiri támɛnɛro. Matɛn gyã kɛ ke ò ma da kpɛ́siran, ádi su à wɛ́ kpátɛmairo. 44Oni gbasa ò a la ò pi: Dikiri, bɔrɛn o n e kũ nàao ke ímio ke nibɔ ũ ke punsi ke gyãre ke purusuna ũ, akũ ódi kpányĩroo? 45Kína ni weḿma à pi: Yãpuran matɛn oárɛ, lákũ ádi kɛ gbɛ̃ kũ à kĩanaanɛ gbɛ̃ dínɔ tɛ́ro nà, makũmɛ ádi kɛmɛnɛro. 46Gbɛ̃ birenɔ ni tá wɛ́tãmma kũ àdi lákaro gũmmɛ, gbɛ̃ mananɔ sɔ̃ wɛ̃̀ndi kũ àdi lákaro gũn.
اکنون انتخاب شده:
MATIU 25: BB2005
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.
