Mar 14
14
Yezu kũ ǹ gɔn
(Mat 26.1-5; Luk 22.1-2; Zaã 11.45-53)
1 #
BBN 12.1-27
A gialakun na á goã lɛawaa paa, Zuifun *kiɛ̃mala ǹ zɔ́n laanka *yɔ bùbaã buuru zɔ́n dɔ. Lawa a wúlu-bɔlen goledɛnan laanka landa sii-daraalin man nə́ goã gɔn diɛ Yezu ganaa, màn mɛn bɛ́ toɛ, ǹ kũ ka durii ni ǹ dɛ. 2Sɛnɛ, maǹ nə́ goã pii mà ǹsɛn doamaa bie ǹ kũ zɔ́n pinaa kɛ-n wa, mà bɛ bie wa, mà á die sii lɔlɔkɔn biɛ zaman lɛ bii.
Nyɔɔ gìĩ kɔɔ̃n kaa Yezu mìi-n boo
(Mat 26.6-13; Zaã 12.1-8)
3 #
Luk 7.37-38
Yezu bɛ́ màn bii Simɔn gɔ̀nɔn ki busu babaraa dɛnaa a kion Betaanii kiwi, lɔ goon daa wɔ kion ka kɔlɔ donkolon siĩn kɔ́n nɛ, nyɔɔ gìĩ kɔɔ̃n na a nɛ, a giɔ̀mɔ n kaka parsiini. (Nyɔɔ lɛ yii n fu ka zenzen; a n zɛnaa ka da mɛn gòon ne, bɛ tɔ n naára). Á donkolon lɛ lɛ bũ, á nyɔɔ lɛ kaa Yezu mìi ni. 4Min mɛnɛn bɛ́ walan, bɛn tɛnɛn man nə́ goã pii kɔn nɛ ka busii ni mà bɛa nyɔɔ gìĩ kɔɔ̃n kɛa ziziɛ̃ miɛ giala n ka wàa nɛ? 5Mà nyɔɔ kɛ lɛ á boe la a n sã, a wɔrɔ la lɛawaa biɛsɔɔ (300) a dí nya ǹ giɔ̀mɔ nɛ, a n gii doobaan manɛ!
Ǹ nə́ yoo lɔ lɛ gialaa parsiini.
6Sɛnɛ, Yezu pɛ ǹ nɛ kɛnɛn: «Ka toa kiĩni. Wàa na á baa ka á lɔ lɛ nɔmiɛ? Dí taãn nɛ ka kɛ nɛ á nya masɛ nɛ. 7#TDP 15.11 A giala, doobaan tá kun ka nɛ biikoo tumaa li, bɛ̀ ka á li ka bǐɛ̃ zɛnaa ǹ nɛ ǹ mɛn pinaa, ka á boe la ka zɛnaa ǹ nɛ. Sɛnɛ, masɛ bie re goɛ̃ kun ka-n miɛ̃ wa. 8A bɛ́ boe sii mɛn la, a na á bɛ lɛ zɛnaa. A na á nyɔɔ gìĩ kɔɔ̃n kaa masɛ gɔ̀nɔn ganaa, á zɛnaa á koa maa biĩ nyɛɛnɛ. 9Masɛ n pii ka nɛ sonbore, ka bɛ́ re Boo Tii Kɔɔ̃n pii kanaa paǹ mɛn tumaa nɛ, lɔ kɛ sii mɛn zɛnaa, ǹ tá re bɛ dɔ laakalɛɛ walan, ǹ minin yiri da a sii ni.»
Zudaasi n giɛ Yezu kɔ ǹ gɔn li
(Mat 26.14-16; Luk 22.3-6)
10Kariyɔtin Zudaasi mɛn bɛ́ Yezu a kialandɛnan lɛn goon lɛa, bɛ́ woo pɛ Lawa a wúlu-bɔlen goledɛnan manɛ, mà asɛ n giɛ li a Yezu kɔ ǹ la. 11Ǹ bɛ́ ǹ nə́ bɛ ma, á kɔɔ̃n kɔ ǹ ganaa parsiini. Ǹ nə́ lɛ kɔ mà ǹsɛn tá re wɔrɔ koe la. Zudaasi ná a giala kɔ á ga biikoo sonbore li, màn mɛn bɛ́ toɛ a Yezu kɔ ǹ la.
Kiɛ̃mala ǹ zɔ́n màn-bii yɔrɔ bɔ boo
(Mat 26.17-25; Luk 22.7-14,21-23; Zaã 13.21-30)
12Yɔ bùbaã buuru zɔ́n giala kɔ pinaa, ǹ bɛ́ re wúlu sère nɛn dii kiɛ̃mala ǹ zɔ́n a màn-bii lɛa ǹ mɛn pinaa, Yezu a kialandɛnan nə́ nɔ̀n da la mà a n giɛ li ǹsɛn nə wo kiɛ̃mala ǹ zɔ́n a màn-bii zɛnaa-n maa?
13Yezu tɔ́n a kialandɛnan lɛn min paa dia, á pɛ ǹ nɛ kɛnɛn: «Ka wo Zeruzalɛmu kiwi, ka á re n diɛ giĩ goon lɛ ka mu dɔn ná a mìi ni. Ka kɔ lɛ. 14Bɛ̀ á wɔ kion mɛn nɛ, ka pɛ bɛa kion lɛ a dɛnaa nɛ mà Mìinaa na á kasɛn dia nɔ̀n diɛ ma asɛ a yu ǹ kion lɛ á maa? Mà asɛ laanka a kialandɛnan man die kiɛ̃mala ǹ zɔ́n màn bii maa? 15Á re kion gole goon nyɛɛ ka nɛ lon ǹ miã lalan, ka laadoo màn din tumaa ná a nɛ, ǹ nə́ zɛnaa sɔnbɔraanɛ ǹ nə́ koa. Ka n die kiɛ̃mala ǹ zɔ́n màn-bii zɛnɛɛ wɔsɛn man walan.»
16Bɛa kialandɛnan lɛn nə́ woo, ǹ nə́ wɔ kiwi lɛ gɔ́ɔ̃ nɛ. Yezu pɛ ǹ nɛ lɔn, ǹ nə́ woo a tumaa yaa miɛ̃. Ǹ nə́ kiɛ̃mala ǹ zɔ́n màn-bii zɛnaa walan.
17Wasa bɛ́ á mɛ, Yezu daa á dɔ ka a kialandɛnaa fulupaa lɛ nɛ. 18#Loe 41.9 Ǹ bɛ́ tán màn bii, Yezu pɛ: «Masɛ n pii ka nɛ, sonbore ne: Ka dinin min goon nə die masɛ we maa zɔ́ɔn gɔn, min mɛn din bɛ́ màn bii kun ka masɛ nɛ.»
19A kialandɛnan lɛn yɔrɔ kɔsɛ parsiini, ǹ ná a giala kɔ ǹ nə́ nɔ̀n da la gogoon, didie mà táa asɛ bie wa?
20Yezu tɔ́n pɛ ǹ nɛ kɛnɛn: «Ka dinin min fulupaa kɛ lɛ dù siɛ̃ kun ka masɛ nɛ, ka dinin lɛn goon ne. 21Min a Nɛgiĩ á re giɛ̃, ka a bɛ́ á n kiɛ̃ a wɔ gɔn la Lawa a boo-n lɔn. Sɛnɛ, min mɛn bɛ́ re Min a Nɛgiĩ we a zɔ́ɔn gɔn, bɛa dɛnaa wɔ n ka bɔ̀n nɛ! Bɛ̀ ǹ dɛnaa din na a yɛ wa, bɛ á soɛ a ganaa.»
Dɛnaa a màn-bii sonbore
(Mat 26.26-30; Luk 22.15-20; Kor1 11.23-25)
22Ǹ bɛ́ màn bii, Yezu buuru saa, á barka da Lawa nɛ, á yiyiɛ kɔn, á kɔ a kialandɛnan la, á pɛ ǹ nɛ: «Ka kɛ si, masɛ din gɔ̀nɔn siĩ-n ka kɛ nɛ.» 23Bɛ kio, á duvɛ̃ saa màn nɛ, á barka da Lawa nɛ, á kɔ ǹ la, ǹ tumaa mi. 24#BBN 24.8; Zer 31.31-34 Yezu tɔ́n pɛ ǹ nɛ: «Masɛ mà n ka kɛ nɛ, á kaa minbuiin tumaa a kirisibaa a lɛa, á n nyɛɛ mà Lawa lɛ kɔ kɔn la wɔ ka minbuiinin ni. 25Masɛ n pii ka nɛ, sonbore ne: Ma a duvɛ̃ mii doo duduu wa, yǎa *Lawa a kiibaa ǹ bǎã nɛ, ma tɔn duvɛ̃ dii mii.»
26Ǹ bɛ́ ǹ nə́ zɔ́n lɛ a loe lɔ ǹ nə́ nya, ǹ nə́ soo ǹ nə́ woo *Olivie dan kele la.
Yezu a boo Piɛrɛ a piã wɔ gɔn la
(Mat 26.31-35; Luk 22.31-34; Zaã 13.36-38)
27 #
Zak 13.7
Yezu pɛ a kialandɛnan manɛ:
– Sii mɛn bɛ́ re koɛ masɛ la, bɛ lɛ n die ka dinin tumaa a mɛnaa ǹ giala biɛ, ka a bɛ́ ke á n kiɛ̃ Lawa a boo-n lɔn: «Man die sèren-lɛduə̃li lɛ dii, sèren lɛn tá re sawɛɛ.» 28#Mat 28.16 Sɛnɛ, bɛ̀ ma yii wusoo á kaa, man die woe ka nyɛɛnɛ Galilee gána nɛ.
29Piɛrɛ tɔ́n pɛ nɛ: «Haalɛ ta ǹ tumaa baa si ǹ nə́ n daa, masɛ bie wa!»
30Yezu tɔ́n pɛ Piɛrɛ nɛ: «Man pii n ni, ka boo taãn nɛ: Pelo tèlò-n dinin, koo laan bɛ̀ a wuu pɛ gunyin paa, bɛ̀ n nə́ n piã ka masɛ nɛ á dɔ gunyin sɔɔ.»
31Piɛrɛ wusoo á n parsii bɔ doo á pɛ: «Haalɛ ta masɛ n giɛ̃ kunun n ni, masɛ a n piɛ̃ n nɛ duduu wa.»
Kialandɛnan gialakunun lɛn tumaa pɛ miɛ̃.
Yezu Lawa nyan mɛn kɔ Zɛtsemaanii
(Mat 26.36-46; Luk 22.39-46)
32Bɛ kio, ǹ nə́ dɔ bǎã kɔ́n nɛ lalaa lɛ-a, a tɔ mà Zɛtsemaanii. Yezu pɛ a kialandɛnan manɛ: «Ka giã tán kànaa, ma wo Lawa nyankɔ bɔrɔ.»
33Á Piɛrɛ kũ ka Zaaki ni ka Zaã nɛ, ǹ nə́ woo kun. A yiri yii ná a giala kɔ á n lɔlɔkɔn, a foo yii ziziɛ̃. 34Á tɔ́n pɛ ǹ nɛ: «Foo-ziziɛ̃ n die masɛ dii. Ka giã tán kànaa, ka n yii toa koo.»
35Á n zɔ̃ á woo nyɛɛn boɛɛn nɛ, á na á kaa tán, á Lawa nyankɔ: «Bɛ̀ a tá boe la a n zɛnaa, Lawa masɛ kanbaa biikoo kɛa nɔmaa kɛ ganaa.»
36A na á goã pii: «E, maa Díi! N tá boe sii din tumaa la. Là-paparɛɛ kɛ wɔlɔ lui masɛ ganaa. Sɛnɛ, masɛ foo sii baran n zɛnaa wa, n din wɔ nə n zɛnaa.»
37Á wusoo á daa kialandɛnaa min sɔɔ lɛ li, á daa ǹ yaa tán nyuù ni. Á tɔ́n pɛ Piɛrɛ nɛ: «Simɔn, ma n nyuù we? N boo la n nə́ n yii toa koo boɛɛn dinin wa? 38Ka n yii toa koo, ka Lawa nyankɔ, màn mɛn bɛ́ toɛ, ka baran mɛnaa damagɔ́ɔ̃ li ǹ sii-n wa. Sii sonbore zɛnaa ǹ foo tá minbuiin nɛ lon, sɛnɛ, a zɛnaa ǹ pàã na a ba a lon wa.»
39Á wusoo á n zɔ̃ á woo nyɛɛnɛ, á Lawa nyankɔ miɛ̃ doo. 40Á wusoo á daa a kialandɛnan lɛn li, á daa ǹ yaa tán nyuù-n doo, nyuù la ǹ yii ni. Boo din ba n diɛ ǹ la wa.
41A sɔɔbaa ǹ wɔ, a bɛ́ á wusoo á daa, á nɔmaa á pɛ ǹ nɛ: «Ka n tɔn nyuù we, ka á n susui? A lɛ pã kəni! Biikoo dɔ. Ka ga, ǹ tá re Min a Nɛgiĩ we sii baraa-zɛnaalin gɔn. 42Ka yoo, wɔ n tan! Ka ga, min mɛn bɛ́ re ma koe maa zɔ́ɔn la, á ke die.»
Yezu kũ boo
(Mat 26.47-56; Luk 22.47-53; Zaã 18.3-12)
43Yezu bɛ́ boo diɛ, Zudaasi daa á dɔ gɔrɔ, a kialandɛnaa fulupaa lɛ goon ne. Lawa a wúlu-bɔlen goledɛnan laanka landa sii-daraalin laanka Zuifun goledɛnan nə́ zaman dia kun ni, ǹ nə́ daa ka gɔya san laanka bàbàlan nɛ ǹ gɔn. 44Zudaasi mɛn bɛ́ die Yezu koe ǹ la, á gòon yiɛ ǹ ganaa á sii a kɔnbɔ nyaa ǹ nɛ, á pɛ ǹ nɛ mà asɛ bɛ́ re fòo diɛ min mɛn nɛ a n sɔɔ a nɛ, mà a din lɛ nɛ. Mà ǹ kũ ǹ tamaa sɔnbɔraanɛ, ǹ wo ne.
45Zudaasi bɛ́ á dɔ lɔn gɔrɔ, á n zɔ̃ á dɔ Yezu li, á pɛ nɛ: «Mìinaa!»
Bɛ kio, á n sɔɔ a nɛ. 46Gialakunun lɛn nə́ tɔ́n kaa Yezu la ǹ nə́ kũ. 47Min mɛnɛn bɛ́ ǹ nə́ goã walan, bɛn goon ná a gɔya sa bɔ, á yoo Lawa a wúlu-bɔlen kiã a dí-nyali gialaa, a ná a too na á bɔ a ganaa. 48Yezu tɔ́n pɛ ǹ nɛ: «Ka n ka gɔya san laanka bàbàlan goa ka daa masɛ gialaa, ka ma n mɛnaa minin la wole lɛa? 49#Luk 19.47; 21.37 Ma bɛ́ kun ka nɛ babaraa, má n minin darɛɛ Lawa a kion, wàa na á baa ka ma kũ wa? Sɛnɛ, kɛ na á n zɛnaa màn mɛn bɛ́ toɛ a n kiɛ̃ Lawa a boo-n lɔn, a kɔnpɛ ka bɛ lɛ nɛ.»
50Bɛa biikoo li, a kialandɛnan tumaa baa si ǹ nə́ toa walan.
51Tɔntɔraa goon kɔ Yezu lɛ yǎa walan, burunkan dinsɔɔ̃ n pɛnɛɛ nɛ a ganaa. Ǹ bɛ́ mà ǹ na a dɔ kuĩ, 52a ná a burunkan na á daa, á baa si ka a gɔ̀nɔn kooro fulupaa nɛ.
Yezu n Zuifun kiri-kurulin yɔrɔ-a
(Mat 26.57-68; Luk 22.54-55,63-71; Zaã 18.13-14,19-24)
53Ǹ nə́ woo ka Yezu ni Lawa a wúlu-bɔlen kiã a piɛ. Lawa a wúlu-bɔlen goledɛnan laanka Zuifun goledɛnan laanka landa sii-daraalin tumaa woo n lɛ sɔkɔn walan. 54Piɛrɛ ná a din bii lui Yezu ganaa á kɔ lɛ yǎa Lawa a wúlu-bɔlen kiã a sumu-n ka kɔ̃. Á giã tán walan á n gɔ̀nɔn wɔ̃ tɛ ganaa kun ka garadin ni. 55Lawa a wúlu-bɔlen goledɛnan laanka kiri-kurulin tumaa ga Yezu biɛ kɔ ǹ gɔn li mà maǹ dii, ǹ nə́ fɔ̃. 56Min gigiã soɛ da la sɛn, sɛnɛ, ǹ dinin nə́ wusoo ǹ nə́ kɔn liere kɔ.
57Ǹ kɔnɔn nə́ yoo, ǹ nə́ soɛ kuru ǹ nə́ da la, 58#Zaã 2.19 mà ǹsɛn nə́ ma a lɛ-n, mà minbuiinin nə Lawa a kion mɛn dɔ ka ǹ gɔn nɛ, mà asɛ á die bɛ lɛ wurii, a wusoo a kɔsɔ dɔ lɛawaa sɔɔ gɔ́ɔ̃ nɛ, min gòɛ̃ ná a ba a-n wa.
59Sɛnɛ, bɛa boo lɛ dɔ din wɔ gɔn la, ǹ bɔlɔ goã kun wa.
60Lawa a wúlu-bɔlen kiã tɔ́n yoo á golee ǹ tumaa yɔrɔ-a, á nɔ̀n da Yezu la: «Minin lɛn bɛ́ n gialaa ka boo mɛn nɛ, boo ba n lɛ-n n tá ǹ lɛ sii-n wa koɛ?»
61Sɛnɛ, Yezu nə́ n lɛ tã, a boo kɔ́n da wa. Lawa a wúlu-bɔlen kiã wusoo á nɔ̀n da la: «N din lɛ n Minin Nyin-sili lɛa? Lawa sonbore kɛa Nɛgiĩ nə n nɛ?»
62 #
Dan 7.13
Yezu tɔ́n pɛ: «Hiĩ, masɛ n bɛ lɛ lɛa. Ka á re Min a Nɛgiĩ yii giã-n tán Lawa Pàãyiidɛnaa gusin. Ka á re yii dɔn lon a labaran bii die.»
63Lawa a wúlu-bɔlen kiã foo yoo, á nɔmaa a ná a din a mɔnaan kũ á ǹ toɛ̃, á pɛ: «Wɔsɛn laadoo ba siére kɔsɔ din ganaa doo wa! 64Táa ka a lɛ ma Lawa tɔ ziziɛ̃? Ka n wàa taasɛ?»
Ǹ tumaa mà a zɛ̀rɛ nɛ, mà a doamaa-n ka gɛ̀ nɛ.
65Ǹ kɔnɔn ná a giala kɔ ǹ nə́ sɛ̀ kaa Yezu ganaa, ǹ nə́ màn yii a yii ganaa, bɛ̀ ǹ nə n gɔn munu ǹ dɛ, ǹ nɔ̀n da la: «Min mɛn bɛ́ á n dɛ, bɛa dɛnaa pɛ wɔsɛn man kən le!»
Bɛ kio, garadin nə́ Yezu kũ ǹ nə́ n gɔn tɔtɔ a para-n.
Piɛrɛ nə n piɛ̃ ka Yezu ni
(Mat 26.69-75; Luk 22.56-62; Zaã 18.15-18,25-27)
66Piɛrɛ bɛ́ tɔn tán sumu lɛ nɛ, lɔ goon daa, bɛa lɔ lɛ n dí nyɛɛ Lawa a wúlu-bɔlen kiã nɛ. 67A bɛ́ á Piɛrɛ yɛ n gɔ̀nɔn wɛ̃ tɛ ganaa, á ga a ganaa ka gongon, á pɛ nɛ: «Nsɛ kɛ dɔ́ goã kun ka Nazarɛtin giĩ Yezu kɛ lɛ nɛ.»
68Sɛnɛ, Piɛrɛ ná a liere kɔ mà asɛ a doɛ̃ wa, mà asɛ din yii ba a boo lɛ a woo ǹ bǎã-a wa.
Bɛ kio, á soo kiɛnlɛ-a, bɛ̀ koo sa goon bɛ́ á wuu pɛ.
69Lɔ dí-nyali lɛ yɛ, min mɛnɛn bɛ́ ǹ tan, á wusoo á pɛ bɛn manɛ mà giĩ kɛ nə ǹ dinin min goon lɛa!
70Piɛrɛ wusoo a ná a liere kɔ.
Bɛ kio boɛɛn nɛ, min mɛnɛn bɛ́ walan bɛn nə́ wusoo ǹ nə́ pɛ Piɛrɛ nɛ mà liere ba a-n wa, mà a nə ǹ dinin min goon lɛa, mà Galilee gána min ni.
71Piɛrɛ yoo á dì bíi á n liɛ, á pɛ: «Bɛ̀ masɛ soɛ bɔ, Lawa dɔlɔ bɔ ma ganaa! Ka bɛ́ giĩ mɛn lɛ boo diɛ masɛ nɛ, masɛ a doɛ̃ wa!»
72A din bǎã-n gɔrɔ koo sa goon wuu a paabaa ǹ wɔ pɛ. Piɛrɛ yiri tɔ́n gisĩ Yezu a boo lɛ nɛ a ǹ mɛn lɛ pɛ nɛ mà koo laan bɛ̀ a wuu pɛ gunyin paa, mà á re n piɛ̃ ka asɛ nɛ á dɔ gunyin sɔɔ. Piɛrɛ nɔmaa á n lɛ da wuu ni.
اکنون انتخاب شده:
Mar 14: SBPE2011
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
