Mat 24
24
Yezu n boo diɛ Lawa a kion a kaa wɔ paǹ li
(Mar 13.1-2; Luk 21.5-6)
1Yezu bɛ́ á soo Lawa a kion a n woe, a kialandɛnan nə́ n zɔ̃ ǹ nə́ dɔ a li, ǹ nə́ Lawa a kion a dɔ ǹ gɔn nyaa nɛ. 2Yezu tɔ́n pɛ ǹ nɛ: «Ka yii tá kɛ din tumaa a siĩnbaa ganaa? Man sonbore pii ka nɛ: Kɔlɔ kɔ́n ba re goɛ̃ ǹ miã lalan kànaa wa. A din tumaa á re kiɛ.»
Minin bɛ́ re nɔmaan mɛnɛn we
(Mar 13.3-13; Luk 21.7-19)
3Yezu bɛ́ giã-n tán *Olivie dan kele la, a kialandɛnan nə́ n zɔ̃ ǹ nə́ dɔ a li ǹ dininsɔɔ̃nɔn, ǹ nə́ nɔ̀n da la:
– Bɛ n die n zɛnɛɛ biĩ? Sii mɛn dɔ n die nyɛɛ mà n wusoo a daa biikoo dɔ, mà kanaa a nya biikoo dɔ? Bɛ pɛ wɔsɛn manɛ.
4Yezu tɔ́n pɛ ǹ nɛ:
– Ka n dinin kũ, ka baran toa min kɔ́n nə ka yiri sã wa. 5Min gigiã á re die ka masɛ tɔ nɛ ǹ pɛ: «Wɔsɛn man Minin Nyin-sili lɛ lɛa!» Ǹ tá re min gigiã yiri siɛ̃. 6Ka á re miɛ mà zia tá kunu hinlaa, mà a tá sɔsɔɔ ka ganaa. Ka baran toa bɛ nyɛ́ɛ da ka ganaa wa. Bɛ doamaa nɛ a n zɛnaa, sɛnɛ, kanaa a nya bie ka bɛ-n bɔrɔ wa. 7A giala tɔrɔn tá re zia biɛ tɔrɔ kɔsɔn ganaa, gánan tá re zia biɛ gána kɔsɔn ganaa. Bǎã gigiã nɛ, bòo á re we, tán tá re bìn diɛ. 8Bɛ din tumaa ná a giala kɔ ǹ gɔn lɛa, ka lɔ a nɔɔ̀rɔ kɔ ǹ gɔn bɛ́ lɔn.
9 #
Mat 10.22
Bɛa biikoo li, kaa zɔ́ɔn tá re ka koe tɔrɔ kɔsɔn la ǹ fuu nyaa ka yii ni, ǹ tá re ka dii ka gã. Ka tìĩ á re boe min tumaa nyin ni masɛ tɔ a lɛa. 10Bɛa biikoo li, min gigiã á re golee Lawa li toɛ walan. Ka dinin tá re kɔn biɛ zɔ́ɔ, ka kɔn kaa kanaa. 11Min gigiã á re n dinin biɛ Lawa a boo gii-dalin lɛa ǹ daa, ǹ tá re min gigiã yiri siɛ̃. 12Baraabaa á la yii-n nə die toɛ, min gigiã a kɔn-narɛɛ kiɛɛrɛ kɔ. 13#Mat 10.22 Sɛnɛ, bɛ̀ min mɛn si a ganaa yǎa a woo kaa a giala-nyɔmiɛ̃ lɛ, bɛa dɛnaa á die kirisibiɛ. 14Boo Tii Kɔɔ̃n kɛ á die n pii kanaa paǹ tumaa nɛ, màn mɛn bɛ́ toɛ, Lawa bɛ́ a kanaa dii a wɔ ma nɛ ǹ lɛ-dia mɛn we, tɔrɔ tumaa bɛ ma. Bɛ kio kanaa tɔn nya.
Sii bɔnɛɛ boo
(Mar 13.14-23; Luk 21.20-24)
15 #
Dan 9.27; 11.31; 12.11 "Sii bɔnɛɛ mɛn bɛ́ basaã kɔ ǹ sii lɛa", Lawa a boo gii-dali Danayeli ná a boo da, ka á re bɛ yii. A n die n zɛnɛɛ Lawa laanka a wúlu-bɔlen kɔn yɛ ǹ bǎã nɛ Lawa a kion. (Kasɛn mɛnɛn bɛ́ sɛ́wɔ kɛ pii, ka n doa ka a giala ma!) 16Bɛa biikoo li, min mɛnɛn bɛ́ re goɛ̃ Zudee gána nɛ, bɛn doamaa nɛ ǹ baa si ǹ wo kelen la. 17#Luk 17.31 Min mɛn bɛ́ kala-n, bɛ̀ á gisĩ, a doamaa bie a wɔ kion doo mà asɛ na a mànan goɛ wa. 18Min mɛn bɛ́ wuru-n, bɛ doamaa bie a wusoo a wo piɛ doo mà asɛ n woe a mɔnaa siɛ wa. 19Bɔ̀n nə die goɛ̃ lɔ nɔnaan wɔ lɛa, ka min mɛnɛn dɔn bɛ́ nɛnyaanan nə́ ǹ gɔn, ǹ nə́ nyɔ koe ǹ la bɛa lɛawaan kɛn lɛn li. 20Ka Lawa nyankɔ, kaa baa si biikoo baran bɔ̀nɔn tì baa wa, a baran *susu ǹ pii pinaa dɔ baa wa. 21#Dan 12.1; SNS 7.14 A giala, bɛa biikoo lɛ a nɔmaa lɛ á die gole koe parsiini, a kũ kanaa diɛ biikoo ganaa a da pelo ǹ yaa, min tɔn nə ǹ miã yɛ ka a yii-n wa, min ba re ǹ miã kɔsɔ yii ka a yii-n doo duduu wa. 22Bɛ̀ Lawa bie re màn boe bɛa lɛawaan kɛn lɛ wa, min kɔ́n ba boe la a la wa. Sɛnɛ, a min mɛnɛn yii gɔgɔɔ̃, a n die màn boe lɛawaan lɛn lɛ bɛn lɛn taman yii.
23Bɛ̀ min tá pii ka nɛ bɛa biikoo li mà: «Ka ga, Minin Nyin-sili lɛ á kànaa!» hinlaa «a tá kɛnɛn li!» ka baran golee li wa. 24A giala, min tɛn tá re die a soɛ kuru mà asɛ n Minin Nyin-sili lɛ lɛa, min tɛn dɔ á re die a soɛ kuru, mà asɛ n Lawa a boo gii-dali lɛa: Ǹ tá re sii a kɔnboe dadaran laanka kaãbaa ǹ sii kakan zɛnɛɛ ǹ minin yiri sã nɛ, bɛ̀ maǹ boe la dinin, maǹ Lawa a yii gɔgɔɔ̃ wolen kɛn lɛn yiri siɛ̃. 25Masɛ á ke má pɛ ka nɛ bɛ̀ a biikoo baa doe. 26#Luk 17.23 Bɛ lɛ nɛ, bɛ̀ min nə́ pɛ ka nɛ bɛa biikoo li: «Á ke! A tá don,» ka baran wo wa. Bɛ̀ min mɛn dɔ́ pɛ ka nɛ: «Á ke, a n duru kion kànaa,» ka baran golee ǹ dɛnaa a boo li wa. 27La a tɛ pɛ bɛ́ n toɛ lɛ̀nyɛɛn lɔn bɛa wo yǎa lɛ̀giala-n, bɛ̀ minin yii yɛ, Min a Nɛgiĩ a wusoo a daa n die n biɛ miɛ̃. 28#Luk 17.23 Bɛ̀ màn gere a bǎã mɛn nɛ, zèwon ma nə n lɛ soekɔn walan.
Min a Nɛgiĩ a daa boo
(Mar 13.24-27; Luk 21.25-28)
29Bɛa nɔmaa lɛawaan kɛn lɛn kiɛ̃ kio gɔrɔ, wasa á die n biɛ nuunaa nɛ, mui ba re a folon kiɛ doo wa, leeren tá re boe lon ǹ kaa, lon màn pàãdɛnan dinin tumaa á re n lɔlɛkɔn. 30Bɛa biikoo li, Min a Nɛgiĩ a daa a sii a kɔnbɔ á die soe lon. Kanaa a tɔrɔn tumaa á re n lala diɛ. N tá re Min a Nɛgiĩ yii labaran la, ka pàã gole laanka gugurubaa gole ne. 31Masɛ á die maa lon a dia dí-a wolen diɛ, bɛn gole wuu li, kanaa gùrù sii din tumaa ganaa, ǹ maa yii gɔgɔɔ̃ wolen lɛn lɛ sɔkɔn a saa kanaa lɛkoro goon ganaa, a wo a lɛkoro kɔsɔ yaa.
Daraa mɛn bɛ́ yii gɔ́rɔ da wɔ paǹ li
(Mar 13.28-31; Luk 21.29-33)
32Daraa mɛn bɛ́ yii gɔ́rɔ da wɔ gɔn la, ka n too kɔ a ganaa. Bɛ̀ a gùrùn nə́ sɔsɔrɔ kɔ, a luu pã lɔn gɔrɔ, ka n doɛ̃ mà bɔ̀nɔn na á diri. 33A din goon ne, bɛ̀ ka bɛa siin kɛn lɛn tumaa yɛ, ka dɔ̃ mà Min a Nɛgiĩ a daa diri foɛɛ̃nɛ. 34Man pii ka nɛ, sonbore: Pelo minin kɛn ba re giɛ̃ ǹ nya, bɛ̀ bɛa sii kɛ tumaa ná a n zɛnaa wa. 35Lon laanka tán tá re kiɛ̃, sɛnɛ, masɛ a boon kɛn ba re kiɛ̃ wa, maǹ goɛ̃ yǎa duduu.
Die n Min a Nɛgiĩ a daa biikoo doɛ̃?
(Mar 13.32-37; Luk 17.26-30,34-36)
36Sɛnɛ, min kɔ́n ba Min a Nɛgiĩ a daa pinaa laanka a lɛawaa doɛ̃ wa, haalɛ lon a dia dí-a wolen ba doɛ̃ wa, Lawa a Nɛgiĩ lɛ dɔ dinmaa ba doɛ̃ wa, yǎa Díi Lawa dinsɔɔ̃. 37A n baa lɔn Nowee a biikoo li, a n die n biɛ miɛ̃ Min a Nɛgiĩ a daa pinaa. 38A giala, mu gole lɛ laan bɛ̀ a da kanaa lɛ bii, minin man nə́ goã màn bibii, ǹ nə́ màn mimii, ǹ nə́ lɔn gɔgoɛ, ǹ nə́ ǹ nɛnyaanan koe giĩn la, yǎa Nowee a wɔ goo-n lɛ a pinaa. 39Ǹ nə n gɔ́ɔ̃ bii ka sii kɔ́n nɛ wa, yǎa mu gole lɛ daa, á ǹ yii goa á kiɛ̃ ǹ nɛ. A n die n biɛ miɛ̃ Min a Nɛgiĩ a daa pinaa dɔ nɛ. 40Giĩ min paa á re goɛ̃ wuru-n kun, goon tá re n siɛ, goon nə n toa walan. 41Lɔ min paa á re goɛ̃ wii loe gii la kun, goon tá re n siɛ, goon nə n toa walan. 42Bɛ lɛ taman yii, ka n yii toa koo, a giala ka ba kaa Dɛnaa a daa pinaa doɛ̃ wa. 43Bɛ̀ kiondɛnaa n wurumu a da tèlò-n biikoo doɛ̃, a nə n yii dɔrɛɛ, a ba re toɛ a na a kiɛnlɛ yiɛ wa. 44Bɛ lɛ taman yii, ka dɔn nə n yii dɔraa, a giala, ka yiri bɛ́ a ba biikoo mɛn li wa, Min a Nɛgiĩ n die die bɛa biikoo lɛ li.
Yezu boo giməə mɛn da dí-nyali sonbore laanka dí-nyali baraa wɔ paǹ li
(Luk 12.41-48)
45Dí-nyali mɛn nə yiridɛnaa lɛa, á n bɔlɔgoondɛnaa dɔ lɛa? Ǹ mɛn bɛ́ a dɛnaagiĩ bɔ a koa ǹ miã dí-nyalin mìi la bɛ̀ a bɛ́ re woe zii ni, mà a ga ǹ walan, bɛ̀ a màn-bii kɔ ǹ la a biikoo li. 46Bɛa dí-nyali mɛn bɛ́ a dɛnaagiĩ wusoo á daa yaa a dí nyɛɛ a yɔrɔ li, bɛ wɔ na á bǐɛ̃ kɔ! 47Masɛ n pii ka nɛ, sonbore: A dɛnaagiĩ lɛ á die koɛ a gɔn màn din tumaa mìi la. 48Sɛnɛ, bɛ̀ dí-nyali baraa mɛn nɛ, a n pii a din gɔ́ɔ̃ nɛ, maa dɛnaagiĩ a die wusii sisia wa, 49a n die yui a bɔ a mɛ ǹ miãn la a n məməə, a màn bii, a màn mi kun ka yɔ-mili babaraan nɛ. 50Dí-nyali lɛ bɛ́ a ba n yii diɛ a dɛnaagiĩ lɛ la ǹ mɛn pinaa wa, a bɛ́ a ba biikoo mɛn doɛ̃ wa, dɛnaagiĩ lɛ n nɔmɛɛ a kiɛ̃ a da bɛa biikoo li. 51Á die dɔlɔ babaraa boe dí-nyali lɛ ganaa, ka gɔ́ɔ̃ tì-an dɔlɔ kɛ tɔrɔ bɛ́ lɔn. Á re wuu pii bɛa bǎã lɛ nɛ, a sɔ kere bɔ.
اکنون انتخاب شده:
Mat 24: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
