Eze 21
21
Sii mɛn bɛ́ re Zeruzalɛmu yii
1Dɛnaa Lawa boo da ma nɛ á pɛ: 2– Minbuiin a nɛ, n yɔrɔ dia gusin a lɛ̀gɔn la. Sɛ̀ pɛ gusin a lɛ̀gɔn la dɛnan kɛn ganaa, n paraa wɔ gusin a lɛ̀gɔn la a daã kɛ wɔ paǹ li. 3Kɛ pɛ gusin a lɛ̀gɔn la a daã lɛ wɔ paǹ li: «Ka n too kɔ masɛ Dɛnaa Lawa a da ǹ boo li: Á ke, man die tɛ diɛ n ganaa. Da buruu tumaa nɛ, a gere tumaa nɛ, á re bɛn kuĩ. Bɛa tɛ gole kɛ lɛ a re nimi wa. Á re màn tumaa kuĩ, a saa gusin a lɛ̀gɔn la ganaa, a wo gɔsɛ a lɛ̀gɔn la yaa. 4Min tumaa á re doɛ̃ kəni, mà masɛ Dɛnaa Lawa din ni ma tɛ lɛ da, min kɔn dɔ a re boe la a nimi wa.» 5Má tɔ́n pɛ: «E, Dɛnaa Lawa, minin man pii, mà masɛ n boo tì dinsɔɔ̃ diɛ minin ganaa.»
6Dɛnaa Lawa wusoo á boo da ma nɛ á pɛ: 7– Minbuiin a nɛ, n yɔrɔ dia Zeruzalɛmu la. Yoo ǹ wúlu bɔ ǹ bǎãn kɛn gialaa, n maa boo da Izirayeli gána ganaa. 8A pɛ Izirayeli gána nɛ, mà masɛ Dɛnaa Lawa a da ǹ boo á ke: «Masɛ Dɛnaa Lawa n die n gialaa. Ma á re maa gɔya sa woɛ̃, ma min peperen laanka min baraan waa, ma ǹ bɔ gána lɛ nɛ. 9Ma bɛ́ re min peperen laanka min baraan wɛɛ ma ǹ bɔ a nɛ, bɛ lɛ na á toa ma á re maa gɔya sa lɛ woɛ̃ min tumaa li, a saa gusin a lɛ̀gɔn la ganaa, a wo gɔsɛ a lɛ̀gɔn la yaa. 10Min tumaa á re doɛ̃ kəni, mà masɛ Dɛnaa Lawa n ma gɔya sa woɛ̃ má bɔ a kii ni, ma a woe a-n doo wa.»
11Minbuiin a nɛ, n kii kũ n gini là-paparɛɛ taman yii. Gini ǹ tumaa yii ni. 12Bɛ̀ ǹ nə́ nɔ̀n da n la mà wàa na á baa n tá gini, a pɛ ǹ nɛ, mà n boo mɛn ma, mà bɛ lɛ a lɛa nɛ. Min tumaa foo á re biɛ niɛ̃, min tumaa pàã á re nyɛɛ, min tumaa gɔ́ɔ̃ á re n lɔlɛkɔn, min tumaa gù á re giɛ̃. Á ke, bɛa sii lɛ á die, á dɔ á nya dinin. Ma din Dɛnaa Lawa a da ǹ boo ne.
Lawa a gɔya sa
13Dɛnaa Lawa wusoo á boo da ma nɛ á pɛ: 14– Minbuiin a nɛ, maa boo gii kɛ da n pɛ kɛnɛn: «Dɛnaa Lawa a da ǹ boo á ke:
Gɔya sa á ke,
ǹ ná a lɛ bɔ,
ǹ nə́ zɔnɔ sɔnbɔraanɛ!
15A lɛ na á n lɔ minin
bɔlɔ-kurii taman yii,
a gɔ̀nɔn na á n zɔnɔ,
tɛ pii taman yii.
16Má kɔ ǹ la máa ǹ na a lɛ tuturu,
má kɔ ǹ la máa ǹ na a lɛ lɔ,
ǹ boo la ǹ saa ǹ gɔn,
ǹ wɔ basaã-kɔle kɛ gɔn.
Dɛnaa Lawa a da ǹ boo ne.
17Minbuiin a nɛ, n lɛ dɛ,
n lɛ dɛ kɔsɛkɔsɛ!
Gɔya sa á ke maa zaman lɛ gialaa,
á ke Izirayeli a
nyɛɛnaandɛnan tumaa gialaa.
Gɔya sa n die ǹ laanka maa zaman
lɛ dii kun.
Bɛ lɛ nɛ, n kii kũ.
18Nɔmaa gole n ka kɛ nɛ.
Ma din Dɛnaa Lawa a da ǹ boo ne.
19Minbuiin a nɛ, maa boo kɛ pɛ:
N gɔn tɔ kɔn lɛ.
Bɛ̀ á dɔ gunyin paa, gunyin sɔɔ,
màn die a wusoo a mɛ gɔya sa
lɛ a minin dɛ li miɛ̃.
Gɛ̀ dɛ ǹ gɔya sa nɛ,
á minbuiin dɛ á wɔlɔ lɛnpɛnɛ nɛ.
20Má min doa ǹ kiɛnlɛn tumaa lɛ-a,
ka gɛ̀ dɛ ǹ gɔya sa ná a gɔn.
A n tɛ zuĩ ka la a tɛ-pɛ bɛ́ lɔn,
a lɛ na á n lɔ gɛ̀-dɛ taman yii,
màn mɛn bɛ́ toɛ nyɛ́ɛ minin kũ,
màn mɛn bɛ́ toɛ min gigiã mɛnaa.
21Haya, gɔya lɛ bɔle-a!
A dɛ bɛ̀ n wo gusin,
n bɔyaa n dɛ bɛ̀ n wo gɔsɛ,
n nyan bǎã kɔn din toa wa.
22Masɛ dɔ n die gɛ̀ dii ka ma
gɔnɔn paanan nɛ,
ma foo mɛn yoo ke,
yǎa man foo nyɛɛ.
Ma din Dɛnaa Lawa a da ǹ boo ne.»
Baabiloniin kii a gɔya sa
23Dɛnaa Lawa a da ǹ boo á ke: 24– Minbuiin a nɛ, zii màn paa lɔ tán, Baabiloniin kii lɛ bɛ́ re koe ziin mɛnɛn lɛ a da zia baa. Bɛa ziin lɛn doamaa nɛ, ǹ soo gána goon ne. Zii lɛ a gogoonmaa a giala kɔ ǹ bǎã nɛ, gɔn nyín zɛnaa, a gòon nə́ dia-n kiwi goon la. 25Zia nɛn lɛn man die Zii lɛa goon siɛ ǹ wo Amɔn tɔrɔn kiwi Rabaa kɛ gialaa, ǹ kɔsɔ dɔ saa, ǹ wo Zeruzalɛmu kiwi kɛ gialaa Zudaa gána nɛ, kiwi mɛn lɛ bɛ́, ǹ nə́ kungɔn dɔ ǹ ná a lɛnpɛnɛ nɛ. 26Baabiloniin kii na á goã zii màn paa lɛ a sawaa kɔn-a ǹ bǎã nɛ, á n dí nyɛɛ giɛ sii giala li. A na á goã kiɛnɛn zuzuĩ lon, nɔ̀n didiɛ dìn la, gigiɛ màn foon ganaa. 27Kiɛ lɛ na á mɛnaa a gusin, á nyaa mà Zeruzalɛmu ni. Kii lɛ maǹ ziabaa ǹ lɛ-dɛ wɔ kɔsɛkɔsɛ, ǹ minin dɛ lɛ a gú da ǹ ziabaa ǹ màn dadaran doa kiwi lɛ a kiɛnlɛ-a, ǹ bèlèn dɔ, ǹ nyankɔrɔ fɔ̃! 28Zeruzalɛmu minin man die bɛa dí kɛ lɛ biɛ soɛ lɛa. A giala, minin nə́ goã ǹ nə́ n lɛ kɔ ǹ la, mà ǹsɛn tá re n doe ǹ lɛ. Sɛnɛ, mà ǹ tá re woe bɛ̀rɛbaa ǹ bǎã nɛ, mà bɛ á re ǹ yiri diɛ ǹ sii baraa lɛ nɛ. 29Bɛ lɛ na á toa masɛ Dɛnaa Lawa gole á ke pii: «Ka n wusii ma yiri diɛ kaa sii baraan lɛn nɛ, ka n ma bɔlɔ tii woone. Kaa zɛnaa ǹ siin lɛn tumaa n nyɛɛ mà ka dinin zɛ̀rɛ nɛ. Ka bɛ́ ka dinin la nyɛɛ miɛ̃, haya! Ǹ tá re ka kuĩ, ǹ wo ka nɛ bɛ̀rɛbaa ǹ bǎã nɛ.
30Nsɛ, Izirayeli minin nyɛɛnaandɛnaa, min kooro babaraa ke, n too kɔ: N tá re n sii baraa zɛnaa kɛ lɛ diɛ, a lɛawaa á die. 31Ma din Dɛnaa Lawa gole n kɛ pii: Ǹ tá re n kiibaa ǹ bafolo laanka n gɛ̀lɛ boe ǹ bɔ n mìi-a, siin nə n bɔyaa. Min mɛn bɛ́ tán, bɛ á re yui lon, min mɛn bɛ́ lon, bɛ á re gisĩ tán. 32Basaã woo basaã, man die basaã din taãn kɛ koe Zeruzalɛmu ni! Bɛa basaã lɛ miã din tɔn yɛ duduu wa. A n die goɛ̃ miɛ̃ yǎa bɛa sii lɛ a zɛnaali wole die.»
Sii mɛn bɛ́ re Amɔn tɔrɔn yii
33 #
Zer 49.1-6; Eze 25.1-7; Amɔ 1.3-15; Sof 2.8-11 Minbuiin a nɛ, maa boo gii kɛ da: Amɔn tɔrɔn nə sɔ mɛn kɔ ma ganaa, masɛ Dɛnaa Lawa n kɛ pii ǹ wɔ paǹ li: «A pɛ ǹ nɛ:
Gɔya sa á ke!
Ǹ nə́ woɛ̃, ǹ nə́ bɔ a kii ni,
ǹ ná a lɛ lɔ,
ǹ nə́ die minin bɔlɔ kuri ni.
A n die tɛ kiɛ,
ka la a tɛ-pɛ bɛ́ lɔn.
34Ka bɛ́ n foo doɛ taasiɛ kooron laanka soɛ boon ganaa, ǹ mɛn waáraa, gɔya sa lɛ á re Lawa tɔ ziziɛ̃ wole babaraan kɛn wìi niɛ̃. A lɛawaa á die ǹ lon, ǹ tá re ǹ sii baraa zɛnaa lɛ lɛ diɛ.
35Ka kaa gɔya san lɛn kaa ǹ kii ni. Ma á re dɔlɔ boe ka ganaa kaa bɔ ǹ bǎã kɛ nɛ, kaa yɛ ǹ gána kɛ nɛ. 36Ma foo á re yui ka li, ma dɔlɔ bɔ ka ganaa, ma ka wɔ min gagasan gɔn, min mɛnɛn dí bɛ́ ka minin dɛ nɛ. 37Tɛ á re ka kuĩ, ka mà á re kiɛ tán gána lɛ nɛ. Minin yiri din ba re gisĩ ka-n doo wa. A giala, ma din Dɛnaa Lawa a da ǹ boo ne.»
اکنون انتخاب شده:
Eze 21: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.