Eze 23
23
Samarii minin kɔrɔbaa
1Dɛnaa Lawa a boo á ke á pɛ ma nɛ: 2– Minbuiin a nɛ, n too kɔ boo kɛ li: Lɔ min paa kɔn nɛ, dan goon. 3Maǹ nə́ goã kɔrɔbaa zɛnɛɛ Ezipti gána nɛ, bɛ̀ ǹ bɛ́ tɔn ten dinin. Maǹ nə́ ǹ foo bii tatama walan, ǹ nə́ n gɔn tatalaa ǹ nyɔn ganaa. 4Lɔn lɛn tɔn nə́ ke: A goledɛnaa tɔ n Oholaa, a boɛɛndɛnaa tɔ n Oholibaa. Maǹ nə́ n baa masɛ wɔn lɛa, ǹ nə́ nɛgiĩn laanka nɛlɔn yɛ. Oholaa lɛ, Samarii kiwi kɛ n ka bɛ nɛ. Oholibaa ke, Zeruzalɛmu kiwi kɛ n ka bɛ nɛ.
5Sɛnɛ, a laanɛ Oholaa tá masɛ wɔ lɛa, á kɔrɔbaa zɛnaa. Á n din kɔ a tɔntɔraa Asiirii minin kɛn la. 6Bɛn lɛn manə ǹ miãkɛnɛn lɛa, mɔnaa tatãn sonboren we. Maǹ gánadɛnan laanka nyɛɛnaandɛnan lɛa, ǹ tumaa n giĩ tenən lɛa, yii ń boe ǹ li, sùi da baa-a wole sonboren lɛa. 7Oholaa nə́ n din kɔ Asiirii minin goledɛnan kɛn tumaa la. Ǹ mɛnɛn tumaa sii bɛ́ á goã a ganaa, a na á goã naarɛbaa zɛnɛɛ kun ka bɛn nɛ. Á naarɛbaa zɛnaa ka ǹ dìn kɛn tumaa nɛ, á goã ǹ guguru koe. 8A kɔrɔbaa mɛn lɛ giala kɔ Ezipti gána nɛ, a bɛ lɛ da wa. A giala, maǹ nə́ goã giɛ̃ kun ni haalɛ a tenmaa waáraa, ǹ nə́ goã a nɛniɛbaa ǹ nyɔn kɛn kuĩ, bɛ̀ ǹ da naarɛbaa ganaa. 9Bɛ lɛ nɛ, má toa a tɔntɔraa Asiirii minin lɛn gɔn, kɛn lɛn ǹ sii goã a ganaa. 10Bɛn ná a tontoro da, ǹ ná a nɛgiĩn laanka a nɛlɔn goa, ǹ ná a dinmaa kɛ dɛ. Ǹ dɔlɔ mɛn bɔ a ganaa, bɛ na á ǹ miã lɔn doroo.
Zeruzalɛmu minin kɔrɔbaa
11Ǹ dɔɔ̃nlɔ Oholibaa bɛa sii kɛ lɛ tumaa yɛ. Sɛnɛ, a giĩ sii bɛ́ á baraa kɔ á la yii ni, á n din ziziɛ̃ á la Oholaa nɛ. A kɔrɔbaa lɛ la ǹ gololɔ Oholaa a naarɛbaa kɛ nɛ. 12Asiirii minin kɛn gánadɛnan laanka ǹ nyɛɛnaandɛnan sii na á goã Oholibaa dɔ ganaa. Bɛa minin lɛn man nə́ goã ǹ miãkɛnɛn lɛa, ǹ wɔ ǹ mɔnaan nə́ siĩn sɔnbɔraanɛ, sùi da baa-a wole sonboren lɛa, ǹ tumaa n giĩ tenən lɛa, yii ń boe ǹ li. 13Má a dɔ yɛ á n din gɔgɔrɛ kɔ, ǹ dinin min paa a zɛnaa ǹ sii ǹ goon. 14Oholibaa sɛ́ din wusoo á màn da a kɔrɔbaa lɛ li. Ǹ kɔn pinaa, a na á giĩn nyínin yɛ, ǹ nə́ ǹ zɛnaa kion gɔ̀nɔn ganaa. *Baabilonii minin kɛn nyínin manɛ, ǹ nə́ ǹ zɛnaa ka màn tã nɛ. 15Maabɛlɛ na á goã ǹ bɔsɔ̃, mɔnaa gɔnɔn nə́ ǹ mìi-a. Ǹ dinin tumaa, bɛ̀ ń nə́ ǹ yɛ, ka zia-baali dadaran manɛ. Maǹ ka Baabilonii minin kɛn bɛ́ lɔn ǹ dinin yɛ ǹ gána nɛ. 16Oholibaa din yii mɛ ǹ-a lɔn gɔrɔ, ǹ sii kũ, á nɔmaa á minin dia ǹ la Baabilonii gána nɛ. 17Baabilonii minin lɛn nə́ daa giã kun ni, ǹ ná a gɔgɔrɛ kɔ ka ǹ kɔrɔbaa kɛ nɛ. A bɛ́ á n din ziziɛ̃ kunun ǹ ni, ǹ tìĩ daa á bɔ a nyin ni ka kusikusi. 18Á n din tontoro da minin yii ni, a ná a kɔrɔbaa lɛ da wɔlɔ fúlu-a. Bɛ lɛ n ke a tìĩ bɔ ma dɔ nyin ni, ka ǹ dɔɔ̃nlɔ Oholaa lɛ tìĩ á ke á bɔ masɛ Dɛnaa Lawa nyin ni lɔn. 19Á màn da a kɔrɔbaa lɛ li, á minin yiri gisĩ a tenmaa waáraa a kɔrɔbaa kɛ nɛ, a tá Ezipti-n lɛ a biikoo li. 20Bɛn lɛn min kɔrɔn sii na á goã a ganaa. A giala, ǹ giulun nə ka dundun wɔ bɛ́ lɔn, ǹ kii a daa ǹ gɔn nə ka sùi wɔ bɛ́ lɔn.
Zeruzalɛmu a dɔlɔ
21Oholibaa, n kɔrɔbaa mɛn zɛnaa n tenmaa waáraa, bɛ̀ Ezipti minin bɛ́ n gɔn tatalɛɛ n tìãbii ganaa, bɛ̀ ǹ nə́ n nɛniɛbaa ǹ nyɔn kɛn kukũ, a din lɛ n ke, ń wusoo ń ti a ganaa doo. 22Bɛ lɛ na á toa, Oholibaa, masɛ Dɛnaa Lawa á kɛ pii n ni: «N tɔtɔraan mɛnɛn lɛn tìĩ bɔ n nyin ni, man die bɛn lɛn kiɛ n ganaa. Man die ǹ toɛ̃ bǎã tumaa nɛ, ma ǹ kaa n ganaa. 23Minin tá re boe Baabilonii, Kalde minin kɛn tumaa, Pekɔdi minin ni, Sowa minin ni ka Kowa minin ni. Asiirii minin kɛn tumaa á re kiɛ kun ka bɛn nɛ. Ǹ tumaa n min ten lɛa, yii n boe ǹ li. Kɛn man gánadɛnan lɛa, kɛn nə́ nyɛɛnaandɛnan lɛa, zia-baalin ni, goledɛnan nɛ, ǹ tumaa n boe sùi da baa-a la sɔnbɔraanɛ. 24Ǹ tá re boe gɔsɛ a lɛ̀gɔn la ǹ da n gialaa ka ziabaa ǹ wotoron ne, da baa-a ǹ mànan tɔrɔ tumaa nɛ, ka zia-baali damata nɛ. Ǹ tá re die n lɛnpɛnɛ ka bɛn lɛn nɛ, ǹ goóron nə́ ǹ gɔn, ǹ ziabaa ǹ bafolon nə́ ǹ mìi-a. Ma á re n Oholibaa a sii lɛ yɔrɔ pii ǹ yii ni, ǹ tá re kiri we n ganaa, a kɔnpɛ ka ǹ dinin landan nɛ. 25Ma foo mɛn yoo n li ke, ma á re toɛ, ǹ kakaarɛbaa ǹ sii zɛnaa n nɛ. Ǹ tá re n nyin kuri, ka n toon ne. N minin mɛnɛn bɛ́ re goɛ̃, ǹ tá re bɛn dii zia la. Ǹ tá re n nɛgiĩn laanka ǹ nɛlɔn kɛn goɛ, min mɛnɛn dɔn bɛ́ re goɛ̃ kiwi lɛ nɛ, tɛ á re bɛn kuĩ. 26Ǹ tá re n mɔnaan wɛɛ ǹ bɔ n ganaa, ǹ nə n nyaǹ bɔ ǹ mànan kɛn si n la. 27Bɛa biikoo li, ma á re n kurii n gɛsɛbaa ǹ siin kɛn lɛn zɛnaa ganaa, ka n kɔrɔbaa kɛ nɛ, ń bɔ nɛ Ezipti gána nɛ. N ba re n yii din siɛ n ga ǹ ganaa doo wa, n yiri din ba re die ka Ezipti gána kɛ-n doo wa. 28Ma din Dɛnaa Lawa n kɛ pii: Min mɛnɛn lɛn sii bɛ́ a ba n ganaa wa, ǹ tìĩ bɔ n nyin ni, á ke, man die n we bɛn lɛn gɔn. 29Ǹ tá re n kuĩ ka zɔ́ɔbaa nɛ. Bɛ̀ ń dí nya ń màn mɛn yɛ, ǹ tá re bɛ tumaa kuĩ ǹ si n la. Ǹ tá re n mɔnaa boe ǹ bɔ n ganaa, ǹ nə n gɔ̀nɔn kooro da. N bɛ́ kɔrɔbaa lɛ zɛnɛɛ ka n tontoro mɛn lɛ nɛ, ǹ tá re bɛ boe ǹ da wɔlɔ fúlu-a. Man die bɛ zɛnɛɛ n nɛ, n gɛsɛbaa laanka n kɔrɔbaa lɛ taman yii. 30A giala, ma n nə́ n saa tɔrɔ kɔsɔn li ń kɔrɔbaa zɛnaa, ń nə́ ǹ dìn guguru kɔ, ń nə́ n din gɔgɔrɛ kɔ nɛ. 31N nə́ ń kɔ n dɔɔ̃nlɔ lɛ a zɛnaa ǹ sii lɛ. A bɛ́ miɛ̃, ma dɔlɔ mɛn bɔ n dɔɔ̃nlɔ lɛ ganaa, man die bɛ lɛ miã boe n dɔ ganaa.» 32Masɛ Dɛnaa Lawa n kɛ pii:
«N dɔɔ̃nlɔ lɛ a dɔlɔ lɛ,
a din lɛ n die n boe n dɔ ganaa,
dɔlɔ gole ne, dɔlɔ kaka nɛ.
A din lɛ n die toɛ,
minin nə yaa wɔ n ganaa,
minin nə n da yaa lɛa,
dɔlɔ lɛ a golebaa taman yii.
33Là-paparɛɛ laanka foo-ziziɛ̃ á re
n gɔ̀nɔn boe.
Dɔlɔ mɛn nə n da n dɔɔ̃nlɔ
Samarii mìi ni,
a din lɛ tɔrɔ nɛ,
dɔlɔ mɛn bɛ́ nyɛ́ɛ diɛ,
nɔmaa ná a nɛ, bɛ nɛ.
34Sɛnɛ, bɛa dɔlɔ kɛ lɛ á re n boe
n ganaa,
á re n boe n ganaa yǎa a nyɛɛ.
Là-paparɛɛ gɔ́ɔ̃ nɛ,
n foo á re yui n din li,
n tá ka n nə n nyɔn kɛn wɔ̃woɛ̃ n nə ǹ kaa.
Ma din Dɛnaa Lawa a da ǹ boo-n ka bɛ nɛ.
35Bɛ lɛ na á toa masɛ Dɛnaa Lawa á kɛ pii: N yiri bɛ́ á bɔ ka masɛ nɛ, n bɛ́ ń ma tii, n din tá re n toɛ̃ ka n gɛsɛbaa laanka n kɔrɔbaa ǹ siin lɛn guĩ ni.»
Samarii laanka Zeruzalɛmu zɛ̀rɛbaa
36Dɛnaa Lawa tɔ́n pɛ ma nɛ: – Minbuiin a nɛ, kiri wɔ Oholaa laanka Oholibaa ganaa. Ǹ bɛ́ sii bɔbɔnɛɛn mɛnɛn zɛnɛɛ, bɛn lɛn pɛ ǹ nɛ. 37A giala, maǹ nə́ naarɛbaa zɛnaa, ǹ nə́ gɛ̀ dɛ. Ǹ dìn guguru kɔ kɛ lɛ n naarɛbaa lɛa ǹ nə́ zɛnaa. Ǹ nɛnyaanan mɛnɛn yɛ maa wɔn lɛa, ǹ nə́ wúlu bɔ ka bɛn dɔn dinin ni dìn lɛn ganaa. 38Ǹ nə́ kɛ dɔ din la ma la: A din pinaa lɛ nɛ, ǹ nə́ maa kion sonbore kɛ gɔgɔrɛ kɔ, ǹ nə́ maa susu ǹ piin kɛn ziziɛ̃. 39Bɛ̀ ǹ nə́ ǹ nɛnyaanan lɛn dɛ dìn ganaa ǹ mɛn pinaa, maǹ wusii bɛ̀ ǹ da wɔ maa kion sonbore kɛ nɛ a din pinaa, bɛ̀ ǹ bɛ dɔ ziziɛ̃. Ǹ sii mɛn zɛnaa maa kion lɛ nɛ, a din lɛ n ka bɛ nɛ. 40Ka bɛ dɔ nɛ, ǹ nə́ minin dia woe lɛ diɛ giĩn la gána sɔsɔɔ nɛ. Lɛ-dia dɔ ǹ li lɔn, ǹ nə́ daa. Bɛn lɛn lɛa nɛ, Oholaa laanka Oholibaa nə́ n zoo, ǹ nə́ nyaǹ kaa ǹ yiin ganaa, ǹ nə́ ǹ nyaǹ bɔ ǹ mànan wɔ. 41Bɛ kio, ǹ nə́ giã tán pìi sonbore la, tabala n tán-a ǹ nyɛɛnɛ, ǹ nə́ maa da yon gìĩ kɔɔ̃n kɛ laanka maa nyɔɔ kɛ kaa bɛ la. 42Zaman gole a sɛ̀-pɛ lɛ goã boe ǹ li, ǹ foo yii ń kɔɔ̃nɛ. Min gigiã dɔ́ bɔ diə gole kɛa bǎã tumaa nɛ, ǹ nə́ daa kaa kun ka zaman lɛ nɛ. Ǹ nə́ zanan kaa dɔɔ̃nlɔ min paa lɛ gɔn wìin ganaa, ǹ nə́ kii bafolo wɔ ǹ gogoonmaa mìi-a. 43Bɛ lɛ nɛ, ma tɔ́n kɛ pɛ ma din gɔ́ɔ̃ nɛ: «Ǹ mɛn dɔ din bɛ́ á ziziɛ̃ naarɛbaa lɛ gɔ́ɔ̃ nɛ, a n tɔn wusii n din koe kɔrɔbaa dɔ la.» 44Giĩn man woe a li miɛ̃, ka ǹ nə́ ke woe lɔ kɔrɔ li lɔn. Giĩn lɛn man woe Oholaa laanka Oholibaa li miɛ̃, ka ǹ bɛ́ woe lɔ kɔrɔn li lɔn. 45Sɛnɛ, giĩn mɛnɛn bɛ́ pepere, bɛn tá re kiri we ǹ ganaa. Lɔn mɛnɛn bɛ́ kɔrɔbaa zɛnɛɛ ǹ nə́ gɛ̀ dii, ǹ tá re bɛn dɔlɔ kɛ tɔrɔ diɛ ǹ mìi ni. A giala, lɔ naarɛn manɛ, gɛ̀-dɛlen dɔn manɛ.
46Masɛ Dɛnaa Lawa bɛ́ màn mɛn pii, bɛ n ka kɛ nɛ: «Ka zaman gole yiɛ ka kaa ǹ ganaa, ka ǹ toa nyɛ́ɛ gole kɛ gɔn, ka ǹ gɔn mànan goa. 47Zaman lɛ kɔlɔ kaã bɔ ǹ ganaa, ǹ nə ǹ nana kɔn ka gɔya nɛ. Ka ǹ nɛgiĩn laanka ǹ nɛlɔn dɛ, ka tɛ da ǹ kionən ganaa. 48Ma á re gɛsɛbaa ǹ sii kɛ lɛ nyɛɛ ma bɔ gána lɛ nɛ. Lɔn tumaa á re a boo miɛ, ǹ ba re koe dɔɔ̃nlɔ min paa kɛa gɛsɛbaa ǹ siin kɛn lɛ wa. 49Ǹ tá re ǹ gɛsɛbaa kɛ lɛ a saraa yii, ǹ dì guguru kɔ kɛ lɛ a sii baraa a dɔlɔ á re n diɛ ǹ mìi ni. Ǹ tá re doɛ̃ bɛa biikoo li kəni, mà masɛ din nə Dɛnaa Lawa lɛa.»
اکنون انتخاب شده:
Eze 23: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.