LKK 2
2
1Masɛ n nyankɔrɔ lɛ kɛ a
da buũ kooro lɛa,
man nyankɔrɔ basa kɛ a
da buũ kooro lɛa.
Tɔntɔraa lɛ n boo diɛ
2Da buũ bɛ́ siĩni,
á la nyɛn nɛ lɔn,
maa paa ǹ wɔ lɛ dɔ n siĩn miɛ̃,
á la nɛniɛ gialakunun kɛn manɛ.
Nɛniɛ lɛ n boo diɛ
3Ka da bɛ́ lɔn, a nɛ n kɔɔ̃nɛ
á la ǹ miãn wɔ nɛ,
ma din foo dùũ wɔ lɛ dɔ n soɛ
tɔntɔraa gialakunun kɛn man miɛ̃.
A wúlu a giã á kɔɔ̃n ma ganaa,
a nɛ kɔɔ̃n kɛ dɔ á kɔɔ̃n ma lɛ-n.
4Á woo ma nɛ là nyɛɛ ǹ bǎã nɛ,
á ná a kɔn-narɛɛ kuməə ma ganaa.
5Ka bǐɛ̃ kɔ ma-a
ka *rezɛ̃ da nɛ nɛ,
ka ma yii dɔraa ka da nɛ nɛ,
a giala kɔn-narɛɛ na á
busu baa ma ganaa.
6Ma mìi na a gɔsɛ a gɔn la,
a nə́ n gusin talɛɛ ma-a.#2.6 Min tɛn nə taasɛ mà nɛlɔ lɛ n tɔn boo diɛ.
Tɔntɔraa lɛ n boo diɛ
7Zeruzalɛmu nɛnɛn lɛn,
ma gɛlɛɛ ka nɛ!
Ma n ka nyankoe ka don woreen
laanka don a yuunun tɔ nɛ.
Ka baran bũ wa,
ka baran ma din foo dùũ
wɔ kɛ yii kaa,
bɛ̀ a ná a tɔn dɔ a din wɔ lɛ-a wa.
Loe paabaa ǹ wɔ
(2.8–3.5)
Nɛniɛ lɛ n boo diɛ: Ma din foo dùũ wɔ lɛ n die
8Ma din foo dùũ wɔ lɛ lɛ á boe!
Á ke yii die!
A n pipiɛ̃ kelen la,
paparɛ tentenen la,
9ka n pɛ mà woree
hinlaa yuùn ten ne.
Á ke, á n zɔ̃ á golee wɔa kikio.
A n giɛ ka fenɛtərə ne,
a nə n yii koe
ka fenɛtərə kokoon ne.
10Ma din foo dùũ wɔ lɛ
lɛ dia ma la,
á pɛ ma-n kɛnɛn:
«Yoo n daa, maa paa ǹ wɔ,
maa paa ǹ wɔ siĩni, yoo n da kiɛ̃.
11Ga, la nə́ n lɛ kũ,
bɔ̀nɔn nə́ n dɔ̀ɔ̃ kɔ.
12Gána lɛ nɛ,
dan man buũ lɛa tuutuu.
Màn tumaa a loe lɔ biikoo ne.
Wuruun lɛ á boe wɔa gána lɛ nɛ.
13Gɔ́rɔ nɛ burun tá a gialaa miɛ.
Rezɛ̃ dan man buũ lɛa,
ǹ gìĩ kɔɔ̃n kɛ nə́ n diɛ wɔlɔ la.
Maa paa ǹ wɔ siĩni,
yoo n da kiɛ̃.
14Maa paa ǹ wɔ,
nsɛ mɛn bɛ́ ka zɛrɛkantoan nə gɛ̀fu yala-n,
durii-n kele kɔ́sɔ nɛ,
da bɔ, ma n yɛ,
da bɔ, ma n bɔlɔ ma.
A giala n lɛn gɔ́ɔ̃ lɛ á kɔɔ̃nɛ,
n yɔrɔ dɔ á siĩn parɛ.»
Nɛniɛ lɛ dan nə boo diɛ
15Ka tolokan kɛn kũ ka ǹ kɔ,
toloka bisinin kɛn lɛn,
basaã koe rezɛ̃ dan manɛ.
A giala wɔa rezɛ̃ da lɛ n buu lɛa.
Nɛniɛ lɛ n boo diɛ
16Ma din foo dùũ wɔ lɛ n maa wɔ lɛa,
ma dɔ na a dɔ wɔ lɛa.
Da buũ bǎã n kɔɔ̃n a ganaa.
17Ma din foo dùũ wɔ,
wɔlɔ á pii mà a n fúli,
mà lɛ̀ n woe wɛɛ,
n bɔyaa n wo sɔnsɔn,
ka woree hinlaa yuùn ten bɛ́ lɔn,
baa sii Betɛɛrɛ#2.17 Min tɛnɛn man taasɛ mà bɛa kele kɛ lɛ n kele lɛa a n niɛ̃ n kɔn-a màn paa. kelen la.
اکنون انتخاب شده:
LKK 2: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.