Zer 41
41
1 #
Kiin2 25.25
Lɛ̀ a mui sɔbaabaa ǹ wɔ li, Netania a nɛgiĩ, Elisamaa a nɔ̀ɔn Isimayeli daa Ayikaamu a nɛgiĩ Gedalia li Mispaa kun ka min fù ni. Isimayeli na á goã kii a sumu min lɛa. Á goã kii a dí-nyali gole goon din lɛa. A ǹ toa màn bii Gedalia a piɛ Mispaa, 2Netania a nɛgiĩ Isimayeli laanka a giĩ fù lɛ yoo, ǹ nə́ Safan a nɔ̀ɔn, Ayikaamu a nɛgiĩ Gedalia dɛ ka gɔya sa nɛ. *Baabiloniin kii min mɛn koa gánadɛnaa lɛa Zudaa gána nɛ, ǹ nə́ bɛ dɛ. 3Zudaa min mɛn tumaa goã kun ka Gedalia nɛ Mispaa, Isimayeli bɛn tumaa dɛ kɔnlɛ ka Baabilonii sɔraasin ni, ǹ mɛnɛn tumaa goã walan.
Isimayeli zii tɔ-wɔle pɔkiwisi dɛ
4Gedalia a gɛ̀ lɛawaa, min kɔn tɔn ma mà á gã wa. 5Minin nə́ bɔ Sisɛmu, Siiloo, ka Samarii kiwi ni ǹ nə́ daa. Maǹ min pɔkiwisi, ǹ lɛtoro ka koɛ̃maa nɛ, ǹ mɔnaan nə́ tɔtoɛ̃ nɛ, ǹ nə́ n gɔ̀nɔn tɔtoɛ̃. Maǹ die Lawa gɔ ǹ màn laanka da yon gìĩ kɔɔ̃n nɛ Lawa a kion wɔ lɛa. 6Netania a nɛgiĩ Isimayeli soo Mispaa á woo n da ǹ lɛ ka wuu ni. A bɛ́ á dɔ ǹ ganaa, á pɛ ǹ nɛ: «Ka da Ayikaamu a nɛgiĩ Gedalia a piɛ.» 7Ǹ nə́ wɔ kiwi lɛ nɛ. Bǎã goon ne, Netania nɛgiĩ Isimayeli laanka a kiodɛnan lɛn nə́ ǹ dɛ, ǹ nə́ ǹ geren kaa nyankɔrɔ zuzulu ni. 8Sɛnɛ, ǹ bii, min fù pɛ Isimayeli ni: «N nyan wɔ dɛ wa. Wɔ́ màn-bii duru wurun ni: *Belee ne, *ɔrzi ni, nyɔɔ nɛ ka zoo nyɔɔ nɛ.» Isimayeli tɔn bɛn toa walan, a ǹ dɛ kun ka ǹ dɔɔ̃nɔn lɛn nɛ wa. 9Isimayeli min mɛnɛn lɛn dɛ kun ka Gedalia nɛ, a ǹ gere zũ nyankɔrɔ mɛn lɛ nɛ, kii Azaa na á fɔ̃ bɛ̀ a bɛ́ zia biɛ kɔn ka Izirayelin kii Bayesaa nɛ. Isimayeli bɛ pã ka gere ne. 10Bɛ kio, min mɛn tumaa goã Mispaa, á ǹ tumaa baa kòso nɛn lɛa kɔnlɛ ka kii a nɛlɔn nɛ. Bǎã-lɛduə̃lin goledɛnaa Nebuzaradan minin mɛnɛn tumaa koa Ayikaamu a nɛgiĩ Gedalia li, á bɛn tumaa si. Netania a nɛgiĩ Isimayeli tɔn kiɛ̃ ka kòso nɛn lɛn nɛ á woo ǹ ne Amɔn tɔrɔn li.
Isimayeli a kòso nɛn kaa
11Kareya a nɛgiĩ Zoanan laanka sɔraasin nyɛɛnaandɛnan mɛnɛn nə goã kun ni, bɛn nə́ Netania a nɛgiĩ Isimayeli a minin dɛ boo lɛ ma. 12Ǹ nə́ ǹ sɔraasin tumaa sɔkɔn, màn mɛn bɛ́ toɛ ǹ wo a gialaa. Ǹ nə́ dɔ a ganaa Gabawɔ̃ a pɛrɛ gole kɛ lɛ-a. 13Isimayeli a kòso nɛn lɛn bɛ́ ǹ nə́ Kareya a nɛgiĩ Zoanan yɛ ka a sɔraasi nyɛɛnaandɛnan nɛ a kio, ǹ foo kɔɔ̃n kɔ. 14Isimayeli bɔ ka min mɛnɛn lɛn tumaa nɛ Mispaa, ǹ tumaa nə́ n bɔyaa ǹ nə́ kaa kun ka Zoanan nɛ. 15Sɛnɛ, Isimayeli baa si Kareya a nɛgiĩ Zoanan nyɛɛnɛ kun ka min kiwisi ni ǹ nə́ woo Amɔn tɔrɔn li. 16Bɛ kio, min mɛnɛn yii goã koo Netania a nɛgiĩ Isimayeli a wo bɛ̀rɛbaa ǹ bǎã-n wolen lɛn bii, Isimayeli a Ayikaamu a nɛgiĩ Gedalia dɛ kio Mispaa, Kareya a nɛgiĩ Zoanan laanka a sɔraasin nyɛɛnaandɛnan nə́ bɔ ka bɛn nɛ Gabawɔ̃ ǹ nə́ ǹ sɔkɔn. Giĩn ni goã ǹ tan sɔraasin lɛa, lɔn nɛ, nɛnyaanan nɛ, ka kii a sumu dí-nyalin ni. 17Ǹ nə́ zii saa, ǹ nə́ woo golee Kiimaamu a golee ǹ bǎã kɛ nɛ, kunu Bɛtlehɛmu ganaa. Maǹ giɛ li ǹ wo Ezipti gána nɛ. 18Maǹ nə́ goã nyɛ́ɛ biɛ Baabilonii minin manɛ a giala, Netania a nɛgiĩ Isimayeli na á Ayikaamu a nɛgiĩ Gedalia dɛ, Baabiloniin kii nə ǹ mɛn lɛ koa gánadɛnaa lɛa Zudaa gána mìi la.
اکنون انتخاب شده:
Zer 41: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.