Abd 1
1
1 #
Iza 34.5-17; 63.1-6; Zer 49.7-22; Eze 25.12-14; 35.1-15; Amɔ 1.11-12; Mal 1.2-5 Boon kɛn man Abdiasi a sii-yɛn lɛa Edɔmu minin wɔ paǹ li:
Á min dɔ din dia woe pii
gána kɔsɔ minin manɛ.
Wɔ boo mɛn ma
boe Dɛnaa Lawa li,
bɛ n ka kɛ nɛ:
«Ka yoo,
wɔ n ta kiwi lɛ gialaa ka zia nɛ.»
Dɔlɔ mɛn bɛ́ re n boe Edɔmu ganaa
2Edɔmu,
á ke man die n biɛ kiɛɛrɛ
tɔrɔ kɔsɔn bii,
n tìĩ á re boe ǹ ne taãn-taãnɛ.
3Táa n din-koa baraa
kɛ lɛ nə n yiri siɛ̃!
Nsɛ bɛ́ giã-n kele kɔ́sɔ nɛ,
n nə́ lon kelen lalan,
ma n taasɛ kəni:
«Die n boe la
a masɛ da gisĩ tán ganaa?»
4Haalɛ ta ma nə ń piɛ̃,
ń woo lon ka giogialatã-a bɛ́ lɔn,
á kɔɔ̃nɛ, n wo n kii dɔ
lon a leeren bii,
man die n boe walan,
ma n da tán!
Ma din Dɛnaa Lawa
a da ǹ boo ne.
5Wurumunun kɛn bɛ́ re die
kiɛ n li tèlò-n,
basaã-kɔlen kɛn bɛ́ re
kiɛ n li tèlò-n,
n tá re doɛ̃!
Ǹ bɛ́ re boe màn mɛn tumaa la,
maǹ die bɛ goɛ ǹ wo ne.
Rezɛ̃-nalin kɛn
ba re màn kɔn toɛ wa,
yǎa a nɛ gogoon dinsɔɔ̃.
6Sonbore, Ezawu tɔrɔ lɛn,
ǹ bɛ́ re ka biɛ lɔn, á ke:
Ka gɔn mànan mɛnɛn duru,
ǹ nə́ ke bɛn wɛɛ ǹ kiɛ fúlu-a.
7Ka bɛ dɔ nɛ,
ka n doa kɔn
ka min mɛnɛn lɛn nɛ,
ǹ nə́ ke ǹ nə́ ka loo,
ǹ nə́ ka bɔ kaa bǎã nɛ.
Ka kɔn wɔ ma
ka min mɛnɛn lɛn nɛ,
ǹ nə́ ke ǹ nə́ ka bebele,
ǹ gɔn dɔ ka-a.
Ǹ nə́ goã kaa màn bii kun ka nɛ,
bɛ̀ ǹ nə́ pii:
«Yiri goon din ba
Edɔmu minin kɛn lon wa.»
8Taãn nɛ, a pinaa á die,
Ezawu tɔrɔn sii-dɔ̃lin kɛn,
ma á die ǹ dii.
Yiridɛnaa kɔn ba re goɛ̃
Edɔmu gána-n wa.
Ma din Dɛnaa Lawa
a da ǹ boo ne.
9E, Temaa minin,
nyɛ́ɛ á die kaa zia-baalin kɛn kuĩ.
Bɛ lɛ n ke,
ǹ tá re Ezawu tɔrɔn kɛn
giĩn tumaa dii zia la.
Edɔmu minin nə sii mɛn la
10Ka kakaarɛbaa ǹ sii
mɛnɛn zɛnaa,
ka dɔɔ̃n Zakɔba tɔrɔn kɛn manɛ,
bɛ lɛ n ke, sìi gole á die ka kuĩ.
Ǹ tá re ka dii, ǹ ka nya lenlen.
11Tiin bɛ́ ǹ nə́ daa kɔ
Zeruzalɛmu lɛ ǹ mɛn pinaa,
a pinaa, táa ka n ká golee tìãlɛa.
Tɔrɔ kɔsɔn bɛ́ ǹ mànan goɛ
ǹ gii kɔn ǹ mɛn pinaa,
a pinaa,
táa ka dɔn man ká kaa
kunun ǹ ni,
ká zɛnaa miɛ̃.
12A da yaa,
ka dɔɔ̃nɔn lɛn bɛ́ koe ne
ǹ mɛn pinaa,
bɛ̀ ka doamaa bie ka golee
ka ga ǹ ganaa wa.
Zudaa tɔrɔn kɛn bɛ́ bɔ̀n biɛ
ǹ mɛn pinaa,
bɛ̀ ka doamaa bie ka golee,
ka yaa wɔ ǹ ganaa wa.
Ǹ bɛ́ nɔmaa gɔ́ɔ̃ nɛ
ǹ mɛn pinaa,
bɛ̀ ka doamaa bie
ka n lɛ wɔ ǹ ganaa wa.
13Sii bɛ́ á maa minin lɛn yɛ
ǹ mɛn pinaa,
bɛ̀ ka doamaa bie
ka wɔ ǹ kiwi lɛ-n wa.
Sii lɛ bɛ́ á ǹ yɛ ǹ mɛn pinaa,
bɛ̀ kasɛn kɛn dinin doamaa bie
ka golee,
ka ga ǹ nɔmaa ganaa wa.
Sii bɛ́ á ǹ yɛ ǹ mɛn pinaa,
bɛ̀ ka doamaa bie ka n gɔn da
ǹ gɔn mànan ganaa wa.
14Nɔmaa bɛ́ maa minin lɛn mìi ni
ǹ mɛn pinaa,
ǹ mɛnɛn nə baa si ǹ nə́ la,
bɛ̀ kasɛn kɛn doamaa bie,
ka n doa zii gialaa,
ka bɛn dɛ doo wa.
Ǹ mɛnɛn nə goã ǹ yii n koo,
bɛ̀ kasɛn kɛn doamaa bie,
ka bɛn kũ,
ka ǹ kɔ ǹ zɔ́ɔn la doo wa.
15Á re bǐɛ̃ koe!
Dɛnaa Lawa
a dɔlɔ bɔ ǹ lɛawaa diri.
Tɔrɔn tumaa sii tá a nɛ.
Ka dɔn nə zɛnaa lɔn,
a n die n zɛnɛɛ ka dɔn man miɛ̃.
Ka baraa mɛn zɛnaa,
a sii n die kuĩ ka dinin mìi ni.
Izirayeli minin kirisibaa
16Kasɛn Izirayeli minin kɛn,
ká ma gɔn lɛ yɛ
maa kele sonbore#1.16 Kele sonbore: Kele mɛn bɛ́ ǹ nə́ Lawa a kion lɛ dɔ la Zeruzalɛmu. kɛ la.
Man die boe tɔrɔ kɔsɔn lɛn dɔn
yii-n miɛ̃ duduu.
Ma gɔn tá re miɛ̃ ǹ ganaa,
á re doe ǹ yii li.
Min din ba re doɛ̃,
mà ǹ nə́ goã ǹ tan wa.
17Sɛnɛ,
min mɛnɛn bɛ́ re baa sii ǹ la,
bɛn tá re n duri *Siɔn kele kɛ la,
á re wusii a kele sonbore baa.
Zakɔba tɔrɔn tá re wusii,
ǹ nə ǹ bǎã si ǹ zɔ́ɔn la.
18Ezawu tɔrɔn kɛn ka buu bɛ́ lɔn,
Zakɔba tɔrɔn kɛn tá re tɛ biɛ
bɛn ganaa,
Zozɛfu tɔrɔn kɛn tá re tɛbuə̃ biɛ
ǹ ganaa,
ǹ tá re ǹ kuĩ, ǹ nə ǹ nya lenlen.
Ǹ min goon yii a die goɛ̃ koo wa.
Ma din Dɛnaa Lawa n má pɛ.
Lawa a kiibaa
19Ezawu tɔrɔn kele yii
kɛ á re doe gusin a lɛ̀gɔn la
dɛnan kɛn ganaa.
Ǹ mɛnɛn bɛ́ diə bǎã kɛ nɛ,
Filisiti minin bǎã kɛ á re doe
bɛn ganaa.
Efrayimu tɔrɔn laanka
Samarii minin bǎã kɛ á re doe
Izirayeli minin ganaa.
Galaati gána kɛ á re doe
Bɛnzamɛn tɔrɔn ganaa.
20Ǹ Izirayeli a zia nɛn mɛnɛn goa,
ǹ nə́ woo ǹ ne bɛ̀rɛbaa ǹ bǎã nɛ,
Kanaan gána ke,
a wo Sarɛptaa kiwi yaa,
bɛ á re doe bɛn ganaa.
Ǹ Zeruzalɛmu minin mɛnɛn goa,
ǹ nə́ woo ǹ ne
bɛ̀rɛbaa ǹ bǎã nɛ Sefaradi,
gusin a lɛ̀gɔn la kiwin
kɛn tá re doe bɛn ganaa.
21Min mɛnɛn nə kirisibaa
bɛn tá re dii Siɔn kele kɛ la,
ǹ giã Ezawu gána mìi la.
Kiibaa á die goɛ̃ Dɛnaa Lawa nɛ!
اکنون انتخاب شده:
Abd 1: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.