LKK 8
8
1Aa! Toa bɛ̀ n nə ma
miãgiĩ lɛa dɛ!
Toa bɛ̀ ma n wɔa kion min lɛa dɛ!
Bɛ̀ má kaa n lɛ bǎã nɛ,
bɛ̀ ma bɛ́ re n soɛ n nɛ
minin yii ni,
min ná a boe la a ma tɔ pɛ wa.
2Bɛ̀ ma nə n kuĩ,
ma wo wɔ n nɛ maa náa a kion,
n ma daraa.
Bɛ̀ man duvɛ̃ gìĩ kɔɔ̃n koe n la,
n na a nɛ̀n da,
ka maa grenadie mu kɛ nɛ.
3Ma mìi na a gɔsɛ a gɔn la,
a nə́ n gusin talɛɛ ma-a.
4Zeruzalɛmu nɛlɔn lɛn,
ma gɛlɛɛ ka nɛ!
Ka baran bũ wa,
ka baran ma din foo dùũ
wɔ lɛ yii kaa,
bɛ̀ a ná a tɔn dɔ a din wɔ lɛ-a wa.
Loe sɔrɔbaa ǹ wɔ
(8.5-14)
Nɛlɔn man boo diɛ
5Lɔ mɛn nə ke
n toɛ diə gole li die,
paraa-n denden
a din foo dùũ wɔ gùrù ganaa?
Pàã mɛn bɛ́ kɔn-narɛɛ lon
Nɛniɛ lɛ n boo diɛ
Man má n yii kaa
pɔmu da kɛ giulun,
n dan bɛ́ á n nɔ̀ si bǎã mɛn lɛ nɛ,
a bɛ́ á n yɛ á n da kanaa
bǎã mɛn lɛ nɛ.
6Ma tɔ kiɛ̃ n foo ganaa,
toa n goã ma dinsɔɔ̃ nɛ,
a giala, kɔn-narɛɛ lɛ pàã n kaka.
N bɛ́ min mɛn narɛ,
a toɛ n nə ǹ dɛnaa toa walan wa.
Kɔn-narɛɛ n ka tɛ gigiri bɛ́ lɔn,
a ná a nimi wa.
7Mu dadaran ba boe
kɔn-narɛɛ a tɛ kɛ la, ǹ nimi wa.
Tà mun ba boe la ǹ bii wa.
Ta min mɛn nə
n gɔn màn tumaa siɛ,
mà a na a lonkoe
ka kɔn-narɛɛ nɛ,
a min kɔn din yii wa.
Sunɛmun nɛ lɛ miãgiĩn man boo diɛ
8Wɔ diɛ̃ nɛlɔ boɛɛn goon tan,
a nyɔn nə tɔn bɔ bɔrɔ wa.
Bɛ̀ tɔntɔraa daa bɔ
a kio ǹ mɛn waáraa,
wɔ n die wàa sii zɛnɛɛ
wɔ diɛ̃lɔ lɛ wɔ paǹ li?
9Bɛ̀ a na á daa yaa,
wɔ diɛ̃lɔ lɛ n kungɔn lɛa,
bɛ̀ wɔ n kanpiɛnɛn zɛnɛɛ
ka wɔrɔ nɛ a lalan.
Bɛ̀ a n kiɛnlɛ lɛa,
bɛ̀ wɔ n da kaka gɔn diɛ a kii la.
Nɛniɛ lɛ n boo diɛ
10Masɛ, man kungɔn lɛa.
Ma nyɔn kɛn man sanabolon lɛa.
Bɛ lɛ n ke á giɛ ma-a,
mà ma din na asɛ wɔ bǐɛ̃ koe.
Tɔntɔraa lɛ n boo diɛ
11Salomɔn a
*rezɛ̃ da wuru goon tá Baali-Hamɔn.
Á bɛa rezɛ̃ da wuru lɛ a gama
walan sii toa minin gɔn.
Bɛ̀ ǹ nə́ wuru lɛ a da nɛ sã,
ǹ gogoonmaa doamaa nɛ,
á n die ka wɔrɔ duu goon ne.
12Ma din gɔn tɔ rezɛ̃
da wuru lɛ n bii-a maa lɛa.
Haya! Salomɔn!
Duu goon lɛ nə n din wɔ lɛa,
min mɛnɛn bɛ́ giɛ da nɛ lɛ walan,
bɛn wɔ n biɛpaa.
13E! Nsɛ mɛn bɛ́ giã-n tán
dù gɔrɔ bii,
ma miãn tá n too diɛ n lɛn li,
toa ma n lɛ ma.
Nɛniɛ lɛ n boo diɛ
14Ma din foo dùũ wɔ,
n baa fufuu!
N baa fufuu ka
woree hinlaa ka yuùn ten bɛ́ lɔn,
da yon gìĩ kɔɔ̃n kelen kɛn la.
اکنون انتخاب شده:
LKK 8: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.