Zak 7
7
Lɛ-sɔɔ mɛn bɛ́ a kɔɔ̃n Dɛnaa Lawa ganaa wa
1Dariyusu a kiibaa lɛ̀ siibaa ǹ wɔ li, a mui manangɔrɔbaa ǹ wɔ, ǹ bɛ́ ǹ mɛn lɛ bíi mà *Kisilə mui, bɛa lɛawaa siibaa ǹ wɔ li, Dɛnaa Lawa boo da Zakarii ni. 2-3Kii a dí-nyalin nyɛɛnaandɛnaa gole Betɛli Saresɛɛrɛ ná a minin dia mà ǹ Dɛnaa Lawa nyankɔ mà a n yɔrɔ bǐɛ̃ da ǹsɛn la, ǹ nɔ̀n kɛ da Dɛnaa Lawa Pàãyiidɛnaa a kion a Lawa a wúlu-bɔlen laanka Lawa a boo gii-dalin la: «Ma doamaa-n ma wuu pɛ, man lɛ sɔɔ haalɛ tɔn pelo yii ni lɛ̀ a mui soorobaa ǹ wɔ li ka ma bɛ́ má goã zɛnɛɛ lɔn haalɛ bibi#7.3 Bɛa lɛ-sɔɔ kɛ lɛ n Zeruzalɛmu kuĩ giala pii lɛ̀ 587 bɛ̀ Yezu tɔn yɛ wa.?» 4Dɛnaa Lawa Pàãyiidɛnaa boo kɛ da ma nɛ: 5«Boo da zaman tumaa nɛ ka Lawa a wúlu-bɔlen ne n pɛ ǹ nɛ:
A lɛ̀ pɔsɔbaa n ka kɛ nɛ,
ka nə n lɛ-sɔɔ,
ka n gɛ̀ loen loe,
mui sooro laanka a sɔbaabaa ǹ wɔ li.
Taãn nə n pɛ, ka n bɛa lɛ soɛ lɛ
zɛnɛɛ masɛ tɔ la?
6Bɛ̀ kaa màn bii ka n màn mii,
ka dinin là taman yii bie wa?»
7Lɛlɛ, Lawa a boo gii-dalin nə́ goã ǹ nə́ gɔn waa boon kɛn miãn da ka Dɛnaa Lawa tɔ nɛ. Bɛa biikoo li, Zeruzalɛmu laanka a lɛkoro-a kiwi tumaa goã yii-nyɛɛ la. Minin nə́ goã giã nɛ Negɛvu gána nɛ ka *Sefelaa gána kɛ nɛ. 8Dɛnaa Lawa Pàãyiidɛnaa boo da Zakarii ni á pɛ nɛ: 9«Dɛnaa Lawa Pàãyiidɛnaa n ke pii:
Ka kiri pepere wɔ,
ka goã min sonboren lɛa,
kɔn-narɛɛ n ka bii.
10Ka nyan mɛnaa
nɛ toen laanka lɔ giɔɔrɔ la wa,
tii laanka doobaa nɛ.
Ka nyan taasiɛ baraan wɔ kɔn a paǹ li wa.»
11Sɛnɛ, minin nə́ n piã ǹ nə n too kɔ wa. Ǹ nə́ n dɔ̀ɔ̃ wɔ, ǹ nə́ n toon tã màn mɛn bɛ́ toɛ ǹ nyan màn kɔn ma wa. 12Ǹ nə́ n foo kaka kɔ ka kɔlɔ bɛ́ lɔn. Ǹ nə́ n piã ka Dɛnaa Lawa Pàãyiidɛnaa a dí-pɛ laanka a boon ne, a ǹ mɛnɛn kɔ a lɛlɛ a Lawa a boo gii-dali la a din yiri barka nɛ. Bɛ lɛ nɛ, Dɛnaa Lawa Pàãyiidɛnaa foo yoo parsiini 13á pɛ:
«Ma bɛ́ máa ǹ ma bɔlɔ si,
ǹ nə n too kɔ wa.
A din yii goon ne,
bɛ̀ ǹ tá gú diɛ,
ma dɔ ba n too koe ǹ lon wa.
14Má ǹ sasawaa tɔrɔn bii,
ǹ bɛ́ ǹ ba ǹ mɛnɛn dinin doɛ̃ wa.
Ǹ goa lɛ kio,
ǹ gána lɛ yu.
Min kɔn ba woe walan wa,
min kɔn dɔ a boe a-n wa.
Bɛa gána kɔɔ̃n-kɔɔ̃n kɛ lɛ,
ǹ nə́ bɔyaa ǹ nə́ baa kɛbɔlɔ lɛa.»
اکنون انتخاب شده:
Zak 7: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.