जकर्याह 5
5
उडदे ऊई पर्चिया रा दर्शण
1मैं फेर क्या देखेया कि एक लिखी री पर्ची अवा दे उडणे लगी री। 2दूते मांते पूछेया, “ताखे क्या दिशणे लगी रा?” मैं बोलेया, “माखे एक लिखी री पर्ची अवा दे उडदी ऊई दिशणे लगी री, ये लगभग ती फूट लाम्बी ओर पन्द्रा फूट चौड़ी लगोई।” 3फेर तिने माखे बोलेया, “एते पर्चिया दे सेयो शब्द लिखी राखे जिना खे यहोवा सारी तरतिया खे स्राप देणे खे बोलणे लगी रा। पर्चिया दे एकी तरफा खे लिखी राखेया कि हर चोरो खे देशो ते बारे करेया जाणा। दूजिया तरफा दे लिखी राखेया कि जो कोई बी सच्च बोलणे रा वादा करी की चूठ बोलोआ, तेसखे बी देशो ते बारे करेया जाणा। 4सेना रे यहोवे री येई बाणी ए, मां स्राप पेजणा। ये चोरो रे कअरो दे पीतरे जाणा। ये तेस माणूंए रे कअरे बी जाणा जो मेरे नाओं पाँदे वादा करदे बखदे चूठ बोलोआ। ये तेस कअरो दे रणा ओर से पूरी तरआ ते नाश करी देणा। एस तेसरे कअरो रिया काती ओर पात्थर टाल़ी देणे।”
टोकरिया दे बैठी री जवाणसा रा दर्शण
5तेबे जो दूत मां साथे गल्ला करो था, तिने बारे जाई की माखे बोलेया, “ऊबे देख कि ये क्या चीज निकल़ने लगी री?” 6मैं पूछेया, “ये क्या ए?” स्वर्गदूते माखे बोलेया, “ये चीज जो निकल़ने लगी री ये एक नज्ज नापणे री टोकरी ए।” तिने फेर बोलेया, “सारे देशो रे लोका रा येई रूप ए।” 7तेबे स्वर्गदूते टोकरिया रा टकणा ऊबे चकेया, जो शीशे रा बणी रा था। टोकरिया दे पीतरे एक जवाणस बैठी री थी। 8स्वर्गदूते बोलेया, “ये तिना दुष्टता रे कामा खे बताओई जो लोक करोए।” फेर स्वर्गदूते से जवाणस तेते टोकरिया दे पाईती ओर तेते टकणे की से टोकरी फेर बन्द करी ती। 9तेबे मैं ऊबे देखेया, ओर माखे दो जवाणसा दिशणे लगिया। सेयो मजबूत पंखा साथे मेरिया तरफा खे उडिया। अवा तिना खे एड़े डवाई की लईगी जेड़े अवा बड़े पंछिया खे लई जाओई। सेयो टोकरिया खे तरती ओर सर्गो बीचे लई गिया। 10तेबे मैं तेस स्वर्गदूतो ते जो मां साथे गल्ला करो था, पूछेया, “सेयो तेसा टोकरिया खे केयी निणे लगी रिया?” 11स्वर्गदूते माखे बोलेया, “सेयो टोकरिया खे शिनार नाओं रे देशो दे निणे लगी रिया ए। इना तेती एसा खे एक मन्दर बनाणा। जेबे मन्दर बणी की त्यार ऊई जाणा, तो तिना से टोकरी तेस मन्दरो रे पीतरे राखी देणी। तिना से एड़िया जगा दे राखणी जेती लोक तिजी री पूजा करने खे आऊणे।”
اکنون انتخاب شده:
जकर्याह 5: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.