प्रेरितों के कम 5
5
पवित्र आत्मा कन्ने चुठ बोलना
1हनन्याह नां दा एक मानु, ते ओसदी करेआली सफिरा ने अपनी केछ जमीन बेची 2ते ओदे पैसें चा केछ रखी दिता; ते ए गल्ल ओसदी करेआली बी जानदी ही, ते ओसदा एक ऐसा आनीयै प्रेरितें गी देई दित्ता। 3लेकन पतरस ने आखया, “ए हनन्याह! शतान ने तेरे मन च ए गल्ल कि पाई ऐ के तू पवित्र आत्मा कन्ने चुठ बोले, ते जमीन दे केछ पैसे रखी ले? 4जेलै तकर ओ तेरे कोल रेई, के तेरी नेई ही? ते जेलै बिकी गेई तां के ओदी कीमत तेरे वश च नेई ही? तो ए गल्ल अपने मन च कि बचारी? तो मनुक्ख कन्ने नेई लेकन परमेसर कन्ने चुठ गलाया ऐ।” 5ए गल्लां सुनदे गै हनन्याह जमीन उपर टेई गीया ते प्राण शुड़ी दिता, ते सारें सुनने आलें उपर बड़ा डर शाई गीया। 6पी जवानें आईयै ओसदा कीड़ा बनाया ते बार लेईयै संसकार करी दिता।
7लगपग त्रै कैंटे बाद ओसदी करेआली, जे केछ ओया हा नेई जानियें, अन्दर आई। 8ओस बेलै पतरस ने उसी आखया, “मिकी सना के तुसें ओ जमीन इनें गै पैसें कन्ने बेची ही?” ओनें आखया, “आं, इनें च गै।” 9पतरस ने उसी आखया, “ए के गल्ल ऐ के तुसें दौनीं प्रभु दे आत्मा दी परिख्या आसतै एक कित्ता? देख, तेरे करेआले दा संसकार करने आले दरबाजे उपर गै खड़ोते न, ते तुगी बी बार लेई जागन।” 10ओस बेलै ओ फोरन ओदे पैरें च पेई गई, ते प्राण छुड़ी दिते; ते जवानें कोल आईयै उसी मरीदियें गी दिखया, ते बार लेईयै उसी ओदे करेआले कन्ने संसकार करी दिता। 11सारी कलीसिया उपर ते इनें गल्लें गी सब सुनने आलें यरूशलेम दे विश्वासियें उपर, मता डर शाई गीया।
चेलें थमां चेन्न ते चमत्कार
12प्रेरितें दे अथ्थें थमां मते सारे चेन्न ते चमत्कार लोकें बेच दसे जंदे हे, मसीह दे विश्वासी सारे एक चेत्त ओईयै सुलैमान दे चबारे च किट्ठे ओदे हे। 13लेकन बाकीयें बिचा कुसे गी बी इम्त नेई ओंदी ही के, उन्दे कन्ने मिलचै; पी बी लोग उंदी बड़ाई करदे हे। 14ते बश्वास करने आले मते सारे मरद ते जनांनीयां प्रभु दी कलीसिया च बड़ी गिनती च मिलदे रे। 15इत्थैं तकर के लोग बीमारें गी सिड़कें उपर लेयाई-लेयाईयै, खट्टे ते खटोलें उपर लटाई दिंदे हे, के जेलै पतरस अवै, ते ओसदे परधांमा गै कुसे उपर पेई जा। 16ते यरूशलेम दे आसे पासे दे शैरें थमां बी मते लोग बमारें ते अशोद्ध आत्मा दे सताएं दें गी लेयाई-लेयाईयै, किट्ठे ओदे हे, ते सारे चंगे करी दिते जंदे हे।
चेलें गी जेल च सुटना
17ओस बेलै महायाजक ते ओदे सारे साथी जेड़े सदूकियें दे पंथ दे हे, गुस्सै कन्ने परोई गै 18ते प्रेरितें गी पकड़ीयै जेलै च बंद करी दिता। 19लेकन रात गी प्रभु दे एक सोर्गदूत जेले दे दरबाजे खोलियै उनेंगी बार आनीयै आखया, 20“जाओ, मंदर च खड़ोईयै, एस मेशा दी जिंदड़ी दियां सब गल्लां लोकें गी सनाओ।”
21ओ ए गल्लां सुनीयै सबेरे ओदे गै मंदर च जाईयै शिखया देन लगे। लेकन महायाजक ते ओदे साथियें आईयै महासभै गी ते इस्राएलियें दे सब बुजुर्गें गी किट्ठा कित्ता, ते जेले च आखी पेजया के उनेंगी लेई औन। 22लेकन जेल दे अधिकारियें उत्थें पूजियै उनेंगी जेल च नेई दिखया, ते मुड़ीयै सनिया दिता, 23“असैं जेल गी बडे चक्न्नें ओईयै बंद कित्ते दा हा, ते पैरेदारें गी बार दरबाजें उपर खड़ोते दे दिखया; लेकन जेसलै खोलया, तां कोल अन्दर कोई नेई मिलया।” 24जेसलै मंदर दे प्रधान ते प्रधान याजकें ए गल्लां सुनींयां, तां उंदे बारै च बड़ी चेंता च पेई गै के उंदा के ओया 25इनें च कुसे आईयै उनेंगी सनाया, “दिखो, जिनेंगी तुसें जेले च रखा दा हा, ओ मनुक्ख मंदर च खड़ोईयै लोकें गी शिखया दे करदे न।” 26ओस बेलै प्रधान, अधिकारियें कन्ने जाईयै, उनेंगी लेई आया, लेकन जबरदस्ती नेई, किके ओ लोकें थमां डरदे हे, के साड़े उपर कोई पत्थर नेई मारे।
27उनै उनेंगी पी आनीयै महासभा दे सामने खड़ा करी दिता ते ओस बेलै महायाजक ने उनेंगी पूछया, 28“के असैं तुसेंगी ठाकीयै उक्म नेई दिता हा, के तोस एस नां कन्ने शिखया नेई दियो? तां बी दिखो, तुसें सारे यरूशलेम गी अपनी शिखया कन्ने परी दित्ता दा ऐ ते ओस मनुक्ख दी अत्या साड़ी मुंडी उपर आनना चांदे ओ।” 29ओसलै पतरस ते, दुए प्रेरितें जबाब दिता, “मनुक्खें दे उक्म थमां बद परमेसर दे उक्म दा पालन करना गै साड़ा फर्ज ऐ। 30साड़े बजुरगें दे परमेसर ने यीशु गी जिंदा कित्ता, जिसी तुसें सूली उपर लटकाईयै मारी दिता हा। 31उसी गै परमेसर ने प्रभु ते मुक्ति देने आला रखया, अपने सज्जे अथ्थ कन्ने उच्चा कित्ता, के ओ इस्राएलियें गी मन फेरने दी ते पापें दी माफी दियें। 32ते अस इनें गल्लें दे गवाह न, ते उय्यां गै पवित्र आत्मा बी, जिसी परमेसर ने उनेंगी दिता दा ऐ, जेड़े ओसदे उक्म गी मनदे न।”
33ए सुनीयै सभा दे लोक बलि उठे, ते उनेंगी मारना चाया। 34लेकन गमलीएल नां दा एक फरीसी जेड़ा यहूदीयें दे कनून गी जाननें आला ते सब लोकें च आदरमान आला हा, महासभै च खड़ोईयै प्रेरितें गी थुड़े चेर आसतै बार कढी देने दा उक्म दित्ता। 35ओस बेलै ओनें सभा दे लोकें गी आखया, “ए इस्राएलियें, तोस जे केछ इनें मनुक्खें कन्ने करना चांदे ओ, सोची समझीयै करयो। 36किके इनें दिनें थमां पैलैं थियूदास ए आखदे ओई जागया, के आंऊँ बी केछ ऐं; ते कोई चार सौ मनुक्ख ओदे कन्ने ओई गै, लेकन ओ मारा गीया; ते जिनैं लोग उसी मनदे हे, सारे तितर-बितर ओए ओ ते मिटी गै। 37एस दे बाद नां लिखाई दे दिनें च यहूदा गलीली जागया, ते केछ लोग अपनी बखी करी लेते; ओ बी मरोई गीया, ते जिनैं लोग उसी मनदे हे, सारे तितर-बितर ओई गै। 38एस आसतै आंऊँ थुआड़े कन्ने आखन ऐं, इनें मनुक्खें कोलां दूर गै रवो ते उन्दे कन्ने केछ लैंन देंन नेई रखो; किके जेकर ए योजना जां कम मनुक्खें थमां ओग तां ओ मिटी जागन; 39लेकन जेकर परमेसर थमां ऐ, तां तोस उनेंगी कदें बी नेई मिटाई सकगे। कुत्ते ऐसा नेई उवै के तोस परमेसर कन्ने बी लड़ने आले बनो।”
40ओस बेलै उनै ओसदी गल्ल मनी लेई; ते प्रेरितें गी बलाईयै मार चढ़ांई; ते ए उक्म देईयै छुड़ी दिता, के यीशु दे नां कन्ने पी कोई गल्ल नेई करयो। 41ओ एस गल्ल कन्ने खोश ओईयै महासभा दे सामने थमां चली गै, के अस यीशु दे नां कन्ने बे आदरे ओनें दे जोग तां बनें। 42एस दे बाद प्रेरित रोज मंदर च ते कर-कर च लगातार शिखया दिंदे, ते शोभ समाचार प्रचार करदे हे के यीशु गै मसीह गै।
اکنون انتخاب شده:
प्रेरितों के कम 5: DOG
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.
