LUKU 14
14
Yesu kunna Farisi ke bɛa
1Kámmabogɔrɔ ke zĩ Yesu gɛ̀ɛ pɔ́ ble Farisinɔ gbɛ̃ zɔ̃kɔ̃ ke bɛa, akũ gbɛ̃ kũ ò kú gwenɔ tɛni a kpákpa. 2Kákagyãkɛri ke kú Yesu arɛ gwe. 3Akũ Yesu dokadɔ̃rinɔ kũ Farisinɔ là à pì: Òdi gbɛ̃ werekɔ̃a kámmabogɔrɔ zĩ yá ke òdi werekɔ̃aro? 4Akũ ò gɔ̃̀ yĩtɛna kítikiti. Akũ Yesu gyãre pìi kũ̀, à a wèrekɔ̃a à a gbàrɛ. 5Akũ à ń lá à pì: Tó á gbɛ̃ke nɛ́ ke zù vĩ à zù lɔ̀gɔn kámmabogɔrɔ zĩ, ani a bo gɔ̃̀nɔroo? 6Odi fɔ̃ ò wèaro.
7Yesu è deran gbɛ̃ kũ ò ń sísinɔ tɛn vutɛki mana kũ nà, akũ à yã lɛ̀kɔ̃ańnɛ à pì: 8Tó ò n sisi nɔsɛ pɔ́blea, ǹsun vutɛ vutɛki mana gũnlo. Tó ò gbɛ̃ kũ à zɔ̃kɔ̃ denla sìsi bi! 9Tó á sìsirii sù à pìnnɛ: Ǹ futɛ ǹ vutɛki kpá gbɛ̃ pìia, ĩni futɛ ǹ gɛ́ vutɛ kpɛ kpa kũ wé'iomɛ. 10Tó ò n sisi, ǹgɔ̃ vutɛ kpɛ kpa, de tó n sìsirii sù, ani pinnɛ: Ma gbɛ̃nna, ǹ futɛ ǹ su arɛ la. Abirekũ ni n kɛ bɛ̀ɛrɛde ũ gbɛ̃ kũ á kú lɛɛlɛnɔ arɛ. 11Gbɛ̃ kũ àdi a zĩda karan Luda ni a busa. Gbɛ̃ kũ àdi a zĩda busa sɔ̃, Luda ni a kara.
12Akũ Yesu pì a sìsirii pìinɛ: Tó ntɛn gbɛ̃nɔ sísi pɔ́ble fãnantɛ̃ blenaaa ke ɔkɔsi pɔ́, ǹsun n gbɛ̃nnanɔ sísiro ke n vĩ̀ninɔ kũ n dakũnanɔ ke n danɛnɔ ke n ɔgɔde dakenɔ. Tó n kɛ̀ lɛ, oni ɛra ò n sísimɛ se ò fĩna bonnɛ. 13Tó ntɛn gbɛ̃nɔ sísi pɔ́blea, ǹ takasidenɔ sísi kũ kɔ̃̀nɔdenɔ kũ ɛrɛnɔ kũ vĩ̀nanɔ, 14arubarikadenɔmɛ á ũ, zaakũ ò pɔ́ke vĩ ò fĩna boonnɛro. Luda mɛ́ ani fĩna bonnɛ gbɛ̃ mananɔ vugɔrɔa.
Yãlɛkɔ̃ana kũ pɔ́ble dasio
(Mat 22:1-14)
15Kũ gbɛ̃ kũ ò kú lɛɛlɛnɔ doke yã pìi mà, akũ à pì Yesunɛ: Arubarikaden gbɛ̃ kũ ani pɔ́ ble kũ kpata kũ à bò Luda kĩnaa gbɛ̃nɔo ũ. 16Yesu pìnɛ: Gbɛ̃ke mɛ́ à ye à pɔ́ble kɛ, akũ à gbɛ̃nɔ sìsi dasidasi. 17Pɔ́blegɔrɔ zĩ à a zĩkɛrii zĩ̀ à o gbɛ̃ kũ à ń sísinɔnɛ ò su, ò pɔ́ sĩnda pínki soru kɛ̀ ò làka sà. 18Akũ ń baadi tɛn wɛtɛ ò ń kɛ̃. Gbɛ̃ káaku pìnɛ: Ma bú lù, mani gɛ́ gwa. N yã nna, ǹ ma kɛ̃. 19Gbɛ̃ pãnde pì: Ma zù búbabɔnɔ lù mɛ̀n kuri, mani gɛ́ ń gwa. N yã nna, ǹ ma kɛ̃. 20Gbɛ̃ pãnde pì: Ma nɔ sɛ̀ dufumɛ. A yã mɛ́ à tò mani le mà suro. 21Akũ zĩkɛrii pìi ɛ̀ra à tà, à ń lɛ́gbɛɛ ò a dikiriinɛ. Akũ bede pì pɔ fɛ̃̀, à pì a zĩkɛriinɛ: Ǹ gɛ́ wɛ̃tɛ gũn likalika gãnulɛanɔ kũ zɛ́danɔ, ǹ takasidenɔ kũ kɔ̃̀nɔdenɔ kũ vĩ̀nanɔ kũ ɛrɛnɔ kakara ǹ su kũńwo la. 22Abire gbɛra zĩkɛrii pìi sù à pìnɛ: Dikiri, ma yã kũ n òo kɛ̀, ama vutɛki kpɛ́ kun. 23Akũ dikirii pìi pì zĩkɛrii pìinɛ: Ǹ gɛ́ zɛ́nɔ gũn kũ zɛ́ térerenɔ pínki, ǹ gã na gbɛ̃nɔa ò gɛ̃, de ma ɔn pa. 24Matɛn oárɛ, gbɛ̃ kũ ma ń sísi pìnɔ ke ni lɛ́ zɔ̃ ma pɔ́ble pìiaro.
Gɔ̃na Yesu ìba ũ
(Mat 10:37-38)
25Ò tɛ́ zɛ́n kũ Yesuo dasidasi, akũ à lìtɛ à pìńnɛ: 26Tó gbɛ̃ sù ma kĩnaa, akũ à ye a dei demala ke a da ke a nanɔ ke a nɛ́nɔ ke a vĩ̀ninɔ ke a dakũnanɔ ke a zĩda, ani fɔ̃ à kɛ ma ìba ũro. 27Gbɛ̃ kũ adi a lígbãndurukpana sɛ́ àgɔ̃ tɛ́omairo, ade ni fɔ̃ à kɛ ma ìba ũro. 28Tó á gbɛ̃ke ye à kpɛ́didikɔ̃ana bo, ani vutɛ gĩa à a ɔgɔ dɔdɔ à gwa, tó ani fɔ̃ à zĩ pì kɛroo? 29Tó adi kɛ lɛro, akũ à ɛ̃ pɛ̀tɛ, tó adi fɔ̃ à a làkaro, gbɛ̃ kũ à è pínki ni a lalandi kɛ 30ò pi: Gbɛ̃ díkĩna nà kpɛ́bonaaa à fùa à a mì dɛ. 31Ke tó kína ke ye à gɛ́ zĩ̀ ká kũ kína pãndeo, ani vutɛ gĩa à a laasun lɛ́ à gwa, tó a soza gã̀ kurinɔ ni fɔ̃ ò kù kpá soza gã̀ baro kũ òtɛn sunɔaroo? 32Tó à è áni fɔ̃ro, ani zĩ̀rinɔ zĩ, de ò lɛ́dokɔ̃nɔkɛna yã gbɛkaa zaade adi ká kãniro. 33Lɛmɛ dɔ, tó á gbɛ̃ke dí ɔ gbarɛ pɔ́ kũ à vĩnɔi pínkiro, ani fɔ̃ à kɛ ma ìba ũro.
34Wisi bi pɔ́ nnamɛ, ama tó a í nna tà, deran oni kɛ nà à gɔ̃ nna dɔɔ? 35À mana zĩtɛ ke zùgbɔ̃katɛkinɛro, òdi kɔ́tɛmɛ. Gbɛ̃ kũ à sã vĩ à yã pì ma.
اکنون انتخاب شده:
LUKU 14: BB2005
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Bisã Bible © SIM International, 2005.
