Eze 38
38
Lawa boo mɛn da Gɔgu a paǹ li
1Dɛnaa Lawa a boo á ke á da ma nɛ: 2#SNS 20.8 – Minbuiin a nɛ, n yɔrɔ da Gɔgu la, asɛ mɛn bɛ́ Mesɛki tɔrɔn laanka Tubaali tɔrɔn kɛn nyɛɛnaandɛnaa gole lɛa Magɔgu gána nɛ. Maa boo kɛ da a wɔ paǹ li, 3n pɛ nɛ, mà masɛ Dɛnaa Lawa n kɛ pii: «Nsɛ Gɔgu kɛ lɛ, Mesɛki tɔrɔn laanka Tubaali tɔrɔn nyɛɛnaandɛnaa gole lɛa, man die yui n gialaa. 4Ma á re karafɔ we n lɛ-n, ma n baã ka pàã nɛ ma soo n ne, kun ka n sɔraasin kɛn tumaa nɛ, n sùin laanka n sùi da baalin ni, nyaǹ mànan nə́ ǹ ganaa sɔnbɔraanɛ. Maǹ sɔraasi damata lɛa, goóro bɔnboɛɛnɛn laanka a dadaran nɛ ǹ gɔn ka gɔya san nɛ. 5Pɛrɛsi sɔraasin ni, Etiopii wɔn nɛ, Puuti wɔ nɛ, ǹ tumaa á re ǹ góoron goɛ ka ǹ ziabaa ǹ bafolon ne, ǹ da kunun n ni. 6Gomɛɛrɛ gána a sɔraasin ni, Togarmaa tɔrɔn wɔn nɛ gɔsɛ a lɛ̀gɔn la gɔ́ɔ̃ li, bɛn laanka ǹ sɔraasin tá re woe kunun n ni, ka tɔrɔ gigiã kɔsɔn dɔn nɛ. 7N yɔrɔ bɔ sɔnbɔraanɛ, n din laanka n sɔraasin ni, n nə ǹ mɛnɛn lɛn sɔkɔn-a n li. N din giã ǹ mìi la kəni! 8Lɛ̀ damata gɔ́ɔ̃ nɛ bɛ kio, ma á re n diɛ Izirayeli gána gialaa. Bɛa waáraa kəni, bɛ̀ a minin nə n dinin si zia la. Bɛ̀ ǹ nə́ soo ǹ nə́ n bɔ kiwin kɛn nɛ ǹ nə́ goã ǹ nɛ. Ǹ tá re goɛ̃ soe-n kɔn Izirayeli a kelen kɛn la, ǹ nə́ belebɔ bii-a min ná a ba giã-n la wa. Ǹ bɛ́ ǹ nə́ soo ǹ nə́ n bɔ tɔrɔ kɔsɔn bii, ǹ tumaa á re goɛ̃ là nyantoro la.
9N din ni, n sɔraasin tumaa laanka tɔrɔ gigiã kɔsɔn mɛnɛn bɛ́ kunun n ni, ka die ka yoo ka piɛ̃ gole bɛ́ lɔn ka wo gána lɛ gialaa, ka wo kɔ lɛ ka labara wɔ bɛ́ lɔn.»
10Masɛ Dɛnaa Lawa n kɛ pii: – Bɛa pinaa kɛ lɛ nɛ, taasiɛ gigiã á re die n yiri ni, n tá re sii baraa zɛnaa taasɛ. 11N tá re pii mà gána kɛa kiwin man bii-a kooro, kungɔnɔn nə́ ǹ ba ǹ lɛnpɛnɛ wa, goo ba ǹ kiɛnlɛn lɛ, ǹ nə́ n tiɛ̃ fɔlɔ nə n da ǹ kii la wa. N tá re n siɛ bɛ lɛ li, n pɛ mà nsɛ n die woe gána lɛ gialaa, n wo ǹ minin tɔwaa tán, a da yaa maǹ tán kiĩni, là nyantoro la. 12N tá re yui mà nsɛ n die basaã koe ǹ ne, n nə ǹ mànan goa. Kiwin mɛnɛn gɔ́ɔ̃ kooro bɛ́ á goã lɛlɛ, minin nə́ wusoo ǹ nə́ giã ǹ nɛ, tɔrɔ ke Lawa ná a minin waa gána kɔsɔn nɛ á ǹ sɔkɔn, ń mà nsɛ n die yui bɛn gialaa. Bɛa minin lɛn nə́ tɔɔn laanka gɔn màn gigiã yɛ, maǹ giã-n kanaa lɛ bii#38.12 Bɛa gána lɛ doamaa nɛ a n Zeruzalɛmu kiwi biɛ.. 13Saabaa minin laanka Dedan minin ni, Tarsisi a pii-kɔlen kɛn laanka a lɛkoro-a kiwin wɔn nɛ, bɛn tá re nɔ̀n goon diɛ n la ǹ pɛ: «Ma n nə́ n sɔraasin lɛn sɔkɔn, n nə́ die basaã koe n minin mànan goa? Wɔrɔ nɛ, sana nɛ, tɔɔn laanka gɔn màn kɔsɔn nɛ, ma n li n bɛn goa?»
14Bɛ lɛ taman yii, nsɛ minbuiin a nɛ, a pɛ Gɔgu ni mà masɛ Dɛnaa Lawa n kɛ pii: Bɛ̀ maa minin Izirayeli tɔrɔn lɛn tá là nyantoro la ǹ mɛn waáraa, n tá re a boo miɛ. 15Bɛa biikoo li, n tá re boe n gána nɛ gɔsɛ a lɛ̀gɔn la gɔ́ɔ̃ li, kun ka tɔrɔ gigiã kɔsɔn nɛ. Ka tumaa á re goɛ̃ sùin la, ka kaa kun zaman gole lɛa, sɔraasi gigiã lɛa ka daa. 16N tá re die maa zaman Izirayeli minin lɛn gialaa, n kɔ n lɛ ka labara bɛ́ lɔn. Bɛ n die n zɛnɛɛ biikoo giala nyɔmiɛ̃ waáraa. Ma á re nsɛ Gɔgu diɛ, n wo maa gána minin lɛn gialaa, màn mɛn bɛ́ toɛ, tɔrɔ kɔsɔn nə maa Lawabaa dɔ̃.
17Masɛ Dɛnaa Lawa n kɛ pii: «Man má n din lɛ boo da maa dí-nyali Izirayeli a Lawa a boo gii-dalin kɛn manɛ haalɛ bibi. A kũ bɛa biikoo lɛ ganaa, bɛn nə́ n boo da lɛ̀ damata gɔ́ɔ̃ nɛ. Man die n din lɛ diɛ, n wo maa minin lɛn gialaa. 18Bɛa pinaa kɛ lɛ nɛ, Gɔgu, n bɛ́ re doe Izirayeli gána nɛ ǹ mɛn pinaa, ma foo á re yui. Ma din Dɛnaa Lawa a da ǹ boo ne. 19Bɛa foo wuu pɛ laanka bɛa foo-yoo gole lɛ gɔ́ɔ̃ nɛ, man kɛ pii: Bɛa pinaa kɛ lɛ nɛ, tán tá re bìn diɛ gole we Izirayeli gána nɛ. 20Yìsi mu li ǹ zɔ̀n nɛ, bàanan nɛ, don mànan nɛ, màn mɛn tumaa bɛ́ tɔ we a nɔ̀ la tán, minbuiin nɛ mɛn tumaa bɛ́ kanaa kɛ nɛ, bɛ tumaa gɔ̀nɔn tá re bìn diɛ ma nyɛɛnɛ. Kelen tá re wurii, mu a gisĩ ǹ bǎãn kɛn tá re ziziɛ̃, kungɔnɔn tá re kiɛ. 21Dɛnaa Lawa a da ǹ boo á ke: Ma á re zia yui ma kaa nsɛ Gɔgu ganaa, ma din a kelen kɛn tumaa la. N sɔraasin lɛn tá re kɔn dii. 22Ma á re piɛ̃ busu laanka zia biɛ dɔlɔ lɛa ma da ka mìi ni, bɛ minin dɛdɛ. N laanka n sɔraasin kɛn nɛ ka zaman kɔsɔn kɛ nɛ, ma á re la gole kiɛ ka la ka gii ni, kiribi tɛdɛnaa ń kun ni. 23Ma á re ma din a golebaa laanka ma din a Lawabaa kɛ nyɛɛ tɔrɔ kɔsɔn tumaa nɛ. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.»
اکنون انتخاب شده:
Eze 38: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.