BLS 12
12
Zizikɔ laanka gɛ̀ boo
1Sɛnɛ n tɔntɔraabaa biikoo li,
n yiri kɔ ka n diɛ wole ne,
bɛ̀ koe lɛawaan kɛn nə baa doe,
ka lɛ̀n kɛn nɛ,
ń die pii mà ǹ sii ba nsɛ-a wa.
2Bɛa biikoo li,
n tá re goɛ̃ wɔlɔ tì li,
ka wasa a fólon na á nimi,
ka mui laanka leeren man nə́ kũ,
ǹ nə́ tii,
ka la n bara goɛ la a kaa kio.
3Bɛa pinaa kɛ lɛ nɛ,
kion-lɛduə̃lin kɛn gɔ̀nɔn tá re bìn diɛ.
Giĩ kakan kɛn tá re n pusi.
Màn-lɔlin kɛn tá re ǹ màn lɔ lɛ diɛ,
a giala, ǹ ba tɛ doo wa.
Yii-kɔ fenɛtrə-wolen kɛn tá re a lɛ diɛ.
4Dàã a kiɛnlɛ-a ǹ goon kɛn tá re n tiɛ̃,
màn lɔ ǹ gii kɛ wuu á re basɛ̃,
n tá re yui bàanan lɛ-baa li,
loe-saalin kɛn lɛn tá re basɛ̃.
5Bɛa biikoo li,
tenten a dii tá re nyɛ́ɛ diɛ,
zii tɔ we tá re gɔ́ɔ̃ woɛ̃,
bɛ á zɛnɛɛ kəni,
bɛ̀ da kɛ́ buũ kɔ fu panpan,
bisin kɛ ń guguru a din-a,
sii kɔn din ná a là kakaɛ̃ diɛ doo wa.
Sonbore,
ǹ kɔn pinaa minbuiin nɛ gogoonmaa n die woe,
piɛ duduu.
Ziin la, wuu-pɛlen dɔn man nə n bibiĩ,
ǹ nə́ n yii diɛ bɛa biikoo kɛ lɛ la.
6Wɔrɔ biɛ lɛ n die fore,
sana donkolon lɛ n die yui,
dɔn lɛ n die yui mu yala lɛ-a,
mu si ǹ gagana ziziɛ̃ lɛ n die boe a mɛnaa tù ni#12.6 A saa vɛrsi paa lɛ ganaa a da dɔ vɛrsi sɔrɔ ganaa, min tɛnɛn man taasɛ mà bɛa bǎã lɛ n min a pàã a nya boo diɛ a zizibaa biikoo li..
7Bɛa biikoo kɛ lɛ li,
minbuiin nɛ gɔ̀nɔn siĩ lɛ bɔ tán tii mɛn li,
a nə n bɔyɛɛ a wo walan.
Telenboeen nə n bɔyɛɛ a wo Lawa li,
Lawa mɛn lɛ kɔ.
8Sii-dɔ̃li lɛ na á pɛ mà:
a giala din na a banban,
sii woo sii,
a giala din na a banban.
Boo mìi naa
9Minin-daraali lɛ goã sii-dɔ̃li lɛa,
bɛ dɔ dinsɔɔ̃ bie wa,
á wusoo doo á minin dɔn daraa sii-doɛ̃ ganaa.
Á suusu gigiã sɔsɔ̃,
á ǹ gɔsɛ, á ǹ zɛnaa.
10Á n doa,
á ga boo kɔɔ̃nɔn li,
màn mɛn dɔ nə n kiɛ̃,
a n pepere, boo taãn lɛa.
11Sii-dɔ̃lin boon man ka tɔɔn loo ǹ kiɛn bɛ́ lɔn,
man ka tɔɔn gama walan wolen gɔnɔn dere tán nɛ,
tɔɔ-lɛduə̃li goon dinsɔɔ̃ na á ǹ wɔ.
12Bɛ lɛ nɛ, maa nɛgiĩ,
toa n daraa bɔ ǹ nɛ.
Sɛ́wɔn mɛnɛn bɛ́ boe la ǹ nə n kiɛ̃,
gigiãbaa dan bie wa.
Daraa gigiã tá gɔ̀nɔn siĩ nɔmiɛ̃.
13Màn mɛn tumaa nə n pɛ,
wɔ n too kɔ bɛ gɔn nyɔmiɛ̃ ganaa:
nyɛ́ɛ baa Lawa nɛ,
n na a gɔn waa ǹ boon tamaa.
A giala minbuiin nɛ doamaa-n ka bɛ nɛ.
14Sonbore,
Lawa tá re nya ǹ dí tumaa a kiri we,
ka sii mɛn tumaa bɛ́ durii ni,
ta bǐɛ̃ nɛ, hinlaa baraa nɛ.
اکنون انتخاب شده:
BLS 12: SBPE2011
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
San Bible Protestant Edition © Bible Society of Burkina Faso, 2011.