Mar 9
9
1Yezu tɔ́n pɛ ǹ nɛ doo: «Masɛ n pii ka nɛ sonbore, min tɛn tá ka bii kànaa dinin, ǹ tá re goɛ̃ ǹ yii n koo yǎa *Lawa a kiibaa kɛ die ka pàã nɛ, a die ǹ yiɛ.»
Yezu na a din a gugurubaa nyaa ka sii mɛn nɛ
(Mat 17.1-13; Luk 9.28-36)
2 #
Piɛ2 1.17-18
Lɛawaa sɔrɔ bɛ kio, Yezu Piɛrɛ laanka Zaaki laanka Zaã kũ á woo ǹ ne tiãlɛa kele sasa goon la. Ǹ dininsɔɔ̃nɔn bɛ́ walan, Yezu nə́ n bɔyaa ǹ yɔrɔ-a. 3A mɔnaan nə́ n bɔyaa ǹ nə́ tɛ pɛ fu ka panpaɛ̃. Min kɔ́n din ba kanaa gɔ́ɔ̃ nɛ, á n boe la a mɔnaa pii a fu kɔ miɛ̃ wa. 4Bɛ kio boɛɛn gɔrɔ, kialandɛnaa sɔɔ lɛ min paa yɛ boo diɛ kun ka Yezu ni: Lawa a boo gii-dalin goledɛnaa Yilii laanka landa sii-daraalin goledɛnaa Muizu ni. 5Piɛrɛ tɔ́n pɛ Yezu ni: «Mìinaa, a n siĩni wɔsɛn nə giã kànaa. Wɔsɛn man die siã sɔɔ doe, n din wɔ goã ka goon ne, Muizu wɔ goã ka goon ne, Yilii wɔ goã ka goon ne.»
6Nyɛ́ɛ nə́ ǹ tumaa kũ parsiini. Bɛ lɛ nɛ, Piɛrɛ din yii a boo kɔsɔ ganaa á diɛ á kiɛ̃ bɛ lɛ la wa.
7Labara goon bɔ á n kuməə ǹ ganaa. Lawa a boo-diɛ lɛ bɔ bɛa labara lɛ gɔ́ɔ̃ nɛ á pɛ: «Masɛ a Nɛgiĩ narɛ wole n ka kɛ nɛ, ka n too kɔ a lon!»
8Bɛa bǎã-n gɔrɔ, a kialandɛnan lɛn nə́ ga ǹ paǹan li, ǹ min kɔsɔ yɛ kun ni doo, á kiɛ̃ Yezu din la wa.
9Ǹ bɛ́ gisĩ ǹ boe kele lɛ la ǹ mɛn waáraa, Yezu nə́ n gɔn waa ǹ nɛ á pɛ: «Ka sii mɛn yɛ ka ka yii ni, ka nyan toa ka a laakalaa min kɔ́n yii-n wa, yǎa Min a Nɛgiĩ yii kiɛ a n boe geren bii.»
10Ǹ nə́ bɛa gɔn-waa kɛ lɛ si, sɛnɛ maǹ nə́ goã nɔ̀n diɛ kɔn la mà bɛa yii kaa á bɔ geren bii kɛ lɛ giala mà wàa?
11 #
Mal 3.23; Mat 11.14 Bɛ kio, ǹ nə́ nɔ̀n da Yezu la ǹ nə́ pɛ: «Wàa na á baa landa sii-daraalin nə́ pii mà Yilii doamaa nɛ a da Minin Nyin-sili lɛ nyɛɛnɛ?»
12Á tɔ́n pɛ ǹ nɛ: «Sonbore ne, Yilii doamaa nɛ a daa bɔrɔ, a sii din tumaa yɔrɔ bɔ sɔnbɔraanɛ. Sɛnɛ, wàa na á baa a kiɛ̃maa tá Lawa a boo ne, mà Min a Nɛgiĩ tá re nɔmiɛ parsiini, mà minin tá re n piɛ̃-n dɔn? 13Bɛ din tumaa á kiɛ̃ kio, man pii ka nɛ, máa Yilii daa dinin, sɛnɛ, minbuiinin nə́ n foo sii zɛnaa a ganaa, ka a kiɛ̃maa bɛ́ nɛ a wɔ gɔn la lɔn.»
Yezu nɛnyaan kɔ́n a nɔ̀ɔnɔn loo
(Mat 17.14-21; Luk 9.37-43a)
14Ǹ bɛ́ ǹ nə́ dɔ a kialandɛnan gialakunun lɛn li, ǹ nə́ zaman gole yɛ á ǹ lɛnpɛnɛ, landa sii daraalin ná a gialaa liere koe kɔn-a ǹ nɛ. 15Yezu a daa zaman lɛ tɔwaa parsiini; ǹ bɛ́ ǹ nə́ Yezu yɛ lɔn gɔrɔ, ǹ nə́ baa si ǹ nə́ woo fòo da nɛ. 16Yezu tɔ́n nɔ̀n da a kialandɛnan lɛn la mà wàa liere ne ǹ tá koe kɔn-a ǹ nɛ?
17Giĩ goon nə́ n toa zaman lɛ bii á pɛ kɛnɛn: «Mìinaa, nɔ̀ɔnɔn man masɛ a nɛgiĩ ganaa, ǹ ba toɛ á boo diɛ wa, bɛ lɛ nɛ masɛ daa nɛ n li. 18Bɛ̀ ǹ nə́ yoo li bǎã mɛn nɛ, maǹ nyanɛɛ bɛ̀ ǹ duwəə tán, a lɛ yii kàã bɔ, a sɔ̃ kere bɔ a laa ka kaka. Má pɛ n kialandɛnan lɛn manɛ máa ǹ nɔ̀ɔnɔn lɛn loo, sɛnɛ, ǹ boo ǹ la wa.»
19Yezu tɔ́n pɛ ǹ nɛ: «E, kasɛn golee Lawa li baãnaan kɛn! Masɛ n die goɛ̃ kun ka nɛ yǎa biĩ doo, ka tɔn golee Lawa li? Ma n die kaa sii sii ma ganaa miɛ̃ yǎa biĩ kəni? Ka nɛ lɛ kũ ka da kɔ ma la.»
20Ǹ nə́ kũ ǹ nə́ daa kɔ la.
Nɔ̀ɔnɔn lɛn bɛ́ ǹ nə́ Yezu yɛ lɔn gɔrɔ, ǹ nə́ bìn da nɛ lɛ ganaa parsiini, ǹ nə́ nyanaa ǹ nə́ duwəə tán, á n birikəə̃ tán, a lɛ kàã bɔ. 21Yezu tɔ́n nɔ̀n da ǹ di la mà kɛ na á n giala kɔ a ganaa biĩ.
Ǹ di tɔ́n pɛ mà haalɛ a nɛnyaanbaa waáraa nɛ. 22Bɛ ǹ tá giɛ a dɛ ǹ gɔn li, ǹ tɛn nɛ, maǹ nyanɛɛ bɛ̀ ǹ da tɛ-n, ǹ tɛn nɛ, maǹ nyanɛɛ bɛ̀ ǹ da mu li. Bɛ̀ n tá boe la n sii kɔ́n zɛnaa, n makara bɔ wɔsɛn ganaa, n nə n dɔ wɔ lɛ!
23Yezu tɔ́n pɛ nɛ: «Bɛ̀ ma tá boe la...! Bɛ̀ min golee Lawa li, a n boe sii tumaa la.»
24Bɛa bǎã-n gɔrɔ, nɛ lɛ di nə́ n lɛ dɛ, á pɛ nɛ: «Má golee li, n dɔ ma lɛ, n màn da maa golee Lawa li boɛɛn kɛ li.»
25Yezu bɛ́ á yɛ zaman nə́ tɔn nə n nanaɛ die ǹ li, á paraa nɔ̀ɔnɔn lɛn li, á pɛ ǹ nɛ: «Kasɛn mɛnɛn bɛ́ min kurii boo diɛ laanka boo ma ganaa, man pii ka nɛ, máa ka woo ka n bɔ nɛ kɛ lɛ nɛ, ka nyan toa ka da a ganaa doo duduu wa!»
26Nɔ̀ɔnɔn lɛn nə́ n lɛdɛ ǹ nə́ bìn da nɛ lɛ ganaa parsiini, ǹ nə́ tɔ́n woo. Nɛginin lɛ goã tán ka a na á gã. Bɛ lɛ nɛ, min mɛnɛn dinin nə goã walan, bɛn mà á gã. 27Sɛnɛ, Yezu nɛ lɛ kũ a gɔn ganaa, á saa á da lon, yǎa a golee a gòãn la.
28Yezu bɛ́ á dɔ piɛ, a laanka a kialandɛnan dininsɔɔ̃nɔn bɛ́ kun, ǹ nə́ nɔ̀n da la mà wàa na á baa ǹsɛn nə boo la ǹ nə́ bɛa nɔ̀ɔnɔn lɛn loo wa?
29Yezu tɔ́n pɛ ǹ nɛ: «Bɛ̀ á n bɔ Lawa nyankɔ nɛ, min kɔ́n ba boe la a nɔ̀ɔnɔn kɛn tɔrɔ loo ǹ woo wa.»
Yezu a gɛ̀ laanka a yii kaa boo
(Mat 17.22-23; Luk 9.43b-45)
30Ǹ nə́ kiɛ̃ ǹ nə́ n bɔ walan, ǹ nə́ Galilee gána wɔsɔ kɔn. Yezu ba li minin na asɛ bǎã dɔ̃ wa. 31A giala, a na á goã a kialandɛnan lɛn darɛɛ, á n pii ǹ ni kɛnɛn: «Min a Nɛgiĩ á re n we min baraan gɔn, ǹ tá re dii a gã. A gɛ̀ lɛawaa sɔɔ, a yii á re kiɛ.»
32Sɛnɛ, a kialandɛnan nə bɛa boo kɛ lɛ giala ma wa, a nɔ̀n damala dɔ na á goã nyɛ́ɛ lɛa ǹ ganaa.
Yezu a kialandɛnan nə liere mɛn kɔ
(Mat 18.1-5; Luk 9.46-48)
33Ǹ nə́ dɔ Kafaranaamu kiwi. Yezu bɛ́ á dɔ kion ǹ mɛn waáraa, á nɔ̀n da a kialandɛnan lɛn la ma maǹ nə́ goã wàa-n liere koe zii la?
34 #
Luk 22.24
Sɛnɛ ǹ nə́ n lɛ tã, a giala ǹ bɛ́ zii la, maǹ nə́ goã kɔn liere koe, mà die n gole ǹsɛn bii. 35#Mat 20.26-27; 23.11; Mar 10.43,44; Luk 22.26 Yezu tɔ́n giã tán, á ǹ dinin min fulupaa lɛ tumaa bíi, á pɛ ǹ nɛ: «Bɛ̀ min mɛn tá nyɛɛnaandɛnaabaa li, bɛ doamaa nɛ, a n baa ka dinin tumaa a kialandɛnaa lɛa, a n baa ka dinin tumaa a dí-nyali lɛa.»
36Á tɔ́n nɛnyaan boɛɛn kũ á daa nɛ ǹ yɔrɔ-a, á saa á da a kolo-n, á pɛ ǹ nɛ: 37#Mat 10.40; Luk 10.16; Zaã 13.20 «Bɛ̀ min mɛn lɛ kɔ á nɛnyaan kɛ miã kũ doɛ̃ masɛ tɔ taman yii, bɛa dɛnaa na á lɛ kɔ masɛ dinmaa lɛ ganaa. Bɛ̀ min mɛn dɔ́ lɛ kɔ masɛ ganaa, bɛa dɛnaa bie á lɛ kɔ masɛ dinsɔɔ̃ ganaa wa, sɛnɛ ma dia wole.»
Die n Yezu a dàã lɛa?
(Luk 9.49-50)
38Zaã pɛ Yezu ni: «Mìinaa, wɔsɛn nə́ giĩ goon yɛ nɔ̀ɔnɔn lui ka nə n tɔ nɛ. Wɔ́ kurəə a ganaa, a giala, a ba kun ka wɔsɛn nɛ wa.»
39Sɛnɛ Yezu pɛ nɛ: – Ka toa walan, ka nyan kurəə a ganaa wa. A giala, min kɔ́n ba boe la a kaãbaa ǹ sii zɛnaa ka masɛ tɔ nɛ, bɛa dɛnaa nə n bɔyaa gɔrɔ a masɛ tɔ baraa pɛ wa. 40#Mat 12.30; Luk 11.23 Min mɛn bɛ́ a ba wɔsɛn zɔ́ɔ lɛa wa, bɛa dɛnaa n wɔa dàã lɛa. 41#Mat 10.42Min mɛn bɛ́ re mu sii paan din ni kooro a kɔ ka la a giala mà ka ǹ masɛ wɔn lɛa, man pii ka nɛ sonbore ne, ǹ dɛnaa ba re foɛ̃ a saraa li wa.
Yezu gɔn-waa mɛn wɔ sii baraa a paǹ li
(Mat 18.6-9; Luk 17.1-2)
42Nɛnyaanan kɛn golee-n masɛ li, bɛ̀ bɛn goon a mɛnaa ǹ giala bɔ min mɛn li, á soɛ bɛa dɛnaa ganaa ǹ gii dan kaara yii a bɔlɔ ganaa, ǹ nyanaa ǹ da yìsi mu gole li.
43 #
Mat 5.30
Bɛ̀ n gɔn goon tá n diɛ sii baraa nɛ, a kuru n bɔ n ganaa. A giala, n goã n yii n koo ka n gɔn goon ne Lawa a piɛ, bɛ á soɛ n nə n gɔnɔn paanan toa n ganaa n wo ǹ ne tɛ-n, nɔmaa ǹ tɛ mɛn bɛ́ a nimi wa. [ 44«Nyuunun mɛnɛn bɛ́ fuu nyɛɛ minin man walan, ǹ ba giɛ̃ wa, a tɛ dɔ a nimi wa.»] 45Bɛ̀ n gòã goon tá n diɛ sii baraa nɛ, a kuru n bɔ n ganaa. A giala, n goã n yii n koo ka n gòã goon ne Lawa a piɛ, bɛ á soɛ n nə n gòãn paanan toa n ganaa n wo ǹ ne tɛ-n. [ 46«Nyuunun mɛnɛn bɛ́ fuu nyɛɛ minin man walan, ǹ ba giɛ̃ wa, a tɛ dɔ a nimi wa.»] 47#Mat 5.29 Bɛ̀ n yii goon tá n diɛ sii baraa nɛ, a gɔsɛ n bɔ n yɔrɔ nɛ. A giala, n wo giã Lawa a kiibaa ǹ bǎã nɛ ka n yii goon ne, bɛ á sóɛ, n nə n yiin paanan toa ǹ yɔrɔ nɛ n wo ǹ ne tɛ-n. 48#Iza 66.24«Nyuunun mɛnɛn bɛ́ fuu nyɛɛ minin man walan, ǹ ba giɛ̃ wa, a tɛ dɔ a nimi wa.»
49Ǹ bɛ́ ǹ nə́ goã yìsi pɛsɛ̃ *wúlu mànan mɛnɛn ganaa lɔn, bɛ̀ ǹ nə ǹ tamaa mà ǹ goã siĩni, nɔmaa mɛn bɛ́ tɛ lɛa min tumaa mìi-n ke, bɛ á die ǹ *yoreen koe a ǹ tɔ wɔ ǹ gɔn-a siĩnbaa nyaa.
50 #
Mat 5.13; Luk 14.34-35 Yìsi n màn sonbore lɛa sɛn, sɛnɛ bɛ̀ yìsi a yìsibaa nya, maǹ die n biɛ lɔn ǹ tɔn baa yìsi lɛa doo? Ka miãn bii, ka toa kaa zɛnaa ǹ sii sonboren nə goã ka yìsi bɛ́ màn-bii li lɔn, ka koa kun ka yii-nyɛɛ nɛ.
اکنون انتخاب شده:
Mar 9: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
