Iza 66
66
Lawa guguru kɔ ǹ yɔrɔ sonbore
1 #
Mat 5.34-35; 23.22 #
NDS 7.49-50
Dɛnaa Lawa n kɛ pii:
Lon nə maa kii dankan lɛa,
tán nə maa gòãn kaa ǹ bǎã lɛa.
Ka n boe la ka kion mɛn dɔ
maa wɔ lɛa?
Bǎã mɛn nɛ má n boe la
man susu a nɛ.
2Bɛa mànan kɛn tumaa,
ma din gɔn nɛ á ǹ zɛnaa.
Ǹ tumaa n ma din wɔn lɛa.
Masɛ Dɛnaa Lawa a da ǹ boo ne.
Sɛnɛ, ma yii bɛ́ doa-n min mɛn
la ka makara-doɛ̃ nɛ,
nɔmaa-wɔle kɛ nɛ,
a foo n ziziɛ̃ nɛ,
ka min mɛn bɛ́ n too koe
maa boo ganaa,
a n nyɛ́ɛ biɛ ma yii ni.
3A da yaa,
wúlu mànan wɔ paǹ li,
minin man diin dii,
ǹ wusoo doo ǹ minbuiin nɛn dɛ.
Maǹ sèren bɔlɔ kuri,
bɛ̀ ǹ tá ginin dɔn dii.
Maǹ die ka Lawa gɔ ǹ màn nɛ
bɛ̀ ǹ tá biriin mà kiɛ tán.
Maǹ da yon gìĩ kɔɔ̃n tiɛ̃ maa
wɔ lɛa,
bɛ̀ ǹ tá dìn dɔn guguru koe.
Maǹ nə ǹ dinin foo siin zɛnɛɛ,
sii bɔbɔnɛɛ n kɔɔ̃nɛ ǹ ganaa.
4Á bǐɛ̃ kɔ,
ma dɔ n die koe yɔrɔ boe
ǹ wɔ lɛa.
Sii mɛn bɛ́ nyɛ́ɛ diɛ ǹ ganaa,
man die bɛ lɛ diɛ ǹ la.
A giala, má lɛ dia,
min kɔn ma lɛ si wa.
Má boo da, min kɔn nə
n too kɔ wa.
Sii mɛn bɛ́ bɔbɔnɛɛ ma yii li,
ka sii mɛn bɛ́ a kɔɔ̃n ma
ganaa wa,
ka ǹ bɛ lɛ zɛnɛɛ.
Dɛnaa Lawa a sii zɛnaa
5Ka n too kɔ Dɛnaa Lawa
a boon li,
kasɛn mɛnɛn bɛ́ nyɛ́ɛ biɛ a yii ni.
Ka dɔɔ̃nɔn man ka biɛ zɔ́ɔ,
ǹ tá ka lui masɛ taman yii.
Maǹ pii:
«Dɛnaa Lawa na a gugurubaa
lɛ nyaa kəni,
ka bɛ nɛ,
wɔ á re kaa foo kɔɔ̃nbaa yii.»
Sɛnɛ, sìi n die ǹ dinin kuĩ.
6Ka n too kɔ bìn diɛ kɛ li
boe kiwi,
bìn diɛ ke boe Lawa a kion,
Dɛnaa Lawa lɛn nɛ:
A zɔ́ɔn nə kɔnbɔ ka màn mɛn nɛ,
a n bɛ lɛ koe ǹ la.
7 #
SNS 12.5
*Siɔn laan bɛ̀ a n nɔɔrɔ koe,
á nɛ yɛ.
Á nɛginin yɛ,
là paparɛɛ tɔ nə n giala kɔ
a ganaa.
8Die na á tɔn kɛ miã ma,
hinlaa á ǹ miã yɛ?
Gána á boe la a n koa
pinin goon?
Zaman tá boe la a yɛ bǎã goon
ne ka nɛ bɛ́ lɔn?
A da yaa, Siɔn na á bɛ lɛ zɛnaa.
Là paparɛɛ giala kɔ maa nɛ,
a ná a nɛnyaanan tumaa yɛ,
á ǹ kaa kanaa.
9Dɛnaa Lawa n nɔ̀n diɛ:
Bɛ̀ n lɔ yaa nɔ̀ guĩ yǎa
mui manangɔrɔ,
bɛ n nyɛɛ mà man nɛ lɛ kurii
yɛ ganaa?
N Lawa n nɔ̀n diɛ:
Bɛ̀ ma din nə nyin koe,
wàa n toɛ ma nɛ lɛ kurəə
yɛ ganaa?
10Kasɛn mɛnɛn bɛ́ Zeruzalɛmu
n kɔɔ̃n ka ganaa,
ka n nyɛnyɛɛ kun ni.
Ka goã foo kɔɔ̃n kɔ gole la kun ni.
Kasɛn mɛnɛn nə goã gɛ̀ koɛ
a koen kɛn taman yii,
ka foo kɔɔ̃n gole kɛ gii kɔn
nɛ kanna kəni!
11Nɛ ǹ dan nyɔ bɛ́ piɛ̃ lɔn
a nɛ tiɛɛ̃n mi ka foo kɔɔ̃n nɛ a kã,
ka dɔn tá re kiɛ̃ miɛ̃,
a ka foo waa.
12Dɛnaa Lawa n kɛ pii:
Á ke,
man die là nyantoro diɛ
baa si ganaa Zeruzalɛmu
ka tà bɛ́ lɔn,
tɔrɔ kɔsɔn naforo kɛ baa si
ka mu zii bɛ́ lɔn á pã á toɛ̃.
Man die ka tamɛɛ
ka lɔ bɛ́ a nɛnyaan tiɛɛ̃n
tamɛɛ lɔn:
a n diɛ a kolo-n, a bɔ a da
a gòã la,
a na a là wɔraa.
13Náa bɛ́ a nɛnyaanan foo
wɛɛ lɔn,
ma dɔ n die ka dɔn foo wɛɛ miɛ̃.
Bɛ n die n zɛnɛɛ Zeruzalɛmu.
14Ka á re bɛ yii,
ka foo á re kɔɔ̃n koe,
ka wen nə wusoo
ǹ yiikoonaabaa yɛ
ka buu bɛ́ lɔn la kio.
Min mɛnɛn bɛ́ dí nyɛɛ
Dɛnaa Lawa nɛ,
á re n pàã nyɛɛ bɛn manɛ.
Sɛnɛ, a zɔ́ɔn kɛn tá re a foo
yoo kɛa gugurubaa yii.
15Dɛnaa Lawa á ke yii die.
A n die tɛ gɔ́ɔ̃ nɛ.
A ziabaa ǹ wotoron kɛn man
ka piɛ̃ gole bɛ́ lɔn.
A n die a foo-yoo baraa kɛ nyɛɛ,
a nyɛ́ɛ da minin ganaa
ka tɛ buə̃ ne.
16Taãn nɛ,
Dɛnaa Lawa n die kiri kuri
minbuiin nɛ tumaa la,
ka tɛ buə̃ laanka gɔya sa nɛ
Dɛnaa Lawa á re geren mɔnɛɛ.
17Minin kɛn n dinin *yoreen
koe a tɔ-a
ǹ tɔn wɔ dù gɔrɔn nɛ,
min mɛn bɛ́ bii, maǹ kiɛ bɛ kio#66.17 Min mɛn bɛ́ bii, man kiɛ bɛ kio: Bɛ n sii zɛnaa ǹ gɔn lɛa ǹ nə́ din guguru koe ne..
Maǹ birii hinlaa nyan soɛ̃,
bɛa màn bɔbɔnɛɛn kɛn.
Bɛa minin lɛn tumaa tá re gɛ̀
we kun.
Dɛnaa Lawa a da ǹ boo ne.
Tɔrɔn tumaa a sɔkɔn-a
18Dɛnaa Lawa pɛ: «Ma tá ǹ zɛnaa ǹ siin laanka ǹ taasiɛ doɛ̃. Man die bɔlɔ tumaa a tɔrɔn soekɔn. Ǹ tá re die, ǹ maa gugurubaa yɛ. 19Ma á re sii giala pɛ ǹ màn diɛ ǹ bii. Min mɛnɛn yii bɛ́ re goɛ̃ koo, ma á re ǹ diɛ kiɛ-bɔle zanbian kɛn li boe Tarsisi, Puli, ka Luudi. Ma á re ǹ diɛ Tubaali minin li, Zavan minin ni, ka gánan kɛn nɛ Yìsi mu gole bii, bǎã mɛn bɛ́ ǹ bin tɔn ma boo ma wa, ǹ bin maa gugurubaa yɛ wa. Ǹ tá re maa gugurubaa nyɛɛ bɛa tɔrɔn lɛn manɛ. 20Ka dɔɔ̃nɔn mɛnɛn bɛ́ re goɛ̃ tɔrɔn tumaa bii, ǹ tá re die ǹ tumaa nɛ, sùin la, ziabaa ǹ wotoron ne, wotoron ne ǹ nə́ mɔnaa kɔ ǹ mìi lɛ, dundun sùin la ka nyɔɔmaan nɛ. Ǹ tá re die yǎa maa kele sonbore kɛ li Zeruzalɛmu, Dɛnaa Lawa na á pɛ: Bɛ n die goɛ̃ ǹ Lawa gɔ ǹ màn lɛa maa wɔ lɛa. Man die ǹ sii ka Izirayeli minin bɛ́ nɛn bɛ̀ ǹ wúlu mànan mɛnɛn kaa màn sonboren ne bɛ̀ ǹ da-n maa kion lɔn.» 21Dɛnaa Lawa pɛ: Ma á re minin tɛnɛn boe ǹ bii, *Levii tɔrɔn lɛa, ma ǹ baa Lawa a wúlu-bɔlen lɛa.
22 #
Iza 65.17; Piɛ2 3.13; SNS 21.1 Lon dii laanka tán dii ke
má ǹ zɛnaa,
maǹ die goɛ̃ kaka ma yɔrɔ-a,
Dɛnaa Lawa a da ǹ boo ne.
A din goon ne: Ka tɔ nɛ,
ka min mɛn tumaa bɛ́ re yii ka la,
ǹ ba re papaɛ̃ ǹ nə n bɔ
ma yɔrɔ-a duduu wa.
23Bɛa yɔrɔ lɛ la,
mui dii zɔ́n gogoonmaa li,
ka *susu ǹ pii gogoonmaa nɛ,
minbuiin nɛ tumaa á re
n musin koɛ tán
masɛ Dɛnaa Lawa yɔrɔ-a.
Dɛnaa Lawa na á pɛ.
24 #
Mar 9.48
Bɛ̀ ǹ tá soe kiwi lɛ nɛ,
min mɛnɛn nə goã ǹ nə́ n gòã
dii ma ganaa,
ǹ tá re bɛn gere yii tán.
Nyuunun mɛnɛn bɛ́ ǹ soɛ̃,
bɛn ba re giɛ̃ duduu wa.
Tɛ mɛn bɛ́ ǹ kuĩ,
bɛa nimi wa.
Bɛ ǹ die goɛ̃ sii bɔbɔnɛɛ lɛa
minbuiin nɛ tumaa ganaa.
اکنون انتخاب شده:
Iza 66: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.