Mat 15
15
Digolon nə́ landa mɛn koa
(Mar 7.1-13)
1 *Fariziɛ̃n kɔnɔn laanka landa sii-daraalin kɔnɔn nə́ n toa Zeruzalɛmu, ǹ nə́ daa nɔ̀n da Yezu la: 2«Wɔsɛn digolon nə landa mɛn koa, wàa na á baa nsɛ a kialandɛnan ba bɛ tamaɛ wa? Ka a n gɔn pii ká landa bɛ́ pii lɔn, bɛ̀ ka tɔn màn bii wa.»
3Yezu tɔ́n pɛ ǹ nɛ:
– Kasɛn dɔn, wàa na á baa ka tá Lawa a dí-pɛ ziziɛ̃ ka ka dinin landa siin ni? 4#BBN 20.12; 21.17; TDP 5.16; LWS 20.9 Táa Lawa pɛ: «N díi laanka n náa guguru kɔ,» hinlaa «bɛ̀ min boo baraa da ǹ di-a hinlaa ǹ dan ganaa, ǹ doamaa nɛ ǹ bɛ dɛ a gã.» 5Sɛnɛ, kasɛn man pii mà bɛ̀ min pɛ ǹ di-n hinlaa ǹ dan nɛ mà asɛ doamaa bɛ́ nɛ a n dɔ lɛ ka màn mɛn nɛ, mà asɛ n die Lawa goe ka bɛ nɛ, 6bɛa dɛnaa kɛ laadoo ba a ganaa doo, a ǹ di guguru kɔ ka màn nɛ wa. Ka ǹ Lawa a boo sàabiɛ kɛnɛn lɛn ka dinin landan lɛa! 7Gɔ́ɔ̃ tì-an kɛn! Sonbore tá Izayii lon, bɛ̀ a bɛ́ á pɛ kaa wɔ gɔn la kɛnɛn:
8 #
Iza 29.13
Lawa pɛ:
«Minin kɛn man ma guguru koe ka ǹ lɛ nɛ,
sɛnɛ, ǹ gɔ́ɔ̃ wɔlɔ á lui-n ma ganaa.
9 Maǹ ma guguru koe kooro,
a giala, maǹ minbuiinin dí-pɛn siɛ
ǹ tá ǹ biɛ Lawa a dí-pɛn lɛa,
bɛ̀ ǹ minin daraa ǹ ganaa.»
Mànan mɛnɛn bɛ́ min gɔgɔrɛ koe
(Mar 7.14-23)
10Bɛ kio, Yezu lɛ dia zaman lɛ la, á pɛ ǹ nɛ: «Ka n too kɔ ka kɛ giala ma: 11Màn mɛn bɛ́ we minbuiin nɛ lɛ-n, bɛ bie a gɔgɔrɛ koe wa. Sɛnɛ, màn mɛn bɛ́ boe a lɛ-n, bɛ lɛ na a gɔgɔrɛ koe.»
12Yezu a kialandɛnan nə́ n zɔ̃ ǹ nə́ dɔ a li, ǹ nə́ pɛ nɛ: «N boo da ǹ gɔn kɛ lɛ kɛnɛn, n tá doɛ̃ mà á Fariziɛ̃n lɛn foo busu?»
13Yezu tɔ́n pɛ ǹ nɛ: «Da mɛn tumaa bɛ́ masɛ Di Lawa ná a zumu wa, bɛ tumaa á die n wɛɛ̃. 14#Luk 6.39 Ka ǹ toa walan. Maǹ yii tere-an lɛa yii tere-an bàlà kuĩ! Bɛ̀ yii tere-a nə́ ǹ miã yii tere-a a bàlà kũ, ǹ dinin paanan tá re boe ǹ kaa nyankɔrɔ nɛ.»
15Piɛrɛ tɔ́n pɛ nɛ: «Boo giməə kɛ giala pɛ wɔsɛn manɛ.»
16Yezu pɛ: «Haalɛ tɔn pelo, ka dɔn ba tɔn boo giala miɛ wa? 17Ka a doɛ̃ mà màn mɛn din tumaa bɛ́ we minbuiin nɛ lɛ-n, mà a n woe a gɔ́ɔ̃ nɛ, bɛ kio a tɔn soo goɛ̀rɛ lɛa wa? 18#Mat 12.34 Sɛnɛ, màn mɛn bɛ́ soe lɛ-n, bɛ lɛ n boe foo ne, bɛ lɛ dɔ n minbuiin nɛ gɔgɔrɛ koe. 19A giala, taasiɛ naarɛn lɛn man boe a foo ne, bɛn lɛn man diɛ gɛ̀ dɛ ganaa, ka naarɛbaa nɛ, ka kɔrɔbaa nɛ, ka wurumubaa nɛ, ka soɛ-bɔ nɛ, ka min kɔsɔ tɔ ziziɛ̃ nɛ. 20Siin mɛnɛn bɛ́ min gɔgɔrɛ koe, bɛn lɛn man ka bɛn nɛ! Sɛnɛ, màn bii bɛ̀ n nə́ n nə n gɔn pii ka landa bɛ́ pii lɔn wa, bɛa min gɔgɔrɛ koe wa.»
Tii lɔ mɛn nə golee Yezu li
(Mar 7.24-30)
21Bɛ kio, Yezu kiɛ̃ á n bɔ walan á woo bǎã kɔ́n nɛ, kunu Tiiri kiwi laanka Sidɔn kiwi ganaa. 22Kanaan lɔ goon dɔ goã giã-n walan, á daa Yezu li á n lɛ dɛ a ganaa: «Mìinaa, kii Davida tɔrɔ, makara bɔ masɛ ganaa! Nɔ̀ɔnɔn man maa nɛlɔ ganaa, a giã ǹ gɔn ba siĩn duduu wa!»
23Sɛnɛ, Yezu nə n lɛ da lɛ wa. A kialandɛnan nə́ n zɔ̃ ǹ nə́ dɔ a li, ǹ ná a nyankɔ mà a pɛ lɔ lɛ nɛ mà a woo, á n bɔ ǹsɛn kio ka bɛa lɛ-dɛ kɛ-n miɛ̃.
24Yezu tɔ́n pɛ: «Izirayeli minin mɛnɛn bɛ́ ǹ nə́ papaã ka sèren bɛ́ lɔn, Lawa na á ma dia bɛn lɛn dininsɔɔ̃nɔn li.»
25Lɔ lɛ nɔmaa á daa kaa tán-a a giulun, á pɛ: «Mìinaa, n dɔ masɛ lɛ!»
26Yezu tɔ́n pɛ: «A ba siĩni min nə nɛnyaanan màn-bii saa a kɔ gin tienən ma la wa.»
27Lɔ lɛ tɔ́n pɛ: «Mìinaa, sonbore ne, sɛnɛ, màn-bii bisin mɛn bɛ́ kiɛ tán-a, gindɛnaa a gin tienən tá bɛ goɛ ǹ bii sɛn.»
28Yezu tɔ́n pɛ nɛ: «E, lɔ lɛɛ, n golee Lawa li á gole! N bɛ́ giɛ màn mɛn li, bɛ á die n zɛnɛɛ n nɛ.»
A din biikoo li gɔrɔ, a nɛlɔ lɛ a busu nya.
Yezu busulən mɛnɛn busu nya
29Yezu kiɛ̃ á n bɔ walan á woo Galilee tà lɛ-a. Á dii kele goon la, á giã tán-a. 30Zaman gigiã daa a li ka gɔ̃naan nɛ, yii tere-an nɛ, wɔ̀lɔ̀dɛnan nɛ, lɛ tere-an nɛ, ka busulə tɔrɔ gigiã kɔsɔn nɛ. Ǹ nə́ ǹ kaa tán-a Yezu giulun, á ǹ kaka kɔ. 31Minin bɛ́ ǹ nə́ lɛ tere-an yɛ boo diɛ, ǹ bɛ́ ǹ nə́ wɔ̀lɔ̀dɛnan yɛ ǹ nə́ kaka kɔ, gɔ̃naan nə́ tɔ we telee ne, yii tere-an yii n wɔlɔ yii, ǹ nə́ n kaãbaa parsiini, ǹ ná a giala kɔ ǹ nə́ Izirayeli minin Lawa guguru kɔ.
Yezu minbuiin duu sii (4 000) too ka màn-bii ni
(Mar 8.1-10)
32Yezu ná a kialandɛnan bíi, á pɛ ǹ nɛ: «Minin kɛn makara á boe masɛ ganaa, a giala ǹ lɛawaa sɔɔ n ke kun ka masɛ nɛ, sɛnɛ, màn kɔ́n banban doo ǹ tá re bii wa. Ma ba li ma ǹ toa ǹ wo ka ǹ gɔ́ɔ̃ kooro-n wa, ǹ tá re kerekaɛ̃ zii la.»
33A kialandɛnan nə́ nɔ̀n da la: «Wɔ n die boe ka màn-bii-n maa, wɔ zaman kɛ miã too ne don kɛ nɛ?»
34Yezu tɔ́n nɔ̀n da ǹ la: «Buuru mìi gia n ka lon?»
Ǹ nə́ tɔ́n pɛ: «Sɔbaa, ka zɔ̀ bisin kɔ́n nɛ.»
35Yezu tɔ́n pɛ zaman lɛ nɛ, mà ǹ giã tán. 36Bɛ kio, á buuru sɔbaa lɛ laanka zɔ̀ lɛ goa, á barka da Lawa nɛ, á ǹ yiyiɛ kɔn, á ǹ kɔ a kialandɛnan ma la, ǹ nə́ gii zaman lɛ nɛ. 37Didie màn bii á kã. Màn-bii gialakun mɛn nə goã, a kialandɛnan nə́ goa ǹ nə́ kaa kankaan sɔbaa piɛ̃, ǹ nə́ woo ne. 38Min mɛnɛn nə sɔ̃, giĩ duu sii (4 000) ni, lɔn laanka nɛnyaanan gòɛ̃ ná a ba a-n wa. 39Yezu bɛ́ á zaman lɛ toa á woo ǹ mɛn waáraa, a din wɔ tà kuru ǹ goo ne, á woo Magadan gána nɛ.
اکنون انتخاب شده:
Mat 15: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.
