Zer 52
52
Nebukadenezɔɔrɔ n kii Sedekiasi biɛ kòso nɛ lɛa
1Sedekiasi bɛ́ kii biɛ, bɛ̀ a lɛ̀ fuəwengoon ne. A na á lɛ̀ fulugoon kiibaa zɛnaa Zeruzalɛmu. Ǹ dan tɔ n Amutaali. Libnaa min Irmeya a nɛlɔ nɛ. 2Sii mɛn bɛ baraa Dɛnaa Lawa yii li, Sedekiasi na á bɛ lɛ zɛnaa ka Zoakiimu bɛ́ lɔn ka te. 3Siin mɛnɛn nə n zɛnaa Zeruzalɛmu laanka Zudaa gána nɛ, bɛn nə́ Dɛnaa Lawa foo yoo parsiini. Bɛ lɛ nɛ, a ná a zaman lɛ zũ sɔsɔɔ a din ganaa.
Á n gòãn dii *Baabiloniin kii Nebukadenezɔɔrɔ ganaa. 4#Eze 24.2 Bɛ lɛ nɛ, Baabiloniin kii Nebukadenezɔɔrɔ yoo Zeruzalɛmu gialaa ka a sɔraasin tumaa nɛ. A sɔraasin nə́ ǹ giã ǹ bǎãn koa kiwi lɛ yɔrɔ-a, ǹ nə́ ziabaa ǹ kungɔn dɔ ǹ ná a lɛnpɛnɛ nɛ. Bɛ na á n zɛnaa Sedekiasi a kiibaa lɛ̀ manangɔrɔbaa ǹ wɔ li, a mui fùbaa ǹ wɔa lɛawaa fù. 5Ǹ nə́ kiwi lɛ lɛnpɛnɛ yǎa Sedekiasi a kiibaa lɛ̀ fulugoonbaa ǹ wɔ li. 6Bòo wɔ Zeruzalɛmu. Á baraa kɔ, haalɛ màn-bii kɔn din goã a tan wa. Bɛa lɛ̀ lɛ a mui siibaa ǹ wɔ a lɛawaa manangɔrɔbaa ǹ wɔ li, 7#Eze 33.21 Ǹ nə́ yala bɔ kiwi tama a ǹ kungɔn kɛ ganaa, kiwi lɛ lɛnpɛnɛ. Tèlò-n, Zudaa a sɔraasin tumaa baa si. Ǹ nə́ bɔ ka kiɛnlɛ kɛ nɛ kungɔn màn paa kɛ bii n ni, dia-n woe kii a dù gɔrɔ la. Baabilonii minin nə́ Zeruzalɛmu lɛnpɛnɛ. A laan bɛ yii ni, ǹ nə́ bɔ ka Arabaa zii kɛ nɛ. 8Sɛnɛ, Baabilonii sɔraasin nə́ kii Sedekiasi kio loo, ǹ nə́ dɔ a ganaa Zerikoo a wuru bǎãn kɛn nɛ. A sɔraasin tumaa nə n na ǹ nə́ n bɔ a ganaa kəni. 9Baabilonii sɔraasin nə́ baa kòso nɛ lɛa, ǹ nə́ woo ne Ribla kiwi Amaati gána nɛ Baabiloniin kii yɔrɔ-a. Á kiri wɔ Sedekiasi ganaa walan. 10A din Ribla kiwi lɛ nɛ Baabiloniin kii Sedekiasi a nɛgiĩn laanka Zudaa a kiãn dɛ a din yɔrɔ-a. 11#Eze 12.13 Bɛ kio, á Sedekiasi yii nànan fɔ̃fɔ̃, ǹ nə́ tɔn yii ka zan zɔrɔka naakɔn paa nɛ. Á dia Baabilonii ka bɛa yɔrɔ kɛ lɛ nɛ, á baa kòso nɛ lɛa yǎa a gɛ̀ pinaa.
Nebuzaradan nə Zeruzalɛmu ziziɛ̃
12Baabiloniin kii Nebukadenezɔɔrɔ a kiibaa lɛ̀ fulumanangɔrɔbaa ǹ wɔ a mui soorobaa ǹ wɔ a lɛawaa fùbaa ǹ wɔ pinaa, Nabuzaradan wɔ Zeruzalɛmu. Baabiloniin kii-lɛduə̃lin goledɛnaa nɛ. A na á goã kun ka kii lɛa min yii guguru-an nɛ. 13#Kiin1 9.8 Á tɛ da Lawa a kion ganaa, kii kion ne, kionən tumaa nɛ, ka kiwi lɛ a min yii guguru-an kionən ne. 14Zia kurun mɛnɛn nə goã kun ka bǎã-lɛduə̃lin goledɛnaa lɛ nɛ, bɛn nə́ Zeruzalɛmu lɛnpɛnɛ ǹ kungɔn lɛ ziziɛ̃. 15Bɛ kio, min mɛnɛn nə goã kiwi lɛ nɛ, Nebuzaradan nə́ ǹ tumaa goa á woo ǹ ne: Doobaan manɛ, min mɛnɛn nə n dinin wɔ Baabiloniin kii gɔn ka gɔn dí-nyali nyɔɔbaan nɛ. 16Sɛnɛ, á gána lɛ a doobaan tɛnɛn toa walan màn mɛn bɛ́ toɛ ǹ *rezɛ̃ da wuru laanka wurun kɔsɔ.
17 #
Kiin1 7.15-47
Zan bìbìn mɛnɛn nə goã Lawa a kion lɛ a kiɛnlɛ-a kɔnlɛ ka wotoron lɛn laanka zan doo kaaraa kɛ nɛ sumu lɛ gɔ́ɔ̃ nɛ, Baabilonii minin nə́ ǹ tumaa yɔyɔrɛ. Ǹ nə́ woo ka zan lɛ tumaa nɛ Baabilonii. 18Ǹ goã dí nyɛɛ ka zan mànan mɛnɛn tumaa nɛ Lawa a kion lɛ nɛ, ǹ nə́ bɛn dɔn tumaa goa: ton goa ǹ mànan kɛn manɛ, lasanan nɛ, bolon nimi ǹ mànan kɛn nɛ, mà pɛsɛ̃ ǹ tàanan nɛ ka tàan kɔsɔn nɛ. 19Mànan mɛnɛn tumaa goã sana lɛa hinlaa wɔrɔ lɛa, kii-lɛduə̃lin goledɛnaa lɛ bɛn tumaa goa: Doon manɛ, nyɔɔ gìĩ kɔɔ̃n tã ǹ mànan nɛ, mà pɛsɛ̃ ǹ tàanan nɛ, ton goa ǹ mànan nɛ, bolon da ǹ bǎãn nɛ, kaaranan nɛ ka màn gialakunun ni. 20Kii Salomɔn goã á ǹ kaa zan màn damata zɛnaa ganaa Lawa a kion lɛ wɔn lɛa: Bìbì màn paa kɛ nɛ, doo kaaraa kɛ nɛ dii gɔ̀lɔ̀ nyín fulupaa dɔ̀ɔ̃ nɛ ka wotoron kɛn nɛ. Ǹ boo la ǹ nə́ bɛa mànan kɛn lɛn gugurubaa zɔɔ̃ wa. 21Bìbìn lɛn wo lon na á goã mɛtərə manangɔrɔ, ǹ buuriibaa n mɛtərə sɔrɔ. Ǹ gɔ́ɔ̃ n koo, zan lɛ a binbirinbaa n santimɛtərə kiwisi ǹ nə́ kaa la. 22Bìbì lɛ a gogoonmaa mìi ni, zan màn buurii goon goã a tan, a wo lon nə mɛtərə paa ka talɛɛ. Maǹ nə́ biɛ doron doron nyín zɛnaa doedoe-n kɔn lɛ ka zɔrɔka bɛ́ lɔn ka grenadie da nɛ nyínin ni. Ǹ tumaa n zan lɛa. 23Màn buuriin lɛn gogoonmaa ganaa, grenadie da nɛ nyín pɔmanangɔrɔ ka sɔrɔ n yii ǹ para li, ǹ tumaa a kaa kun da nɛ paabiɛ màn buurii lɛ lɛnpɛnɛ.
24Kii-lɛduə̃lin goledɛnaa lɛ wúlu-bɔlen goledɛnaa Seraya kũ, a kiodɛnaa Sefania nɛ ka Lawa a wúlu-bɔle sɔɔ nɛ Lawa a kion lɛ a kiɛnlɛ lɛduĩ. 25Á sɔraasin sii yɔrɔ-bɔle goon dɔ kũ ka min sɔbaa kɔnɔn dɔn nɛ kunu kii ganaa. Á sɔraasin goledɛnaa a sɛ́wɔ-kiɛ̃li dɔ kũ, ǹ mɛn lɛ bɛ́ minin boe sɔraasin lɛa, ka Zudaa min pɔsɔrɔ nɛ. Bɛa minin lɛn tumaa ǹ nə goã Zeruzalɛmu. 26Kii-lɛduə̃lin goledɛnaa Nebuzaradan woo ǹ ne Baabiloniin kii li Ribla kiwi. 27Baabiloniin kii nə ǹ dɛ walan, Amaati gána nɛ. Maǹ nə́ woo ka Zudaa zaman nɛ gùli kɔ ǹ bǎã nɛ ka kɛa yɔrɔ kɛ lɛ nɛ, sɔsɔɔ ǹ gána ganaa. 28Nebukadenezɔɔrɔ min mɛnɛn goa á woo ǹ ne, ǹ lɛ á ke:
Lɛ̀ sɔbaabaa ǹ wɔ: Zudaa min duu sɔɔ ka fuəwensɔɔ (3 023);
29A kiibaa lɛ̀ fulukiwisibaa ǹ wɔ: Zeruzalɛmu min biɛkiwisi ka pɔsɔɔwenpaa (832);
30Lɛ̀ fuəweensɔɔbaa ǹ wɔ li, kii-lɛduə̃lin goledɛnaa Nebuzaradan Zudaa min biɛsɔbaa ka pusiwensooro (745) goa á woo ǹ ne.
Ǹ tumaa a kaa kun ni min duu sii ka biɛsɔrɔ (4 600).
Baabiloniin kii nə n gɔn boe Zoakini ganaa
31Zudaan kii Zoakini a kuĩ lɛ̀ pɔsɔɔweensɔbaa, Evili-Merodaaki kii baa Baabilonii gána nɛ. A kiibaa lɛ̀ bibinaa a mui fulupaabaa ǹ wɔ a lɛawaa fuəweensoorobaa ǹ wɔ li, Evili-Merodaaki Zoakini bɔ kòso ne á da. 32Á boo da-n sɔnbɔraa nɛ, á golebaa kɔ la á la kiin kɛn tumaa nɛ ǹ nə́ goã kun Baabilonii gána nɛ. 33Zoakini ná a kòso nɛ mɔnaa bɔ á bɔ a din ganaa, á goã màn bii kun ka kii-n miɛ̃ baraabaraa a yiikoonaabaa tumaa gɔ́ɔ̃ nɛ. 34Bɛa yɔrɔ lɛ la, Zoakini laadoo goã màn mɛn tumaa ganaa baraabaraa a yiikoonaabaa tumaa gɔ́ɔ̃ nɛ, Baabiloniin kii bɛ tumaa kɔ la yǎa á woo kaa a gɛ̀ lɛ.
اکنون انتخاب شده:
Zer 52: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.