MATIU 2

Susunɛyãdɔ̃rinɔ suna Yesu gwa

1Ò Yesu ì Bɛtilihamu Yudea bùsun kína Hɛrɔdu gɔrɔa. Akũ susunɛyãdɔ̃rinɔ bò ifãboki kpa, ò sù Yurusalɛmu, 2ò gbɛ̃nɔ là ò pì: Nɛ́ kũ ò ì Yudanɔ kína ũ kú máa? O a susunɛ è ifãboki kpa, akũ o su kútɛnɛ. 3Kũ kína Hɛrɔdu yã pìi mà, à bídi kɛ̀ kũ Yurusalɛmudenɔ ń pínki. 4À Yuda sa'orikinɔ kũ ludayãdannɛrinɔ kàkara ń pínki, akũ à ń lá gu kũ oni Arumasihu in. 5Ò wèa ò pì: Bɛtilihamumɛ zaa Yudea bùsun. Zaakũ lákũ annabii kɛ̃̀ nàn dí:

6Bɛtilihamu kũ à kú Yudanɔ bùsun,

ń kĩana Yuda wɛ̃tɛnɔiro fá.

Zaakũ n gũnn kína ni bon,

kũ ani do ma gbɛ̃ Isarailanɔnɛ arɛ.

7Akũ Hɛrɔdu susunɛyãdɔ̃rinɔ sìsi asiri gũn, à susunɛ pì bogɔrɔ sãnsãn gbɛ̀kaḿma. 8Akũ à ń gbarɛ Bɛtilihamu à pì: À gɛ́ à nɛ́ pì baaru gbɛkagbɛka kũ laakariio. Tó a a è, à su à omɛnɛ, makũ se, mani gɛ́ kútɛnɛ.

9Kũ ò kína yã mà, akũ ò dà zɛ́n. Akũ susunɛ kũ ò è ifãboki kpa yã pìi dòńnɛ arɛ dɔ ari à gɛ̀ɛ à zɛ̀ nɛ́ pì kúkila. 10Kũ ò susunɛ pìi è, ń pɔ kɛ̀ nna manamana. 11Ò gɛ̃̀ kpɛ́n, ò nɛ́ pìi è kũ a da Mariamao, akũ ò kùtɛ ò donyĩ kɛ̀nɛ. Akũ ò ń aruzɛkɛ àkpatinɔ wɛ̃̀wɛ̃, ò a gbà wura kũ turaretitio kũ lí'ɔ gbĩ nnannao. 12Luda òńnɛ nana gũn kũ òsun bɔtɛ Hɛrɔdu kĩnaaro, akũ ò tà ń bùsun kũ zɛ́ pãndeo.

Gɛna kũ Yesuo Misila

13Ń tanaa gbɛra Dikiri malaikaa bò à sù Yusufua nana gũn à pì: Ǹ futɛ ǹ nɛ́ pì sɛ́ kũ a dao, ǹ bàa lɛ́ ǹ gɛ́ kũńwo Misila, ĩnigɔ̃ kú gwe ari mà su mà yã onnɛ dɔ, zaakũ Hɛrɔdu ni nɛ́ pì wɛtɛ à dɛmɛ.

14Akũ Yusufu fùtɛ gwãani, à nɛ́ pìi sɛ̀ kũ a dao, à gɛ̀ɛ kũńwo Misila. 15À kú gwe ari Hɛrɔdu gɛ̀ɛ à gào. Abirekũ kɛ̀, de yã kũ Dikirii ò annabii gãi kɛ yãimɛ, à pì:

Ma a nɛ́ gbɛ̀sɛ Misila.

Nɛ́gɔ̃gbɛ̃nɔ dɛdɛnaa

16Kũ Hɛrɔdu è susunɛyãdɔ̃rinɔ ɔ̃ndɔ̃ kɛ̀arɛ, akũ a pɔ fɛ̃̀ manamana. À susunɛ bogɔrɔ taka dɔ̃ yã kũ à gbɛ̀ka susunɛyãdɔ̃rii pìnɔa yãi, akũ à gbɛ̃nɔ zĩ̀ ò nɛ́gɔ̃gbɛ̃ kũ ò kà wɛ̃̀ pla ke kũ ò kĩ̀ainɔ dɛ̀dɛ Bɛtilihamu kũ a buranɔ pínki. 17Yã kũ annabi Ilimia òo kɛ̀ sà, à pì:

18Ò wiki gbãna mà Rama,

òtɛn ɔ́ɔ dɔ, òtɛn wiki pɛ́.

Rahila tɛni a nɛ́nɔ ɔ́ɔ dɔ,

à gì ò a nɛ̀sɛ kpátɛi,

zaakũ ò kun doro.

Suna kũ Misilao

19Kũ Hɛrɔdu gà, akũ Dikiri malaika bò à sù Yusufua Misila nana gũn 20à pì: Ǹ futɛ ǹ nɛ́ pì sɛ́ kũ a dao, ǹ tá kũńwo Isarailanɔ bùsun, zaakũ gbɛ̃ kũ òtɛn wɛtɛ ò nɛ́ pì dɛnɔ gàga.

21Akũ à fùtɛ à nɛ́ pìi sɛ̀ kũ a dao, à tà kũńwo Isarailanɔ bùsun. 22Kũ à mà Akɛlau mɛ́ àtɛn kí ble Yudea a de Hɛrɔdu gɛ̃nɛ ũ, vutɛna gwe vĩna a kũ̀. Luda yã ònɛ nana gũn, akũ à tà Galili bùsun, 23à gɛ̀ɛ à vùtɛ wɛ̃tɛ kũ òdi pi Nazɛra gũn. Lɛn yã kũ annabinɔ òo pàpa, kũ ò pì: Oni a sísi Nazɛra gbɛ̃.

اکنون انتخاب شده:

MATIU 2: BB2005

های‌لایت

کپی

مقایسه

به اشتراک گذاشتن