जकर्याह 13
13
मूर्तिपूजा रा नाश
1तेस बखते दाऊदो रे कराने रे फाईदे खे एक सूबल खोली जाणी। एसा यरूशलेमो दे रणे वाल़ेया ओरी लोका खे बी आशीष देणी। एसा तिना सबी रे पाप तोई देणे, जो अशुद्ध ए। एसा सेयो शुद्ध ओर साफ बणाई देणे। 2सेना रा यहोवा ईंयाँ बोलोआ, “तेस बखते मां एस देशो ते मूर्तिया खत्म करी देणियां ओर सेयो फेर याद नि रणियां ओर मां भविष्यबक्ता ओर अशुद्ध आत्मा एस देशो ते नाश करी देणियां।” 3जे कोई फेर चूठी भविष्यबाणी करोगा, तो तेसरे माये-बाओ, जिना ते से पैदा ऊई रा, तेसखे बोलणा, “तूँ जिऊँदा नि रणा, कऊँकि तैं परमेशरो रे नाओं ते चूठ बोली राखेया” इजी री खातर जेबे से चूठी भविष्यबाणी करोगा, तेबे तेसरे माया-बाओ से जिना ते से पैदा ऊई रा काई देणा। 4तेस बखते हर एक भविष्यबक्ते भविष्यबाणी करदे ऊए आपणे-आपणे दर्शणो ते शर्मिंदा ऊणे। तिना एबे सच्चे भविष्यबक्ता ऊणे रा टोंग नि करना। तिना लोका खे तोखा देणे खे ऊना रे टाल्ले नि पईनणे, 5पर तेस बोलणा, “आऊँ भविष्यबक्ता नि ए, जिम्मीदार ए, कऊँकि बचपनो तेई आऊँ ओरी लोका रा दास ऊई की सेवा करदा आई रा।” 6तेबे तेसते ये पूछेया जाणा, “तेरे शरीरो दे यो जख़्म केड़े ए?” तेबे तेस बोलणा, “यो सेयो ई जो मेरे दोस्ता रे कअरे माखे लगी रे।”
प्रभुए रे ग्वाल़े खे काणे री आज्ञा
7सेना रे यहोवे री ये बाणी ए, “ओ तलवार! उठ, ओर मेरे ग्वाल़े ते लड़!” सेना रा यहोवा ईंयाँ बोलोआ, “जो माणूं मां साथे खड़ी रा, तेसरे खलाफ मां आपणा आथ बढ़ाणा। ग्वाल़े खे कायी दे, तेबे पेडा ओरे-पोरे ऊई जाणिया; मां आपणा आथ बाल-बच्चेया रे खलाफ बढ़ाणा।” 8परमेशरो री ये बाणी बी ए, “एस देशो रे सारे रणे वाल़ेया रे दो तिहाई लोक कायी देणे ओर बची रे तिहाई लोक तिदे बसे दे रणे। 9से तिहाई लोक मां आगी दे पाई की सेयो एड़े साफ करने जेड़ा चाँदी साफ करेया जाओआ, ओर मां सेयो एड़े परखणे जेड़े सूईना आगी दे परखोए। तिना मांते प्रार्थना करनी ओर मां तिना री सुणेया करनी। मां तिना रे बारे बोलणा, ‘ये मेरी प्रजा ए’, ओर तिना मेरे बारे दे बोलणा, ‘यहोवा म्हारा परमेशर ए’।”
اکنون انتخاب شده:
जकर्याह 13: BGH
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This work is licensed under Creative Commons Attribution-ShareAlike 4.0 License.