MNS 22
22
Balaamu laanka Balaaki
1Izirayeli minin lɛn nə́ yoo doo, ǹ nə́ woo golee Moabu gána a nyankɔrɔ lɛ kɛ nɛ, Zurdɛ̃ tà kio, Zerikoo yɔrɔ-a. 2-4Izirayeli minin lɛn nə goã ǹ nə́ sii mɛn tumaa zɛnaa Amɔɔrɔ tɔrɔn manɛ, Sipɔɔrɔ a nɛgiĩ Balaaki ke, á goã Moabu gána a kii lɛa bɛa waáraa lɛ nɛ, bɛ ná a yii boo ma. A laanka a zaman tumaa nyɛ́ɛ baa Izirayeli zaman lɛ nyɛɛn taãn-taãnɛ, a giala Izirayeli zaman lɛ goã mɔnaa nɛ. Moabu minin lɛn nə́ tɔ́n pɛ Madiã min golen manɛ: «Màn mɛn tumaa bɛ́ wɔsɛn lɛnpɛnɛ, bɛa zaman damata kɛ lɛ n die a yii mamaɛ, ka dii bɛ́ buu soɛ̃ a bɔ tán lɔn.»
5 #
MNS 31.8; Piɛ2 2.15-16; Zud 11 Bɛ kio, Balaaki minin dia Bewɔɔrɔ a nɛgiĩ Balaamu ǹ di-piɛ Petɔrɔ kiwi, Efrati tà lɛ-a, mà ǹ wo kɛ pɛ Balaamu ni:
Á ke, tɔrɔ kɔn a minin man nə́ n toa Ezipti gána nɛ, ǹ nə́ daa. Ǹ nə́ wɔlɔ gɔ̀nɔn bɔ gána lɛ nɛ. Maǹ nə́ giã kunu masɛ li. 6Bǐɛ̃ kɔ n daa kəni, n lɛn baraa bii bɛa tɔrɔ kɛ lɛ a minin lɛn li, masɛ a lɛa. A giala, ǹ pàã la masɛ wɔ nɛ. Bɛ̀ ń lɛ kɔ, kɔntan, masɛ á die boe ǹ la, ma ǹ loo ma ǹ bɔ bǎã lɛ nɛ. A giala, ma á doɛ̃, bɛ̀ ń barka da min woo min ganaa, bɛ wɔ n bǐɛ̃ koe, bɛ̀ ń lɛn baraa bii min woo min li, bɛ wɔ n ziziɛ̃.
7Bɛ kio, Moabu gána a min golen laanka Madiã gána wɔn nə́ yoo ǹ nə́ woo ka màn nə́ ǹ gɔn, sii-nyaali lɛ a saraa ǹ wɔ lɛa. Ǹ bɛ́ ǹ nə́ dɔ Balaamu li, ǹ nə́ Balaaki a boon lɛn pɛ nɛ. 8Balaamu tɔ́n pɛ ǹ nɛ: «Ka golee ka waa kànaa, Dɛnaa Lawa bɛ́ re boo mɛn pii ma nɛ, masɛ n die ka lɛ sii, a kɔnpɛ ka bɛ nɛ.»
Moabu gána a min dadaran lɛn dɔn nə́ golee Balaamu li. 9Lawa daa Balaamu li, á nɔ̀n da la: «Minin kɛn man dien lɛa n piɛ?»
10Balaamu ná a lɛ si: – Sipɔɔrɔ a nɛgiĩ Balaaki ke, Moabu gána a kii lɛa, bɛ na á ǹ dia die pii ma-n kɛnɛn: 11«Á ke, zaman mɛn lɛ nə n toa Ezipti gána nɛ á daa, ǹ nə́ wɔlɔ gɔ̀nɔn bɔ gána lɛ nɛ. Bǐɛ̃ kɔ, n daa kəni, n lɛn baraa bii ǹ li, maa lɛa. Bɛ̀ n lɛ kɔ, kɔntan ma á re boe Izirayeli minin lɛn la, ma ǹ loo ma ǹ bɔ gána lɛ nɛ.»
12Lawa pɛ Balaamu ni: «N baran toa n wo kun ka bɛa minin kɛn lɛn nɛ wa. N baran toa n lɛn baraa bii zaman kɛ lɛ li wa, a giala masɛ barka da zaman lɛ ganaa.»
13Bɛa lɛawaa baayɛlɛ, Balaamu yoo á pɛ Balaaki a min dadaran lɛn manɛ: «Ka wusoo ka wo kaa gána nɛ, a giala, Dɛnaa Lawa n masɛ kurii, mà ma baran wo kun ka-n wa.»
14Bɛ kio, Moabu gána a min dadaran lɛn nə́ yoo ǹ nə́ n bɔyaa ǹ nə́ woo Balaaki li, ǹ nə́ pɛ nɛ: «Balaamu nə́ n piã mà a die kun ka wɔsɛn nɛ wa.»
15Sɛnɛ, Balaaki wusoo á min dadara kɔsɔn dia mɔnaa nɛ, ǹ yii ń guguru á la bibinaa dɛnan kɛn wɔ nɛ. 16Ǹ bɛ́ ǹ nə́ dɔ Balaamu li, ǹ nə́ pɛ nɛ: – Sipɔɔrɔ a nɛgiĩ Balaaki na á pɛ kɛnɛn: «Sabara baa, n baran n piã mà n ba die masɛ li wa. 17A giala, ma á die gugurubaa koe n la a tɔ-a, bɛ̀ ń nɔ̀n da ma la ka màn mɛn nɛ, ma á die bɛ koe n la. Sabara baa n daa kəni, n lɛn baraa bii bɛa zaman kɛ lɛ li, masɛ a lɛa.»
18Sɛnɛ, Balaamu Balaaki a dí-nyalin lɛn lɛ si: «Ta Balaaki na a kion wɔrɔ tumaa laanka a kion sana tumaa koe masɛ la, ma ba re sii boɛɛn hinlaa sii gole zɛnɛɛ, màn mɛn nə́ ke a ba woe kun ka maa Lawa, Dɛnaa Lawa a boo-n wa. 19Ka dɔn nə sabara baa ka golee kəni, tèlò kɛ lɛ nɛ, ka n yii da yǎa masɛ doɛ̃, Dɛnaa Lawa bɛ́ re wusii a boo mɛn pɛ ma nɛ.»
20Lawa daa Balaamu li tèlò-n á pɛ nɛ: «Bɛ̀ bɛa minin kɛn lɛn man nə́ daa lɛ dia n la, yoo n dɔ ǹ ganaa n woo. Sɛnɛ, bɛ̀ ma boo mɛn pɛ n nɛ, n doamaa nɛ n bɛ lɛ dinsɔɔ̃ zɛnaa.»
Balaamu a dundun
21Bɛa lɛawaa baayɛlɛ, Balaamu yoo á ná a dundun dan kũ, á kɛkɛrɛ da a dɔ̀ɔ̃-n, á woo kun ka Moabu gána a min dadaran lɛn nɛ. 22Sɛnɛ, Lawa bɛ́ á Balaamu yɛ woe, a foo yoo li. Dɛnaa Lawa a lon a dia dí-a wole goon tɔ́n woo n doa zii la, á n die zii tiɛ̃ a ganaa. Balaamu lɛ na á goã a dundun dan la, a dí-nyali min paa ń kun ni. 23Dundun dan lɛ Dɛnaa Lawa a lon a dia dí-a wole lɛ yɛ doa-n zii lɛ la, ka gɔya sa ná a gɔn, a ná a ba a kii-n wa. Dundun dan lɛ tɔ́n zii da, á n dɔ da lɛ-n. Balaamu dundun dan lɛ məə, á da zii la doo. 24Dɛnaa Lawa lon a dia dí-a wole lɛ wusoo á woo n doa zii nyankɔrɔ bǎã goon ne, kiɛ̃ rezɛ̃ dan laanka kungɔn màn paa bii ni. 25Dundun dan lɛ Dɛnaa Lawa a lon a dia dí-a wole lɛ yɛ doo, á tɔ́n woo n naa kungɔn lɛ ganaa, á Balaamu gòã kɛmɛ a ganaa. Balaamu tɔ́n bɔ á mɛ dundun dan lɛ la doo, á məə. 26Dɛnaa Lawa a lon a dia dí-a wole lɛ wusoo á kiɛ̃ á woo ǹ nyɛɛn doo, á n doa kiɛ̃ ǹ bǎã boɛɛn kɔn nɛ, min ná a ba boe la a kanaa la, a wo a gɔsɛ hinlaa a gusin wa. 27Dundun dan lɛ wusoo doo á Dɛnaa Lawa a lon a dia dí-a wole lɛ yɛ, yǎa a na, a waa tán ka Balaamu ni. Balaamu foo yoo li, á məməə ka bàlà nɛ. 28Dɛnaa Lawa tɔ́n dundun dan lɛ da boo diɛ ganaa, á n lɛ da Balaamu lɛ: «Ma n má wàa pɛ n ganaa, ń tá koɛ kɔn la gunyin sɔɔ masɛ dii?»
29Balaamu tɔ́n pɛ dundun dan lɛ nɛ: «A giala, n nə n sàn kɔ ka masɛ nɛ. Bɛ̀ ń nə n daa gɔya yaa masɛ gɔn, bɛ̀ ma n dɛ a din bǎã nɛ ń gã.»
30Dundun dan lɛ wusoo á pɛ Balaamu ni: «Ma din bie n dundun dan lɛ lɛa, n nə dii ma la haalɛ bibindun wa ya? Ma á nɛn bɛ̀ ma kɛ miã tɔrɔ zɛnaa nɛ?» Balaamu ná a lɛ si mà haayii. 31Bɛ kio, Dɛnaa Lawa Balaamu yii na, á Dɛnaa Lawa a lon a dia dí-a wole lɛ yɛ doa-n zii la, gɔya sa ná a gɔn, a ná a ba a kii-n wa. Balaamu nə́ n zuməə, á na, á kaa tán a lɛ la. 32Dɛnaa Lawa a lon a dia dí-a wole lɛ tɔ́n nɔ̀n da la kɛnɛn: «Wàa na á baa ń koa kɔn la gunyin sɔɔ, n nə́ n dundun dan lɛ dɛ? Á ke, ma din ni má soo má daa zii tã n ganaa, a giala zii-tɔ lɛ nyɛɛn ba re bǐɛ̃ biɛ n ganaa wa. 33Dundun dan lɛ sɛ ma yɛ gunyin sɔɔ, á kanaa á n bɔ ma li. Bɛ̀ a bie á kanaa á n bɔ ma nyɛɛn wa, bɛ̀ má n dɛ a din bǎã nɛ ń gã, ma dundun dan lɛ sɛ yii toa koo.»
34Balaamu pɛ Dɛnaa Lawa a lon dia dí-a wole lɛ nɛ: «Má sii baraa zɛnaa, a giala ma goã doɛ̃, máa n din nə ke ń goã doa nɛ, ma nyɛɛn zii lɛ la wa. Kanna, bɛ̀ zii-tɔ lɛ á baraa n yii li, man wusii.»
35Sɛnɛ, Dɛnaa Lawa a lon a dia dí-a wole lɛ pɛ nɛ: «Wo kũ ka bɛa minin kɛn lɛn nɛ, sɛnɛ bɛ̀ masɛ boo mɛn pɛ n nɛ, n bɛ lɛ dinsɔɔ̃ pɛ.»
Bɛ kio, Balaamu woo kũ ka Balaaki a min dadaran lɛn nɛ.
Balaamu laanka Balaaki a kɔn yɛ
36Balaaki bɛ́ á ma, mà Balaamu á die, á soo á woo n da lɛ yǎa Iri-Moabu kiwi kɛ nɛ, kaa-n Arnɔn tà lɛ, a gána lɛ gèlè la. 37Balaaki pɛ Balaamu ni: «Ma bɛ́ má minin dia die lɛ diɛ n la bibinaa nɛ, wàa na á baa n lɛ kɔ ń daa wa? Ma n taasɛ, mà masɛ n ma ba re boe la ma gugurubaa gole kɔ n la wa?»
38Balaamu tɔ́n Balaaki lɛ si kɛnɛn: «Á ke, má daa n li dɔn. Masɛ n die boe la ma wàa boo da? Bɛ̀ Lawa boo mɛn wɔ ma lɛ-n, man die bɛ lɛ pii.»
39Bɛ kio, Balaamu kiɛ̃ kun ka Balaaki ni, ǹ nə́ woo Kiriyati-Usoti kiwi. 40Balaaki wúlu bɔ ka diin laanka sèren ne, á Balaamu gii bɔ nɛ, ka goledɛnan mɛnɛn nə goã kun ni.
Balaamu barka da Izirayeli zaman ganaa
41Bɛa lɛawaa baayɛlɛ, Balaaki Balaamu kũ, ǹ nə́ woo dii, Bamɔti-Baali la. Balaamu nə́ n toa walan, a yii n Izirayeli zaman lɛ gialakun ganaa.
اکنون انتخاب شده:
MNS 22: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.