Eze 40
40
Lawa a kion dii
1Wɔa goa a wo bɛ̀rɛbaa ǹ bǎã-n lɛ a lɛ̀ fuəwensoorobaa ǹ wɔ, mui bibinaa a lɛawaa fubaa ǹ wɔ pinaa, bɛ n kɔnpii ka Zeruzalɛmu kiwi kɛa yu lɛ̀ fulusiibaa ǹ wɔ nɛ. A din pinaa taãn lɛ nɛ, Dɛnaa Lawa pàã gisĩ ma la, á ma saa á woo ma-n walan. 2#SNS 21.10 Lawa a sii-nyaa gɔ́ɔ̃ nɛ, má woo ma din yaa Izirayeli gána nɛ. Á ma da kele sasasa goon mìi ni walan, gusin a lɛ̀gɔn la. Mànan mɛnɛn nə goã bɛa kele lɛ a gusin a lɛ̀gɔn la, maǹ ka kiwi kɔn a kionən bɛ́ lɔn. 3#SNS 11.1; 21.15 A bɛ́ á woo ma-n walan, ma bɛ́ giɛ, bɛ̀ giĩ goon nə́ ke golee-n kiɛnlɛ-a. A gɔ̀nɔn na á goã tɛ pii ka zan bɛ́ lɔn. Màn kɔn nə́ goã a gɔn ka bòosa biɛ bɛ́ lɔn, kun ka màn zɔɔ̃ ǹ bàlà nɛ.
4Giĩ lɛ nə n toa ma ganaa kɛnɛn: «Minbuiin a nɛ, ga doɛ̃, n too dɔ kɔ doɛ̃. Ma bɛ́ re màn mɛn tumaa nyɛɛ n nɛ, n yiri kɔ bɛ li taãn-taãnɛ. A giala, Lawa n giɛ li a sii nyaa n nɛ, bɛ lɛ na á toa á daa ka n nɛ bǎã kɛ lɛ nɛ. N bɛ́ re màn mɛn tumaa yii, n die n bɛ laakalaa Izirayeli tɔrɔn lɛn manɛ.»
Kanaa sumu kɛ laanka a kiɛnlɛn
5 #
Kiin1 6.1-38; KZS2 3.1-9 Ma màn mɛn yɛ, bɛ á ke: kungɔn goon na á goã Lawa a kion lɛ lɛnpɛnɛ. Màn zɔɔ̃ ǹ bàlà na á goã giĩ lɛ gɔn, a sasabaa dɔ gùrù yii sɔrɔ. Gùrù yii goon nə́ dɔ santimɛtərə posooro. Á kungɔn lɛ a didimibaa zɔɔ̃, bɛ na á goã bàlà yii goon. Á ná a là a wo lon zɔɔ̃, bɛ dɔ na á goã bàlà yii goon. 6Kiɛnlɛ mɛn yɔrɔ bɛ́ dia-n lɛ̀giala gɔn la, giĩ lɛ daa walan, á dii bɛa banbaranan kɛn la. Á kiɛnlɛ mìi lɛ zɔɔ̃, bɛ na á goã bàlà yii goon. Kiɛnlɛ paabaa ǹ wɔ kɛ dɔ na á goã bàlà yii goon. 7Bǎã-lɛduə̃lin kion nɛn kɛn, bɛn gogoonmaa a sasabaa na á goã bàlà yii goon, ǹ gɔ́ɔ̃ a golebaa dɔ na á goã bàlà yii goon. Ǹ gɔ́ɔ̃ kuru kɔn-a ǹ kungɔnɔn kɛn didimibaa n gùrù yii sooro. Dàã a kiɛnlɛ mɛn bɛ́ gɔ́ɔ̃ li, bɛa golebaa n gùrù yii goon. 8Giĩ lɛ kiɛnlɛ-a ǹ dàã lɛ dɔ gɔ́ɔ̃ zɔ́ɔ̃. 9Bɛ na á goã gùrù yii kiwisi. A bìbìn kɛn didimibaa na á goã gùrù yii papaa. Dàã lɛ sɛ a kiɛnlɛ na á goã gɔ́ɔ̃ li. 10Wɔ ǹ kiɛnlɛ mɛn bɛ́ lɛ̀giala gɔn la, wɔlɔ lɛduə̃ ǹ kion nɛn man nə́ goã bɛ dɔ wàãn li: Kion nɛ sɔɔ n gusin, kion nɛ sɔɔ n gɔsɛ. Kion nɛn lɛn tumaa gɔ́ɔ̃ n goon, ǹ bìbìn dɔn didimibaa n goon.
11Bɛ kio, á wɔ ǹ kiɛnlɛ lɛ zɔɔ̃. A gɔ́ɔ̃ a pəməbaa na á goã gùrù yii fù, a sasabaa na á goã gùrù yii fulusɔɔ. 12Kiɛnlɛ-lɛduəlin kion nɛn lɛn yɔrɔ-a ǹ wàã gogoonmaa n gùrù yii sɔsɔrɔ, kungɔnɔn tan ǹ sasabaa n gùrù yii goon. 13Kion gɔ́ɔ̃n lɛn yɔrɔ n dia-n kɔn la papaa. A saa gɔ́ɔ̃ goon ganaa, a wo gɔ́ɔ̃ kɔsɔ kɛ yaa, bɛ na á goã gùrù yii fuəwensooro. 14Bɛ kio, á bìbìn kɛn zɔɔ̃. Bɛn man nə́ goã gùrù yii pɔpɔsɔrɔ. Ǹ bǎã mɛn dɔ ǹ nə́ dàã lɛ lɛnpɛnɛ nɛ, bɛ n kunu bɛa bìbìn lɛn li.
15A saa dàã li a wɔ ǹ kiɛnlɛ gole kɛ ganaa a wo sumu gɔ́ɔ̃ a wɔ ǹ kiɛnlɛ kɛ yaa dàã lɛ nyɛɛnɛ, bɛ na á goã gùrù yii posooro. 16Fənɛtərən man kion lɛ lɛnpɛnɛ tɛ̀mɛn nə́ ǹ ganaa, dàã a kigiala gɔnɔn nɛ ka kungɔnɔn mɛnɛn bɛ́ kionən lɛn niɛ̃ kɔn. Ǹ nə́ sèwo da gɔn nyínin zɛnaa kungɔnɔn lɛn ganaa.
17Bɛ kio, á ma kũ á wɔ ma nɛ kanaa Lawa a kion lɛ a sɔmɔ-n. Ma màn mɛn yɛ, bɛ á ke: Maǹ nə́ sɔmɔ gɔ́ɔ̃ duwəə, kion nɛ pɔsɔɔ na á lɛnpɛnɛ. 18Banbaran mɛn bɛ́ kiɛnlɛ gogoonmaa nə́ n bɔ la, bɛ n kɔnpii ka kiɛnlɛn lɛn gɔ́ɔ̃ a golebaa nɛ. Bɛa banbaran lɛ la goã tán, á la sumu gɔ́ɔ̃ wɔ kɛ nɛ. 19Bɛ kio, á saa dàã a wɔ ǹ kiɛnlɛ kɛ ganaa, á zɔɔ̃ yǎa sumu gɔ́ɔ̃ a wɔ ǹ kiɛnlɛ kɛ yɔrɔ-a. Bɛ na á goã gùrù yii paabiɛ. Lɛ̀giala gɔn la wɔ a sii n ka bɛ nɛ. Gɔsɛ a lɛ̀gɔn la wɔ paǹ li, 20kiɛnlɛ mɛn yɔrɔ bɛ́ dia-n walan, n bɔ a nɛ n wo kanaa sɔmɔ gɔ́ɔ̃ nɛ, á bɛa pəməbaa laanka a sasabaa zɔɔ̃. 21A bǎã lɛduə̃ ǹ kionən lɛn man sɔrɔ: sɔɔ gusin, sɔɔ gɔsɛ. A bii kuru kɔn-a ǹ kungɔnɔn laanka dàã kɛ nɛ, bɛ tumaa a golebaa n goon ka lɛ̀giala gɔn la a kiɛnlɛ kɛ wɔ nɛ. A sasabaa n gùrù yii posooro, a gɔ́ɔ̃ a golebaa n gùrù yii fuəwensooro. 22A dàã nɛ, a fənɛtərən ne ka a sèwo da nyínin kɛn nɛ, bɛn sasabaa na á goã goon ka kiɛnlɛ kɛ wɔn nɛ, ǹ mɛn lɛ yɔrɔ bɛ́ dia-n lɛ̀giala la. A dii ǹ bǎã na á goã banbaran sɔbaa. Dàã lɛ na á goã a yɔrɔ-a. 23Sumu gɔ́ɔ̃ kɛa wɔ ǹ kiɛnlɛn man nə́ goã, goon yɔrɔ n dia-n gɔsɛ a lɛ̀gɔn la a kiɛnlɛ kɛ la, goon dɔ yɔrɔ n dia-n lɛ̀giala gɔn la a kiɛnlɛ kɛ la. A saa kiɛnlɛ lɛ a goon ganaa, a wo a yɔrɔ-a wɔ yaa, giĩ lɛ bɛa bii kɛ zɔɔ̃: a na á goã gùrù yii paabiɛ. 24Bɛ kio, á ma kũ á woo ma nɛ gusin a lɛ̀gɔn la. Ma màn mɛn yɛ walan bɛ á ke: kiɛnlɛ goon na á goã gusin a lɛ̀gɔn la. Á bɛa bìbìn laanka a dàã li zɔɔ̃. Ǹ dɔn sasabaa na á goã goon ka kɛn lɛn wɔ nɛ. 25Fənɛtərən man nə́ goã kiɛnlɛ lɛ laanka dàã lɛ ganaa, ǹ ná a lɛnpɛnɛ. Ǹ dɔn man nə́ goã goon ka fənɛtərə gialakunun kɛn lɛn nɛ, lɛ̀giala laanka gɔsɛ a lɛ̀gɔn la. Ǹ sasabaa na á goã gùrù yii posooro, ǹ gɔ́ɔ̃ a golebaa na á goã gùrù yii fuəwensooro. 26Bɛa kiɛnlɛ lɛ a dii ǹ banbaranan man nə́ goã sɔbaa, dàã lɛ yɔrɔ-a gɔrɔ. Sèwo da nyínin man nə́ goã a bìbìn lɛn paǹan paanan ganaa. 27Sumu gɔ́ɔ̃ lɛ a kiɛnlɛ goã a tan, a yɔrɔ n dia-n gusin a lɛ̀gɔn la. Gusin a lɛ̀gɔn la, a saa kiɛnlɛ lɛ a goon ganaa a wo a yɔrɔ-a wɔ yaa, giĩ lɛ bɛa bii kɛ zɔɔ̃: a na á goã gùrù yii paabiɛ.
Lawa a kion gɔ́ɔ̃ a sumu kaa kiɛnlɛn
28Bɛ kio, giĩ lɛ ma kũ, á bɔ ka gusin a lɛ̀gɔn la a kiɛnlɛ kɛ nɛ, á woo ka ma nɛ kion lɛ a sumu gɔ́ɔ̃ li. Á bɛa kiɛnlɛ lɛ zɔɔ̃, a pəməbaa na á goã goon ka gialakunun lɛn wɔ nɛ. 29A dàã nɛ, a kion gɔ́ɔ̃n nɛ, a bìbìn ni, bɛn lɛn dɔn pəməbaa na á goã goon ka gialakunun kɛn lɛn wɔ nɛ. Fənɛtərən man nə́ goã dàã lɛ ganaa, ǹ ná a lɛnpɛnɛ. Ǹ sasabaa n gùrù yii posooro, ǹ gɔ́ɔ̃ a pəməbaa n gùrù yii fuəwensooro. 30Dàãn man nə́ goã kion lɛ lɛnpɛnɛ. Ǹ sasabaa n gùrù yii fuəwensooro, ǹ gɔ́ɔ̃ a pəməbaa n gùrù yii sooro. 31A dàã lɛ a kiɛnlɛ na á goã dia-n kanaa sɔmɔ kɛ la. Sèwo da nyínin man nə́ goã a bìbìn kɛn ganaa. A wɔ ǹ kiɛnlɛ a banbaran na á goã kiwisi.
32Bɛ kio, á ma kũ á bɔ lɛ̀giala gɔn li, á wɔ ka ma nɛ sumu gɔ́ɔ̃ lɛ nɛ. Á kiɛnlɛ kɛ zɔɔ̃, bɛa pəməbaa na á goã goon ka ǹ miã n nɛ. 33A kion gɔ́ɔ̃n kɛn nɛ, a bìbìn ni ka a dàã nɛ, bɛn tumaa a pəməbaa na á goã goon ka gialakunun kɛn nɛ. Fənɛtərən man nə́ goã kiɛnlɛ lɛ laanka dàã lɛ ganaa, ǹ ná a lɛnpɛnɛ. Ǹ sasabaa n gùrù yii posooro, ǹ gɔ́ɔ̃ a pəməbaa n gùrù yii fuəwensooro. 34A dàã lɛ a kiɛnlɛ yɔrɔ na á goã dia-n sɔmɔ gɔ́ɔ̃ kɛ la. Sèwo da nyínin man nə́ goã a bìbìn kɛn ganaa, ǹ paǹan paanan li. A dii ǹ banbaran na á goã kiwisi. 35Bɛ kio, á daa ka ma nɛ gɔsɛ a lɛ̀gɔn la, kiɛnlɛ kɛ lɛ-a. Á bɛ zɔɔ̃, a pəməbaa na á goã goon ka gialakunun lɛn wɔ nɛ. 36A kion gɔ́ɔ̃n nɛ, a bìbìn ni, a dàã nɛ ka a fənɛtərən ne, bɛn ná a lɛnpɛnɛ. A sasabaa na á goã gùrù yii posooro, a gɔ́ɔ̃ a pəməbaa na á goã gùrù yii fuəwensooro. 37A dàã a kiɛnlɛ lɛ yɔrɔ na á goã dia-n kanaa a sɔmɔ gɔ́ɔ̃ kɛ la. Sèwo da nyínin man nə́ goã a bìbìn kɛn ganaa, ǹ paǹan paanan li. A dii ǹ banbaranan man nə́ goã kiwisi.
38Kion goon na á goã doa-n dàã lɛ ganaa, a kiɛnlɛ n dia-n gɔsɛ-a lɛ̀gɔn la kiɛnlɛ kɛ la. Maǹ nə́ goã *wúlu màn tiɛ̃n kɛn pii walan. 39Tabalan nə́ goã tán wɔ ǹ kiɛnlɛ lɛ a dàã li. Màn paa na á goã gusin, màn paa na á goã gɔsɛ. Maǹ nə́ goã wúlu màn tiɛ̃ kɛ a tɔɔn dii bɛn la, sii baraa sawaa ǹ wúlu mànan nɛ, ka zɛ̀rɛ si Lawa la ǹ wɔn nɛ. 40Gɔsɛ a lɛ̀gɔn la dia-n die kanaa la, tabala màn paa na á goã tán wɔ ǹ kiɛnlɛ kɛ lɛ-a, para goon li. Tabala màn paa dɔ na á goã tán para kɔsɔ li, dia-n woe gɔ́ɔ̃ li, kunu dàã a kiɛnlɛ lɛ ganaa. 41A kaa kun nə tabala kiwisi, ǹ nə́ goã wúlu mànan lɛn dii la. Tabala sii na á goã wàã goon li, sii na á goã a wàã kɔsɔ kɛ dɔ li. 42Kɔlɔ-sɛlɛɛ tabala màn sii na á goã tán wúlu màn tiɛ̃ wɔn lɛa. Ǹ sasabaa na á goã gùrù yii goon ka talɛɛ, ǹ gɔ́ɔ̃ a pəməbaa na á goã gùrù yii goon ka talɛɛ, ǹ là a wo lon na á goã gùrù yii goon. Ǹ bɛ́ ǹ nə́ goã wúlu màn tiɛ̃ laanka sii baraa sawaa ǹ wúlu kɛa tɔɔn zɛnɛɛ ka mànan mɛnɛn nɛ, maǹ nə́ goã bɛn kiɛ bɛa tabalan lɛn lalan. 43Tabalan lɛn lɛkoron li, ǹ nə́ nyankɔrɔ bɔ ǹ nə́ ǹ lɛnpɛnɛ nɛ. Bɛa nyankɔrɔ lɛ a pəməbaa á doe gɔn tìsì li. Maǹ nə́ goã wúlu mànan siĩ kiɛ bɛa tabalan lɛn lalan.
44Bɛ̀ ń sumu gɔ́ɔ̃ a kiɛnlɛ kɛ na, ń wɔ sumu lɛ gɔ́ɔ̃ nɛ, kion nɛ màn paa n sumu lɛ gɔ́ɔ̃ nɛ, loe-lɔlen wɔ lɛa. Goon nə gɔsɛ wɔ ǹ kiɛnlɛ a wàã ganaa a yɔrɔ n dia-n gusin a lɛ̀gɔn la, goon dɔ n gusin wɔ ǹ kiɛnlɛ lɛ a wàã ganaa, a yɔrɔ n dia-n gɔsɛ a lɛ̀gɔn la. 45Giĩ lɛ tɔ́n nə n toa ma ganaa: Kion nɛ lɛ a ke a yɔrɔ n dia-n gusin a lɛ̀gɔn la, Lawa a wúlu-bɔlen wɔ n ka bɛ nɛ, ǹ mɛnɛn bɛ́ kion lɛ a dí nyɛɛ. 46Kion nɛ lɛ a ke a yɔrɔ n dia-n gɔsɛ a lɛ̀gɔn la, Lawa a wúlu-bɔlen wɔ n ka bɛ nɛ, ǹ mɛnɛn bɛ́ *wúlu bɔ ǹ bǎã kɛa dí nyɛɛ. *Levii tɔrɔn bii, Sadɔki tɔrɔn kɛn dininsɔɔ̃nɔn man boe la, ǹ golee Dɛnaa Lawa yɔrɔ-a ǹ dí nya nɛ.bb
Lawa a kion lɛa nyaa ǹ gɔn
47Giĩ lɛ sumu gɔ́ɔ̃ lɛ zɔɔ̃: A sasabaa na á goã gùrù yii paabiɛ, a gɔ́ɔ̃ a pəməbaa dɔ na á goã gùrù yii paabiɛ. A wàã sii na á goã zɛnɛɛ-n kɔnlɛ. Wúlu bɔ ǹ bǎã lɛ na á goã kion lɛ nyɛɛnɛ. 48Á ma kũ á wɔ ka ma nɛ kion lɛ a dàã li. Bìbìn mɛnɛn bɛ́ a nɛ, á bɛn zɔɔ̃. A wàã goon wɔ n gùrù yii sooro, wàã goon kɛ dɔ wɔ n gùrù yii sooro. Kiɛnlɛ lɛ a pəməbaa na á goã gùrù yii sɔɔ wàã goon li, gùrù yii sɔɔ wàã kɔsɔ kɛ dɔ li. 49Dàã lɛ a sasabaa na á goã gùrù yii fuə, a gɔ́ɔ̃ a pəməbaa na á goã gùrù yii fulupaa. Banbaranan man nə́ goã a ganaa, a dii ǹ bǎã lɛa. Bìbì màn paa kɔsɔ na á goã kiɛnlɛ-a wɔn kɛn li, goon nə́ wàã kɛ-a, goon kɛ dɔ n wàã kɛ-a.
اکنون انتخاب شده:
Eze 40: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.