Zer 22
22
1Dɛnaa Lawa pɛ Zeremii ni: – Yoo, n wo Zudaan kii a kion, n boon kɛn da walan. 2N tá re pii ni: «Nsɛ Zudaan kii ke giã-n Davida a kii dankan la, ń too kɔ Dɛnaa Lawa a boo li. Bɛa boon lɛn manə n gána nyɛɛnaandɛnan wɔ lɛa, ka zaman kɛ nɛ boe kii kion a kiɛnlɛn nɛ.» 3Dɛnaa Lawa bɛ́ boo mɛn diɛ, á ke: «Ka kiri pepere wɔ, ka goã sonbore la. Ǹ bɛ́ mɛnɛɛ min mɛnɛn la, ka bɛn si ka ǹ kaa. Ka nyan mɛnaa tiin la wa, nɛ toenən ne ka lɔ giɔɔrɔn nɛ. Ka nyan kakaarɛbaa zɛnaa ǹ ganaa wa. Ka nyan yii tì-a mà kaa kànaa wa. 4Bɛ̀ ka bɛa boo kɛn lɛn tamaa sɔnbɔraa nɛ, kiin tá re yii duduu ǹ giã Davida a kii dankan la. Ǹ tá re dii sùi hinlaa ziabaa ǹ wotoro la bɛ̀ ǹ bɔ kii kion lɛ a kiɛnlɛn nɛ, ǹ dinin ni, ǹ gána nyɛɛnaandɛnan nɛ ka zaman lɛ nɛ. 5#Mat 23.28; Luk 13.35 Sɛnɛ, bɛ̀ ka n too kɔ maa boon lɛn li wa, maa da ǹ boo á ke: Ma nə n liɛ, masɛ Dɛnaa Lawa, ka maa Lawa baa nɛ, kii kion kɛ á re kɛbɔlɔ biɛ.»
6Dɛnaa Lawa bɛ boo mɛn diɛ Zudaan kii a kion a paǹ li, á ke:
N siĩnbaa n
ka Galaati a daã kɛ wɔ bɛ́ lɔn,
ka Liban a kele mìin kɛn nɛ.
A da yaa, sàabaa ba la wa,
man die n biɛ diə gole lɛa,
kɛbɔlɔ lɛa.
7Ma á re basaã-kɔlen diɛ,
didie n ka ziabaa ǹ mànan nɛ,
ǹ da n gialaa.
Ǹ tá re n da dadara sonboren
kɛn dii,
ǹ tɛ da ǹ ganaa.
8Tiin mɛnɛn tumaa bɛ́ re kiɛ̃ kunu Zeruzalɛmu kiwi li, ǹ tá re nɔ̀n diɛ ǹ dinin la ǹ nə́ pii: «Wàa na á baa Dɛnaa Lawa sii kɛ miã zɛnaa kiwi gole kɛ nɛ?» 9Ǹ tá re ǹ lɛ sii ǹ pɛ: «A giala, a minin man nə́ kaa tán lawa kɔsɔn giulun, ǹ nə́ ǹ guguru kɔ. Lɛ kɔ kɔn la mɛn bɛ́ ǹ laanka Dɛnaa Lawa, ǹ Lawa bii n ni, ǹ nə́ n la bɔ bɛ ganaa.»
Boon mɛnɛn nə n da kiin ganaa
10Zudaa minin lɛn,
min mɛn bɛ́ á gã,
ka nyan wuu pɛ bɛ la wa.
Ka nyan wuu pɛ kii Zoziasi la wa.
Sɛnɛ, min mɛn bɛ́ woe
a ná a die doo wa,
ka wuu pɛ bɛa dɛnaa la.
A giala, a yɛ gána mɛn nɛ,
a yii á re miɛ̃ bɛ ganaa doo wa.
11 #
Kiin2 23.31-34; KZS2 36.1-4 Dɛnaa Lawa n kɛ pii Zudaan kii Zoziasi a nɛgiĩ Salumu a paǹ li, asɛ mɛn kii baa ǹ di Zoziasi bǎã nɛ. «Salumu soo, a ba kànaa doo wa, a re die doo wa. 12Ǹ kũ ǹ nə́ woo ne gána mɛn nɛ, á re giɛ̃ walan. A yii á re miɛ a gána kɛ-a doo wa.»
Boo mɛn nə n da kii Zozakimu a paǹ li
13Wàa koe n ka kɛ nɛ
n ganaa Zozakimu!
Ń kii kion dɔ n din wɔ lɛa,
kɔkɔrɔbaa gɔ́ɔ̃ nɛ.
Ma n kionən doe kɔn mìi ni,
mɛnaa ma la gɔ́ɔ̃ nɛ.
Ma n dí-nyalin kiɛ dí kooro nyɛɛ ganaa,
ń nə n ba ǹ saraa koe ǹ la wa.
14Ma nə n taasɛ:
Man die kii kion gole doe,
sanabolo dadaran lɛa,
a kion nɛn nə́ dadara,
ma fenɛtərən bɔ a ganaa,
ma *sɛdrə gɔn kɔ a kungɔnɔn lɛ,
ma a gɔ̀nɔn lɔ, a goã tã.
15Ma ǹ zoɛ̃ li n nə n kiibaa nyaa
bɛ lɛ a lɛa nɛ ń nə n kion dɔ ka
Sɛdrə gɔn nɛ.
A da yaa n díi goã màn bii,
a n màn mii ka min tumaa bɛ́ lɔn,
a n koe peperebaa lɛ,
a n kiri pepere we.
A sii tumaa goã bǐɛ̃ koe.
16A na á goã doobaan laanka
nɔmaa wolen zia gii diɛ.
A sii tumaa goã yɔrɔ yii.
Bɛ lɛ bie masɛ Lawa doɛ̃ lɛa wa?
Dɛnaa Lawa a da ǹ boo ne.
17Sɛnɛ, nsɛ n giɛ n dinsɔɔ̃ a là li.
Ma n zoɛ̃ yii tì-an dɛ li,
n nə́ kakaarɛbaa zɛnɛɛ minin ni,
ka mɛnaa ma la nɛ.
18 #
Kiin2 23.36–24.6; KZS2 36.5-7 Bɛ lɛ nɛ, Dɛnaa Lawa boo mɛn da
Zudaan kii Zoziasi a nɛgiĩ
Zozakimu á paǹ li, á ke:
Bɛ̀ á gã,
gɛ̀ loe ba re n loe wa.
Min kɔn ba re pii:
«Wàa koe n ka kɛ nɛ, dɔɔ̃ngiĩ!
Wàa koe n ka kɛ nɛ, dɔɔ̃nlɔ!»
Min kɔn ba re wuu pii a pɛ:
«Wàa koe n ka kɛ nɛ, dɛnaagiĩ!
Wàa koe n ka kɛ nɛ, kii!»
19Maǹ die biĩ ka gin bɛ́ lɔn,
ǹ giɛɛraa furu-n,
ǹ zũ sɔsɔɔ Zeruzalɛmu
kiɛnlɛn ganaa!
Boo mɛn nə n da Zeruzalɛmu a paǹ li
20Zeruzalɛmu,
dii Liban kelen la n nə n lɛ dɛ.
Toa n lɛ-dɛ dɔ yǎa Basan a diə kɛ nɛ.
N toa Abarimu a kelen la n nə
n lɛ dɛ.
A giala, n sanan tumaa
papaã n ganaa.
21N goã yii-nyɛɛ la ǹ mɛn waáraa,
má boo da n nɛ,
sɛnɛ ń ma lɛ si ń pɛ:
«Ma ba n too koe wa.»
N nə́ n zɛnaa miɛ̃ lɛn,
a kũ n tenmaa waáraa ganaa,
n bin nə n too kɔ ma lon wa!
22Piɛ̃ á re n kiãn tumaa goɛ,
a wo ǹ ne.
Ǹ nə n sanan tumaa goa ǹ wo ǹ ne.
Nsɛ, sìi á re n koe n lɛ,
n yii a gugurubaa tumaa nya,
n zɛnaa ǹ sii baraan kɛn
tumaa taman yii.
23Sisia, ma n giã-n Liban daã nɛ,
ń kii dɔ sɛdrə dan la.
Sɛnɛ, bɛ̀ là paparɛɛ daa n tɔwaa,
n tá re gini,
ka lɔ bɛ́ lɔn nɔɔrɔ koe.
Boo mɛn nə n da kii Zozakimu a nɛgiĩ Konia a paǹ li
24 #
Kiin2 24.8-15; KZS2 36.9-10 Ka maa yiikoonaabaa nɛ, ma nə n liɛ, Dɛnaa Lawa a da ǹ boo ne, ta Zozakimu a nɛgiĩ, Zudaan kii Konia n ma gòon ganaa ǹ kaaran lɛa we-n ma gusin a gòon ganaa, man die n boe ma n bɔ a ganaa. 25Min mɛnɛn bɛ́ giɛ n gɛ̀ li, ǹ nə́ n gɔ̀nɔn diɛ bìn diɛ ganaa, ma á re n we bɛn gɔn. Bɛ n ka Baabiloniin kii Nebukadenezɔɔrɔ nɛ, ka a sɔraasin ni. 26N laanka n dan mɛn nə n yɛ, ma á re ka lui ma ka kaa gána nɛ, ka bɛ́ ka yɛ ǹ mɛn nɛ wa. Walan lɛ nɛ ka á re giɛ̃. 27Ka á re zoɛ̃ li mà ka wusoo ka wo kaa gána nɛ, sɛnɛ, ka a re n bɔyɛɛ doɛ̃ wa.
28Minin man nɔ̀n diɛ: «Konia lɛ na á n baa ka dɔn kɔrɔ bɛ́ lɔn, a na a màn kɔn bǐɛ̃ koe doo wa? Wàa na á baa, ǹ bɛ́ ǹ ba gána mɛn doɛ̃ wa ǹ nə́ a laanka a nɛnyaanan loo ǹ nə́ ǹ kaa walan?»
29Maa gána, maa gána, maa gána, n too kɔ Dɛnaa Lawa a da ǹ boo li! 30A bɛ́ boo mɛn diɛ á ke: – Ka kɛ kiɛ̃ Konia a paǹ li: «Min ni a nɛnyaanan ba re goɛ̃ wa. Là goon din yɛ a ganaa a yiikoonaabaa gɔ́ɔ̃-n wa. Min kɔn ba re yii a sumu-n a giã Davida a kii dankan la, a Zudaa gána nyɛɛnaan bɔ wa.»
اکنون انتخاب شده:
Zer 22: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.