Mat 14
14
Zaã a gɛ̀
(Mar 6.14-29; Luk 9.7-9)
1Bɛa waáraa lɛ nɛ, Erɔdi mɛn bɛ́ Galilee gánadɛnaa lɛa, bɛ́ Yezu boo ma minin lɛ-n. 2Á tɔ́n pɛ a dí-nyalin manɛ: «Zaã, *batɛmu-dali ni, a din lɛ yii na á wusoo á kaa á n bɔ geren bii. Bɛ lɛ na á toa, kaãbaa ǹ sii zɛnaa ǹ pàã tá a lon.»
3 #
Luk 3.19-20
Sonbore ne, Erɔdi dinmaa na á pɛ, mà ǹ Zaã kũ ǹ yii ǹ da kòso-n. A giala Erɔdi na á ǹ diɛ̃ Filipi a lɔ Erɔdiadi saa lɔ lɛa. 4#LWS 18.16; 20.21 Bɛ lɛ nɛ, Zaã goã pii ni mà a doamaa bie a kũ a baa a lɔ lɛa wa.
5Erɔdi na á baa re Zaã dii, sɛnɛ, a na á goã nyɛ́ɛ biɛ gána lɛ a minin manɛ, a giala ǹ tumaa na á goã giɛ Zaã ganaa Lawa a boo gii-dali lɛa.
6Sɛnɛ, Erɔdi a yɛ ǹ zɔ́n pinaa, Erɔdiadi a nɛlɔ yoo, á bɛ̀ baa zɔ́n màn-biilin yɔrɔ-a. Bɛ́ kɔɔ̃n kɔ Erɔdi ganaa parsiini, 7yǎa a n liɛ, mà bɛ̀ á màn mɛn nyankɔ asɛ lon, mà yǎa asɛ bɛ koe la.
8A kɔnpɛ ka ǹ dan a da ǹ boo ne, á tɔ́n pɛ Erɔdi-n kɛnɛn: «Zaã, batɛmu-dali ke, bɛ mìi da màn nɛ kànaa n kɔ masɛ la!»
9Gánadɛnaa yɔrɔ piã, sɛnɛ, a bɛ́ á saa lɛlɛ á n liɛ zɔ́n màn-biilin lɛn yɔrɔ-a, bɛ lɛ taman yii, á nɔmaa á pɛ minin manɛ mà ǹ da kɔ la. 10Á tɔ́n min dia mà a wo Zaã mìi kuru kòso-n a da nɛ. 11Ǹ ná a mìi lɛ da màn nɛ ǹ nə́ daa kɔ nɛnɛn lɛ la, a dɔ́ saa á kɔ ǹ dan la. 12Zaã a kialandɛnan nə́ daa Zaã gere saa ǹ nə́ woo bĩ. Bɛ kio, ǹ nə́ woo a yɔrɔ pɛ Yezu ni.
Yezu minbuiin duu sooro too ka màn-bii ni
(Mar 6.30-44; Luk 9.10-17; Zaã 6.1-14)
13Yezu bɛ́ á bɛa boo kɛ ma, á wɔ tà kuru ǹ goo ne á kiɛ̃ á n bɔ walan, a dinsɔɔ̃ woo don. Sɛnɛ, minin nə́ bɔ a siére-a, zaman gigiã soo kiwi gɔ́ɔ̃ nɛ ǹ nə́ kɔ Yezu lɛ, bɛ̀ ǹ tá tɔ we mu lɛ lɛkoro-a. 14Yezu bɛ́ á soo tà kuru ǹ goo lɛ nɛ, á zaman gigiã yɛ. Bɛa minin lɛn makara bɔ a ganaa, á yoo á ǹ busulən kaka kɔ.
15Wasa bɛ́ á mɛ, Yezu a kialandɛnan nə́ n zɔ̃ ǹ nə́ dɔ a li, ǹ nə́ pɛ nɛ: «Wasa mɛ, bǎã lɛ dɔ wɔlɔ á sɔsɔɔ. Zaman lɛ dia ǹ wo màn-bii pii kiwi gɔ́ɔ̃ nɛ ǹ bii.»
16Yezu tɔ́n pɛ ǹ nɛ: «Ǹ woo la banban. Ka dininmaan nə màn-bii kɔ ǹ la ǹ bii!»
17Ǹ nə́ tɔ́n pɛ Yezu ni: «Buuru mìi sooro laanka zɔ̀ màn paa dinsɔɔ̃ n wɔsɛn lon kànaa.»
18Yezu mà ǹ da ǹ kɔ asɛ la.
19Bɛ kio, á pɛ zaman lɛ nɛ, mà ǹ giã tán-a buu la. Ǹ bɛ́ ǹ nə́ giã tán, á buuru sooro lɛ laanka zɔ̀ màn paa lɛ goa, á n yɔrɔ dia lon, á barka da Lawa nɛ. Á buuru lɛ yiyiɛ á kɔ a kialandɛnan lɛn ma la, ǹ nə́ gii zaman lɛ nɛ. 20Ǹ tumaa sɔ̃ ǹ nə́ kã. A lɛkoro gialakunun mɛnɛn nə́ goã, a kialandɛnan nə́ bɛn goa ǹ nə́ kaa kankaan fulupaa piɛ̃, ǹ nə́ woo ne. 21Min mɛnɛn nə sɔ̃, ǹ tá giĩ duu sooro (5 000) boe, lɔn laanka nɛnyaanan gòɛ̃ ná a ba a-n wa.
Yezu tɔ wɔ tà mu la
(Mar 6.45-52; Zaã 6.15-21)
22Bɛ kio gɔrɔ, Yezu pɛ a kialandɛnan manɛ mà ǹ wɔ tà kuru ǹ goo ne, ǹ wo asɛ nyɛɛnɛ tà lɛ a lɛkoro goon kɛ ganaa, bɛ̀ asɛ dinmaa baa n gɔn boe zaman lɛ ganaa. 23A bɛ́ á n gɔn bɔ ǹ ganaa, a dinsɔɔ̃ woo dii kele kɔ́n la, á Lawa nyankɔ. Wɔlɔ tii, bɛ̀ a dinsɔɔ̃ á tɔn walan. 24Bɛ daa yaa bɛ̀ goo lɛ wɔlɔ á tɔn sɔsɔɔ tà lɛkoro ganaa. Piɛ̃ bɛ́ á goã n diɛ lɛ, mu na á goã bìn diɛ n toe a nɛ. 25Koonən wuu pɛ waáraa, Yezu tɔ wɔ mu la, á tele a kialandɛnan lɛn ganaa. 26Ǹ bɛ́ ǹ nə́ yɛ tɔ we mu la, nyɛ́ɛ nə́ ǹ kũ. Ǹ nə́ tɔ́n pɛ: «Eebe, gere nyín ni!»
Ǹ nə́ yoo ǹ nə́ n lɛ dɛdɛ, nyɛ́ɛ taman yii. 27A din bǎã-n gɔrɔ Yezu boo da ǹ nɛ, á pɛ ǹ nɛ: «Ka n foo taã. Masɛ nɛ, ka baran nyɛ́ɛ baa wa!»
28Piɛrɛ tɔ́n pɛ nɛ: «Dɛnaa, bɛ̀ n din ni sonbore, toa masɛ tɔ wɔ mu lɛ la ma da n li.»
29Yezu tɔ́n pɛ nɛ: «Tɔ wɔ n daa!»
Piɛrɛ soo tà kuru ǹ goo lɛ nɛ, a ná a giala kɔ á tɔ wɔ mu la á tele Yezu ganaa. 30A bɛ́ á ga piɛ̃ lɛ a bɔ ǹ gɔn ganaa, nyɛ́ɛ kũ. A bɛ́ giɛ mà á woe mu giala-a, á nɔmaa á n lɛ dɛ: «Dɛnaa, da ma la wooo!»
31A din bǎã-n gɔrɔ Yezu nə́ n gɔn dia á kũ. Á tɔ́n pɛ nɛ: «N golee Lawa li á kiɛɛrɛ dɛ! Wàa na á baa n foo biɛ na?»
32Ǹ dinin paanan nə́ wɔ goo lɛ gɔ́ɔ̃ nɛ, piɛ̃ lɛ nə́ n lɛ kũ. 33Yezu a kialandɛnan mɛnɛn bɛ́ goo lɛ gɔ́ɔ̃ nɛ, bɛn nə́ nɔmaa ǹ nə́ kaa tán-a Yezu giulun, ǹ nə́ pɛ: «Sonbore pɛ á pɛsã, ma n Lawa a Nɛgiĩ lɛa!»
Yezu busulən mɛnɛn busu nya Zenezarɛti gána nɛ
(Mar 6.53-56)
34Ǹ nə́ tà kuru ǹ nə́ nya, ǹ nə́ dɔ tán kooro ganaa Zenezarɛti gána nɛ. 35Walandɛnan nə́ Yezu dɔ̃, ǹ na a daa boo pɛsɛ̃ ǹ lɛkoro-a ǹ kiwin tumaa nɛ. Minin nə́ daa busulən tumaa kɔ la. 36Maǹ nə́ goã a nyankoe mà a toa busulən lɛn nə n gɔn da a mɔnaa lɛkoro din ganaa kooro. Min mɛn din tumaa bɛ́ á n gɔn da a ganaa, bɛn yii kaka kɔ.
اکنون انتخاب شده:
Mat 14: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
