MATIU 22
22
Nɔsɛ pɔnnakɛnaa
(Luk 14:15-24)
1Yesu ɛ̀ra à yã lɛ̀kɔ̃ańnɛ à pì: 2Lákũ kpata kũ à bò Luda kĩnaa de nàn dí dɔ. Kína ke mɛ́ àtɛn nɔsɛ pɔnna kɛ a nɛ́nɛ, 3akũ à a zĩ̀rinɔ zĩ̀ ò o gbɛ̃ kũ à ń sísi ò mɔ́ pɔ́ blenɔnɛ ò mɔ́, ama ò ye ò suro. 4Akũ à ɛ̀ra à zĩ̀ri pãndenɔ zĩ̀ à pìńnɛ: À gɛ́ à o gbɛ̃ kũ ma ń sísinɔnɛ ma sorumii mà, ma zùsanɔ kũ pɔ́kãde mɛ̀kpananɔ dɛ̀ ma kɛ̀kɛ kɔ̀. Ò mɔ́ nɔsɛpɔblekia. 5Akũ odi laakari dɔ yã pìiaro, ń baadi gɛ̀ɛ a bɔkɔtɛ kɛ̀. Gbɛ̃kenɔ gɛ̀ɛ ń bura, gbɛ̃kenɔ gɛ̀ɛ laga tá. 6Gbɛ̃ kparanɔ zĩ̀rii pìnɔ kũ̀kũ, ò wé'i dàḿma, ò ń dɛdɛ. 7Akũ kína pì pɔ fɛ̃̀, à a sozanɔ gbàrɛ, ò gɛ̀ɛ ò gbɛ̃dɛrii pìnɔ dɛ̀dɛ, akũ ò tɛ́ sɔ̃̀ ń wɛ̃tɛa. 8Akũ kína pìi pì a zĩ̀rinɔnɛ: Nɔsɛpɔble mà, ama gbɛ̃ kũ ma ń sísinɔ dí kɔ̃ síoro. 9À gɛ́ zɛ́rankpakɔ̃anɔ gũn, à gbɛ̃ kũ a lè sĩnda pínki sísi nɔsɛpɔblea. 10Akũ zĩ̀rii pìnɔ fùtɛ ò gɛ̀ɛ zɛ́nɔ gũn, ò gbɛ̃ kũ ò ń lénɔ kàkara, gbɛ̃ vãninɔ kũ gbɛ̃ mananɔ ń pínki. Lɛn nɔsɛ pɔnnakɛrinɔ gu pà lɛ.
11Kũ kína pìi gɛ̃̀ à pɔnnakɛrii pìnɔ gwa, à gɔ̃gbɛ̃ ke è gwe, à nɔsɛ pɔnna uta danaro, 12akũ à pìnɛ: Ma gbɛ̃, à kɛ̀ dera n gɛ̃ la nɔsɛ pɔnna uta danaa sarii? Akũ à yĩtɛna kítikiti. 13Akũ kína pì a dogarinɔnɛ: À a ɔnɔ yĩ kũ a gbánɔ, à a zu bàai gusiran. Gwen oni ɔ́ɔ dɔn ò ɔ di ń mìia. 14Zaakũ gbɛ̃ kũ Luda ń sísinɔn dasi, ama gbɛ̃ kũ à ń sɛ́nɔn dasiro.
Bɛ'ɔgɔkpana Sizaa yã
(Maa 12:13-17; Luk 20:20-26)
15Abire gbɛran Farisinɔ bò ò gɛ̀ɛ ò yã gɔ̃̀gɔ̃ lákũ oni kɛ nà ò Yesu kũ a yã'onaa gũn. 16Akũ ò ń ìbanɔ zĩ̀a kũ Hɛrɔdu gbɛ̃nɔ ò pì: Dannɛri, ó dɔ̃ kũ gbɛ̃ yãpurademɛ n ũ. Ndì Luda zɛ́ dańnɛ súsu, ndì gbɛ̃ wɛ́ gwaro, ndì gbɛ̃ gwena gwaro. 17Lákũ n è nà ǹ owɛrɛ. À zɛ́ vĩ ò bɛ'ɔgɔ kpá Sizaa yá, ke à zɛ́ vĩro? 18Yesu ń nɛ̀sɛ vãni dɔ̃̀ḿma, akũ à pì: Manafikidenɔ! Bɔ́yãi átɛni ma yɔ̃ à gwaa? 19À ɔgɔ kũ òdi bɛ'ɔgɔ kpáo mɔmɛnɛ. Akũ ò ɔgɔ pì do kpàa. 20Akũ à ń lá à pì: Dí mì wãnzãn dí kũ a tɔ́oo? 21Ò wèa ò pì: Siza pɔ́mɛ. Akũ à pìńnɛ: Ɛ̃hɛ̃ à pɔ́ kũ à de Siza pɔ́ ũ kpá Sizaa, á pɔ́ kũ à de Luda pɔ́ ũ kpá Ludaa. 22Kũ ò yã pìi mà, à bò ń sarɛ, akũ ò tà ò a tò gwe.
Gɛ̀nɔ vuna yã
(Maa 12:18-27; Luk 20:27-40)
23Gɔrɔ dokɔ̃nɔ pì zĩ Sadusi kũ òdi pi gɛ̀nɔ dì ga à vuronɔ sù Yesu kĩnaa., akũ ò a gbɛ̀ka ò pì: 24Dannɛri, Musa òwɛrɛ tó gɔ̃gbɛ̃ gà nɛ́'isari, a dakũna a vĩ̀ni gyaanɔ sɛ́ de à nɛ́ buri dato a vĩ̀ninɛ. 25Tɔ̀. Dedokɔ̃nɔdenɔn kú ó tɛ́ yã gbɛ̃nɔn suppla. Woru nɔ sɛ̀, akũ à gà à nɔ pìi tò nɛ́'isari, akũ gyaanɔ gɔ̃̀ Sabinɛ. 26À kɛ̀ Sabinɛ lɛ dɔ kũ Biɔo ari à gɛ̀ɛ pɛ́ ń suppladea. 27Ń pínki gbɛran nɔ pìi gà se. 28Tɔ̀! Gɛ̀nɔ vuna gɔrɔ zĩ ń gbɛ̃nɔn suppla pìnɔ tɛ́ dí mɛ́ anigɔ̃ nɔ pì vĩi? Zaakũ ń pínki ò a dɔ̃̀ nɔ ũ. 29Akũ Yesu wèḿma à pì: A sãtɛ á Luda takada kũ a gbãnao dɔ̃naa sari yãi. 30Tó gɛ̀nɔ vù, ò nɔ sɛ́ro, ò zã kɛro, onigɔ̃ kun lán malaikanɔn kun nà ludambɛmɛ. 31Gɛ̀nɔ vuna yã musu ádi yã kũ Luda òárɛ kyó kɛroo? À pì 32akãamɛ Ibrahĩ kũ Isaakuo kũ Yakubuo Luda ũ. Luda dì kɛ gɛ̀nɔ Luda ũro, gbɛ̃ bɛ̃nɛnɔ Ludamɛ. 33Kũ gbɛ̃nɔ yã pìi mà, a yãdannɛnaa bò ń sarɛ.
Dokayã kũ à deńla
(Maa 12:28-34; Luk 10:25-28)
34Kũ Farisinɔ mà Yesu Sadusinɔ fù, ò kɔ̃ kàkara. 35Akũ ń dokadɔ̃rinɔ do a yɔ̃̀ à gwa, à a là à pì: 36Dannɛri, dokayã kpate mɛ́ à de a kparanɔlaa? 37Yesu wèa à pì: Ǹgɔ̃ ye Dikiri n Ludai kũ nɛ̀sɛ mɛ̀n doo kũ n ninio pínki kũ n laasunnwo pínki. 38Dokayã kũ à bɛ̀ɛrɛ vĩ de a kparanɔlan gwe. 39A plade kũ à bòkɔ̃aon dí: Ǹgɔ̃ ye n gbɛ̃dakei lán n zĩda wɛ̃̀ndii bà. 40Musa doka pínki kũ annabinɔ yãoo lokona dokayã mɛ̀n pla dínɔamɛ.
Arumasihu buri yã
(Maa 12:35-37; Luk 20:41-44)
41Lákũ Farisinɔ kakarana nà, Yesu ń lá à pì: 42A è dera Arumasihu yã musuu? Dí burin a ũu? Ò wèa ò pì: Dauda burimɛ. 43Akũ Yesu pìńnɛ: À kɛ̀ dera Luda Nini dìdi Daudaa, akũ Dauda Arumasihu sìsi Dikirii? À pì,
44Dikiri pì ma dikirinɛ à vutɛ a ɔplai
ari àgɔ̃ a ibɛrɛnɔ kátɛnɛ a gbá gbáru.
45Kũ Dauda pìnɛ Dikiri, à kɛ̀ dera anigɔ̃ de a buri ũ dɔɔ? 46Gbɛ̃ke dí fɔ̃ à wèaro. Zaa gɔrɔ birea gbɛ̃ke dí sù à yãke laa doro.
اکنون انتخاب شده:
MATIU 22: BB2005
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.
