Mat 26
26
Ga Yezu kũ ǹ gɔn li boo
(Mar 14.1-2; Luk 22.1-2; Zaã 11.45-53)
1Yezu bɛ́ á bɛa doroon kɛn lɛn tumaa kɔ á nya, á tɔ́n pɛ a kialandɛnan manɛ: 2#BBN 12.1-27 «Ka á doɛ̃ mà *kiɛ̃mala ǹ zɔ́n gialakun na á goã lɛawaa paa. Ǹ tá re Min a Nɛgiĩ koe minin la, ǹ dere gɔn ganaa.»
3Bɛa biikoo li, Lawa a wúlu-bɔlen goledɛnan laanka Zuifun goledɛnan kɔsɔn nə́ woo n lɛ sɔkɔn wúlu-bɔlen kiã Kayifu a sumu-n, 4ǹ nə́ n lɛ kaa kun boo goon ganaa, mà maǹ die Yezu kuĩ ka durii ni ǹ dɛ. 5Maǹ nə́ goã pii: «Wɔ doamaa bie wɔ kũ zɔ́n pinaa kɛ-n wa, bɛ bie wa, á die sii lɔlɔkɔn biɛ zaman lɛ bii.»
Nyɔɔ gìĩ kɔɔ̃n kaa Yezu mìi-n boo
(Mar 14.3-9; Zaã 12.1-8)
6Giĩ goon goã Betaanii kiwi, a tɔ n Simɔn, gɔ̀nɔn busu babaraa goã a ganaa. Yezu bɛ́ bɛa kion, 7#Luk 7.37-38 lɔ goon daa wɔ walan ka kɔlɔ donkolon siĩn kɔ́n nɛ, nyɔɔ gìĩ kɔɔ̃n ná a nɛ, a giɔ̀mɔ n kaka parsiini. Lɔ lɛ Yezu toa màn bii, á bɛa nyɔɔ lɛ kaa a mìi ni. 8A kialandɛnan bɛ́ ǹ nə́ bɛ yɛ, ǹ foo busu lɔ lɛ li parsiini, ǹ nə́ pɛ: «Wàa-n basaã n ke? 9Toa bɛ̀ wɔ n wɔ́ nyɔɔ kɛ lɛ sã giɔ̀mɔ kaka ganaa, wɔ́ a wɔrɔ kɔ doobaan la!»
10Yezu bɛ́ á dɔ̃ mà maǹ boo diɛ miɛ̃, á tɔ́n pɛ ǹ nɛ: «Wàa na á baa ka tá lɔ kɛ lɛ nɔmiɛ? Dí taãn nɛ ka kɛ nɛ á nya masɛ nɛ. 11#TDP 15.11 A giala, doobaan tá kun ka nɛ biikoo tumaa li, sɛnɛ, ka a re masɛ yii kun ka nɛ biikoo tumaa li wa. 12A bɛ́ á nyɔɔ gìĩ kɔɔ̃n kɛ kaa masɛ gɔ̀nɔn ganaa, a na á maa biĩ yɔrɔ bɔ ka bɛ nɛ. 13Man pii ka nɛ, sonbore, ka bɛ́ re Boo Tii Kɔɔ̃n pii kanaa paǹ mɛn tumaa nɛ, lɔ kɛ sii mɛn zɛnaa, ǹ tá re bɛ dɔ laakalɛɛ walan, ǹ minin yiri da a zɛnaa ǹ sii ni.»
Zudaasi a ga Yezu kɔ ǹ gɔn li
(Mar 14.10-11; Luk 22.3-6)
14Bɛa biikoo li, Kariyɔtin Zudaasi mɛn bɛ́ a kialandɛnaa fulupaa lɛ goon lɛa, bɛ́ woo Lawa a wúlu-bɔlen goledɛnan li, 15#Zak 11.12 á pɛ ǹ nɛ: «Ka n lɛ koe ka wàa kɔ masɛ la, ma Yezu kɔ ka la?»
Ǹ nə́ wɔrɔ we pɔsɔɔ nimi ǹ nə́ kɔ la. 16A saa bɛa biikoo lɛ ganaa, Zudaasi ná a giala kɔ á ga biikoo sonbore li, màn mɛn bɛ́ toɛ, a Yezu kɔ ǹ la.
Kiɛ̃mala ǹ zɔ́n yɔrɔ bɔ
(Mar 14.12-21; Luk 22.7-14,21-23; Zaã 13.21-30)
17 *Yɔ bùbaã buuru zɔ́n giala kɔ pinaa, Yezu a kialandɛnan nə́ daa nɔ̀n da la: «Ma n giɛ li wɔsɛn nə wo kiɛ̃mala ǹ zɔ́n màn-bii zɛnaa maa?»
18Yezu tɔ́n pɛ ǹ nɛ:
– Ka wo min kɔ́n li kiwi gɔ́ɔ̃ nɛ ka pɛ nɛ: «Mìinaa n kɛ pii mà asɛ a biikoo dɔ, mà asɛ n die kiɛ̃mala ǹ zɔ́n màn bii a piɛ, kun ka a kialandɛnan nɛ.»
19Yezu màn mɛn pɛ a kialandɛnan manɛ, ǹ nə́ bɛ lɛ zɛnaa, ǹ nə́ kiɛ̃mala ǹ zɔ́n màn-bii sii yɔrɔ bɔ.
Kiɛ̃mala ǹ zɔ́n màn-bii
20Wasa bɛ́ á mɛ, Yezu laanka a kialandɛnaa fulupaa lɛ giã tán-a ǹ nə́ màn bii. 21Ǹ bɛ́ màn bii, Yezu pɛ ǹ nɛ: «Masɛ n pii ka nɛ, sonbore, ka dinin min goon nə die masɛ we maa zɔ́ɔn gɔn.»
22Bɛa boo lɛ yɔrɔ kɔsiɛ da a kialandɛnan lɛn ganaa parsiini, ǹ ná a giala kɔ ǹ nə́ nɔ̀n da la gogoon, didie n pii: «Táa masɛ bie wa, Dɛnaa?»
23 #
Loe 41.10
Yezu tɔ́n pɛ: «Min mɛn bɛ́ á n gɔn wɔ kun ka masɛ nɛ dù tasa nɛ bɛa dɛnaa nɛ. 24Min a Nɛgiĩ á re giɛ̃, ka a bɛ́ á n kiɛ̃ a wɔ gɔn la Lawa a boo-n lɔn. Sɛnɛ, min mɛn bɛ́ re Min a Nɛgiĩ we a zɔ́ɔn gɔn, bɛa dɛnaa wɔ n ka bɔ̀n nɛ! Bɛ̀ n dɛnaa din na a yɛ wa, bɛ á soɛ a ganaa!»
25Zudaasi mɛn bɛ́ we a zɔ́ɔn gɔn, bɛ́ tɔ́n nɔ̀n da Yezu la: «Táa masɛ bie wa, Mìinaa?»
Yezu tɔ́n pɛ nɛ: «N din bɛ́ nə ń pɛ!»
Dɛnaa a màn-bii sonbore
(Mar 14.22-26; Luk 22.15-20; Kor1 11.23-25)
26Ǹ bɛ́ màn bii, Yezu buuru saa, á barka da Lawa nɛ, á yiyiɛ kɔn, á kɔ a kialandɛnan la, á pɛ ǹ nɛ: «Ka si ka sɔ̃, masɛ din gɔ̀nɔn nɛ.»
27Bɛ kio, á duvɛ̃ saa paan nɛ, á barka da Lawa nɛ, á kɔ ǹ la, á pɛ ǹ nɛ: «Ka dinin tumaa mi, 28#BBN 24.8; Zer 31.31-34 kɛ n masɛ mà lɛa, á kaa minbuiin tumaa a lɛa, màn mɛn bɛ́ toɛ, Lawa nə ǹ sii baraan toa ǹ nɛ. A n nyɛɛ mà Lawa lɛ kɔ kɔn la wɔ ka minbuiinin ni. 29Man pii ka nɛ, sonbore: A kũ sisia ganaa, ma a bɛa duvɛ̃ lɛ mii doo wa, yǎa maa Díi *Lawa a kiibaa ǹ bǎã nɛ, ma bɛ́ re duvɛ̃ dii mii kun ka nɛ ǹ mɛn pinaa.»
30Bɛ kio, ǹ nə́ zɔ́n lɛ a loe lɔ, ǹ nə́ tɔ́n yoo, ǹ nə́ woo *Olivie dan kele la.
Yezu saa lɛlɛ á Piɛrɛ a piã boo mɛn da
(Mar 14.27-31; Luk 22.31-34; Zaã 13.36-38)
31 #
Zak 13.7
Bɛa biikoo li, Yezu pɛ a kialandɛnan manɛ:
– Sii mɛn bɛ́ re n zɛnɛɛ masɛ-n pelo tèlò-n dinin, bɛ lɛ n die ka dinin tumaa a mɛnaa ǹ giala biɛ. A giala, a kiɛ̃maa tá Lawa a boo-n kɛnɛn: «Man die sèren-lɛduə̃li lɛ dii, sèren lɛn tá re sawɛɛ.» 32#Mat 28.16 Sɛnɛ, Yezu mà bɛ̀ asɛ yii wusoo á kaa, mà asɛ á die woe ǹ nyɛɛnɛ Galilee gána nɛ.
33Piɛrɛ tɔ́n nə n lɛ da boo lɛ nɛ á pɛ nɛ: «Haalɛ ta ǹ tumaa baa si ǹ nə́ n daa, masɛ a baa sii ma n daa wa.»
34Yezu tɔ́n pɛ nɛ: «Man pii n ni, sonbore: Pelo tèlò-n dinin, koo laan bɛ̀ a wuu pɛ, n din kɛ lɛ á re n piɛ̃ ka masɛ nɛ, á dɔ gunyin sɔɔ.»
35Piɛrɛ tɔ́n pɛ Yezu ni: «Haalɛ ta masɛ n giɛ̃ kunun n ni, masɛ a n piɛ̃ n nɛ duduu wa.»
Kialandɛnaa gialakunun lɛn tumaa pɛ miɛ̃.
Yezu Lawa nyan mɛn kɔ Zɛtsemaanii dù gɔrɔ nɛ
(Mar 14.32-42; Luk 22.39-46)
36Bɛ kio, Yezu woo á dɔ bǎã kɔ́n nɛ, kun ka a kialandɛnan nɛ, a tɔ mà Zɛtsemaanii. Á tɔ́n pɛ ǹ nɛ: «Ka giã tán kànaa, ma wo Lawa nyankɔ kɛnɛn li ma tɔn daa.» 37Á Piɛrɛ laanka Zebedee a nɛgiĩ min paa kũ, á woo ǹ ne. Yɔrɔ-kɔsiɛ laanka foo-ziziɛ̃ kũ. 38Á tɔ́n pɛ ǹ nɛ: «Foo-ziziɛ̃ n die masɛ dii. Ka giã tán kànaa, ka n yii toa koo kun ka masɛ nɛ.»
39Á n zɔ̃ á woo nyɛɛn boɛɛn nɛ, á na á kaa tán-a, á n mìi kuməə, á Lawa nyankɔ bɛ̀ a n pii: «Maa Díi! Bɛ̀ n tá boe la n zɛnaa, n là-paparɛɛ kɛ wɔlɔ lui ma ganaa. Sɛnɛ, masɛ foo sii baran n zɛnaa wa, n din wɔ nə n zɛnaa.»
40Á wusoo á daa a kialandɛnaa sɔɔ lɛ li, á daa ǹ yaa tán-a nyuù ni. Á tɔ́n pɛ Piɛrɛ nɛ: «Á ke, ka n yii toa koo boɛɛn dinin kun ka masɛ-n wa?» 41Ka n yii toa koo, ka Lawa nyankɔ, màn mɛn bɛ́ toɛ, ka baran mɛnaa damagɔ́ɔ̃ li ǹ sii-n wa. Sii sonbore zɛnaa ǹ foo tá minbuiin nɛ lon, sɛnɛ, a zɛnaa ǹ pàã na a ba a lon wa.
42Á n zɔ̃ á n bɔ ǹ ganaa doo, ka a gunyin paabaa ǹ wɔ nɛ, á Lawa nyankɔ bɛ̀ a n pii: «Maa Díi, bɛ̀ masɛ á boe la ma kanbaa là-paparɛɛ kɛ lɛ-a wa, n din foo sii nə n zɛnaa!»
43Á wusoo á daa a kialandɛnan lɛn li doo, á daa ǹ yaa tán-a nyuù ni. Nyuù na á la ǹ yii ni. 44Yezu kiɛ̃ á n bɔ ǹ li doo, á n zɔ̃ á woo tiãlɛa, á Lawa nyankɔ a gunyin sɔɔbaa ǹ wɔ, a ná a din boo goon lɛ pɛ. 45Bɛ kio, á wusoo á daa a kialandɛnan lɛn li, á pɛ ǹ nɛ: «Ka n tɔn nyuù we ka tá n susui? Á ke, biikoo dɔ. Ǹ tá re Min a Nɛgiĩ we sii baraa-zɛnaali n gɔn. 46Ka yoo wɔ n tan! Ka ga, min mɛn bɛ́ re ma koe maa zɔ́ɔn la, á ke die.»
Yezu a kuĩ
(Mar 14.43-50; Luk 22.47-53; Zaã 18.3-12)
47Yezu bɛ́ boo diɛ, Zudaasi daa á dɔ gɔrɔ, a kialandɛnaa fulupaa lɛ a goon ne. Lawa a wúlu-bɔlen goledɛnan laanka Zuifun goledɛnan nə́ zaman gole dia kun ni, ǹ nə́ daa ka gɔya san laanka bàbàlan nə ǹ gɔn. 48Zudaasi mɛn bɛ́ die Yezu koe ǹ la, á gòon yiɛ ǹ ganaa á sii a kɔnbɔ nyaa ǹ nɛ, á pɛ ǹ nɛ: «Ma bɛ́ re fòo diɛ min mɛn nɛ, man sɔɔ a nɛ, a din lɛ nɛ. Ka kũ.» 49Zudaasi nə́ n zɔ̃ á dɔ Yezu li gɔrɔ, á pɛ nɛ: «Fòo le, Mìinaa!»
Bɛ kio á n sɔɔ a nɛ. 50Yezu tɔ́n pɛ nɛ: «Maa giaáragiĩ, n da sii mɛn ganaa, a zɛnaa fufuu.»
Bɛ kio, gialakunun lɛn nə́ n zɔ̃ ǹ nə́ dɔ, ǹ nə́ kaa Yezu la, ǹ nə́ kũ. 51Min mɛnɛn bɛ́ kun ka Yezu ni, bɛn goon ná a gɔya sa bɔ, á yoo Lawa wúlu-bɔlen kiã a dí-nyali gialaa, a ná a too na, á bɔ a ganaa. 52Yezu tɔ́n pɛ nɛ: «N gɔya sa da a kii ni, a giala min mɛn din tumaa bɛ́ gɔya siɛ min li, ǹ dɔn man die gɔya gɛ̀ we. 53N ba doɛ̃ mà masɛ á boe la ma pɛ maa Díi Lawa nɛ, mà a n dɔ ma lɛ wa? Bɛ̀ masɛ golee li, á boe la a lon a dia dí-a wole kuru dadara fulupaa dia masɛ la sisia, ǹ zia da maa lɛa. 54Sɛnɛ, bɛ̀ masɛ zɛnaa miɛ̃, Lawa a boo lɛ lɛ n siɛ lɔn a tɔn pã doo? A n zɛnaa lɔn, Lawa a boo na á pɛ mà a doamaa nɛ a n zɛnaa miɛ̃.»
55 #
Luk 19.47; 21.37 Bɛ kio, Yezu tɔ́n pɛ zaman lɛ nɛ: «Ka ǹ ka gɔya san laanka babalan goa, ka daa masɛ gialaa, ka masɛ n mɛnaa minin la wole lɛa? Ma bɛ́ giɛ̃ tán Lawa a kion baraabaraa bɛ̀ ma minin daraa, wàa na á baa ka ma kũ wa? 56Sɛnɛ, kɛ din tumaa na á n zɛnaa, màn mɛn bɛ́ toɛ, Lawa a boo gii-dalin nə́ màn mɛn kiɛ̃ Lawa a boo ne, bɛ lɛ lɛ pã.»
Bɛa biikoo li, a kialandɛnan tumaa baa si ǹ nə́ toa walan.
Maǹ kiri we Yezu ganaa
(Mar 14.53-65; Luk 22.54-55,63-71; Zaã 18.13-14,19-24)
57Min mɛnɛn bɛ́ ǹ nə́ Yezu kũ, ǹ nə́ woo ne wúlu-bɔlen kiã Kayifu a piɛ, landa sii-daraalin laanka Zuifun goledɛnan kɔsɔn nə wo n lɛ sɔkɔn bǎã mɛn nɛ. 58Piɛrɛ ná a din bii lui Yezu ganaa, á kɔ lɛ, yǎa Lawa a wúlu-bɔlen kiã a sumu-n ka kɔ̃. Á wɔ sumu-n, á giã tán kun ka dí-nyalin ni, n yii diɛ sii lɛ a giala nyɔmɔɔ ǹ gɔn la.
59Lawa a wúlu-bɔlen goledɛnan laanka kiri-kurulin gialakunun tumaa ga Yezu biɛ kɔ ǹ gɔn li, haalɛ ta a din ni kɔkɔrɔ lɔn, màn mɛn bɛ́ toɛ, ǹ dɛ a gã. 60Sɛnɛ, ǹ na a biɛ kɔ ǹ sii yɛ wa, a laanɛ, min gigiã daa soɛ kuru ǹ nə́ kakaa la. Nyɔɔbaa-n, min paa kɔ́n nə́ yoo, ǹ nə́ soɛ kuru ǹ nə́ da la, 61#Zaã 2.19 ǹ nə́ pɛ: «Giĩ kɛ lɛ pɛ mà asɛ á boe la a Lawa a kion kɛ wuru, asɛ wusoo a kɔsɔ dɔ lɛawaa sɔɔ gɔ́ɔ̃ nɛ.»
62 #
Dan 7.13
Wúlu-bɔlen kiã tɔ́n yoo á pɛ Yezu ni: «Minin lɛn bɛ́ n gialaa ka boo mɛn nɛ, boo ba n lɛ-n, n tá ǹ lɛ sii-n wa?»
63Sɛnɛ, Yezu nə́ n lɛ tã. Wúlu-bɔlen kiã tɔ́n pɛ nɛ: «Ká Lawa yiikoonaa tɔ nɛ, bɛ̀ n din ni Minin Nyin-sili lɛa, bɛ̀ Lawa a Nɛgiĩ n ka n din lɛ nɛ, a pɛ wɔsɛn manɛ.»
64Yezu tɔ́n pɛ nɛ: «Ka n pɛ lɔn. Sɛnɛ, masɛ n pii ka nɛ: A saa sisia ganaa, ka á re Min a Nɛgiĩ yii giã-n tán Lawa Pàãyiidɛnaa gusin, ka á re masɛ yii dɔn die lon a labaran la.»
65 #
LWS 24.16
Lawa a wúlu-bɔlen kiã nɔmaa a ná a din a mɔnaan kũ á ǹ toɛ̃, á pɛ: «Á Lawa tɔ ziziɛ̃! Wɔsɛn laadoo ba siére kɔsɔ-a doo wa! Ka bɛ́ ka a Lawa tɔ ziziɛ̃ ǹ boo lɛ ma. 66Ka n wàa taasɛ?»
Ǹ nə́ tɔ́n pɛ: «A zɛ̀rɛ nɛ, a doamaa-n ka gɛ̀ nɛ.»
67 #
Iza 50.6
Bɛ kio, ǹ nə́ sɛ̀ kakaa a yɔrɔ-a, ǹ nə́ dɛdɛ ka gɔn-muniin ni. Min tɛn nə́ ǹ gɔn tɔtɔ a para-n, 68bɛ̀ ǹ pɛ nɛ: «Minin Nyin-sili lɛ, min mɛn bɛ́ á n dɛ, bɛa dɛnaa pɛ wɔsɛn man kən le!»
Piɛrɛ nə n piɛ̃ ka Yezu ni
(Mar 14.66-72; Luk 22.56-62; Zaã 18.15-18,25-27)
69Piɛrɛ na á goã giã-n tán kanaa sumu-n. Wúlu-bɔlen kiã a lɔn dí-nyali goon nə́ n zɔ̃ á dɔ a li, á pɛ nɛ: «Nsɛ kɛ dɔ goã kun ka Galileen giĩ Yezu kɛ lɛ nɛ.»
70Sɛnɛ, Piɛrɛ ná a liere kɔ min tumaa yɔrɔ-a, á pɛ: «Masɛ din yii ba n boo lɛ a woo ǹ bǎã-a wa.»
71Bɛ kio, á soo sumu-n á woo kiɛnlɛ-a. Lɔ dí-nyali kɔsɔ dɔ yɛ, min mɛnɛn bɛ́ walan, bɛ́ tɔ́n pɛ bɛn manɛ: «Kɛ dɔ́ goã kun ka Nazarɛtin Yezu lɛ nɛ.»
72Piɛrɛ wusoo a ná a liere kɔ doo, á n liɛ á pɛ: «Masɛ a bɛa giĩ lɛ doɛ̃ wa.»
73Bɛ kio boɛɛn nɛ, min mɛnɛn bɛ́ walan, bɛn nə́ n zɔ̃ ǹ nə́ dɔ Piɛrɛ li, ǹ nə́ pɛ nɛ: «Liere ba a-n wa, ma nə ǹ dinin min goon lɛa. N boo da ǹ gɔn din tá n bɔ ǹ bǎã nyɛɛ.»
74Piɛrɛ yoo á dì bíi a din li, á n liɛ: «Bɛ̀ masɛ soɛ bɔ, Lawa dɔlɔ bɔ ma ganaa! Masɛ a kɛa giĩ lɛ doɛ̃ wa dɛ!»
A din biikoo lɛ li gɔrɔ, koo sa goon nə́ wuu pɛ. 75Yezu boo mɛn pɛ Piɛrɛ nɛ, Piɛrɛ yiri gisĩ a nɛ: «Koo laan bɛ̀ a wuu pɛ, n din kɛ lɛ á re n piɛ̃ ka masɛ nɛ, a dɔ gunyin sɔɔ.»
Piɛrɛ soo kanaa, á wuu pɛ parsiini.
اکنون انتخاب شده:
Mat 26: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
