Eze 32
32
Ezipti laanka a kii a gɛ̀ loe
1Izirayeli minin goa a wo bɛ̀rɛ́baa ǹ bǎã nɛ lɛ a lɛ̀ fulupaabaa ǹ wɔ, a mui fulupaabaa ǹ wɔ a lɛawaa bibinaa pinaa, Dɛnaa Lawa boo da ma nɛ á pɛ: 2«Minbuiin a nɛ, foo ziziɛ̃ ǹ loe lɔ Eziptin kii *Faarahɔn la, n pɛ:
Ma nə́ n goã ka yàra ten bɛ́ lɔn
tɔrɔn bii,
ma nə́ n goã ka mu li ǹ màn
babaraa bɛ́ lɔn mu gole li.
Ma nə́ n goã n doe n tàn kɛn mu li,
bɛ̀ n nə ǹ mu yii lɔlɔkɔn ka
n gòãn nɛ,
bɛ̀ n nə ǹ mu yii gɔgɔrɛ kɔ.
3Dɛnaa Lawa a da ǹ boo á ke:
Bɛ̀ tɔrɔ gigiã nə́ n lɛ sɔkɔn
ǹ mɛn waáraa,
ma á re maa zɔ̀ɔ kɛ kiɛ n la ma n kũ,
ǹ tɔ nə n baã ǹ da n nɛ mu lɛkoro-a.
4Ma á re n boe ma n zũ tán
ma á re n zuĩ tán wɔlɔ fúlu-a,
ma á re toɛ bàanan nə da kaa
n gere la,
ma á re toɛ don manan nə n siĩ sɔ̃,
ǹ kã.
5Ma á re n gere diɛ tán kele la,
ma á re nyankɔrɔ lɛ kɛ piɛ̃ ka n
wen ne.
6Mà mɛn bɛ́ boe n gɔ̀nɔn nɛ kele
lɛ la,
ma á re tán goe ka bɛ nɛ a mi.
7 #
Iza 13.10; Mat 24.29; Mar 13.24-25; Luk 21.25; SNS 6.12-13; 8.12 Bɛ̀ ń nə́ n yii nimi ǹ mɛn pinaa,
ma á re pìi koe lon kɛ lɛ.
Ma á re wɔlɔ tii leeren ganaa,
ma á re labara koe wasa lɛ,
mui dɔ a re folon kiɛ wa.
8Lon mànan mɛnɛn tumaa bɛ́
folon kiɛ,
ma á re wɔlɔ tii ǹ ganaa n din a lɛa,
ma á re wɔlɔ tii gána lɛ ganaa.
Ma din Dɛnaa Lawa a da ǹ boo ne.
9Ma á re toɛ n mɛnaa lɛ a sii dɔ tɔrɔ gigiã ganaa, gánan gɔ́ɔ̃ nɛ, n bɛ́ n ba gánan mɛnɛn dinin doɛ̃ wa. Man die bɛ zɛnɛɛ ma tɔrɔ gigiã gɔ́ɔ̃ lɔlɔkɔn nɛ. 10Má bɛ́ re sii mɛn zɛnɛɛ n nɛ, bɛ á re nyɛ́ɛ diɛ tɔrɔ gigiã ganaa. Bɛ̀ má maa gɔya sa kɛ biə̃ ǹ kiin yɔrɔ-a, ǹ mìi ka á re yui a gole ka gurusuu. N bɛ́ re mɛnɛɛ ǹ mɛn pinaa, ǹ gɔ̀nɔn bìn diɛ a re nyɛɛ wa. Didie á re pàã diɛ ka a din ni.
11A giala, Dɛnaa Lawa a da ǹ boo á ke:
Baabiloniin kii kɛ á re die
n gialaa ka zia nɛ.
12Ma á re toɛ a sɔraasin nə
n zaman dɛ ǹ kaa tán.
Ǹ tá kakaarɛ ǹ nə́ la gána tumaa
wɔn manɛ.
Màn mɛn bɛ́ toɛ Ezipti gána kɛ tá
n din gole koe,
ǹ tá re bɛ ziziɛ̃,
ǹ tá re a zaman kɛ tumaa dii lenlen.
13A tɔɔn mɛnɛn tumaa goã mu
kɛ lɛ-a,
ma á re bɛn dii.
Minbuiin nɛ gòãn ba re mu kɛ
yii lɔlɛkɔn doo wa,
tɔɔ gòon tɔnɔn ba re lɔlɛkɔn doo wa.
14Ma á re toɛ Ezipti a tà mu kɛ waa,
ma á re toɛ a mu kɛ baa si ka
nyɔɔ bɛ́ lɔn.
Ma din Dɛnaa Lawa a da ǹ boo ne.
15Ma á re Ezipti gána kɛ ziziɛ̃,
ma baa ka diə gole bɛ́ lɔn.
Bɛ̀ má gána lɛ a mànan waa má
ǹ bɔ a nɛ ǹ mɛn waáraa,
bɛ̀ má a minin tumaa dɛ,
ǹ tá re doɛ̃ bɛa biikoo li kəni,
mà ma din nə Dɛnaa Lawa lɛa.
16Foo ziziɛ̃ ǹ loe lɛ n ka bɛ nɛ, a n die n loe, là-paparɛɛ taman yii. Tɔrɔn lɔn die ǹ lɔ, ǹ bɛa foo ziziɛ̃ ǹ loe lɛ lɔ Ezipti gána laanka a zaman tumaa la. Ma din Dɛnaa Lawa a da ǹ boo ne.»
17Izirayeli minin goa a wo bɛ̀rɛbaa ǹ bǎã nɛ lɛ a lɛ̀ fulupaabaa ǹ wɔ, a mui a lɛawaa fulusoorobaa ǹ wɔ li, Dɛnaa Lawa boo da ma nɛ á pɛ: 18– Minbuiin a nɛ, makara bɔ ǹ wuu pɛ Ezipti gána a zaman kɛ la. Wuu pɛ n Ezipti minin lɛn da zii, ǹ wo kun ka tɔrɔ kakan kɛn minin ni tán giulun, geren bǎã nɛ.
19Ka n taasɛ mà ka n soɛ ka
miãn manɛ?
Ka dɔn nə wo waa tán yàla-n,
kun ka soroman kɛn nɛ!
20Sonbore, zia min mɛnɛn bii,
Ezipti minin lɛn tá re woe kun
ka bɛn nɛ.
Zia lɛ a biikoo dɔ.
Ka Ezipti gána laanka a zaman
tumaa nafɔ̃, ka kiɛ̃ ǹ nɛ!
21Sɛ̀mɔɔ kakan mɛnɛn nə wo
gèren piɛ,
ǹ mɛnɛn lɛn nə goã n doe lɛ,
bɛn tá re pii ni:
«Ǹ nə́ soroman lɛn dɔn dɛ zia la,
ǹ nə́ ke ǹ nə́ wɔ ǹ nə́ daa waa
tán yala-n.»
22Asiiriin kii kɛ n walan,
kun ka a sɔraasin ni.
Ǹ ná a sɔraasin mɛnɛn dɛ zia la,
a yala-n bɛn wɔn bii.
23Asiirii minin yalan lɛn man
tán giulun sɔsɔɔ.
Ǹ yalan lɛn man kii lɛ wɔ lɛnpɛnɛ.
Ǹ nə́ ǹ tumaa dɛ zia la,
ǹsɛn mɛnɛn nə goã nyɛ́ɛ kiɛ
minin ganaa,
yiikoonaan kanaa kɛ nɛ.
24Elamun kii kɛ dɔ n walan,
kun ka a sɔraasin tumaa nɛ.
A yala lɛ na a sɔraasin lɛn wɔ bii,
ǹ nə ǹ mɛnɛn tumaa dɛ zia la.
Soroman lɛn nə́ wɔ tán giulun,
ǹsɛn mɛnɛn lɛn nə goã nyɛ́ɛ kiɛ minin ganaa,
yiikoonaan kanaa kɛ nɛ.
Ǹ dɔn gã n ke ka min gialakunun wɔn bɛ́ lɔn,
bɛ n sìi lɛa ǹ mìi ni, ǹ nə́ woe ne.
25Ǹ nə́ Elamun kii naa tán kun ka sɔraasi geren ne,
ǹ nə ǹ mɛnɛn lɛn dɛ zia la,
bɛn yala ná a wɔ da bii.
Maǹ nə́ bɛa soroman kɛn lɛn tumaa dɛ zia la.
A da yaa nyɛ́ɛ na á goã minbuiinin ganaa,
yiikoonaan kanaa kɛ nɛ,
ǹ dinin lɛn taman yii.
Sɛnɛ, ǹ nə́ ke sìi gɔn,
ǹ yala n geren bii,
kun ka minin ni,
ǹ nə ǹ mɛnɛn dɛ zia la.
26Mesɛkin kii ni,
ka Tubaalin kii ni,
bɛn dɔn man walan,
kun ka ǹ zia-baalin ni,
ǹ sɔraasin yalan nə́ ǹ wɔn kaa bii.
Bɛa soroman lɛn,
ǹ tumaa gã zia la,
a laanɛ ǹ nə́ goã nyɛ́ɛ kiɛ minin ganaa
yiikoonaan kanaa kɛ nɛ.
27Lɛlɛ a zia-baali kakan kɛn,
ǹ nə ǹ geren bĩ kun ka bɛn nɛ wa.
Bɛn man nə́ goã nyɛ́ɛ kiɛ minin ganaa,
yiikoonaan kanaa kɛ nɛ.
Sɛnɛ, ǹ nə́ ǹ gere bĩ kun ka ǹ ziabaa ǹ mànan nɛ,
ǹ nə́ ǹ gɔya san kaa ǹ mìi li,
ǹ gɛ̀-dɛ lɛ a gugurubaa mɛ ǹ we la.
28Kasɛn Ezipti minin kɛn,
ǹ tá re ka dɔn dii kun ka soroman kɛn nɛ,
ka ǹ min mɛnɛn dɛ zia la,
ǹ tá re ka gere biĩ kun ka bɛn nɛ.
29Edɔmu minin tá walan, ǹ kiin laanka ǹ nyɛɛnaandɛnan nɛ. A laanɛ ǹ nə́ giĩ baa, maǹ nə́ ǹ dɔn gere bĩ kun ka gã zia la wole gialakunun kɛn nɛ. Ǹ soroman mɛnɛn bĩ, maǹ nə́ ǹ dɔn gere naa tán yala-n kun ka bɛn nɛ.
30Gɔsɛ a lɛ̀gɔn la a goledɛnan kɛn tumaa tan, kun ka Sidɔn minin kɛn tumaa nɛ, ǹ mɛnɛn lɛn nə gã. A laanɛ ǹ nə́ goã nyɛ́ɛ kiɛ minin ganaa ǹ kakabaa kɛa lɛa, ǹ zɛnaa ǹ sii lɛ sìi da ǹ dinin ganaa. Soroman manɛ. Min mɛnɛn nə gã zia la, ǹ nə́ ǹ gere bĩ kun ka bɛn nɛ. Bɛa sìi kɛ nə ǹ ganaa, kun ka wo tii li wolen ne.
31Bɛ̀ Faarahɔn bɛa zaman damata kɛ lɛ yɛ, a dɔ foo á basɛ̃. Maǹ die a dɔ laanka a sɔraasin lɛn dii zia la. Ma din Dɛnaa Lawa a da ǹ boo ne. 32Sonbore, man má Faarahɔn toa walan, máa nyɛ́ɛ kaa minin ganaa yiikoonaan kanaa kɛ nɛ. Sɛnɛ, ǹ tá re a din laanka a sɔraasin kɛn tumaa gere bĩ kun ka soroman nɛ, ǹ nə ǹ mɛnɛn lɛn dɛ zia la. Ma din Dɛnaa Lawa a da ǹ boo ne.
اکنون انتخاب شده:
Eze 32: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.